અથ સપ્તપઞ્ચાશઃ સર્ગઃ
આપ્લુત્ય ચ મહાવેગઃ પક્ષવાનિવ પર્વતઃ।
ભુજઙ્ગયક્ષગન્ધર્વપ્રબુદ્ધકમલોત્પલમ્ ॥૧॥
સ ચન્દ્રકુમુદં રમ્યં સાર્કકારણ્ડવં શુભમ્ ।
તિષ્યશ્રવણકાદમ્બમભ્રશૈવલશાદ્વલમ્ ॥૨॥
પુનર્વસુમહામીનં લોહિતાઙ્ગમહાગ્રહમ્ ।
ઐરાવતમહાદ્વીપં સ્વાતીહંસવિલાસિતમ્ ॥૩॥
વાતસઙ્ઘાતજાલોર્મિચન્દ્રાંશુશિશિરામ્બુમત્ ।
હનૂમાનપરિશ્રાન્તઃ પુપ્લુવે ગગનાર્ણવમ્ ॥૪॥
ગ્રસમાન ઇવાકાશં તારાધિપમિવોલ્લિખન્ ।
હરન્નિવ સનક્ષત્રં ગગનં સાર્કમણ્ડલમ્ ॥૫॥
અપારમપરિશ્રાન્તશ્ચામ્બુધિં સમગાહત ।
હનૂમાન્મેઘજાલાનિ વિકર્ષન્નિવ ગચ્છતિ ॥૬॥
પાણ્ડુરારુણવર્ણાનિ નીલમાઞ્જિષ્ઠકાનિ ચ ।
હરિતારુણવર્ણાનિ મહાભ્રાણિ ચકાશિરે ॥૭॥
પ્રવિશન્નભ્રજાલાનિ નિષ્ક્રમંશ્ચ પુનઃ પુનઃ।
પ્રચન્નશ્ચ પ્રકાશશ્ચ ચન્દ્રમા ઇવ દૃશ્યતે ॥૮॥
વિવિધાભ્રઘનાપન્નગોચરો ધવલામ્બરઃ।
દૃશ્યાદૃશ્યતનુર્વીરસ્તથા ચન્દ્રાયતેઽમ્બરે ॥૯॥
તાર્ક્ષ્યાયમાણો ગગને સ બભૌ વાયુનન્દનઃ।
દારયન્મેઘબૃન્દાનિ નિષ્પતંશ્ચ પુનઃ પુનઃ॥૧૦॥
નદન્નાદેન મહતા મેઘસ્વનમહાસ્વનઃ।
પ્રવરાન્રાક્ષસાન્ હત્વા નામ વિશ્રાવ્ય ચાત્મનઃ॥૧૧॥
આકુલાં નગરીં કૃત્વા વ્યથયિત્વા ચ રાવણમ્ ।
અર્દયિત્વા મહાવીરાન્ વૈદેહીમભિવાદ્ય ચ ॥૧૨॥
આજગામ મહાતેજાઃ પુનર્મધ્યેન સાગરમ્ ।
પર્વતેન્દ્રં સુનાભં ચ સમુપસ્પૃશ્ય વીર્યવાન્ ॥૧૩॥
જ્યામુક્ત ઇવ નારાચો મહાવેગોઽભ્યુપાગમત્ ।
સ કિઞ્ચિદારાત્ સમ્પ્રાપ્તઃ સમાલોક્ય મહાગિરિમ્ ॥૧૪॥
મહેન્દ્રં મેઘસઙ્કાશં નનાદ સ મહાકપિઃ।
સ પૂરયામાસ કપિર્દિશો દશ સમન્તતઃ॥૧૫॥
નદન્નાદેન મહતા મેઘસ્વનમહાસ્વનઃ।
સ તં દેશમનુપ્રાપ્તઃ સુહૃદ્ધર્શનલાલસઃ॥૧૬॥
નનાદ સુમહાનાદં લાઙ્ગૂલં ચાપ્યકમ્પયત્ ।
તસ્ય નાનદ્યમાનસ્ય સુપર્ણાચરિતે પથિ ॥૧૭॥
ફલતીવાસ્ય ઘોષેણ ગગનં સાર્કમણ્ડલમ્ ।
યે તુ તત્રોત્તરે કૂલે સમુદ્રસ્ય મહાબલાઃ॥૧૮॥
પૂર્વં સંવિષ્ઠિતાશ્શૂરા વાયુપુત્રદિદૃક્ષવઃ।
મહતો વાયુનુન્નસ્ય તોયદસ્યેવ નિઃસ્વનમ્ ।
શુશ્રુવુસ્તે તદા ઘોષમૂરુવેગં હનૂમતઃ॥૧૯॥
તે દીનમનસઃ સર્વે શુશ્રુવુઃ કાનનૌકસઃ।
વાનરેન્દ્રસ્ય નિર્ઘોષં પર્જન્યનિનદોપમમ્ ॥૨૦॥
નિશમ્ય નદતો નાદં વાનરાસ્તે સમન્તતઃ।
બભૂવુરુત્સુકાઃ સર્વે સુહૃદ્દર્શનકાઙ્ક્ષિણઃ॥૨૧॥
જામ્બવાન્ સ હરિશ્રેષ્ઠઃ પ્રીતિસંહૃષ્ટમાનસઃ।
ઉપામન્ત્ર્ય હરીન્સર્વાનિદં વચનમબ્રવીત્ ॥૨૨॥
સર્વથા કૃતકાર્યોઽસૌ હનૂમાન્નાત્ર સંશયઃ।
ન હ્યસ્યાકૃતકાર્યસ્ય નાદ એવંવિધો ભવેત્ ॥૨૩॥
તસ્ય બાહૂરુવેગં ચ નિનાદં ચ મહાત્મનઃ।
નિશમ્ય હરયો હૃષ્ટાઃ સમુત્પેતુર્યતસ્તતઃ॥૨૪॥
તે નગાગ્રાન્નગાગ્રાણિ શિખરાચ્છિખરાણિ ચ ।
પ્રહૃષ્ટાઃ સમપદ્યન્ત હનૂમન્તં દિદૃક્ષવઃ॥૨૫॥
તે પ્રીતાઃ પાદપાગ્રેષુ ગૃહ્ય શાખામવસ્થિતાઃ।
વાસાંસિ ચ પ્રકાશાનિ સમાવિધ્યન્ત વાનરાઃ॥૨૬॥
ગિરિગહ્વરસંલીનો યથા ગર્જતિ મારુતઃ।
એવં જગર્જ બલવાન્ હનુમાન્મારુતાત્મજઃ॥૨૭॥
તમભ્રઘનસઙ્કાશમાપતન્તં મહાકપિમ્ ।
દૃષ્ટ્વા તે વાનરાઃ સર્વે તસ્થુઃ પ્રાઞ્જલયસ્તદા ॥૨૮॥
તતસ્તુ વેગવાન્ વીરો ગિરેર્ગિરિનિભઃ કપિઃ।
નિપપાત ગિરેસ્તસ્ય શિખરે પાદપાકુલે ॥૨૯॥
હર્ષેણાપૂર્યમાણોઽસૌ રમ્યે પર્વતનિર્ઝરે ।
છિન્નપક્ષ ઇવાઽકાશાત્પપાત ધરણીધરઃ॥૩૦॥
તતસ્તે પ્રીતમનસઃ સર્વે વાનરપુઙ્ગવાઃ।
હનૂમન્તં મહાત્માનં પરિવાર્યોપતસ્થિરે ॥૩૧॥
પરિવાર્ય ચ તે સર્વે પરાં પ્રીતિમુપાગતાઃ।
પ્રહૃષ્ટવદનાઃ સર્વે તમાગતમુપાગમન્ ॥૩૨॥
ઉપાયનાનિ ચાદાય મૂલાનિ ચ ફલાનિ ચ ।
પ્રત્યર્ચયન્હરિશ્રેષ્ઠં હરયો મારુતાત્મજમ્ ॥૩૩॥
વિનેદુર્મુદિતાઃ કેચિત્ કેચિત્ કિલકિલાં તથા ।
હૃષ્ટાઃ પાદપશાખાશ્ચ આનિન્યુર્વાનરર્ષભાઃ॥૩૪॥
હનૂમાંસ્તુ ગુરૂન્વૃદ્ધાઞ્જામ્બવત્પ્રમુખાંસ્તદા ।
કુમારમઙ્ગદં ચૈવ સોઽવન્દત મહાકપિઃ॥૩૫॥
સ તાભ્યાં પૂજિતઃ પૂજ્યઃ કપિભિશ્ચ પ્રસાદિતઃ।
દૃષ્ટા દેવીતિ વિક્રાન્તઃ સઙ્ક્ષેપેણ ન્યવેદયત્ ॥૩૬॥
નિષસાદ ચ હસ્તેન ગૃહીત્વા વાલિનઃ સુતમ્ ।
રમણીયે વનોદ્દેશે મહેન્દ્રસ્ય ગિરેસ્તદા ॥૩૭॥
હનૂમાનબ્રવીત્ પૃષ્ટસ્તદા તાન્વાનરર્ષભાન્ ।
અશોકવનિકાસંસ્થા દૃષ્ટા સા જનકાત્મજા ॥૩૮॥
રક્ષ્યમાણા સુઘોરાભી રાક્ષસીભિરનિન્દિતા ।
એકવેણીધરા બાલા રામદર્શનલાલસા ॥૩૯॥
ઉપવાસપરિશ્રાન્તા મલિના જટિલા કૃશા ।
તતો દૃષ્ટેતિ વચનં મહાર્થમમૃતોપમમ્ ॥૪૦॥
નિશમ્ય મારુતેઃ સર્વે મુદિતા વાનરા ભવન્ ।
ક્ષ્વેડન્ત્યન્યે નદન્ત્યન્યે ગર્જન્ત્યન્યે મહાબલાઃ॥૪૧॥
ચક્રુઃ કિલકિલામન્યે પ્રતિગર્જન્તિ ચાપરે ।
કેચિદુચ્છ્રિતલાઙ્ગૂલાઃ પ્રહૃષ્ટાઃ કપિકુઞ્જરાઃ॥૪૨॥
આયતાઞ્ચિતદીર્ઘાણિ લાઙ્ગૂલાનિ પ્રવિવ્યધુઃ।
અપરે તુ હનૂમન્તં શ્રીમન્તં વાનરોત્તમમ્ ॥૪૩॥
આપ્લુત્ય ગિરિશૃઙ્ગેષુ સંસ્પૃશન્તિ સ્મ હર્ષિતાઃ।
ઉક્તવાક્યં હનૂમન્તમઙ્ગદસ્તુ તદાબ્રવીત્ ॥૪૪॥
સર્વેષાં હરિવીરાણાં મધ્યે વાચમનુત્તમામ્ ।
સત્ત્વે વીર્યે ન તે કશ્ચિત્સમો વાનર વિદ્યતે ॥૪૫॥
યદવપ્લુત્ય વિસ્તીર્ણં સાગરં પુનરાગતઃ।
જીવિતસ્ય પ્રદાતા નસ્ત્વમેકો વાનરોત્તમ ॥૪૬॥
ત્વત્પ્રસાદાત્ સમેષ્યામઃ સિદ્ધાર્થા રાઘવેણ હ ।
અહો સ્વામિનિ તે ભક્તિરહો વીર્યમહો ધૃતિઃ॥૪૭॥
દિષ્ટ્યા દૃષ્ટા ત્વયા દેવી રામપત્ની યશસ્વિની ।
દિષ્ટ્યા ત્યક્ષ્યતિ કાકુત્સ્થઃ શોકં સીતા વિયોગજમ્ ॥૪૮॥
તતોઽઙ્ગદં હનૂમન્તં જામ્બવન્તં ચ વાનરાઃ।
પરિવાર્ય પ્રમુદિતા ભેજિરે વિપુલાઃ શિલાઃ॥૪૯॥
ઉપવિષ્ટા ગિરેસ્તસ્ય શિલાસુ વિપુલાસુ તે ।
શ્રોતુકામાઃ સમુદ્રસ્ય લઙ્ઘનં વાનરોત્તમાઃ॥૫૦॥
દર્શનં ચાપિ લઙ્કાયાઃ સીતાયા રાવણસ્ય ચ ।
તસ્થુઃ પ્રાઞ્જલયઃ સર્વે હનૂમદ્વદનોન્મુખાઃ॥૫૧॥
તસ્થૌ તત્રાઙ્ગદઃ શ્રીમાન્વાનરૈર્બહુભિર્વૃતઃ।
ઉપાસ્યમાનો વિબુધૈર્દિવિ દેવપતિર્યથા ॥૫૨॥
હનૂમતા કીર્તિમતા યશસ્વિના
	તથાઙ્ગદેનાઙ્ગદનદ્ધબાહુના ।
મુદા તદાધ્યાસિતમુન્નતં મહન્
	મહીધરાગ્રં જ્વલિતં શ્રિયાભવત્ ॥૫૩॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે સપ્તપઞ્ચાશઃ સર્ગઃ