અથ એકોનત્રિંશઃ સર્ગઃ
તથાગતાં તાં વ્યથિતામનિન્દિતાં
	વ્યપેતહર્ષાં પરિદીનમાનસામ્ ।
શુભાં નિમિત્તાનિ શુભાનિ ભેજિરે
	નરં શ્રિયા જુષ્ટમિવોપજીવિનઃ॥૧॥
તસ્યાઃ શુભં વામમરાલપક્ષ્મ
	રાજીવૃતં કૃષ્ણવિશાલશુક્લમ્ ।
પ્રાસ્પન્દતૈકં નયનં સુકેશ્યા
	મીનાહતં પદ્મમિવાભિતામ્રમ્ ॥૨॥
ભુજશ્ચ ચાર્વઞ્ચિતપીનવૃત્તઃ
	પરાર્ધ્યકાલાગુરુચન્દનાર્હઃ।
અનુત્તમેનાધ્યુષિતઃ પ્રિયેણ
	ચિરેણ વામઃ સમવેપતાશુ ॥૩॥
ગજેન્દ્રહસ્તપ્રતિમશ્ચ પીન-
	સ્તયોર્દ્વયોઃ સંહતયોસ્તુ જાતઃ।
પ્રસ્પન્દમાનઃ પુનરૂરુરસ્યા
	રામં પુરસ્તાત્સ્થિતમાચચક્ષે ॥૪॥
શુભં પુનર્હેમસમાનવર્ણ-
	મીષદ્રજોધ્વસ્તમિવામલાક્ષ્યાઃ ।
વાસઃ સ્થિતાયાઃશિખરાગ્રદન્ત્યાઃ
	કિઞ્ચિત્પરિસ્રંસત ચારુગાત્ર્યાઃ॥૫॥
એતૈર્નિમિત્તૈરપરૈશ્ચ સુભ્રૂઃ
	સઞ્ચોદિતા પ્રાગપિ સાધુસિદ્ધૈઃ।
વાતાતપક્લાન્તમિવ પ્રણષ્ટં
	વર્ષેણ બીજં પ્રતિસઞ્જહર્ષ ॥૬॥
તસ્યાઃ પુનર્બિમ્બફલાધરોષ્ઠં
	સ્વક્ષિભ્રુકેશાન્તમરાલપક્ષ્મ ।
વક્ત્રં બભાસે સ્મિતશુક્લદંષ્ટ્રં
	રાહોર્મુખાચ્ચન્દ્ર ઇવ પ્રમુક્તઃ॥૭॥
સા વીતશોકા વ્યપનીતતન્દ્રી
	શાન્તજ્વરા હર્ષવિવૃદ્ધસત્ત્વા ।
અશોભતાર્યા વદનેન શુક્લે
	શીતાંશુના રાત્રિરિવોદિતેન ॥૮॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે એકોનત્રિંશઃ સર્ગઃ