અથ ષષ્ટિતમઃ સર્ગઃ
તસ્ય તદ્વચનં શ્રુત્વા વાલિસૂનુરભાષત ।
અશ્વિપુત્રૌ મહાવેગૌ બલવન્તૌ પ્લવઙ્ગમૌ ॥૧॥
પિતામહવરોત્સેકાત્ પરમં દર્પમાસ્થિતૌ ।
અશ્વિનોર્માનનાર્થં હિ સર્વલોકપિતામહઃ॥૨॥
સર્વાવધ્યત્વમતુલમનયોર્દત્તવાન્પુરા ।
વરોત્સેકેન મત્તૌ ચ પ્રમથ્ય મહતીં ચમૂમ્ ॥૩॥
સુરાણામમૃતં વીરૌ પીતવન્તૌ મહાબલૌ ।
એતાવેવ હિ સઙ્ક્રુદ્ધૌ સવાજિરથકુઞ્જરામ્ ॥૪॥
લઙ્કાં નાશયિતું શક્તૌ સર્વે તિષ્ઠન્તુ વાનરાઃ।
અહમેકોઽપિ પર્યાપ્તઃ સરાક્ષસગણાં પુરીમ્ ॥૫॥
તાં લઙ્કાં તરસા હન્તું રાવણં ચ મહાબલમ્ ।
કિં પુનઃ સહિતો વીરૈર્બલવદ્ભિઃ કૃતાત્મભિઃ॥૬॥
કૃતાસ્ત્રૈઃ પ્લવગૈઃ શક્તૈર્ભવદ્ભિર્વિજયૈષિભિઃ।
વાયુસૂનોર્બલેનૈવ દગ્ધા લઙ્કેતિ નઃ શ્રુતમ્ ॥૭॥
દૃષ્ટ્વા દેવી ન ચાનીતા ઇતિ તત્ર નિવેદિતુમ્ ।
ન યુક્તમિવ પશ્યામિ ભવદ્ભિઃ ખ્યાતપૌરુષૈઃ॥૮॥
નહિ વઃ પ્લવને કશ્ચિન્નાપિ કશ્ચિત્ પરાક્રમે ।
તુલ્યઃ સામરદૈત્યેષુ લોકેષુ હરિસત્તમાઃ॥૯॥
જિત્વા લઙ્કાં સરક્ષૌઘાં હત્વા તં રાવણં રણે ।
સીતામાદાય ગચ્છામઃ સિદ્ધાર્થા હૃષ્ટમાનસાઃ॥૧૦॥
તેષ્વેવં હતવીરેષુ રાક્ષસેષુ હનૂમતા ।
કિમન્યદત્ર કર્તવ્યં ગૃહીત્વા યામ જાનકીમ્ ॥૧૧॥
રામલક્ષ્મણયોર્મધ્યે ન્યસ્યામ જનકાત્મજામ્ ।
કિં વ્યલીકૈસ્તુ તાન્ સર્વાન્ વાનરાન્ વાનરર્ષભાન્ ॥૧૨॥
વયમેવ હિ ગત્વા તાન્ હત્વા રાક્ષસપુઙ્ગવાન્ ।
રાઘવં દ્રષ્ટુમર્હામઃ સુગ્રીવં સહલક્ષ્મણમ્ ॥૧૩॥
તમેવં કૃતસઙ્કલ્પં જામ્બવાન્હરિસત્તમઃ।
ઉવાચ પરમપ્રીતો વાક્યમર્થવદર્થવિત્ ॥૧૪॥
નૈષા બુદ્ધિર્મહાબુદ્ધે યદ્ બ્રવીષિ મહાકપે ।
વિચેતું વયમાજ્ઞપ્તા દક્ષિણાં દિશમુત્તમામ્ ॥૧૫॥
નાનેતું કપિરાજેન નૈવ રામેણ ધીમતા ।
કથઞ્ચિન્નિર્જિતાં સીતામસ્માભિર્નાભિરોચયેત્ ॥૧૬॥
રાઘવો નૃપશાર્દૂલઃ કુલં વ્યપદિશન્ સ્વકમ્ ।
પ્રતિજ્ઞાય સ્વયં રાજા સીતાવિજયમગ્રતઃ॥૧૭॥
સર્વેષાં કપિમુખ્યાનાં કથં મિથ્યા કરિષ્યતિ ।
વિફલં કર્મ ચ કૃતં ભવેત્ તુષ્ટિર્ન તસ્ય ચ ॥૧૮॥
વૃથા ચ દર્શિતં વીર્યં ભવેદ્ વાનરપુઙ્ગવાઃ।
તસ્માદ્ ગચ્છામ વૈ સર્વે યત્ર રામઃ સલક્ષ્મણઃ।
સુગ્રીવશ્ચ મહાતેજાઃ કાર્યસ્યાસ્ય નિવેદને ॥૧૯॥
ન તાવદેષા મતિરક્ષમા નો
	યથા ભવાન્પશ્યતિ રાજપુત્ર ।
યથા તુ રામસ્ય મતિર્નિવિષ્ટા
	તથા ભવાન્પશ્યતુ કાર્યસિદ્ધિમ્ ॥૨૦॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ષષ્ટિતમઃ સર્ગઃ