અથ દ્વાત્રિંશઃ સર્ગઃ
તતઃ શાખાન્તરે લીનં દૃષ્ટ્વા ચલિતમાનસા ।
વેષ્ટિતાર્જુનવસ્ત્રં તં વિદ્યુત્સઙ્ઘાતપિઙ્ગલમ્ ॥૧॥
સા દદર્શ કપિં તત્ર પ્રશ્રિતં પ્રિયવાદિનમ્ ।
ફુલ્લાશોકોત્કરાભાસં તપ્તચામીકરેક્ષણમ્ ॥૨॥
સાથ દૃષ્ટ્વા હરિશ્રેષ્ઠં વિનીતવદવસ્થિતમ્ ।
મૈથિલી ચિન્તયામાસ વિસ્મયં પરમં ગતા ॥૩॥
અહો ભીમમિદં સત્ત્વં વાનરસ્ય દુરાસદમ્ ।
દુર્નિરીક્ષ્યમિદં મત્વા પુનરેવ મુમોહ સા ॥૪॥
વિલલાપ ભૃશં સીતા કરુણં ભયમોહિતા ।
રામ રામેતિ દુઃખાર્તા લક્ષ્મણેતિ ચ ભામિની ॥૫॥
રુરોદ સહસા સીતા મન્દમન્દસ્વરા સતી ।
સાથ દૃષ્ટ્વા હરિવરં વિનીતવદુપાગતમ્ ।
મૈથિલી ચિન્તયામાસ સ્વપ્નોઽયમિતિ ભામિની ॥૬॥
સા વીક્ષમાણા પૃથુભુગ્નવક્ત્રં
	શાખામૃગેન્દ્રસ્ય યથોક્તકારમ્ ।
દદર્શ પિઙ્ગપ્રવરં મહાર્હં
	વાતાત્મજં બુદ્ધિમતાં વરિષ્ઠમ્ ॥૭॥
સા તં સમીક્ષ્યૈવ ભૃશં વિપન્ના
	ગતાસુકલ્પેવ બભૂવ સીતા ।
ચિરેણ સઞ્જ્ઞાં પ્રતિલભ્ય ચૈવં
	વિચિન્તયામાસ વિશાલનેત્રા ॥૮॥
સ્વપ્નો મયાયં વિકૃતોઽદ્ય દૃષ્ટઃ
	શાખામૃગઃ શાસ્ત્રગણૈર્નિષિદ્ધઃ।
સ્વસ્ત્યસ્તુ રામાય સ લક્ષ્મણાય
	તથા પિતુર્મે જનકસ્ય રાજ્ઞઃ॥૯॥
સ્વપ્નો હિ નાયં નહિ મેઽસ્તિ નિદ્રા
	શોકેન દુઃખેન ચ પીડિતાયાઃ।
સુખં હિ મે નાસ્તિ યતો વિહીના
	તેનેન્દુપૂર્ણપ્રતિમાનનેન ॥૧૦॥
રામેતિ રામેતિ સદૈવ બુદ્ધ્યા
	વિચિન્ત્ય વાચા બ્રુવતી તમેવ ।
તસ્યાનુરૂપં ચ કથાં તદર્થ-
	મેવં પ્રપશ્યામિ તથા શૃણોમિ ॥૧૧॥
અહં હિ તસ્યાદ્ય મનોભવેન
	સમ્પીડિતા તદ્ગતસર્વભાવા ।
વિચિન્તયન્તી સતતં તમેવ
	તથૈવ પશ્યામિ તથા શૃણોમિ ॥૧૨॥
મનોરથઃ સ્યાદિતિ ચિન્તયામિ
	તથાપિ બુદ્ધ્યાપિ વિતર્કયામિ ।
કિં કારણં તસ્ય હિ નાસ્તિ
	રૂપં સુવ્યક્તરૂપશ્ચ વદત્યયં મામ્ ॥૧૩॥
નમોઽસ્તુ વાચસ્પતયે સવજ્રિણે
	સ્વયમ્ભુવે ચૈવ હુતાશનાય ।
અનેન ચોક્તં યદિદં મમાગ્રતો
	વનૌકસા તચ્ચ તથાસ્તુ નાન્યથા ॥૧૪॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે દ્વાત્રિંશઃ સર્ગઃ