ಅಥ ನವಮಃ ಸರ್ಗಃ
ತಸ್ಯಾಲಯವರಿಷ್ಠಸ್ಯ ಮಧ್ಯೇ ವಿಮಲಮಾಯತಮ್ ।
ದದರ್ಶ ಭವನಶ್ರೇಷ್ಠಂ ಹನೂಮಾನ್ಮಾರುತಾತ್ಮಜಃ॥೧॥
ಅರ್ಧಯೋಜನವಿಸ್ತೀರ್ಣಮಾಯತಂ ಯೋಜನಂ ಮಹತ್ ।
ಭವನಂ ರಾಕ್ಷಸೇನ್ದ್ರಸ್ಯ ಬಹುಪ್ರಾಸಾದಸಙ್ಕುಲಮ್ ॥೨॥
ಮಾರ್ಗಮಾಣಸ್ತು ವೈದೇಹೀಂ ಸೀತಾಮಾಯತಲೋಚನಾಮ್ ।
ಸರ್ವತಃ ಪರಿಚಕ್ರಾಮ ಹನೂಮಾನರಿಸೂದನಃ॥೩॥
ಉತ್ತಮಂ ರಾಕ್ಷಸಾವಾಸಂ ಹನುಮಾನವಲೋಕಯನ್ ।
ಆಸಸಾದಾಥ ಲಕ್ಷ್ಮೀವಾನ್ ರಾಕ್ಷಸೇನ್ದ್ರನಿವೇಶನಮ್ ॥೪॥
ಚತುರ್ವಿಷಾಣೈರ್ದ್ವಿರದೈಸ್ತ್ರಿವಿಷಾಣೈಸ್ತಥೈವ ಚ ।
ಪರಿಕ್ಷಿಪ್ತಮಸಮ್ಬಾಧಂ ರಕ್ಷ್ಯಮಾಣಮುದಾಯುಧೈಃ॥೫॥
ರಾಕ್ಷಸೀಭಿಶ್ಚ ಪತ್ನೀಭೀ ರಾವಣಸ್ಯ ನಿವೇಶನಮ್ ।
ಆಹೃತಾಭಿಶ್ಚ ವಿಕ್ರಮ್ಯ ರಾಜಕನ್ಯಾಭಿರಾವೃತಮ್ ॥೬॥
ತನ್ನಕ್ರಮಕರಾಕೀರ್ಣಂ ತಿಮಿಙ್ಗಿಲಝಷಾಕುಲಮ್ ।
ವಾಯುವೇಗಸಮಾಧೂತಂ ಪನ್ನಗೈರಿವ ಸಾಗರಮ್ ॥೭॥
ಯಾ ಹಿ ವೈಶ್ರವಣೇ ಲಕ್ಷ್ಮೀರ್ಯಾ ಚನ್ದ್ರೇ ಹರಿವಾಹನೇ ।
ಸಾ ರಾವಣಗೃಹೇ ರಮ್ಯಾ ನಿತ್ಯಮೇವಾನಪಾಯಿನೀ ॥೮॥
ಯಾ ಚ ರಾಜ್ಞಃ ಕುಬೇರಸ್ಯ ಯಮಸ್ಯ ವರುಣಸ್ಯ ಚ ।
ತಾದೃಶೀ ತದ್ವಿಶಿಷ್ಟಾ ವಾ ಋದ್ಧೀ ರಕ್ಷೋಗೃಹೇಷ್ವಿಹ ॥೯॥
ತಸ್ಯ ಹರ್ಮ್ಯಸ್ಯ ಮಧ್ಯಸ್ಥವೇಶ್ಮ ಚಾನ್ಯತ್ಸುನಿರ್ಮಿತಮ್ ।
ಬಹುನಿರ್ಯೂಹಸಂಯುಕ್ತಂ ದದರ್ಶ ಪವನಾತ್ಮಜಃ॥೧೦॥
ಬ್ರಹ್ಮಣೋಽರ್ಥೇ ಕೃತಂ ದಿವ್ಯಂ ದಿವಿ ಯದ್ವಿಶ್ವಕರ್ಮಣಾ ।
ವಿಮಾನಂ ಪುಷ್ಪಕಂ ನಾಮ ಸರ್ವರತ್ನವಿಭೂಷಿತಮ್ ॥೧೧॥
ಪರೇಣ ತಪಸಾ ಲೇಭೇ ಯತ್ಕುಬೇರಃ ಪಿತಾಮಹಾತ್ ।
ಕುಬೇರಮೋಜಸಾ ಜಿತ್ವಾ ಲೇಭೇ ತದ್ರಾಕ್ಷಸೇಶ್ವರಃ॥೧೨॥
ಈಹಾಮೃಗಸಮಾಯುಕ್ತೈಃ ಕಾರ್ತಸ್ವರಹಿರಣ್ಮಯೈಃ।
ಸುಕೃತೈರಾಚಿತಂ ಸ್ತಮ್ಭೈಃ ಪ್ರದೀಪ್ತಮಿವ ಚ ಶ್ರಿಯಾ ॥೧೩॥
ಮೇರುಮನ್ದರಸಙ್ಕಾಶೈರುಲ್ಲಿಖದ್ಭಿರಿವಾಮ್ಬರಮ್ ।
ಕೂಟಾಗಾರೈಃ ಶುಭಾಗಾರೈಃ ಸರ್ವತಃ ಸಮಲಙ್ಕೃತಮ್ ॥೧೪॥
ಜ್ವಲನಾರ್ಕಪ್ರತೀಕಾಶೈಃ ಸುಕೃತಂ ವಿಶ್ವಕರ್ಮಣಾ ।
ಹೇಮಸೋಪಾನಯುಕ್ತಂ ಚ ಚಾರುಪ್ರವರವೇದಿಕಮ್ ॥೧೫॥
ಜಾಲವಾತಾಯನೈರ್ಯುಕ್ತಂ ಕಾಞ್ಚನೈಃ ಸ್ಫಾಟಿಕೈರಪಿ ।
ಇನ್ದ್ರನೀಲಮಹಾನೀಲಮಣಿಪ್ರವರವೇದಿಕಮ್ ॥೧೬॥
ವಿದ್ರುಮೇಣ ವಿಚಿತ್ರೇಣ ಮಣಿಭಿಶ್ಚ ಮಹಾಧನೈಃ।
ನಿಸ್ತುಲಾಭಿಶ್ಚ ಮುಕ್ತಾಭಿಸ್ತಲೇನಾಭಿವಿರಾಜಿತಮ್ ॥೧೭॥
ಚನ್ದನೇನ ಚ ರಕ್ತೇನ ತಪನೀಯನಿಭೇನ ಚ ।
ಸುಪುಣ್ಯಗನ್ಧಿನಾ ಯುಕ್ತಮಾದಿತ್ಯತರುಣೋಪಮಮ್ ॥೧೮॥
ಕೂಟಾಗಾರೈರ್ವರಾಕಾರೈರ್ವಿವಿಧೈಃ ಸಮಲಙ್ಕೃತಮ್ ।
ವಿಮಾನಂ ಪುಷ್ಪಕಂ ದಿವ್ಯಮಾರುರೋಹ ಮಹಾಕಪಿಃ।
ತತ್ರಸ್ಥಃ ಸರ್ವತೋ ಗನ್ಧಂ ಪಾನಭಕ್ಷ್ಯಾನ್ನಸಮ್ಭವಮ್ ॥೧೯॥
ದಿವ್ಯಂ ಸಂಮೂರ್ಛಿತಂ ಜಿಘ್ರನ್ರೂಪವನ್ತಮಿವಾನಿಲಮ್ ।
ಸ ಗನ್ಧಸ್ತಂ ಮಹಾಸತ್ತ್ವಂ ಬನ್ಧುರ್ಬನ್ಧುಮಿವೋತ್ತಮಮ್ ॥೨೦॥
ಇತ ಏಹೀತ್ಯುವಾಚೇವ ತತ್ರ ಯತ್ರ ಸ ರಾವಣಃ।
ತತಸ್ತಾಂ ಪ್ರಸ್ಥಿತಃ ಶಾಲಾಂ ದದರ್ಶ ಮಹತೀಂ ಶಿವಾಮ್ ॥೨೧॥
ರಾವಣಸ್ಯ ಮಹಾಕಾನ್ತಾಂ ಕಾನ್ತಾಮಿವ ವರಸ್ತ್ರಿಯಮ್ ।
ಮಣಿಸೋಪಾನವಿಕೃತಾಂ ಹೇಮಜಾಲವಿರಾಜಿತಾಮ್ ॥೨೨॥
ಸ್ಫಾಟಿಕೈರಾವೃತತಲಾಂ ದನ್ತಾನ್ತರಿತರೂಪಿಕಾಮ್ ।
ಮುಕ್ತಾವಜ್ರಪ್ರವಾಲೈಶ್ಚ ರೂಪ್ಯಚಾಮೀಕರೈರಪಿ ॥೨೩॥
ವಿಭೂಷಿತಾಂ ಮಣಿಸ್ತಮ್ಭೈಃ ಸುಬಹುಸ್ತಮ್ಭಭೂಷಿತಾಮ್ ।
ಸಮೈರೃಜುಭಿರತ್ಯುಚ್ಚೈಃ ಸಮನ್ತಾತ್ಸುವಿಭೂಷಿತೈಃ॥೨೪॥
ಸ್ತಮ್ಭೈಃ ಪಕ್ಷೈರಿವಾತ್ಯುಚ್ಚೈರ್ದಿವಂ ಸಮ್ಪ್ರಸ್ಥಿತಾಮಿವ ।
ಮಹತ್ಯಾ ಕುಥಯಾಽಽಸ್ತೀರ್ಣಾಂ ಪೃಥಿವೀಲಕ್ಷಣಾಙ್ಕಯಾ ॥೨೫॥
ಪೃಥಿವೀಮಿವ ವಿಸ್ತೀರ್ಣಾಂ ಸರಾಷ್ಟ್ರಗೃಹಶಾಲಿನೀಮ್ ।
ನಾದಿತಾಂ ಮತ್ತವಿಹಗೈರ್ದಿವ್ಯಗನ್ಧಾಧಿವಾಸಿತಾಮ್ ॥೨೬॥
ಪರಾರ್ಘ್ಯಾಸ್ತರಣೋಪೇತಾಂ ರಕ್ಷೋಽಧಿಪನಿಷೇವಿತಾಮ್ ।
ಧೂಮ್ರಾಮಗುರುಧೂಪೇನ ವಿಮಲಾಂ ಹಂಸಪಾಣ್ಡುರಾಮ್ ॥೨೭॥
ಪತ್ರಪುಷ್ಪೋಪಹಾರೇಣ ಕಲ್ಮಾಷೀಮಿವ ಸುಪ್ರಭಾಮ್ ।
ಮನಸೋ ಮೋದಜನನೀಂ ವರ್ಣಸ್ಯಾಪಿ ಪ್ರಸಾಧಿನೀಮ್ ॥೨೮॥
ತಾಂ ಶೋಕನಾಶಿನೀಂ ದಿವ್ಯಾಂ ಶ್ರಿಯಃ ಸಞ್ಜನನೀಮಿವ ।
ಇನ್ದ್ರಿಯಾಣೀನ್ದ್ರಿಯಾರ್ಥೈಸ್ತು ಪಞ್ಚ ಪಞ್ಚಭಿರುತ್ತಮೈಃ॥೨೯॥
ತರ್ಪಯಾಮಾಸ ಮಾತೇವ ತದಾ ರಾವಣಪಾಲಿತಾ ।
ಸ್ವರ್ಗೋಽಯಂ ದೇವಲೋಕೋಽಯಮಿನ್ದ್ರಸ್ಯಾಪಿ ಪುರೀ ಭವೇತ್ ।
ಸಿದ್ಧಿರ್ವೇಯಂ ಪರಾ ಹಿ ಸ್ಯಾದಿತ್ಯಮನ್ಯತ ಮಾರುತಿಃ॥೩೦॥
ಪ್ರಧ್ಯಾಯತ ಇವಾಪಶ್ಯತ್ಪ್ರದೀಪಾಂಸ್ತತ್ರ ಕಾಞ್ಚನಾನ್ ।
ಧೂರ್ತಾನಿವ ಮಹಾಧೂರ್ತೈರ್ದೇವನೇನ ಪರಾಜಿತಾನ್ ॥೩೧॥
ದೀಪಾನಾಂ ಚ ಪ್ರಕಾಶೇನ ತೇಜಸಾ ರಾವಣಸ್ಯ ಚ ।
ಅರ್ಚಿರ್ಭಿರ್ಭೂಷಣಾನಾಂ ಚ ಪ್ರದೀಪ್ತೇತ್ಯಭ್ಯಮನ್ಯತ ॥೩೨॥
ತತೋಽಪಶ್ಯತ್ಕುಥಾಸೀನಂ ನಾನಾವರ್ಣಾಮ್ಬರಸ್ರಜಮ್ ।
ಸಹಸ್ರಂ ವರನಾರೀಣಾಂ ನಾನಾವೇಷವಿಭೂಷಿತಮ್ ॥೩೩॥
ಪರಿವೃತ್ತೇಽರ್ಧರಾತ್ರೇ ತು ಪಾನನಿದ್ರಾವಶಙ್ಗತಮ್ ।
ಕ್ರೀಡಿತ್ವೋಪರತಂ ರಾತ್ರೌ ಪ್ರಸುಪ್ತಂ ಬಲವತ್ತದಾ ॥೩೪॥
ತತ್ಪ್ರಸುಪ್ತಂ ವಿರುರುಚೇ ನಿಃಶಬ್ದಾನ್ತರಭೂಷಿತಮ್ ।
ನಿಃಶಬ್ದಹಂಸಭ್ರಮರಂ ಯಥಾ ಪದ್ಮವನಂ ಮಹತ್ ॥೩೫॥
ತಾಸಾಂ ಸಂವೃತದಾನ್ತಾನಿ ಮೀಲಿತಾಕ್ಷೀಣಿ ಮಾರುತಿಃ।
ಅಪಶ್ಯತ್ಪದ್ಮಗನ್ಧೀನಿ ವದನಾನಿ ಸುಯೋಷಿತಾಮ್ ॥೩೬॥
ಪ್ರಬುದ್ಧಾನೀವ ಪದ್ಮಾನಿ ತಾಸಾಂ ಭೂತ್ವಾ ಕ್ಷಪಾಕ್ಷಯೇ ।
ಪುನಃಸಂವೃತಪತ್ರಾಣಿ ರಾತ್ರಾವಿವ ಬಭುಸ್ತದಾ ॥೩೭॥
ಇಮಾನಿ ಮುಖಪದ್ಮಾನಿ ನಿಯತಂ ಮತ್ತಷಟ್ಪದಾಃ।
ಅಮ್ಬುಜಾನೀವ ಫುಲ್ಲಾನಿ ಪ್ರಾರ್ಥಯನ್ತಿ ಪುನಃ ಪುನಃ॥೩೮॥
ಇತಿ ವಾಮನ್ಯತ ಶ್ರೀಮಾನುಪಪತ್ತ್ಯಾ ಮಹಾಕಪಿಃ।
ಮೇನೇ ಹಿ ಗುಣತಸ್ತಾನಿ ಸಮಾನಿ ಸಲಿಲೋದ್ಭವೈಃ॥೩೯॥
ಸಾ ತಸ್ಯ ಶುಶುಭೇ ಶಾಲಾ ತಾಭಿಃ ಸ್ತ್ರೀಭಿರ್ವಿರಾಜಿತಾ ।
ಶರದೀವ ಪ್ರಸನ್ನಾ ದ್ಯೌಸ್ತಾರಾಭಿರಭಿಶೋಭಿತಾ ॥೪೦॥
ಸ ಚ ತಾಭಿಃ ಪರಿವೃತಃ ಶುಶುಭೇ ರಾಕ್ಷಸಾಧಿಪಃ।
ಯಥಾ ಹ್ಯುಡುಪತಿಃ ಶ್ರೀಮಾಂಸ್ತಾರಾಭಿರಿವ ಸಂವೃತಃ॥೪೧॥
ಯಾಶ್ಚ್ಯವನ್ತೇಽಮ್ಬರಾತ್ತಾರಾಃ ಪುಣ್ಯಶೇಷಸಮಾವೃತಾಃ।
ಇಮಾಸ್ತಾಃ ಸಙ್ಗತಾಃ ಕೃತ್ಸ್ನಾ ಇತಿ ಮೇನೇ ಹರಿಸ್ತದಾ ॥೪೨॥
ತಾರಾಣಾಮಿವ ಸುವ್ಯಕ್ತಂ ಮಹತೀನಾಂ ಶುಭಾರ್ಚಿಷಾಮ್ ।
ಪ್ರಭಾವರ್ಣಪ್ರಸಾದಾಶ್ಚ ವಿರೇಜುಸ್ತತ್ರ ಯೋಷಿತಾಮ್ ॥೪೩॥
ವ್ಯಾವೃತ್ತಕಚಪೀನಸ್ರಕ್ಪ್ರಕೀರ್ಣವರಭೂಷಣಾಃ।
ಪಾನವ್ಯಾಯಾಮಕಾಲೇಷು ನಿದ್ರೋಪಹತಚೇತಸಃ॥೪೪॥
ವ್ಯಾವೃತ್ತತಿಲಕಾಃ ಕಾಶ್ಚಿತ್ಕಾಶ್ಚಿದುದ್ಭ್ರಾನ್ತನೂಪುರಾಃ।
ಪಾರ್ಶ್ವೇ ಗಲಿತಹಾರಾಶ್ಚ ಕಾಶ್ಚಿತ್ಪರಮಯೋಷಿತಃ॥೪೫॥
ಮುಕ್ತಾಹಾರವೃತಾಶ್ಚಾನ್ಯಾಃ ಕಾಶ್ಚಿತ್ಪ್ರಸ್ರಸ್ತವಾಸಸಃ।
ವ್ಯಾವಿದ್ಧರಶನಾದಾಮಾಃ ಕಿಶೋರ್ಯ ಇವ ವಾಹಿತಾಃ॥೪೬॥
ಅಕುಣ್ಡಲಧರಾಶ್ಚಾನ್ಯಾ ವಿಚ್ಛಿನ್ನಮೃದಿತಸ್ರಜಃ।
ಗಜೇನ್ದ್ರಮೃದಿತಾಃ ಫುಲ್ಲಾ ಲತಾ ಇವ ಮಹಾವನೇ ॥೪೭॥
ಚನ್ದ್ರಾಂಶುಕಿರಣಾಭಾಶ್ಚ ಹಾರಾಃ ಕಾಸಾಙ್ಚಿದುದ್ಗತಾಃ।
ಹಂಸಾ ಇವ ಬಭುಃ ಸುಪ್ತಾಃ ಸ್ತನಮಧ್ಯೇಷು ಯೋಷಿತಾಮ್ ॥೪೮॥
ಅಪರಾಸಾಂ ಚ ವೈದೂರ್ಯಾಃ ಕಾದಮ್ಬಾ ಇವ ಪಕ್ಷಿಣಃ।
ಹೇಮಸೂತ್ರಾಣಿ ಚಾನ್ಯಾಸಾಂ ಚಕ್ರವಾಕಾ ಇವಾಭವನ್ ॥೪೯॥
ಹಂಸಕಾರಣ್ಡವೋಪೇತಾಶ್ಚಕ್ರವಾಕೋಪಶೋಭಿತಾಃ।
ಆಪಗಾ ಇವ ತಾ ರೇಜುರ್ಜಘನೈಃ ಪುಲಿನೈರಿವ ॥೫೦॥
ಕಿಙ್ಕಿಣೀಜಾಲಸಙ್ಕಾಶಾಸ್ತಾ ಹೇಮವಿಪುಲಾಮ್ಬುಜಾಃ।
ಭಾವಗ್ರಾಹಾ ಯಶಸ್ತೀರಾಃ ಸುಪ್ತಾ ನದ್ಯ ಇವಾಬಭುಃ॥೫೧॥
ಮೃದುಷ್ವಙ್ಗೇಷು ಕಾಸಾಞ್ಚಿತ್ಕುಚಾಗ್ರೇಷು ಚ ಸಂಸ್ಥಿತಾಃ।
ಬಭೂವುರ್ಭೂಷಣಾನೀವ ಶುಭಾ ಭೂಷಣರಾಜಯಃ॥೫೨॥
ಅಂಶುಕಾನ್ತಾಶ್ಚ ಕಾಸಾಞ್ಚಿನ್ಮುಖಮಾರುತಕಮ್ಪಿತಾಃ।
ಉಪರ್ಯುಪರಿ ವಕ್ತ್ರಾಣಾಂ ವ್ಯಾಧೂಯನ್ತೇ ಪುನಃ ಪುನಃ॥೫೩॥
ತಾಃ ಪತಾಕಾ ಇವೋದ್ಧೂತಾಃ ಪತ್ನೀನಾಂ ರುಚಿರಪ್ರಭಾಃ।
ನಾನಾವರ್ಣಸುವರ್ಣಾನಾಂ ವಕ್ತ್ರಮೂಲೇಷು ರೇಜಿರೇ ॥೫೪॥
ವವಲ್ಗುಶ್ಚಾತ್ರ ಕಾಸಾಞ್ಚಿತ್ಕುಣ್ಡಲಾನಿ ಶುಭಾರ್ಚಿಷಾಮ್ ।
ಮುಖಮಾರುತಸಙ್ಕಮ್ಪೈರ್ಮನ್ದಂ ಮನ್ದಂ ಚ ಯೋಷಿತಾಮ್ ॥೫೫॥
ಶರ್ಕರಾಸವಗನ್ಧಃ ಸ ಪ್ರಕೃತ್ಯಾ ಸುರಭಿಃ ಸುಖಃ।
ತಾಸಾಂ ವದನನಿಃಶ್ವಾಸಃ ಸಿಷೇವೇ ರಾವಣಂ ತದಾ ॥೫೬॥
ರಾವಣಾನನಶಙ್ಕಾಶ್ಚ ಕಾಶ್ಚಿದ್ರಾವಣಯೋಷಿತಃ।
ಮುಖಾನಿ ಚ ಸಪತ್ನೀನಾಮುಪಾಜಿಘ್ರನ್ಪುನಃ ಪುನಃ॥೫೭॥
ಅತ್ಯರ್ಥಂ ಸಕ್ತಮನಸೋ ರಾವಣೇ ತಾ ವರಸ್ತ್ರಿಯಃ।
ಅಸ್ವತನ್ತ್ರಾಃ ಸಪತ್ನೀನಾಂ ಪ್ರಿಯಮೇವಾಚರಂಸ್ತದಾ ॥೫೮॥
ಬಾಹೂನುಪನಿಧಾಯಾನ್ಯಾಃ ಪಾರಿಹಾರ್ಯವಿಭೂಷಿತಾನ್ ।
ಅಂಶುಕಾನಿ ಚ ರಮ್ಯಾಣಿ ಪ್ರಮದಾಸ್ತತ್ರ ಶಿಶ್ಯಿರೇ ॥೫೯॥
ಅನ್ಯಾ ವಕ್ಷಸಿ ಚಾನ್ಯಸ್ಯಾಸ್ತಸ್ಯಾಃ ಕಾಚಿತ್ಪುನರ್ಭುಜಮ್ ।
ಅಪರಾ ತ್ವಙ್ಕಮನ್ಯಸ್ಯಾಸ್ತಸ್ಯಾಶ್ಚಾಪ್ಯಪರಾ ಕುಚೌ ॥೬೦॥
ಊರುಪಾರ್ಶ್ವಕಟೀಪೃಷ್ಠಮನ್ಯೋನ್ಯಸ್ಯ ಸಮಾಶ್ರಿತಾಃ।
ಪರಸ್ಪರನಿವಿಷ್ಟಾಙ್ಗ್ಯೋ ಮದಸ್ನೇಹವಶಾನುಗಾಃ॥೬೧॥
ಅನ್ಯೋನ್ಯಸ್ಯಾಙ್ಗಸಂಸ್ಪರ್ಶಾತ್ಪ್ರೀಯಮಾಣಾಃ ಸುಮಧ್ಯಮಾಃ।
ಏಕೀಕೃತಭುಜಾಃ ಸರ್ವಾಃ ಸುಷುಪುಸ್ತತ್ರ ಯೋಷಿತಃ॥೬೨॥
ಅನ್ಯೋನ್ಯಭುಜಸೂತ್ರೇಣ ಸ್ತ್ರೀಮಾಲಾಗ್ರಥಿತಾ ಹಿ ಸಾ ।
ಮಾಲೇವ ಗ್ರಥಿತಾ ಸೂತ್ರೇ ಶುಶುಭೇ ಮತ್ತಷಟ್ಪದಾ ॥೬೩॥
ಲತಾನಾಂ ಮಾಧವೇ ಮಾಸಿ ಫುಲ್ಲಾನಾಂ ವಾಯುಸೇವನಾತ್ ।
ಅನ್ಯೋನ್ಯಮಾಲಾಗ್ರಥಿತಂ ಸಂಸಕ್ತಕುಸುಮೋಚ್ಚಯಮ್ ॥೬೪॥
ಪ್ರತಿವೇಷ್ಟಿತಸುಸ್ಕನ್ಧಮನ್ಯೋನ್ಯಭ್ರಮರಾಕುಲಮ್ ।
ಆಸೀದ್ವನಮಿವೋದ್ಧೂತಂ ಸ್ತ್ರೀವನಂ ರಾವಣಸ್ಯ ತತ್ ॥೬೫॥
ಉಚಿತೇಷ್ವಪಿ ಸುವ್ಯಕ್ತಂ ನ ತಾಸಾಂ ಯೋಷಿತಾಂ ತದಾ ।
ವಿವೇಕಃ ಶಕ್ಯ ಆಧಾತುಂ ಭೂಷಣಾಙ್ಗಾಮ್ಬರಸ್ರಜಾಮ್ ॥೬೩॥
ರಾವಣೇ ಸುಖಸಂವಿಷ್ಟೇ ತಾಃ ಸ್ತ್ರಿಯೋ ವಿವಿಧಪ್ರಭಾಃ।
ಜ್ವಲನ್ತಃ ಕಾಞ್ಚನಾ ದೀಪಾಃ ಪ್ರೇಕ್ಷನ್ತೋ ನಿಮಿಷಾ ಇವ ॥೬೭॥
ರಾಜರ್ಷಿವಿಪ್ರದೈತ್ಯಾನಾಂ ಗನ್ಧರ್ವಾಣಾಂ ಚ ಯೋಷಿತಃ।
ರಕ್ಷಸಾಂ ಚಾಭವನ್ಕನ್ಯಾಸ್ತಸ್ಯ ಕಾಮವಶಙ್ಗತಾಃ॥೬೮॥
ಯುದ್ಧಕಾಮೇನ ತಾಃ ಸರ್ವಾ ರಾವಣೇನ ಹೃತಾಃ ಸ್ತ್ರಿಯಃ।
ಸಮದಾ ಮದನೇನೈವ ಮೋಹಿತಾಃ ಕಾಶ್ಚಿದಾಗತಾಃ॥೬೯॥
ನ ತತ್ರ ಕಾಶ್ಚಿತ್ ಪ್ರಮದಾಃ ಪ್ರಸಹ್ಯ
	ವೀರ್ಯೋಪಪನ್ನೇನ ಗುಣೇನ ಲಬ್ಧಾಃ।
ನ ಚಾನ್ಯಕಾಮಾಪಿ ನ ಚಾನ್ಯಪೂರ್ವಾ
	ವಿನಾ ವರಾರ್ಹಾಂ ಜನಕಾತ್ಮಜಾಂ ತು ॥೭೦॥
ನ ಚಾಕುಲೀನಾ ನ ಚ ಹೀನರೂಪಾ
	ನಾದಕ್ಷಿಣಾ ನಾನುಪಚಾರ ಯುಕ್ತಾ ।
ಭಾರ್ಯಾಭವತ್ತಸ್ಯ ನ ಹೀನಸತ್ತ್ವಾ
	ನ ಚಾಪಿ ಕಾನ್ತಸ್ಯ ನ ಕಾಮನೀಯಾ ॥೭೧॥
ಬಭೂವ ಬುದ್ಧಿಸ್ತು ಹರೀಶ್ವರಸ್ಯ
	ಯದೀದೃಶೀ ರಾಘವಧರ್ಮಪತ್ನೀ ।
ಇಮಾ ಮಹಾರಾಕ್ಷಸರಾಜಭಾರ್ಯಾಃ
	ಸುಜಾತಮಸ್ಯೇತಿ ಹಿ ಸಾಧುಬುದ್ಧೇಃ॥೭೨॥
ಪುನಶ್ಚ ಸೋಽಚಿನ್ತಯದಾ್ತ್ತರೂಪೋ
	ಧ್ರುವಂ ವಿಶಿಷ್ಟಾ ಗುಣತೋ ಹಿ ಸೀತಾ ।
ಅಥಾಯಮಸ್ಯಾಂ ಕೃತವಾನ್ ಮಹಾತ್ಮಾ
	ಲಙ್ಕೇಶ್ವರಃ ಕಷ್ಟಮನಾರ್ಯಕರ್ಮ ॥೭೩॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ನವಮಃ ಸರ್ಗಃ