અથ અષ્ટષષ્ટિતમઃ સર્ગઃ
અથાહમુત્તરં દેવ્યા પુનરુક્તઃ સસમ્ભ્રમમ્ ।
તવ સ્નેહાન્નરવ્યાઘ્ર સૌહાર્દાદનુમાન્ય ચ ॥૧॥
એવં બહુવિધં વાચ્યો રામો દાશરથિસ્ત્વયા ।
યથા મામાપ્નુયાચ્છીઘ્રં હત્વા રાવણમાહવે ॥૨॥
યદિ વા મન્યસે વીર વસૈકાહમરિન્દમ ।
કસ્મિંશ્ચિત્સંવૃતે દેશે વિશ્રાન્તઃ શ્વો ગમિષ્યસિ ॥૩॥
મમ ચાપ્યલ્પભાગ્યાયાઃ સાંનિધ્યાત્તવ વાનર ।
અસ્ય શોકવિપાકસ્ય મુહૂર્તં સ્યાદ્વિમોક્ષણમ્ ॥૪॥
ગતે હિ ત્વયિ વિક્રાન્તે પુનરાગમનાય વૈ ।
પ્રાણાનામપિ સન્દેહો મમ સ્યાન્નાત્ર સંશયઃ॥૫॥
તવાદર્શનજઃ શોકો ભૂયો માં પરિતાપયેત્ ।
દુઃખાદ્દુઃખપરાભૂતાં દુર્ગતાં દુઃખભાગિનીમ્ ॥૬॥
અયં ચ વીર સન્દેહસ્તિષ્ઠતીવ મમાગ્રતઃ।
સુમહાંસ્ત્વત્સહાયેષુ હર્યૃક્ષેષુ હરીશ્વર ॥૭॥
કથં નુ ખલુ દુષ્પારં તરિષ્યન્તિ મહોદધિમ્ ।
તાનિ હર્યૃક્ષસૈન્યાનિ તૌ વા નરવરાત્મજૌ ॥૮॥
ત્રયાણામેવ ભૂતાનાં સાગરસ્યાસ્ય લઙ્ઘને ।
શક્તિઃ સ્યાદ્વૈનતેયસ્ય વાયોર્વા તવ ચાનઘ ॥૯॥
તદસ્મિન્કાર્યનિર્યોગે વીરૈવં દુરતિક્રમે ।
કિં પશ્યસિ સમાધાનં બ્રૂહિ કાર્યવિદાં વર ॥૧૦॥
કામમસ્ય ત્વમેવૈકઃ કાર્યસ્ય પરિસાધને ।
પર્યાપ્તઃ પરવીરઘ્ન યશસ્યસ્તે બલોદયઃ॥૧૧॥
બલૈઃ સમગ્રૈર્યદિ માં હત્વા રાવણમાહવે ।
વિજયી સ્વપુરીં રામો નયેત્તત્સ્યાદ્યશસ્કરમ્ ॥૧૨॥
યથાહં તસ્ય વીરસ્ય વનાદુપધિના હૃતા ।
રક્ષસા તદ્ભયાદેવ તથા નાર્હતિ રાઘવઃ॥૧૩॥
બલૈસ્તુ સઙ્કુલાં કૃત્વા લઙ્કાં પરબલાર્દનઃ।
માં નયેદ્યદિ કાકુત્સ્થસ્તત્તસ્ય સદૃશં ભવેત્ ॥૧૪॥
તદ્યથા તસ્ય વિક્રાન્તમનુરૂપં મહાત્મનઃ।
ભવત્યાહવશૂરસ્ય તથા ત્વમુપપાદય ॥૧૫॥
તદર્થોપહિતં વાક્યં પ્રશ્રિતં હેતુસંહિતમ્ ।
નિશમ્યાહં તતઃ શેષં વાક્યમુત્તરમબ્રુવમ્ ॥૧૬॥
દેવિ હર્યૃક્ષસૈન્યાનામીશ્વરઃ પ્લવતાં વરઃ।
સુગ્રીવઃ સત્ત્વસમ્પન્નસ્ત્વદર્થે કૃતનિશ્ચયઃ॥૧૭॥
તસ્ય વિક્રમસમ્પન્નાઃ સત્ત્વવન્તો મહાબલાઃ।
મનઃસઙ્કલ્પસદૃશા નિદેશે હરયઃ સ્થિતાઃ॥૧૮॥
યેષાં નોપરિ નાધસ્તાન્ન તિર્યક્સજ્જતે ગતિઃ।
ન ચ કર્મસુ સીદન્તિ મહત્સ્વમિતતેજસઃ॥૧૯॥
અસકૃત્તૈર્મહાભાગૈર્વાનરૈર્બલસંયુતૈઃ।
પ્રદક્ષિણીકૃતા ભૂમિર્વાયુમાર્ગાનુસારિભિઃ॥૨૦॥
મદ્વિશિષ્ટાશ્ચ તુલ્યાશ્ચ સન્તિ તત્ર વનૌકસઃ।
મત્તઃ પ્રત્યવરઃ કશ્ચિન્નાસ્તિ સુગ્રીવસંનિધૌ ॥૨૧॥
અહં તાવદિહ પ્રાપ્તઃ કિં પુનસ્તે મહાબલાઃ।
નહિ પ્રકૃષ્ટાઃ પ્રેષ્યન્તે પ્રેષ્યન્તે હીતરે જનાઃ॥૨૨॥
તદલં પરિતાપેન દેવિ મન્યુરપૈતુ તે ।
એકોત્પાતેન તે લઙ્કામેષ્યન્તિ હરિયૂથપાઃ॥૨૩॥
મમ પૃષ્ઠગતૌ તૌ ચ ચન્દ્રસૂર્યાવિવોદિતૌ ।
ત્વત્સકાશં મહાભાગે નૃસિંહાવાગમિષ્યતઃ॥૨૪॥
અરિઘ્નં સિંહસઙ્કાશં ક્ષિપ્રં દ્રક્ષ્યસિ રાઘવમ્ ।
લક્ષ્મણં ચ ધનુષ્મન્તં લઙ્કાદ્વારમુપાગતમ્ ॥૨૫॥
નખદંષ્ટ્રાયુધાન્વીરાન્ સિંહશાર્દૂલવિક્રમાન્ ।
વાનરાન્ વારણેન્દ્રાભાન્ ક્ષિપ્રં દ્રક્ષ્યસિ સઙ્ગતાન્ ॥૨૬॥
શૈલામ્બુદનિકાશાનાં લઙ્કામલયસાનુષુ ।
નર્દતાં કપિમુખ્યાનાં નચિરાચ્છ્રોષ્યસે સ્વનમ્ ॥૨૭॥
નિવૃત્તવનવાસં ચ ત્વયા સાર્ધમરિન્દમમ્ ।
અભિષિક્તમયોધ્યાયાં ક્ષિપ્રં દ્રક્ષ્યસિ રાઘવમ્ ॥૨૮॥
તતો મયા વાગ્ભિરદીનભાષિણા
	શિવાભિરિષ્ટાભિરભિપ્રસાદિતા ।
ઉવાહ શાન્તિં મમ મૈથિલાત્મજા
	તવાતિશોકેન તથાતિપીડિતા ॥૨૯॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે અષ્ટષષ્ટિતમઃ સર્ગઃ