અથ પઞ્ચષષ્ટિતમઃ સર્ગઃ
તતઃ પ્રસ્રવણં શૈલં તે ગત્વા ચિત્રકાનનમ્ ।
પ્રણમ્ય શિરસા રામં લક્ષ્મણં ચ મહાબલમ્ ॥૧॥
યુવરાજં પુરસ્કૃત્ય સુગ્રીવમભિવાદ્ય ચ ।
પ્રવૃત્તિમથ સીતાયાઃ પ્રવક્તુમુપચક્રમુઃ॥૨॥
રાવણાન્તઃપુરે રોધં રાક્ષસીભિશ્ચ તર્જનમ્ ।
રામે સમનુરાગં ચ યથા ચ નિયમઃ કૃતઃ॥૩॥
એતદાખ્યાય તે સર્વં હરયો રામસંનિધૌ ।
વૈદેહીમક્ષતાં શ્રુત્વા રામસ્તૂત્તરમબ્રવીત્ ॥૪॥
ક્વ સીતા વર્તતે દેવી કથં ચ મયિ વર્તતે ।
એતન્મે સર્વમાખ્યાત વૈદેહીં પ્રતિ વાનરાઃ॥૫॥
રામસ્ય ગદિતં શ્રુત્વા હરયો રામસંનિધૌ ।
ચોદયન્તિ હનૂમન્તં સીતાવૃત્તાન્તકોવિદમ્ ॥૬॥
શ્રુત્વા તુ વચનં તેષાં હનૂમાન્મારુતાત્મજઃ।
પ્રણમ્ય શિરસા દેવ્યૈ સીતાયૈ તાં દિશં પ્રતિ ॥૭॥
ઉવાચ વાક્યં વાક્યજ્ઞઃ સીતાયા દર્શનં યથા ।
તં મણિં કાઞ્ચનં દિવ્યં દીપ્યમાનં સ્વતેજસા ॥૮॥
દત્વા રામાય હનુમાંસ્તતઃ પ્રાઞ્જલિરબ્રવીત્ ।
સમુદ્રં લઙ્ઘયિત્વાહં શતયોજનમાયતમ્ ॥૯॥
અગચ્છં જાનકીં સીતાં માર્ગમાણો દિદૃક્ષયા ।
તત્ર લઙ્કેતિ નગરી રાવણસ્ય દુરાત્મનઃ॥૧૦॥
દક્ષિણસ્ય સમુદ્રસ્ય તીરે વસતિ દક્ષિણે ।
તત્ર સીતા મયા દૃષ્ટા રાવણાન્તઃપુરે સતી ॥૧૧॥
ત્વયિ સંન્યસ્ય જીવન્તી રામા રામ મનોરથમ્ ।
દૃષ્ટ્વા મે રાક્ષસીમધ્યે તર્જ્યમાના મુહુર્મુહુઃ॥૧૨॥
રાક્ષસીભિર્વિરૂપાભી રક્ષિતા પ્રમદાવને ।
દુઃખમાપદ્યતે દેવી ત્વયા વીર સુખોચિતા ॥૧૩॥
રાવણાન્તઃપુરે રુદ્ધા રાક્ષસીભિઃ સુરક્ષિતા ।
એકવેણીધરા દીના ત્વયિ ચિન્તાપરાયણા ॥૧૪॥
અધઃશય્યા વિવર્ણાઙ્ગી પદ્મિનીવ હિમાગમે ।
રાવણાદ્વિનિવૃત્તાર્થા મર્તવ્યકૃતનિશ્ચયા ॥૧૫॥
દેવી કથઞ્ચિત્કાકુત્સ્થ ત્વન્મના માર્ગિતા મયા ।
ઇક્ષ્વાકુવંશવિખ્યાતિં શનૈઃ કીર્તયતાનઘ ॥૧૬॥
સા મયા નરશાર્દૂલ શનૈર્વિશ્વાસિતા તદા ।
તતઃ સમ્ભાષિતા દેવી સર્વમર્થં ચ દર્શિતા ॥૧૭॥
રામસુગ્રીવસખ્યં ચ શ્રુત્વા હર્ષમુપાગતા ।
નિયતઃ સમુદાચારો ભક્તિશ્ચાસ્યાઃ સદા ત્વયિ ॥૧૮॥
એવં મયા મહાભાગ દૃષ્ટા જનકનન્દિની ।
ઉગ્રેણ તપસા યુક્તા ત્વદ્ભક્ત્યા પુરુષર્ષભ ॥૧૯॥
અભિજ્ઞાનં ચ મે દત્તં યથાવૃત્તં તવાન્તિકે ।
ચિત્રકૂટે મહાપ્રાજ્ઞ વાયસં પ્રતિ રાઘવ ॥૨૦॥
વિજ્ઞાપ્યઃ પુનરપ્યેષ રામો વાયુસુત ત્વયા ।
અખિલેન યથા દ્દૃષ્ટમિતિ મામાહ જાનકી ॥૨૧॥
અયં ચાસ્મૈ પ્રદાતવ્યો યત્નાત્સુપરિરક્ષિતઃ।
બ્રુવતા વચનાન્યેવં સુગ્રીવસ્યોપશૃણ્વતઃ॥૨૨॥
એષ ચૂડામણિઃ શ્રીમાન્મયા તે યત્નરક્ષિતઃ।
મનઃશિલાયાસ્તિલકં તત્ સ્મરસ્વેતિ ચાબ્રવીત્ ॥૨૩॥
એષ નિર્યાતિતઃ શ્રીમાન્મયા તે વારિસમ્ભવઃ।
એનં દૃષ્ટ્વા પ્રમોદિષ્યે વ્યસને ત્વામિવાનઘ ॥૨૪॥
જીવિતં ધારયિષ્યામિ માસં દશરથાત્મજ ।
ઊર્ધ્વં માસાન્ન જીવેયં રક્ષસાં વશમાગતા ॥૨૫॥
ઇતિ મામબ્રવીત્સીતા કૃશાઙ્ગી ધર્મચારિણી ।
રાવણાન્તઃપુરે રુદ્ધા મૃગીવોત્ફુલ્લલોચના ॥૨૬॥
એતદેવ મયાઽઽખ્યાતં સર્વં રાઘવ યદ્યથા ।
સર્વથા સાગરજલે સન્તારઃ પ્રવિધીયતામ્ ॥૨૭॥
તૌ જાતાશ્વાસૌ રાજપુત્રૌ વિદિત્વા
	તચ્ચાભિજ્ઞાનં રાઘવાય પ્રદાય ।
દેવ્યા ચાખ્યાતં સર્વમેવાનુપૂર્વ્યાદ્
	વાચા સમ્પૂર્ણં વાયુપુત્રઃ શશંસ ॥૨૮॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે પઞ્ચષષ્ટિતમઃ સર્ગઃ