અથ ચતુશ્ચત્વારિંશઃ સર્ગઃ
સન્દિષ્ટો રાક્ષસેન્દ્રેણ પ્રહસ્તસ્ય સુતો બલી ।
જમ્બુમાલી મહાદંષ્ટ્રો નિર્જગામ ધનુર્ધરઃ॥૧॥
રક્તમાલ્યામ્બરધરઃ સ્રગ્વી રુચિરકુણ્ડલઃ।
મહાન્વિવૃત્તનયનશ્ચણ્ડઃ સમરદુર્જયઃ॥૨॥
ધનુઃ શક્રધનુઃ પ્રખ્યં મહદ્ રુચિરસાયકમ્ ।
વિસ્ફારયાણો વેગેન વજ્રાશનિસમસ્વનમ્ ॥૩॥
તસ્ય વિસ્ફારઘોષેણ ધનુષો મહતા દિશઃ।
પ્રદિશશ્ચ નભશ્ચૈવ સહસા સમપૂર્યત ॥૪॥
રથેન ખરયુક્તેન તમાગતમુદીક્ષ્ય સઃ।
હનૂમાન્વેગસમ્પન્નો જહર્ષ ચ નનાદ ચ ॥૫॥
તં તોરણવિટઙ્કસ્થં હનૂમન્તં મહાકપિમ્ ।
જમ્બુમાલી મહાતેજા વિવ્યાધ નિશિતૈઃ શરૈઃ॥૬॥
અર્ધચન્દ્રેણ વદને શિરસ્યેકેન કર્ણિના ।
બાહ્વોર્વિવ્યાધ નારાચૈર્દશભિસ્તુ કપીશ્વરમ્ ॥૭॥
તસ્ય તચ્છુશુભે તામ્રં શરેણાભિહતં મુખમ્ ।
શરદીવામ્બુજં ફુલ્લં વિદ્ધં ભાસ્કરરશ્મિના ॥૮॥
તત્તસ્ય રક્તં રક્તેન રઞ્જિતં શુશુભે મુખમ્ ।
યથાઽઽકાશે મહાપદ્મં સિક્તં કાઞ્ચનબિન્દુભિઃ॥૯॥
ચુકોપ બાણાભિહતો રાક્ષસસ્ય મહાકપિઃ।
તતઃ પાર્શ્વેઽતિવિપુલાં દદર્શ મહતીં શિલામ્ ॥૧૦॥
તરસા તાં સમુત્પાટ્ય ચિક્ષેપ જવવદ્ બલી ।
તાં શરૈર્દશભિઃ ક્રુદ્ધસ્તાડયામાસ રાક્ષસઃ॥૧૧॥
વિપન્નં કર્મ તદ્દૃષ્ટ્વા હનૂમાંશ્ચણ્ડવિક્રમઃ।
સાલં વિપુલમુત્પાટ્ય ભ્રામયામાસ વીર્યવાન્ ॥૧૨॥
ભ્રામયન્તં કપિં દૃષ્ટ્વા સાલવૃક્ષં મહાબલમ્ ।
ચિક્ષેપ સુબહૂન્બાણાઞ્જમ્બુમાલી મહાબલઃ॥૧૩॥
સાલં ચતુર્ભિશ્ચિચ્છેદ વાનરં પઞ્ચભિર્ભુજે ।
ઉરસ્યેકેન બાણેન દશભિસ્તુ સ્તનાન્તરે ॥૧૪॥
સ શરૈઃ પૂરિતતનુઃ ક્રોધેન મહતા વૃતઃ।
તમેવ પરિઘં ગૃહ્ય ભ્રામયામાસ વેગિતઃ॥૧૫॥
અતિવેગોઽતિવેગેન ભ્રામયિત્વા બલોત્કટઃ।
પરિઘં પાતયામાસ જમ્બુમાલેર્મહોરસિ ॥૧૬॥
તસ્ય ચૈવ શિરો નાસ્તિ ન બાહૂ જાનુની ન ચ ।
ન ધનુર્ન રથો નાશ્વાસ્તત્રાદૃશ્યન્ત નેષવઃ॥૧૭॥
સ હતસ્તરસા તેન જમ્બુમાલી મહારથઃ।
પપાત નિહતો ભૂમૌ ચૂર્ણિતાઙ્ગ ઇવ દ્રુમઃ॥૧૮॥
જમ્બુમાલિં સુનિહતં કિઙ્કરાંશ્ચ મહાબલાન્ ।
ચુક્રોધ રાવણઃ શ્રુત્વા ક્રોધસંરક્તલોચનઃ॥૧૯॥
સ રોષસંવર્તિતતામ્રલોચનઃ
	પ્રહસ્તપુત્રે નિહતે મહાબલે ।
અમાત્યપુત્રાનતિવીર્યવિક્રમાન્
	સમાદિદેશાશુ નિશાચરેશ્વરઃ॥૨૦॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ચતુશ્ચત્વારિંશઃ સર્ગઃ