અથ ત્રિચત્વારિંશઃ સર્ગઃ
તતઃ સ કિઙ્કરાન્ હત્વા હનૂમાન્ ધ્યાનમાસ્થિતઃ।
વનં ભગ્નં મયા ચૈત્યપ્રાસાદો ન વિનાશિતઃ॥૧॥
તસ્માત્પ્રાસાદમદ્યૈવમિમં વિધ્વંસયામ્યહમ્ ।
ઇતિ સઞ્ચિન્ત્ય હનુમાન્મનસાદર્શયન્ બલમ્ ॥૨॥
ચૈત્યપ્રાસાદમુત્પ્લુત્ય મેરુશૃઙ્ગમિવોન્નતમ્ ।
આરુરોહ હરિશ્રેષ્ઠો હનૂમાન્મારુતાત્મજઃ॥૩॥
આરુહ્ય ગિરિસઙ્કાશં પ્રાસાદં હરિયૂથપઃ।
બભૌ સ સુમહાતેજાઃ પ્રતિસૂર્ય ઇવોદિતઃ॥૪॥
સમ્પ્રધૃષ્ય તુ દુર્ધર્ષશ્ચૈત્યપ્રાસાદમુન્નતમ્ ।
હનૂમાન્પ્રજ્વલઁલ્લક્ષ્મ્યા પારિયાત્રોપમોઽભવત્ ॥૫॥
સ ભૂત્વા સુમહાકાયઃ પ્રભાવાન્ મારુતાત્મજઃ।
ધૃષ્ટમાસ્ફોટયામાસ લઙ્કાં શબ્દેન પૂરયન્ ॥૬॥
તસ્યાસ્ફોટિતશબ્દેન મહતા શ્રોત્રઘાતિના ।
પેતુર્વિહઙ્ગમાસ્તત્ર ચૈત્યપાલાશ્ચ મોહિતાઃ॥૭॥
અસ્ત્રવિજ્જયતાં રામો લક્ષ્મણશ્ચ મહાબલઃ।
રાજા જયતિ સુગ્રીવો રાઘવેણાભિપાલિતઃ॥૮॥
દાસોઽહં કોસલેન્દ્રસ્ય રામસ્યાક્લિષ્ટકર્મણઃ।
હનુમાઞ્શત્રુસૈન્યાનાં નિહન્તા મારુતાત્મજઃ॥૯॥
ન રાવણસહસ્રં મે યુદ્ધે પ્રતિબલં ભવેત્ ।
શિલાભિસ્તુ પ્રહરતઃ પાદપૈશ્ચ સહસ્રશઃ॥૧૦॥
અર્દયિત્વા પુરીં લઙ્કામભિવાદ્ય ચ મૈથિલીમ્ ।
સમૃદ્ધાર્થો ગમિષ્યામિ મિષતાં સર્વરક્ષસામ્ ॥૧૧॥
એવમુક્ત્વા મહાકાયશ્ચૈત્યસ્થો હરિયૂથપઃ।
નનાદ ભીમનિર્હ્રાદો રક્ષસાં જનયન્ભયમ્ ॥૧૨॥
તેન નાદેન મહતા ચૈત્યપાલાઃ શતં યયુઃ।
ગૃહીત્વા વિવિધાનસ્ત્રાન્પ્રાસાન્ખડ્ગાન્પરશ્વધાન્ ॥૧૩॥
વિસૃજન્તો મહાકાયા મારુતિં પર્યવારયન્ ।
તે ગદાભિર્વિચિત્રાભિઃ પરિઘૈઃ કાઞ્ચનાઙ્ગદૈઃ॥૧૪॥
આજગ્મુર્વાનરશ્રેષ્ઠં બાણૈશ્ચાદિત્યસન્નિભૈઃ।
આવર્ત ઇવ ગઙ્ગાયાસ્તોયસ્ય વિપુલો મહાન્ ॥૧૫॥
પરિક્ષિપ્ય હરિશ્રેષ્ઠં સ બભૌ રક્ષસાં ગણઃ।
તતો વાતાત્મજઃ ક્રુદ્ધો ભીમરૂપં સમાસ્થિતઃ॥૧૬॥
પ્રાસાદસ્ય મહાંસ્તસ્ય સ્તમ્ભં હેમપરિષ્કૃતમ્ ।
ઉત્પાટયિત્વા વેગેન હનૂમાન્મારુતાત્મજઃ॥૧૭॥
તતસ્તં ભ્રામયામાસ શતધારં મહાબલઃ।
તત્ર ચાગ્નિસ્સમભવત્પ્રાસાદશ્ચાપ્યદહ્યત ॥૧૮॥
દહ્યમાનં તતો દૃષ્ટ્વા પ્રાસાદં હરિયૂથપઃ।
સ રાક્ષસશતં હત્વા વજ્રેણેન્દ્ર ઇવાસુરાન્ ॥૧૯॥
અન્તરિક્ષસ્થિતઃ શ્રીમાનિદં વચનમબ્રવીત્ ।
માદૃશાનાં સહસ્રાણિ વિસૃષ્ટાનિ મહાત્મનામ્ ॥૨૦॥
બલિનાં વાનરેન્દ્રાણાં સુગ્રીવવશવર્તિનામ્ ।
અટન્તિ વસુધાં કૃત્સ્નાં વયમન્યે ચ વાનરાઃ॥૨૧॥
દશનાગબલાઃ કેચિત્કેચિદ્દશગુણોત્તરાઃ।
કેચિન્નાગસહસ્રસ્ય બભૂવુસ્તુલ્યવિક્રમાઃ॥૨૨॥
સન્તિ ચૌઘબલાઃ કેચિત્ સન્તિ વાયુબલોપમાઃ।
અપ્રમેયબલાઃ કેચિત્ તત્રાસન્હરિયૂથપાઃ॥૨૩॥
ઈદૃગ્વિધૈસ્તુ હરિભિર્વૃતો દન્તનખાયુધૈઃ।
શતૈઃ શતસહસ્રૈશ્ચ કોટીભિશ્ચાયુતૈરપિ ॥૨૪॥
આગમિષ્યતિ સુગ્રીવઃ સર્વેષાં વો નિષૂદનઃ।
નેયમસ્તિ પુરી લઙ્કા ન યૂયં ન ચ રાવણઃ।
યસ્ય ત્વિક્ષ્વાકુવીરેણ બદ્ધં વૈરં મહાત્મના ॥૨૫॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ત્રિચત્વારિંશઃ સર્ગઃ