અથ એકોનપઞ્ચાશઃ સર્ગઃ
તતઃ સ કર્મણા તસ્ય વિસ્મિતો ભીમવિક્રમઃ।
હનુમાન્ ક્રોધતામ્રાક્ષો રક્ષોઽધિપમવૈક્ષત ॥૧॥
ભ્રાજમાનં મહાર્હેણ કાઞ્ચનેન વિરાજતા ।
મુક્તાજાલવૃતેનાથ મુકુટેન મહાદ્યુતિમ્ ॥૨॥
વજ્રસંયોગસંયુક્તૈર્મહાર્હમણિવિગ્રહૈઃ।
હૈમૈરાભરણૈશ્ચિત્રૈર્મનસેવ પ્રકલ્પિતૈઃ॥૩॥
મહાર્હક્ષૌમસંવીતં રક્તચન્દનરૂષિતમ્ ।
સ્વનુલિપ્તં વિચિત્રાભિર્વિવિધાભિશ્ચ ભક્તિભિઃ॥૪॥
વિચિત્રં દર્શનીયૈશ્ચ રક્તાક્ષૈર્ભીમદર્શનૈઃ।
દીપ્તતીક્ષ્ણમહાદંષ્ટ્રં પ્રલમ્બં દશનચ્છદૈઃ॥૫॥
શિરોભિર્દશભિર્વીરો ભ્રાજમાનં મહૌજસં ।
નાનાવ્યાલસમાકીર્ણૈઃ શિખરૈરિવ મન્દરમ્ ॥૬॥
નીલાઞ્જનચયપ્રખ્યં હારેણોરસિ રાજતા ।
પૂર્ણચન્દ્રાભવક્ત્રેણ સબાલાર્કમિવામ્બુદમ્ ॥૭॥
બાહુભિર્બદ્ધકેયૂરૈશ્ચન્દનોત્તમરૂષિતૈઃ।
ભ્રાજમાનાઙ્ગદૈર્ભીમૈઃ પઞ્ચશીર્ષૈરિવોરગૈઃ॥૮॥
મહતિ સ્ફાટિકે ચિત્રે રત્નસંયોગચિત્રિતે ।
ઉત્તમાસ્તરણાસ્તીર્ણે સૂપવિષ્ટં વરાસને ॥૯॥
અલઙ્કૃતાભિરત્યર્થં પ્રમદાભિઃ સમન્તતઃ।
વાલવ્યજનહસ્તાભિરારાત્સમુપસેવિતમ્ ॥૧૦॥
દુર્ધરેણ પ્રહસ્તેન મહાપાર્શ્વેન રક્ષસા ।
મન્ત્રિભિર્મન્ત્રતત્ત્વજ્ઞૈર્નિકુમ્ભેન ચ મન્ત્રિણા ॥૧૧॥
ઉપોપવિષ્ટં રક્ષોભિશ્ચતુર્ભિર્બલદર્પિતમ્ ।
કૃત્સ્નં પરિવૃતં લોકં ચતુર્ભિરિવ સાગરૈઃ॥૧૨॥
મન્ત્રિભિર્મન્ત્રતત્ત્વજ્ઞૈરન્યૈશ્ચ શુભદર્શિભિઃ।
આશ્વાસ્યમાનં સચિવૈઃ સુરૈરિવ સુરેશ્વરમ્ ॥૧૩॥
અપશ્યદ્રાક્ષસપતિં હનૂમાનતિતેજસં ।
વેષ્ઠિતં મેરુશિખરે સતોયમિવ તોયદમ્ ॥૧૪॥
સ તૈઃ સમ્પીડ્યમાનોઽપિ રક્ષોભિર્ભીમવિક્રમૈઃ।
વિસ્મયં પરમં ગત્વા રક્ષોઽધિપમવૈક્ષત ॥૧૫॥
ભ્રાજમાનં તતો દૃષ્ટ્વા હનુમાન્રાક્ષસેશ્વરમ્ ।
મનસા ચિન્તયામાસ તેજસા તસ્ય મોહિતઃ॥૧૬॥
અહો રૂપમહો ધૈર્યમહો સત્ત્વમહો દ્યુતિઃ।
અહો રાક્ષસરાજસ્ય સર્વલક્ષણયુક્તતા ॥૧૭॥
યદ્યધર્મો ન બલવાન્સ્યાદયં રાક્ષસેશ્વરઃ।
સ્યાદયં સુરલોકસ્ય સશક્રસ્યાપિ રક્ષિતા ॥૧૮॥
અસ્ય ક્રૂરૈર્નૃશંસૈશ્ચ કર્મભિર્લોકકુત્સિતૈઃ।
સર્વે બિભ્યતિ ખલ્વસ્માલ્લોકાઃ સામરદાનવાઃ॥૧૯॥
અયં હ્યુત્સહતે ક્રુદ્ધઃ કર્તુમેકાર્ણવં જગત્ ।
ઇતિ ચિન્તાં બહુવિધામકરોન્મતિમાન્કપિઃ।
દૃષ્ટ્વા રાક્ષસરાજસ્ય પ્રભાવમમિતૌજસઃ॥૨૦॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે એકોનપઞ્ચાશઃ સર્ગઃ