અથ ષટ્ષષ્ટિતમઃ સર્ગઃ
એવમુક્તો હનુમતા રામો દશરથાત્મજઃ।
તં મણિં હૃદયે કૃત્વા રુરોદ સહલક્ષ્મણઃ॥૧॥
તં તુ દૃષ્ટ્વા મણિશ્રેષ્ઠં રાઘવઃ શોકકર્શિતઃ।
નેત્રાભ્યામશ્રુપૂર્ણાભ્યાં સુગ્રીવમિદમબ્રવીત્ ॥૨॥
યથૈવ ધેનુઃ સ્રવતિ સ્નેહાદ્ વત્સસ્ય વત્સલા ।
તથા મમાપિ હૃદયં મણિશ્રેષ્ઠસ્ય દર્શનાત્ ॥૩॥
મણિરત્નમિદં દત્તં વૈદેહ્યાઃ શ્વશુરેણ મે ।
વધૂકાલે યથા બદ્ધમધિકં મૂર્ધ્નિ શોભતે ॥૪॥
અયં હિ જલસમ્ભૂતો મણિઃ પ્રવરપૂજિતઃ।
યજ્ઞે પરમતુષ્ટેન દત્તઃ શક્રેણ ધીમતા ॥૫॥
ઇમં દૃષ્ટ્વા મણિશ્રેષ્ઠં તથા તાતસ્ય દર્શનમ્ ।
અદ્યાસ્મ્યવગતઃ સૌમ્ય વૈદેહસ્ય તથા વિભોઃ॥૬॥
અયં હિ શોભતે તસ્યાઃ પ્રિયાયા મૂર્ધ્નિ મે મણિઃ।
અદ્યાસ્ય દર્શનેનાહં પ્રાપ્તાં તામિવ ચિન્તયે ॥૭॥
કિમાહ સીતા વૈદેહી બ્રૂહિ સૌમ્ય પુનઃ પુનઃ।
પરાસુમિવ તોયેન સિઞ્ચન્તી વાક્યવારિણા ॥૮॥
ઇતસ્તુ કિં દુઃખતરં યદિમં વારિસમ્ભવમ્ ।
મણિં પશ્યામિ સૌમિત્રે વૈદેહીમાગતાં વિના ॥૯॥
ચિરં જીવતિ વૈદેહી યદિ માસં ધરિષ્યતિ ।
ક્ષણં વીર ન જીવેયં વિના તામસિતેક્ષણામ્ ॥૧૦॥
નય મામપિ તં દેશં યત્ર દૃષ્ટા મમ પ્રિયા ।
ન તિષ્ઠેયં ક્ષણમપિ પ્રવૃત્તિમુપલભ્ય ચ ॥૧૧॥
કથં સા મમ સુશ્રોણિ ભીરુ ભીરુઃ સતી તદા ।
ભયાવહાનાં ઘોરાણાં મધ્યે તિષ્ઠતિ રક્ષસામ્ ॥૧૨॥
શારદસ્તિમિરોન્મુક્તો નૂનં ચન્દ્ર ઇવામ્બુદૈઃ।
આવૃતો વદનં તસ્યા ન વિરાજતિ સામ્પ્રતમ્ ॥૧૩॥
કિમાહ સીતા હનુમંસ્તત્ત્વતઃ કથયસ્વ મે ।
એતેન ખલુ જીવિષ્યે ભેષજેનાતુરો યથા ॥૧૪॥
મધુરા મધુરાલાપા કિમાહ મમ ભામિની ।
મદ્વિહીના વરારોહા હનુમન્કથયસ્વ મે ।
દુઃખાદ્દુઃખતરં પ્રાપ્ય કથં જીવતિ જાનકી ॥૧૫॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ષટ્ષષ્ટિતમઃ સર્ગઃ