અથ સપ્તષષ્ટિતમઃ સર્ગઃ
એવમુક્તસ્તુ હનુમાન્રાઘવેણ મહાત્મના ।
સીતાયા ભાષિતં સર્વં ન્યવેદયત રાઘવે ॥૧॥
ઇદમુક્તવતી દેવી જાનકી પુરુષર્ષભ ।
પૂર્વવૃત્તમભિજ્ઞાનં ચિત્રકૂટે યથાતથમ્ ॥૨॥
સુખસુપ્તા ત્વયા સાર્ધં જાનકી પૂર્વમુત્થિતા ।
વાયસઃ સહસોત્પત્ય વિદદાર સ્તનાન્તરમ્ ॥૩॥
પર્યાયેણ ચ સુપ્તસ્ત્વં દેવ્યઙ્કે ભરતાગ્રજ ।
પુનશ્ચ કિલ પક્ષી સ દેવ્યા જનયતિ વ્યથા ॥૪॥
તતઃ પુનરુપાગમ્ય વિદદાર ભૃશં કિલ ।
તતસ્ત્વં બોધિતસ્તસ્યાઃ શોણિતેન સમુક્ષિતઃ॥૫॥
વાયસેન ચ તેનૈવં સતતં બાધ્યમાનયા ।
બોધિતઃ કિલ દેવ્યા ત્વં સુખસુપ્તઃ પરન્તપ ॥૬॥
તાં ચ દૃષ્ટ્વા મહાબાહો દારિતાં ચ સ્તનાન્તરે ।
આશીવિષ ઇવ ક્રુદ્ધસ્તતો વાક્યં ત્વમૂચિવાન્ ॥૭॥
નખાગ્રૈઃ કેન તે ભીરુ દારિતં વૈ સ્તનાન્તરમ્ ।
કઃ ક્રીડતિ સરોષેણ પઞ્ચવક્ત્રેણ ભોગિના ॥૮॥
નિરીક્ષમાણઃ સહસા વાયસં સમુદૈક્ષથાઃ।
નખૈઃ સરુધિરૈસ્તીક્ષ્ણૈસ્તામેવાભિમુખં સ્થિતમ્ ॥૯॥
સુતઃ કિલ સ શક્રસ્ય વાયસઃ પતતાં વરઃ।
ધરાન્તરગતઃ શીઘ્રં પવનસ્ય ગતૌ સમઃ॥૧૦॥
તતસ્તસ્મિન્મહાબાહો કોપસંવર્તિતેક્ષણઃ।
વાયસે ત્વં વ્યધાઃ ક્રૂરાં મતિં મતિમતાં વર ॥૧૧॥
સ દર્ભસંસ્તરાદ્ગૃહ્ય બ્રહ્માસ્ત્રેણન્યયોજયઃ।
સ દીપ્ત ઇવ કાલાગ્નિર્જજ્વાલાભિમુખં ખગમ્ ॥૧૨॥
સ ત્વં પ્રદીપ્તં ચિક્ષેપ દર્ભં તં વાયસં પ્રતિ ।
તતસ્તુ વાયસં દીપ્તઃ સ દર્ભોઽનુજગામ હ ॥૧૩॥
ભીતૈશ્ચ સમ્પરિત્યક્તઃ સુરૈઃ સર્વૈશ્ચ વાયસઃ।
ત્રીઁલ્લોકાન્સમ્પરિક્રમ્ય ત્રાતારં નાધિગચ્છતિ ॥૧૪॥
પુનરપ્યાગતસ્તત્ર ત્વત્સકાશમરિન્દમ ।
ત્વં તં નિપતિતં ભૂમૌ શરણ્યઃ શરણાગતમ્ ॥૧૫॥
વધાર્હમપિ કાકુત્સ્થ કૃપયા પરિપાલયઃ।
મોઘમસ્ત્રં ન શક્યં તુ કર્તુમિત્યેવ રાઘવ ॥૧૬॥
ભવાંસ્તસ્યાક્ષિ કાકસ્ય હિનસ્તિ સ્મ સ દક્ષિણમ્ ।
રામ ત્વાં સ નમસ્કૃત્ય રાજ્ઞો દશરથસ્ય ચ ॥૧૭॥
વિસૃષ્ટસ્તુ તદા કાકઃ પ્રતિપેદે સ્વમાલયમ્ ।
એવમસ્ત્રવિદાં શ્રેષ્ઠઃ સત્ત્વવાઞ્છીલવાનપિ ॥૧૮॥
કિમર્થમસ્ત્રં રક્ષઃસુ ન યોજયસિ રાઘવ ।
ન દાનવા ન ગન્ધર્વા નાસુરા ન મરુદ્ગણાઃ॥૧૯॥
તવ રામ રણે શક્તાસ્તથા  પ્રતિસમાસિતુમ્ ।
તવ વીર્યવતઃ કચ્ચિન્મયિ યદ્યસ્તિ સમ્ભ્રમઃ॥૨૦॥
ક્ષિપ્રં સુનિશિતૈર્બાર્ણૈહન્યતાં યુધિ રાવણઃ।
ભ્રાતુરાદેશમાજ્ઞાય લક્ષ્મણો વા પરન્તપઃ॥૨૧॥
સ કિમર્થં નરવરો ન માં રક્ષતિ રાઘવઃ।
શક્તૌ તૌ પુરુષવ્યાઘ્રૌ વાય્વગ્નિસમતેજસૌ ॥૨૨॥
સુરાણામપિ દુર્ધર્ષૌ કિમર્થં મામુપેક્ષતઃ।
મમૈવ દુષ્કૃતં કિઞ્ચિન્મહદસ્તિ ન સંશયઃ॥૨૩॥
સમર્થૌ સહિતૌ યન્માં ન રક્ષેતે પરન્તપૌ ।
વૈદેહ્યા વચનં શ્રુત્વા કરુણં સાધુભાષિતમ્ ॥૨૪॥
પુનરપ્યહમાર્યાં તામિદં વચનમબ્રુવમ્ ।
ત્વચ્છોકવિમુખો રામો દેવિ સત્યેન તે શપે ॥૨૫॥
રામે દુઃખાભિભૂતે ચ લક્ષ્મણઃ પરિતપ્યતે ।
કથઞ્ચિદ્ભવતી દૃષ્ટા ન કાલઃ પરિશોચિતુમ્ ॥૨૬॥
અસ્મિન્ મુહૂર્તે દુઃખાનામન્તં દ્રક્ષ્યસિ ભામિનિ ।
તાવુભૌ નરશાર્દૂલૌ રાજપુત્રૌ પરન્તપૌ ॥૨૭॥
ત્વદ્દર્શનકૃતોત્સાહૌ લઙ્કાં ભસ્મીકરિષ્યતઃ।
હત્વા ચ સમરે રૌદ્રં રાવણં સહબાન્ધવમ્ ॥૨૮॥
રાઘવસ્ત્વાં વરારોહે સ્વપુરીં નયિતા ધ્રુવમ્ ।
યત્તુ રામો વિજાનીયાદભિજ્ઞાનમનિન્દિતે ॥૨૯॥
પ્રીતિસઞ્જનનં તસ્ય પ્રદાતું તત્ત્વમર્હસિ ।
સાભિવીક્ષ્ય દિશઃ સર્વા વેણ્યુદ્ગ્રથનમુત્તમમ્ ॥૩૦॥
મુક્ત્વા વસ્ત્રાદ્દદૌ મહ્યં મણિમેતં મહાબલ ।
પ્રતિગૃહ્ય મણિં દોર્ભ્યાં તવ હેતો રઘુપ્રિય ॥૩૧॥
શિરસા સમ્પ્રણમ્યૈનામહમાગમને ત્વરે ।
ગમને ચ કૃતોત્સાહમવેક્ષ્ય વરવર્ણિની ॥૩૨॥
વિવર્ધમાનં ચ હિ મામુવાચ જનકાત્મજા ।
અશ્રુપૂર્ણમુખી દીના બાષ્પગદ્ગદભાષિણી ॥૩૩॥
મમોત્પતનસમ્ભ્રાન્તા શોકવેગસમાહતા ।
મામુવાચ તતઃ સીતા સભાગ્યોઽસિ મહાકપે ॥૩૪॥
યદ્ દ્રક્ષ્યસિ મહાબાહું રામં કમલલોચનમ્ ।
લક્ષ્મણં ચ મહાબાહું દેવરં મે યશસ્વિનમ્ ॥૩૫॥
સીતયાપ્યેવમુક્તોઽહમબ્રુવં મૈથિલીં તથા ।
પૃષ્ટમારોહ મે દેવિ ક્ષિપ્રં જનકનન્દિનિ ॥૩૬॥
યાવત્તે દર્શયામ્યદ્ય સસુગ્રીવં સલક્ષ્મણમ્ ।
રાઘવં ચ મહાભાગે ભર્તારમસિતેક્ષણે ॥૩૭॥
સાબ્રવીન્માં તતો દેવી નૈષ ધર્મો મહાકપે ।
યત્તે પૃષ્ટં સિષેવેઽહં સ્વવશા હરિપુઙ્ગવ ॥૩૮॥
પુરા ચ યદહં વીર સ્પૃષ્ટા ગાત્રેષુ રક્ષસા ।
તત્રાહં કિં કરિષ્યામિ કાલેનોપનિપીડિતા ॥૩૯॥
ગચ્છ ત્વં કપિશાર્દૂલ યત્ર તૌ નૃપતેઃ સુતૌ ।
ઇત્યેવં સા સમાભાષ્ય ભૂયઃ સન્દેષ્ટુમાસ્થિતા ॥૪૦॥
હનુમન્સિંહસઙ્કાશૌ તાવુભૌ રામલક્ષ્મણૌ ।
સુગ્રીવં ચ સહામાત્યં સર્વાન્બ્રૂયા અનામયમ્ ॥૪૧॥
યથા ચ સ મહાબાહુર્માં તારયતિ રાઘવઃ।
અસ્માદ્દુઃખામ્બુસંરોધાત્ તત્ ત્વમાખ્યાતુમર્હસિ ॥૪૨॥
ઇમં ચ તીવ્રં મમ શોકવેગં
	રક્ષોભિરેભિઃ પરિભર્ત્સનં ચ ।
બ્રૂયાસ્તુ રામસ્ય ગતઃ સમીપં
	શિવશ્ચ તેઽધ્વાસ્તુ હરિપ્રવીર ॥૪૩॥
એતત્તવાર્યા નૃપ સંયતા સા
	સીતા વચઃ પ્રાહ વિષાદપૂર્વમ્ ।
એતચ્ચ બુદ્ધ્વા ગદિતં યથા ત્વં
	શ્રદ્ધત્સ્વ સીતાં કુશલાં સમગ્રામ્ ॥૪૪॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે સપ્તષષ્ટિતમઃ સર્ગઃ