ಅಥ ಚತುರ್ಥಃ ಸರ್ಗಃ
ಸ ನಿರ್ಜಿತ್ಯ ಪುರೀಂ ಲಙ್ಕಾಂ ಶ್ರೇಷ್ಠಾಂ ತಾಂ ಕಾಮರೂಪಿಣೀಮ್ ।
ವಿಕ್ರಮೇಣ ಮಹಾತೇಜಾ ಹನುಮಾನ್ ಕಪಿಸತ್ತಮಃ॥೧॥
ಅದ್ವಾರೇಣ ಮಹಾವೀರ್ಯಃ ಪ್ರಾಕಾರಮವಪುಪ್ಲುವೇ ।
ನಿಶಿ ಲಙ್ಕಾಂ ಮಹಾಸತ್ತ್ವೋ ವಿವೇಶ ಕಪಿಕುಞ್ಜರಃ॥೨॥
ಪ್ರವಿಶ್ಯ ನಗರೀಂ ಲಙ್ಕಾಂ ಕಪಿರಾಜಹಿತಙ್ಕರಃ।
ಚಕ್ರೇಽಥ ಪಾದಂ ಸವ್ಯಂ ಚ ಶತ್ರೂಣಾಂ ಸ ತು ಮೂರ್ಧನಿ ॥೩॥
ಪ್ರವಿಷ್ಟಃ ಸತ್ತ್ವಸಮ್ಪನ್ನೋ ನಿಶಾಯಾಂ ಮಾರುತಾತ್ಮಜಃ।
ಸ ಮಹಾಪಥಮಾಸ್ಥಾಯ ಮುಕ್ತಪುಷ್ಪವಿರಾಜಿತಮ್ ॥೪॥
ತತಸ್ತು ತಾಂ ಪುರೀಂ ಲಙ್ಕಾಂ ರಮ್ಯಾಮಭಿಯಯೌ ಕಪಿಃ।
ಹಸಿತೋತ್ಕೃಷ್ಟನಿನದೈಸ್ತೂರ್ಯಘೋಷಪುರಸ್ಕೃತೈಃ॥೫॥
ವಜ್ರಾಙ್ಕುಶನಿಕಾಶೈಶ್ಚ ವಜ್ರಜಾಲವಿಭೂಷಿತೈಃ।
ಗೃಹಮೇಧೈಃ ಪುರೀ ರಮ್ಯಾ ಬಭಾಸೇ ದ್ಯೌರಿವಾಮ್ಬುದೈಃ॥೬॥
ಪ್ರಜಜ್ವಾಲ ತದಾ ಲಙ್ಕಾ ರಕ್ಷೋಗಣಗೃಹೈಃ ಶುಭೈಃ।
ಸಿತಾಭ್ರಸದೃಶೈಶ್ಚಿತ್ರೈಃ ಪದ್ಮಸ್ವಸ್ತಿಕಸಂಸ್ಥಿತೈಃ॥೭॥
ವರ್ಧಮಾನಗೃಹೈಶ್ಚಾಪಿ ಸರ್ವತಃ ಸುವಿಭೂಷಿತೈಃ।
ತಾಂ ಚಿತ್ರಮಾಲ್ಯಾಭರಣಾಂ ಕಪಿರಾಜಹಿತಙ್ಕರಃ॥೮॥
ರಾಘವಾರ್ಥೇ ಚರನ್ ಶ್ರೀಮಾನ್ ದದರ್ಶ ಚ ನನನ್ದ ಚ ।
ಭವನಾದ್ಭವನಂ ಗಚ್ಛನ್ ದದರ್ಶ ಕಪಿಕುಞ್ಜರಃ॥೯॥
ವಿವಿಧಾಕೃತಿರೂಪಾಣಿ ಭವನಾನಿ ತತಸ್ತತಃ।
ಶುಶ್ರಾವ ರುಚಿರಂ ಗೀತಂ ತ್ರಿಸ್ಥಾನಸ್ವರಭೂಷಿತಮ್ ॥೧೦॥
ಸ್ತ್ರೀಣಾಂ ಮದನವಿದ್ಧಾನಾಂ ದಿವಿ ಚಾಪ್ಸರಸಾಮಿವ ।
ಶುಶ್ರಾವ ಕಾಞ್ಚೀನಿನದಂ ನೂಪುರಾಣಾಂ ಚ ನಿಃಸ್ವನಮ್ ॥೧೧॥
ಸೋಪಾನನಿನದಾಂಶ್ಚಾಪಿ ಭವನೇಷು ಮಹಾತ್ಮನಾಮ್ ।
ಆಸ್ಫೋಟಿತನಿನಾದಾಂಶ್ಚ ಕ್ಷ್ವೇಡಿತಾಂಶ್ಚ ತತಸ್ತತಃ॥೧೨॥
ಶುಶ್ರಾವ ಜಪತಾಂ ತತ್ರ ಮನ್ತ್ರಾನ್ ರಕ್ಷೋಗೃಹೇಷು ವೈ ।
ಸ್ವಾಧ್ಯಾಯ ನಿರತಾಂಶ್ಚೈವ ಯಾತುಧಾನಾನ್ದದರ್ಶ ಸಃ॥೧೩॥
ರಾವಣಸ್ತವಸಂಯುಕ್ತಾನ್ಗರ್ಜತೋ ರಾಕ್ಷಸಾನಪಿ ।
ರಾಜಮಾರ್ಗಂ ಸಮಾವೃತ್ಯ ಸ್ಥಿತಂ ರಕ್ಷೋಗಣಂ ಮಹತ್ ॥೧೪॥
ದದರ್ಶ ಮಧ್ಯಮೇ ಗುಲ್ಮೇ ರಾಕ್ಷಸಸ್ಯ ಚರಾನ್ ಬಹೂನ್ ।
ದೀಕ್ಷಿತಾನ್ ಜಟಿಲಾನ್ ಮುಣ್ಡಾನ್ ಗೋಜಿನಾಮ್ಬರವಾಸಸಃ॥೧೫॥
ದರ್ಭಮುಷ್ಟಿಪ್ರಹರಣಾನಗ್ನಿಕುಣ್ಡಾಯುಧಾಂಸ್ತಥಾ ।
ಕೂಟಮುದ್ಗರಪಾಣೀಂಶ್ಚ ದಣ್ಡಾಯುಧಧರಾನಪಿ ॥೧೬॥
ಏಕಾಕ್ಷಾನೇಕವರ್ಣಾಂಶ್ಚ ಲಮ್ಬೋದರಪಯೋಧರಾನ್ ।
ಕರಾಲಾನ್ಭುಗ್ನವಕ್ತ್ರಾಂಶ್ಚ ವಿಕಟಾನ್ವಾಮನಾಂಸ್ತಥಾ ॥೧೭॥
ಧನ್ವಿನಃ ಖಡ್ಗಿನಶ್ಚೈವ ಶತಘ್ನೀ ಮುಸಲಾಯುಧಾನ್ ।
ಪರಿಘೋತ್ತಮಹಸ್ತಾಂಶ್ಚ ವಿಚಿತ್ರಕವಚೋಜ್ಜ್ವಲಾನ್ ॥೧೮॥
ನಾತಿಸ್ತೂಲಾನ್ ನಾತಿಕೃಶಾನ್ ನಾತಿದೀರ್ಘಾತಿಹ್ರಸ್ವಕಾನ್ ।
ನಾತಿಗೌರಾನ್ ನಾತಿಕೃಷ್ಣಾನ್ನಾತಿಕುಬ್ಜಾನ್ನ ವಾಮನಾನ್ ॥೧೯॥
ವಿರೂಪಾನ್ಬಹುರೂಪಾಂಶ್ಚ ಸುರೂಪಾಂಶ್ಚ ಸುವರ್ಚಸಃ।
ಪತಾಕಿನಶ್ಚಧ್ವಜಿನೋ ದದರ್ಶ ವಿವಿಧಾಯುಧಾನ್ ॥೨೦॥
ಶಕ್ತಿವೃಕ್ಷಾಯುಧಾಂಶ್ಚೈವ ಪಟ್ಟಿಶಾಶನಿಧಾರಿಣಃ।
ಕ್ಷೇಪಣೀಪಾಶಹಸ್ತಾಂಶ್ಚ ದದರ್ಶ ಸ ಮಹಾಕಪಿಃ॥೨೧॥
ಸ್ರಗ್ವಿಣಸ್ತ್ವನುಲಿಪ್ತಾಂಶ್ಚ ವರಾಭರಣಭೂಷಿತಾನ್ ।
ನಾನವೇಷಸಮಾಯುಕ್ತಾನ್ ಯಥಾಸ್ವೈರಚರಾನ್ ಬಹೂನ್ ॥೨೨॥
ತೀಕ್ಷ್ಣಶೂಲಧರಾಂಶ್ಚೈವ ವಜ್ರಿಣಶ್ಚ ಮಹಾಬಲಾನ್ ।
ಶತಸಾಹಸ್ರಮವ್ಯಗ್ರಮಾರಕ್ಷಂ ಮಧ್ಯಮಂ ಕಪಿಃ॥೨೩॥
ರಕ್ಷೋಽಧಿಪತಿನಿರ್ದಿಷ್ಟಂ ದದರ್ಶಾನ್ತಃ ಪುರಾಗ್ರತಃ।
ಸ ತದಾ ತದ್ ಗೃಹಂ ದೃಷ್ಟ್ವಾ ಮಹಾಹಾಟಕತೋರಣಮ್ ॥೨೪॥
ರಾಕ್ಷಸೇನ್ದ್ರಸ್ಯ ವಿಖ್ಯಾತಮದ್ರಿಮೂರ್ಧ್ನಿ ಪ್ರತಿಷ್ಠಿತಮ್ ।
ಪುಣ್ಡರೀಕಾವತಂಸಾಭಿಃ ಪರಿಖಾಭಿಃ ಸಮಾವೃತಮ್ ॥೨೫॥
ಪ್ರಾಕಾರಾವೃತಮತ್ಯನ್ತಂ ದದರ್ಶ ಸ ಮಹಾಕಪಿಃ।
ತ್ರಿವಿಷ್ಟಪನಿಭಂ ದಿವ್ಯಂ ದಿವ್ಯನಾದವಿನಾದಿತಮ್ ॥೨೬॥
ವಾಜಿಹ್ರೇಷಿತಸಙ್ಘುಷ್ಟಂ ನಾದಿತಂ ಭೂಷಣೈಸ್ತಥಾ ।
ರಥೈರ್ಯಾನೈರ್ವಿಮಾನೈಶ್ಚ ತಥಾ ಹಯಗಜೈಃ ಶುಭೈಃ॥೨೭॥
ವಾರಣೈಶ್ಚ ಚತುರ್ದನ್ತೈಃ ಶ್ವೇತಾಭ್ರನಿಚಯೋಪಮೈಃ।
ಭೂಷಿತೈ ರುಚಿರದ್ವಾರಂ ಮತ್ತೈಶ್ಚ ಮೃಗಪಕ್ಷಿಭಿಃ॥೨೮॥
ರಕ್ಷಿತಂ ಸುಮಹಾವೀರ್ಯೈರ್ಯಾತುಧಾನೈಃ ಸಹಸ್ರಶಃ।
ರಾಕ್ಷಸಾಧಿಪತೇರ್ಗುಪ್ತಮಾವಿವೇಶ ಗೃಹಂ ಕಪಿಃ॥೨೯॥
ಸ ಹೇಮಜಾಮ್ಬೂನದಚಕ್ರವಾಲಂ
	ಮಹಾರ್ಹಮುಕ್ತಾಮಣಿ ಭೂಷಿತಾನ್ತಮ್್ ।
ಪರಾರ್ಧ್ಯಕಾಲಾಗುರುಚನ್ದನಾರ್ಹಂ
	ಸ ರಾವಣಾನ್ತಃ ಪುರಮಾವಿವೇಶ ॥೩೦॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಚತುರ್ಥಃ ಸರ್ಗಃ