ಅಥ ಅಷ್ಟಮಃ ಸರ್ಗಃ
ಸ ತಸ್ಯ ಮಧ್ಯೇ ಭವನಸ್ಯ ಸಂಸ್ಥಿತೋ
	ಮಹದ್ವಿಮಾನಂ ಮಣಿರತ್ನಚಿತ್ರಿತಮ್ ।
ಪ್ರತಪ್ತಜಾಮ್ಬೂನದಜಾಲಕೃತ್ರಿಮಂ
	ದದರ್ಶ ಧೀಮಾನ್ ಪವನಾತ್ಮಜಃ ಕಪಿಃ॥೧॥
ತದಪ್ರಮೇಯಪ್ರತಿಕಾರಕೃತ್ರಿಮಂ
	ಕೃತಂ ಸ್ವಯಂ ಸಾಧ್ವಿತಿ ವಿಶ್ವಕರ್ಮಣಾ ।
ದಿವಂ ಗತೇ ವಾಯುಪಥೇ ಪ್ರತಿಷ್ಠಿತಂ
	ವ್ಯರಾಜತಾದಿತ್ಯಪಥಸ್ಯ ಲಕ್ಷ್ಮ ತತ್ ॥೨॥
ನ ತತ್ರ ಕಿಞ್ಚಿನ್ನ ಕೃತಂ ಪ್ರಯತ್ನತೋ
	ನ ತತ್ರ ಕಿಞ್ಚಿನ್ನ ಮಹಾರ್ಹರತ್ನವತ್ ।
ನ ತೇ ವಿಶೇಷಾ ನಿಯತಾಃ ಸುರೇಷ್ವಪಿ
	ನ ತತ್ರ ಕಿಞ್ಚಿನ್ನ ಮಹಾವಿಶೇಷವತ್ ॥೩॥
ತಪಃ ಸಮಾಧಾನಪರಾಕ್ರಮಾರ್ಜಿತಂ
	ಮನಃ ಸಮಾಧಾನವಿಚಾರಚಾರಿಣಮ್ ।
ಅನೇಕಸಂಸ್ಥಾನವಿಶೇಷನಿರ್ಮಿತಂ
	ತತಸ್ತತಸ್ತುಲ್ಯವಿಶೇಷನಿರ್ಮಿತಮ್ ॥೪॥
ಮನಃ ಸಮಾಧಾಯ ತು ಶೀಘ್ರಗಾಮಿನಂ
	ದುರಾಸದಂ ಮಾರುತತುಲ್ಯಗಾಮಿನಮ್ ।
ಮಹಾತ್ಮನಾಂ ಪುಣ್ಯಕೃತಾಂ ಮಹರ್ದ್ಧಿನಾಂ
	ಯಶಸ್ವಿನಾಮಗ್ರ್ಯಮುದಾಮಿವಾಲಯಮ್ ॥೫॥
ವಿಶೇಷಮಾಲಮ್ಬ್ಯ ವಿಶೇಷಸಂಸ್ಥಿತಂ
	ವಿಚಿತ್ರಕೂಟಂ ಬಹುಕೂಟಮಣ್ಡಿತಮ್ ।
ಮನೋಽಭಿರಾಮಂ ಶರದಿನ್ದುನಿರ್ಮಲಂ
	ವಿಚಿತ್ರಕೂಟಂ ಶಿಖರಂ ಗಿರೇರ್ಯಥಾ ॥೬॥
ವಹನ್ತಿ ಯತ್ಕುಣ್ಡಲಶೋಭಿತಾನನಾ
	ಮಹಾಶನಾ ವ್ಯೋಮಚರಾನಿಶಾಚರಾಃ।
ವಿವೃತ್ತವಿಧ್ವಸ್ತವಿಶಾಲಲೋಚನಾ
	ಮಹಾಜವಾ ಭೂತಗಣಾಃ ಸಹಸ್ರಶಃ॥೭॥
ವಸನ್ತಪುಷ್ಪೋತ್ಕರಚಾರುದರ್ಶನಂ
	ವಸನ್ತಮಾಸಾದಪಿ ಚಾರುದರ್ಶನಮ್ ।
ಸ ಪುಷ್ಪಕಂ ತತ್ರ ವಿಮಾನಮುತ್ತಮಂ
	ದದರ್ಶ ತದ್ವಾನರವೀರಸತ್ತಮಃ॥೮॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಅಷ್ಟಮಃ ಸರ್ಗಃ