અથ એકષષ્ટિતમઃ સર્ગઃ
તતો જામ્બવતો વાક્યમગૃહ્ણન્ત વનૌકસઃ।
અઙ્ગદપ્રમુખા વીરા હનૂમાંશ્ચ મહાકપિઃ॥૧॥
પ્રીતિમન્તસ્તતઃ સર્વે વાયુપુત્રપુરઃસરાઃ।
મહેન્દ્રાગ્રાત્ સમુત્પત્ય પુપ્લુવુઃ પ્લવગર્ષભાઃ॥૨॥
મેરુમન્દરસઙ્કાશા મત્તા ઇવ મહાગજાઃ।
છાદયન્ત ઇવાકાશં મહાકાયા મહાબલાઃ॥૩॥
સભાજ્યમાનં ભૂતૈસ્તમાત્મવન્તં મહાબલમ્ ।
હનૂમન્તં મહાવેગં વહન્ત ઇવ દૃષ્ટિભિઃ॥૪॥
રાઘવે ચાર્થનિર્વૃત્તિં કર્તું ચ પરમં યશઃ।
સમાધાય સમૃદ્ધાર્થાઃ કર્મસિદ્ધિભિરુન્નતાઃ॥૫॥
પ્રિયાખ્યાનોન્મુખાઃ સર્વે સર્વે યુદ્ધાભિનન્દિનઃ।
સર્વે રામપ્રતીકારે નિશ્ચિતાર્થા મનસ્વિનઃ॥૬॥
પ્લવમાનાઃ ખમાપ્લુત્ય તતસ્તે કાનનૌકસઃ।
નન્દનોપમમાસેદુર્વનં દ્રુમશતાયુતમ્ ॥૭॥
યત્તન્મધુવનં નામ સુગ્રીવસ્યાભિરક્ષિતમ્ ।
અધૃષ્યં સર્વભૂતાનાં સર્વભૂતમનોહરમ્ ॥૮॥
યદ્રક્ષતિ મહાવીરઃ સદા દધિમુખઃ કપિઃ।
માતુલઃ કપિમુખ્યસ્ય સુગ્રીવસ્ય મહાત્મનઃ॥૯॥
તે તદ્વનમુપાગમ્ય બભૂવુઃ પરમોત્કટાઃ।
વાનરા વાનરેન્દ્રસ્ય મનઃકાન્તં મહાવનમ્ ॥૧૦॥
તતસ્તે વાનરા હૃષ્ટા દૃષ્ટ્વા મધુવનં મહત્ ।
કુમારમભ્યયાચન્ત મધૂનિ મધુપિઙ્ગલાઃ॥૧૧॥
તતઃ કુમારસ્તાન્વૃદ્ધાઞ્જામ્બવત્પ્રમુખાન્કપીન્ ।
અનુમાન્ય દદૌ તેષાં નિસર્ગં મધુભક્ષણે ॥૧૨॥
તે નિસૃષ્ટાઃ કુમારેણ ધીમતા વાલિસૂનુના ।
હરયઃ સમપદ્યન્ત દ્રુમાન્ મધુકરાકુલાન્ ॥૧૩॥
ભક્ષયન્તઃ સુગન્ધીનિ મૂલાનિ ચ ફલાનિ ચ ।
જગ્મુઃ પ્રહર્ષં તે સર્વે બભૂવુશ્ચ મદોત્કટાઃ॥૧૪॥
તતશ્ચાનુમતાઃ સર્વે સુસંહૃષ્ટા વનૌકસઃ।
મુદિતાશ્ચ તતસ્તે ચ પ્રનૃત્યન્તિ તતસ્તતઃ॥૧૫॥
ગાયન્તિ કેચિત્ પ્રહસન્તિ કેચિ-
	ન્નૃત્યન્તિ કેચિત્ પ્રણમન્તિ કેચિત્ ।
પતન્તિ કેચિત્ પ્રચરન્તિ કેચિત્
	પ્લવન્તિ કેચિત્ પ્રલપન્તિ કેચિત્ ॥૧૬॥
પરસ્પરં કેચિદુપાશ્રયન્તિ
	પરસ્પરં કેચિદતિબ્રુવન્તિ ।
દ્રુમાદ્દ્રુમં કેચિદભિદ્રવન્તિ
	ક્ષિતૌ નગાગ્રાન્નિપતન્તિ કેચિત્ ॥૧૭॥
મહીતલાત્કેચિદુદીર્ણવેગા
	મહાદ્રુમાગ્રાણ્યભિસમ્પતન્તિ ।
ગાયન્તમન્યઃ પ્રહસન્નુપૈતિ
	હસન્તમન્યઃ પ્રરુદન્નુપૈતિ ॥૧૮॥
તુદન્તમન્યઃ પ્રણદન્નુપૈતિ
	સમાકુલં તત્ કપિસૈન્યમાસીત્ ।
ન ચાત્ર કશ્ચિન્ન બભૂવ મત્તો
	ન ચાત્ર કશ્ચિન્ન બભૂવ દૃપ્તઃ॥૧૯॥
તતો વનં તત્પરિભક્ષ્યમાણં
	દ્રુમાંશ્ચ વિધ્વંસિતપત્રપુષ્પાન્ ।
સમીક્ષ્ય કોપાદ્દધિવક્ત્રનામા
	નિવારયામાસ કપિઃ કપીંસ્તાન્ ॥૨૦॥
સ તૈઃ પ્રવૃદ્ધૈઃ પરિભર્ત્સ્યમાનો
	વનસ્ય ગોપ્તા હરિવૃદ્ધવીરઃ।
ચકાર ભૂયો મતિમુગ્રતેજા
	વનસ્ય રક્ષાં પ્રતિ વાનરેભ્યઃ॥૨૧॥
ઉવાચ કાંશ્ચિત્ પરુષાણ્યભીત-
	મસક્તમન્યાંશ્ચ તલૈર્જઘાન ।
સમેત્ય કૈશ્ચિત્ કલહં ચકાર
	તથૈવ સામ્નોપજગામ કાંશ્ચિત્ ॥૨૨॥
સ તૈર્મદાદપ્રતિવાર્યવેગૈ-
	ર્બલાચ્ચ તેન પ્રતિવાર્યમાણૈઃ।
પ્રધર્ષણે ત્યક્તભયૈઃ સમેત્ય
	પ્રકૃષ્યતે ચાપ્યનવેક્ષ્ય દોષમ્ ॥૨૩॥
નખૈસ્તુદન્તો દશનૈર્દશન્ત-
	સ્તલૈશ્ચ પાદૈશ્ચ સમાપયન્તઃ।
મદાત્કપિં તે કપયઃ સમન્તા-
	ન્મહાવનં નિર્વિષયં ચ ચક્રુઃ॥૨૪॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે એકષષ્ટિતમઃ સર્ગઃ