ಅಥ ದ್ವಾದಶಃ ಸರ್ಗಃ
ಸ ತಸ್ಯ ಮಧ್ಯೇ ಭವನಸ್ಯ ಸಂಸ್ಥಿತೋ
	ಲತಾಗೃಹಾಂಶ್ಚಿತ್ರಗೃಹಾನ್ನಿಶಾಗೃಹಾನ್ ।
ಜಗಾಮ ಸೀತಾಂ ಪ್ರತಿದರ್ಶನೋತ್ಸುಕೋ
	ನ ಚೈವ ತಾಂ ಪಶ್ಯತಿ ಚಾರುದರ್ಶನಾಮ್ ॥೧॥
ಸ ಚಿನ್ತಯಾಮಾಸ ತತೋ ಮಹಾಕಪಿಃ
	ಪ್ರಿಯಾಮಪಶ್ಯನ್ರಘುನನ್ದನಸ್ಯ ತಾಮ್ ।
ಧ್ರುವಂ ನ ಸೀತಾ ಧ್ರಿಯತೇ ಯಥಾ ನ ಮೇ
	ವಿಚಿನ್ವತೋ ದರ್ಶನಮೇತಿ ಮೈಥಿಲೀ ॥೨॥
ಸಾ ರಾಕ್ಷಸಾನಾಂ ಪ್ರವರೇಣ ಜಾನಕೀ
	ಸ್ವಶೀಲಸಂರಕ್ಷಣತತ್ಪರಾ ಸತೀ ।
ಅನೇನ ನೂನಂ ಪ್ರತಿ ದುಷ್ಟಕರ್ಮಣಾ
	ಹತಾ ಭವೇದಾರ್ಯಪಥೇ ಪರೇ ಸ್ಥಿತಾ ॥೩॥
ವಿರೂಪರೂಪಾ ವಿಕೃತಾ ವಿವರ್ಚಸೋ
	ಮಹಾನನಾ ದೀರ್ಘವಿರೂಪದರ್ಶನಾಃ।
ಸಮೀಕ್ಷ್ಯ ತಾ ರಾಕ್ಷಸರಾಜಯೋಷಿತೋ
	ಭಯಾದ್ವಿನಷ್ಟಾ ಜನಕೇಶ್ವರಾತ್ಮಜಾ ॥೪॥
ಸೀತಾಮದೃಷ್ಟ್ವಾ ಹ್ಯನವಾಪ್ಯ ಪೌರುಷಂ
	ವಿಹೃತ್ಯ ಕಾಲಂ ಸಹ ವಾನರೈಶ್ಚಿರಮ್ ।
ನ ಮೇಽಸ್ತಿ ಸುಗ್ರೀವಸಮೀಪಗಾ ಗತಿಃ
	ಸುತೀಕ್ಷ್ಣದಣ್ಡೋ ಬಲವಾಂಶ್ಚ ವಾನರಃ॥೫॥
ದೃಷ್ಟಮನ್ತಃಪುರಂ ಸರ್ವಂ ದೃಷ್ಟಾ ರಾವಣಯೋಷಿತಃ।
ನ ಸೀತಾ ದೃಶ್ಯತೇ ಸಾಧ್ವೀ ವೃಥಾ ಜಾತೋ ಮಮ ಶ್ರಮಃ॥೬॥
ಕಿಂ ನು ಮಾಂ ವಾನರಾಃ ಸರ್ವೇ ಗತಂ ವಕ್ಷ್ಯನ್ತಿ ಸಙ್ಗತಾಃ।
ಗತ್ವಾ ತತ್ರ ತ್ವಯಾ ವೀರ ಕಿಂ ಕೃತಂ ತದ್ವದಸ್ವ ನಃ॥೭॥
ಅದೃಷ್ಟ್ವಾ ಕಿಂ ಪ್ರವಕ್ಷ್ಯಾಮಿ ತಾಮಹಂ ಜನಕಾತ್ಮಜಾಮ್ ।
ಧ್ರುವಂ ಪ್ರಾಯಮುಪಾಸಿಷ್ಯೇ ಕಾಲಸ್ಯ ವ್ಯತಿವರ್ತನೇ ॥೮॥
ಕಿಂ ವಾ ವಕ್ಷ್ಯತಿ ವೃದ್ಧಶ್ಚ ಜಾಮ್ಬವಾನಙ್ಗದಶ್ಚ ಸಃ।
ಗತಂ ಪಾರಂ ಸಮುದ್ರಸ್ಯ ವಾನರಾಶ್ಚ ಸಮಾಗತಾಃ॥೯॥
ಅನಿರ್ವೇದಃ ಶ್ರಿಯೋ ಮೂಲಮನಿರ್ವೇದಃ ಪರಂ ಸುಖಮ್ ।
ಅನಿರ್ವೇದೋ ಹಿ ಸತತಂ ಸರ್ವಾರ್ಥೇಷು ಪ್ರವರ್ತಕಃ॥೧೦॥
ಕರೋತಿ ಸಫಲಂ ಜನ್ತೋಃ ಕರ್ಮ ಯಚ್ಚ ಕರೋತಿ ಸಃ।
ತಸ್ಮಾದನಿರ್ವೇದಕರಂ ಯತ್ನಂ ಚೇಷ್ಟೇಽಹಮುತ್ತಮಮ್ ॥೧೧॥
ಭೂಯಸ್ತತ್ರ ವಿಚೇಷ್ಯಾಮಿ ನ ಯತ್ರ ವಿಚಯಃ ಕೃತಃ।
ಅದೃಷ್ಟಾಂಶ್ಚ ವಿಚೇಷ್ಯಾಮಿ ದೇಶಾನ್ರಾವಣಪಾಲಿತಾನ್ ॥೧೨॥
ಆಪಾನಶಾಲಾ ವಿಚಿತಾಸ್ತಥಾ ಪುಷ್ಪಗೃಹಾಣಿ ಚ ।
ಚಿತ್ರಶಾಲಾಶ್ಚ ವಿಚಿತಾ ಭೂಯಃ ಕ್ರೀಡಾಗೃಹಾಣಿ ಚ ॥೧೩॥
ನಿಷ್ಕುಟಾನ್ತರರಥ್ಯಾಶ್ಚ ವಿಮಾನಾನಿ ಚ ಸರ್ವಶಃ।
ಇತಿ ಸಞ್ಚಿನ್ತ್ಯ ಭೂಯೋಽಪಿ ವಿಚೇತುಮುಪಚಕ್ರಮೇ ॥೧೪॥
ಭೂಮೀಗೃಹಾಂಶ್ಚೈತ್ಯಗೃಹಾನ್ಗೃಹಾತಿಗೃಹಕಾನಪಿ ।
ಉತ್ಪತನ್ನಿಪತಂಶ್ಚಾಪಿ ತಿಷ್ಠನ್ಗಚ್ಛನ್ಪುನಃ ಕ್ವಚಿತ್ ॥೧೫॥
ಅಪವೃಣ್ವಂಶ್ಚ ದ್ವಾರಾಣಿ ಕಪಾಟಾನ್ಯವಘಟ್ಟಯನ್ ।
ಪ್ರವಿಶನ್ನಿಷ್ಪತಂಶ್ಚಾಪಿ ಪ್ರಪತನ್ನುತ್ಪತನ್ನಿವ ॥೧೬॥
ಸರ್ವಮಪ್ಯವಕಾಶಂ ಸ ವಿಚಚಾರ ಮಹಾಕಪಿಃ।
ಚತುರಙ್ಗುಲಮಾತ್ರೋಽಪಿ ನಾವಕಾಶಃ ಸ ವಿದ್ಯತೇ ।
ರಾವಣಾನ್ತಃಪುರೇ ತಸ್ಮಿನ್ಯಂ ಕಪಿರ್ನ ಜಗಾಮ ಸಃ॥೧೭॥
ಪ್ರಾಕರಾನ್ತರವೀಥ್ಯಶ್ಚ ವೇದಿಕಶ್ಚೈತ್ಯಸಂಶ್ರಯಾಃ।
ಶ್ವಭ್ರಾಶ್ಚ ಪುಷ್ಕರಿಣ್ಯಶ್ಚ ಸರ್ವಂ ತೇನಾವಲೋಕಿತಮ್ ॥೧೮॥
ರಾಕ್ಷಸ್ಯೋ ವಿವಿಧಾಕಾರಾ ವಿರೂಪಾ ವಿಕೃತಾಸ್ತಥಾ ।
ದೃಷ್ಟಾ ಹನುಮತಾ ತತ್ರ ನ ತು ಸಾ ಜನಕಾತ್ಮಜಾ ॥೧೯॥
ರೂಪೇಣಾಪ್ರತಿಮಾ ಲೋಕೇ ಪರಾ ವಿದ್ಯಾಧರಸ್ತ್ರಿಯಃ।
ದೃಷ್ಟಾ ಹನುಮತಾ ತತ್ರ ನ ತು ರಾಘವನನ್ದಿನೀ ॥೨೦॥
ನಾಗಕನ್ಯಾ ವರಾರೋಹಾಃ ಪೂರ್ಣಚನ್ದ್ರನಿಭಾನನಾಃ।
ದೃಷ್ಟಾ ಹನುಮತಾ ತತ್ರ ನ ತು ಸಾ ಜನಕಾತ್ಮಜಾ ॥೨೧॥
ಪ್ರಮಥ್ಯ ರಾಕ್ಷಸೇನ್ದ್ರೇಣ ನಾಗಕನ್ಯಾ ಬಲಾದ್ಧೃತಾಃ।
ದೃಷ್ಟಾ ಹನುಮತಾ ತತ್ರ ನ ಸಾ ಜನಕನನ್ದಿನೀ ॥೨೨॥
ಸೋಽಪಶ್ಯಂಸ್ತಾಂ ಮಹಾಬಾಹುಃ ಪಶ್ಯಂಶ್ಚಾನ್ಯಾ ವರಸ್ತ್ರಿಯಃ।
ವಿಷಸಾದ ಮಹಾಬಾಹುರ್ಹನೂಮಾನ್ಮಾರುತಾತ್ಮಜಃ॥೨೩॥
ಉದ್ಯೋಗಂ ವಾನರೇನ್ದ್ರಾಣಾಂ ಪ್ಲವನಂ ಸಾಗರಸ್ಯ ಚ ।
ವ್ಯರ್ಥಂ ವೀಕ್ಷ್ಯಾನಿಲಸುತಶ್ಚಿನ್ತಾಂ ಪುನರುಪಾಗತಃ॥೨೪॥
ಅವತೀರ್ಯ ವಿಮಾನಾಚ್ಚ ಹನೂಮಾನ್ಮಾರುತಾತ್ಮಜಃ।
ಚಿನ್ತಾಮುಪಜಗಾಮಾಥ ಶೋಕೋಪಹತಚೇತನಃ॥೨೫॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ದ್ವಾದಶಃ ಸರ್ಗಃ