અથ ચત્વારિંશઃ સર્ગઃ
શ્રુત્વા તુ વચનં તસ્ય વાયુસૂનોર્મહાત્મનઃ।
ઉવાચાત્મહિતં વાક્યં સીતા સુરસુતોપમા ॥૧॥
ત્વાં દૃષ્ટ્વા પ્રિયવક્તારં સમ્પ્રહૃષ્યામિ વાનર ।
અર્ધસઞ્જાતસસ્યેવ વૃષ્ટિં પ્રાપ્ય વસુન્ધરા ॥૨॥
યથા તં પુરુષવ્યાઘ્રં ગાત્રૈઃ શોકાભિકર્શિતૈઃ।
સંસ્પૃશેયં સકામાહં તથા કુરુ દયાં મયિ ॥૩॥
અભિજ્ઞાનં ચ રામસ્ય દદ્યા હરિગણોત્તમ ।
ક્ષિપ્તામિષિકાં કાકસ્ય કોપાદેકાક્ષિશાતનીમ્ ॥૪॥
મનઃશિલાયાસ્તિલકો ગણ્ડપાર્શ્વે નિવેશિતઃ।
ત્વયા પ્રણષ્ટે તિલકે તં કિલ સ્મર્તુમર્હસિ ॥૫॥
સ વીર્યવાન્ કથં સીતાં હૃતાં સમનુમન્યસે ।
વસન્તીં રક્ષસાં મધ્યે મહેન્દ્રવરુણોપમ ॥૬॥
એષ ચૂડામણિર્દિવ્યો મયા સુપરિરક્ષિતઃ।
એતં દૃષ્ટ્વા પ્રહૃષ્યામિ વ્યસને ત્વામિવાનઘ ॥૭॥
એષ નિર્યાતિતઃ શ્રીમાન્ મયા તે વારિસમ્ભવઃ।
અતઃ પરં ન શક્ષ્યામિ જીવિતું શોકલાલસા ॥૮॥
અસહ્યાનિ ચ દુઃખાનિ વાચશ્ચ હૃદયચ્છિદઃ।
રાક્ષસૈઃ સહ સંવાસં ત્વત્કૃતે મર્ષયામ્યહમ્ ॥૯॥
ધારયિષ્યામિ માસં તુ જીવિતં શત્રુસૂદન ।
માસાદૂર્ધ્વં ન જીવિષ્યે ત્વયા હીના નૃપાત્મજ ॥૧૦॥
ઘોરો રાક્ષસરાજોઽયં દૃષ્ટિશ્ચ ન સુખા મયિ ।
ત્વાં ચ શ્રુત્વા વિષજ્જન્તં ન જીવેયમપિ ક્ષણમ્ ॥૧૧॥
વૈદેહ્યા વચનં શ્રુત્વા કરુણં સાશ્રુભાષિતમ્ ।
અથાબ્રવીન્મહાતેજા હનુમાન્મારુતાત્મજઃ॥૧૨॥
ત્વચ્છોકવિમુખો રામો દેવિ સત્યેન તે શપે ।
રામે શોકાભિભૂતે તુ લક્ષ્મણઃ પરિતપ્યતે ॥૧૩॥
દૃષ્ટા કથઞ્ચિદ્ભવતી ન કાલઃ પરિદેવિતુમ્ ।
ઇમં મુહૂર્તં દુઃખાનામન્તં દ્રક્ષ્યસિ ભામિનિ ॥૧૪॥
તાવુભૌ પુરુષવ્યાઘ્રૌ રાજપુત્રાવનિન્દિતૌ ।
ત્વદ્દર્શનકૃતોત્સાહૌ લઙ્કાં ભસ્મીકરિષ્યતઃ॥૧૫॥
હત્વા તુ સમરે રક્ષો રાવણં સહબાન્ધવૈઃ।
રાઘવૌ ત્વાં વિશાલાક્ષિ સ્વાં પુરીં પ્રતિ નેષ્યતઃ॥૧૬॥
યત્તુ રામો વિજાનીયાદભિજ્ઞાનમનિન્દિતે ।
પ્રીતિસઞ્જનનં ભૂયસ્તસ્ય ત્વં દાતુમર્હસિ ॥૧૭॥
સાબ્રવીદ્દત્તમેવાહો મયાભિજ્ઞાનમુત્તમમ્ ।
એતદેવ હિ રામસ્ય દૃષ્ટ્વા યત્નેન ભૂષણમ્ ॥૧૮॥
શ્રદ્ધેયં હનુમન્વાક્યં તવ વીર ભવિષ્યતિ ।
સ તં મણિવરં ગૃહ્ય શ્રીમાન્પ્લવગસત્તમઃ॥૧૯॥
પ્રણમ્ય શિરસા દેવીં ગમનાયોપચક્રમે ।
તમુત્પાતકૃતોત્સાહમવેક્ષ્ય હરિયૂથપમ્ ॥૨૦॥
વર્ધમાનં મહાવેગમુવાચ જનકાત્મજા ।
અશ્રુપૂર્ણમુખી દીના બાષ્પગદ્ગદયા ગિરા ॥૨૧॥
હનૂમન્સિંહસઙ્કાશૌ ભ્રાતરૌ રામલક્ષ્મણૌ ।
સુગ્રીવં ચ સહામાત્યં સર્વાન્બ્રૂયા અનામયમ્ ॥૨૨॥
યથા ચ સ મહાબાહુર્માં તારયતિ રાઘવઃ।
અસ્માદ્દુઃખામ્બુસંરોધાત્ ત્વં સમાધાતુમર્હસિ ॥૨૩॥
ઇદં ચ તીવ્રં મમ શોકવેગં
	રક્ષોભિરેભિઃ પરિભર્ત્સનં ચ ।
બ્રૂયાસ્તુ રામસ્ય ગતઃ સમીપં
	શિવશ્ચ તેઽધ્વાઽસ્તુ હરિપ્રવીર ॥૨૪॥
સ રાજપુત્ર્યા પ્રતિવેદિતાર્થઃ
	કપિઃ કૃતાર્થઃ પરિહૃષ્ટચેતાઃ।
તદલ્પશેષં પ્રસમીક્ષ્ય કાર્યં
	દિશં હ્યુદીચીં મનસા જગામ ॥૨૫॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ચત્વારિંશઃ સર્ગઃ