અથ પઞ્ચપઞ્ચાશઃ સર્ગઃ
સન્દીપ્યમાનાં વિત્રસ્તાં ત્રસ્તરક્ષોગણાં પુરીમ્ ।
અવેક્ષ્ય હાનુમાઁલ્લઙ્કાં ચિન્તયામાસ વાનરઃ॥૧॥
તસ્યાભૂત્સુમહાંસ્ત્રાસઃ કુત્સા ચાત્મન્યજાયત ।
લઙ્કાં પ્રદહતા કર્મ કિંસ્વિત્કૃતમિદં મયા ॥૨॥
ધન્યાઃ ખલુ મહાત્માનો યે બુદ્ધ્યા કોપમુત્થિતમ્ ।
નિરુન્ધન્તિ મહાત્માનો દીપ્તમગ્નિમિવામ્ભસા ॥૩॥
ક્રુદ્ધઃ પાપં ન કુર્યાત્કઃ ક્રુદ્ધો હન્યાદ્ગુરૂનપિ ।
ક્રુદ્ધઃ પરુષયા વાચા નરસ્સાધૂનધિક્ષિપેત્ ॥૪॥
વાચ્યાવાચ્યં પ્રકુપિતો ન વિજાનાતિ કર્હિચિત્ ।
નાકાર્યમસ્તિ ક્રુદ્ધસ્ય નાવાચ્યં વિદ્યતે ક્વચિત્ ॥૫॥
યઃ સમુત્પતિતં ક્રોધં ક્ષમયૈવ નિરસ્યતિ ।
યથોરગસ્ત્વચં જીર્ણાં સ વૈ પુરુષ ઉચ્યતે ॥૬॥
ધિગસ્તુ માં સુદુર્બુદ્ધિં નિર્લજ્જં પાપકૃત્તમમ્ ।
અચિન્તયત્વા તાં સીતામગ્નિદં સ્વામિઘાતકમ્ ॥૭॥
યદિ દગ્ધા ત્વિયં સર્વા નૂનમાર્યાપિ જાનકી ।
દગ્ધા તેન મયા ભર્તુર્હતં કાર્યમજાનતા ॥૮॥
યદર્થમયમારમ્ભસ્તત્કાર્યમવસાદિતમ્ ।
મયા હિ દહતા લઙ્કાં ન સીતા પરિરક્ષિતા ॥૯॥
ઈષત્કાર્યમિદં કાર્યં કૃતમાસીન્ન સંશયઃ।
તસ્ય ક્રોધાભિભૂતેન મયા મૂલક્ષયઃ કૃતઃ॥૧૦॥
વિનષ્ટા જાનકી વ્યક્તં ન હ્યદગ્ધઃ પ્રદૃશ્યતે ।
લઙ્કાયાઃ કશ્ચિદુદ્દેશઃ સર્વા ભસ્મીકૃતા પુરી ॥૧૧॥
યદિ તદ્વિહતં કાર્યં મયા પ્રજ્ઞાવિપર્યયાત્ ।
ઇહૈવ પ્રાણસંન્યાસો મમાપિ હ્યદ્ય રોચતે ॥૧૨॥
કિમગ્નૌ નિપતામ્યદ્ય આહોસ્વિદ્વડવામુખે ।
શરીરમિહ સત્ત્વાનાં દદ્મિ સાગરવાસિનામ્ ॥૧૩॥
કથં નુ જીવતા શક્યો મયા દ્રષ્ટું હરીશ્વરઃ।
તૌ વા પુરુષશાર્દૂલૌ કાર્યસર્વસ્વઘાતિના ॥૧૪॥
મયા ખલુ તદેવેદં રોષદોષાત્પ્રદર્શિતમ્ ।
પ્રથિતં ત્રિષુ લોકેષુ કપિત્વમનવસ્થિતમ્ ॥૧૫॥
ધિગસ્તુ રાજસં ભાવમનીશમનવસ્થિતમ્ ।
ઈશ્વરેણાપિ યદ્રાગાન્મયા સીતા ન રક્ષિતા ॥૧૬॥
વિનષ્ટાયાં તુ સીતાયાં તાવુભૌ વિનશિષ્યતઃ।
તયોર્વિનાશે સુગ્રીવઃ સબન્ધુર્વિનશિષ્યતિ ॥૧૭॥
એતદેવ વચઃ શ્રુત્વા ભરતો ભ્રાતૃવત્સલઃ।
ધર્માત્મા સહશત્રુઘ્નઃ કથં શક્ષ્યતિ જીવિતુમ્ ॥૧૮॥
ઇક્ષ્વાકુવંશે ધર્મિષ્ઠે ગતે નાશમસંશયમ્ ।
ભવિષ્યન્તિ પ્રજાઃ સર્વાઃ શોકસન્તાપપીડિતાઃ॥૧૯॥
તદહં ભાગ્યરહિતો લુપ્તધર્માર્થસઙ્ગ્રહઃ।
રોષદોષપરીતાત્મા વ્યક્તં લોકવિનાશનઃ॥૨૦॥
ઇતિ ચિન્તયતસ્તસ્ય નિમિત્તાન્યુપપેદિરે ।
પૂર્વમપ્યુપલબ્ધાનિ સાક્ષાત્પુનરચિન્તયત્ ॥૨૧॥
અથ વા ચારુસર્વાઙ્ગી રક્ષિતા સ્વેન તેજસા ।
ન નશિષ્યતિ કલ્યાણી નાગ્નિરગ્નૌ પ્રવર્તતે ॥૨૨॥
નહિ ધર્માત્મનસ્તસ્ય ભાર્યામમિતતેજસઃ।
સ્વચરિત્રાભિગુપ્તાં તાં સ્પ્રષ્ટુમર્હતિ પાવકઃ॥૨૩॥
નૂનં રામપ્રભાવેણ વૈદેહ્યાઃ સુકૃતેન ચ ।
યન્માં દહનકર્માયં નાદહદ્ધવ્યવાહનઃ॥૨૪॥
ત્રયાણાં ભરતાદીનાં ભ્રાતૄણાં દેવતા ચ યા ।
રામસ્ય ચ મનઃકાન્તા સા કથં વિનશિષ્યતિ ॥૨૫॥
યદ્વા દહનકર્માયં સર્વત્ર પ્રભુરવ્યયઃ।
ન મે દહતિ લાઙ્ગૂલં કથમાર્યાં પ્રધક્ષ્યતિ ॥૨૬॥
પુનશ્ચાચિન્તયત્તત્ર હનુમાન્વિસ્મિતસ્તદા ।
હિરણ્યનાભસ્ય ગિરેર્જલમધ્યે પ્રદર્શનમ્ ॥૨૭॥
તપસા સત્યવાક્યેન અનન્યત્વાચ્ચ ભર્તરિ ।
અસૌ વિનિર્દહેદગ્નિં ન તામગ્નિઃ પ્રધક્ષ્યતિ ॥૨૮॥
સ તથા ચિન્તયંસ્તત્ર દેવ્યા ધર્મપરિગ્રહમ્ ।
શુશ્રાવ હનુમાંસ્તત્ર ચારણાનાં મહાત્મનામ્ ॥૨૯॥
અહો ખલુ કૃતં કર્મ દુર્વિગાહં હનૂમતા ।
અગ્નિં વિસૃજતા તીક્ષ્ણં ભીમં રાક્ષસસદ્મનિ ॥૩૦॥
પ્રપલાયિતરક્ષઃ સ્ત્રીબાલવૃદ્ધસમાકુલા ।
જનકોલાહલાધ્માતા ક્રન્દન્તીવાદ્રિકન્દરૈઃ ॥૩૧॥
દગ્ધેયં નગરી લઙ્કા સાટ્ટપ્રાકારતોરણા ।
જાનકી ન ચ દગ્ધેતિ વિસ્મયોઽદ્ભુત એવ નઃ॥૩૨॥
ઇતિ શુશ્રાવ હનુમાન્ વાચં તામમૃતોપમામ્ ।
બભૂવ ચાસ્ય મનસો હર્ષસ્તત્કાલસમ્ભવઃ॥૩૩॥
સ નિમિત્તૈશ્ચ દૃષ્ટાર્થૈઃ કારણૈશ્ચ મહાગુણૈઃ।
ઋષિવાક્યૈશ્ચ હનુમાનભવત્પ્રીતમાનસઃ॥૩૪॥
તતઃ કપિઃ પ્રાપ્તમનોરથાર્થ-
	સ્તામક્ષતાં રાજસુતાં વિદિત્વા ।
પ્રત્યક્ષતસ્તાં પુનરેવ દૃષ્ટ્વા
	પ્રતિપ્રયાણાય મતિં ચકાર ॥૩૫॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે પઞ્ચપઞ્ચાશઃ સર્ગઃ