ಅಥ ತ್ರಯೋದಶಃ ಸರ್ಗಃ
ವಿಮಾನಾತ್ತು ಸ ಸಙ್ಕ್ರಮ್ಯ ಪ್ರಾಕಾರಂ ಹರಿಯೂಥಪಃ।
ಹನೂಮಾನ್ವೇಗವಾನಾಸೀದ್ಯಥಾ ವಿದ್ಯುದ್ ಘನಾನ್ತರೇ ॥೧॥
ಸಮ್ಪರಿಕ್ರಮ್ಯ ಹನುಮಾನ್ರಾವಣಸ್ಯ ನಿವೇಶನಾನ್ ।
ಅದೃಷ್ಟ್ವಾ ಜಾನಕೀಂ ಸೀತಾಮಬ್ರವೀದ್ವಚನಂ ಕಪಿಃ॥೨॥
ಭೂಯಿಷ್ಠಂ ಲೋಲಿತಾ ಲಙ್ಕಾ ರಾಮಸ್ಯ ಚರತಾ ಪ್ರಿಯಮ್ ।
ನ ಹಿ ಪಶ್ಯಾಮಿ ವೈದೇಹೀಂ ಸೀತಾಂ ಸರ್ವಾಙ್ಗಶೋಭನಾಮ್ ॥೩॥
ಪಲ್ವಲಾನಿ ತಟಾಕಾನಿ ಸರಾಂಸಿ ಸರಿತಸ್ತಥಾ ।
ನದ್ಯೋಽನೂಪವನಾನ್ತಾಶ್ಚ ದುರ್ಗಾಶ್ಚ ಧರಣೀಧರಾಃ॥೪॥
ಲೋಲಿತಾ ವಸುಧಾ ಸರ್ವಾ ನ ಚ ಪಶ್ಯಾಮಿ ಜಾನಕೀಮ್ ।
ಇಹ ಸಮ್ಪಾತಿನಾ ಸೀತಾ ರಾವಣಸ್ಯ ನಿವೇಶನೇ ॥೫॥
ಆಖ್ಯಾತಾ ಗೃಧ್ರರಾಜೇನ ನ ಚ ಸಾ ದೃಶ್ಯತೇ ನ ಕಿಮ್ ।
ಕಿಂ ನು ಸೀತಾಥ ವೈದೇಹೀ ಮೈಥಿಲೀ ಜನಕಾತ್ಮಜಾ ।
ಉಪತಿಷ್ಠೇತ ವಿವಶಾ ರಾವಣೇನ ಹೃತಾ ಬಲಾತ್ ॥೬॥
ಕ್ಷಿಪ್ರಮುತ್ಪತತೋ ಮನ್ಯೇ ಸೀತಾಮಾದಾಯ ರಕ್ಷಸಃ।
ಬಿಭ್ಯತೋ ರಾಮಬಾಣಾನಾಮನ್ತರಾ ಪತಿತಾ ಭವೇತ್ ॥೭॥
ಅಥವಾ ಹ್ರಿಯಮಾಣಾಯಾಃ ಪಥಿ ಸಿದ್ಧನಿಷೇವಿತೇ ।
ಮನ್ಯೇ ಪತಿತಮಾರ್ಯಾಯಾ ಹೃದಯಂ ಪ್ರೇಕ್ಷ್ಯ ಸಾಗರಮ್ ॥೮॥
ರಾವಣಸ್ಯೋರುವೇಗೇನ ಭುಜಾಭ್ಯಾಂ ಪೀಡಿತೇನ ಚ ।
ತಯಾ ಮನ್ಯೇ ವಿಶಾಲಾಕ್ಷ್ಯಾ ತ್ಯಕ್ತಂ ಜೀವಿತಮಾರ್ಯಯಾ ॥೯॥
ಉಪರ್ಯುಪರಿ ಸಾ ನೂನಂ ಸಾಗರಂ ಕ್ರಮತಸ್ತದಾ ।
ವಿಚೇಷ್ಟಮಾನಾ ಪತಿತಾ ಸಮುದ್ರೇ ಜನಕಾತ್ಮಜಾ ॥೧೦॥
ಆಹೋ ಕ್ಷುದ್ರೇಣ ಚಾನೇನ ರಕ್ಷನ್ತೀ ಶೀಲಮಾತ್ಮನಃ।
ಅಬನ್ಧುರ್ಭಕ್ಷಿತಾ ಸೀತಾ ರಾವಣೇನ ತಪಸ್ವಿನೀ ॥೧೧॥
ಅಥ ವಾ ರಾಕ್ಷಸೇನ್ದ್ರಸ್ಯ ಪತ್ನೀಭಿರಸಿತೇಕ್ಷಣಾ ।
ಅದುಷ್ಟಾ ದುಷ್ಟಭಾವಾಭಿರ್ಭಕ್ಷಿತಾ ಸಾ ಭವಿಷ್ಯತಿ ॥೧೨॥
ಸಮ್ಪೂರ್ಣಚನ್ದ್ರಪ್ರತಿಮಂ ಪದ್ಮಪತ್ರನಿಭೇಕ್ಷಣಮ್ ।
ರಾಮಸ್ಯ ಧ್ಯಾಯತೀ ವಕ್ತ್ರಂ ಪಞ್ಚತ್ವಂ ಕೃಪಣಾ ಗತಾ ॥೧೩॥
ಹಾ ರಾಮ ಲಕ್ಷ್ಮಣೇತ್ಯೇವಂ ಹಾಯೋಧ್ಯೇ ಚೇತಿ ಮೈಥಿಲೀ ।
ವಿಲಪ್ಯ ಬಹು ವೈದೇಹೀ ನ್ಯಸ್ತದೇಹಾ ಭವಿಷ್ಯತಿ ॥೧೪॥
ಅಥವಾ ನಿಹಿತಾ ಮನ್ಯೇ ರಾವಣಸ್ಯ ನಿವೇಶನೇ ।
ಭೃಶಂ ಲಾಲಪ್ಯತೇ ಬಾಲಾ ಪಞ್ಜರಸ್ಥೇವ ಸಾರಿಕಾ ॥೧೫॥
ಜನಕಸ್ಯ ಕುಲೇ ಜಾತಾ ರಾಮಪತ್ನೀ ಸುಮಧ್ಯಮಾ ।
ಕಥಮುತ್ಪಲಪತ್ರಾಕ್ಷೀ ರಾವಣಸ್ಯ ವಶಂ ವ್ರಜೇತ್ ॥೧೬॥
ವಿನಷ್ಟಾ ವಾ ಪ್ರಣಷ್ಟಾ ವಾ ಮೃತಾ ವಾ ಜನಕಾತ್ಮಜಾ ।
ರಾಮಸ್ಯ ಪ್ರಿಯಭಾರ್ಯಸ್ಯ ನ ನಿವೇದಯಿತುಂ ಕ್ಷಮಮ್ ॥೧೭॥
ನಿವೇದ್ಯಮಾನೇ ದೋಷಃ ಸ್ಯಾದ್ದೋಷಃ ಸ್ಯಾದನಿವೇದನೇ ।
ಕಥಂ ನು ಖಲು ಕರ್ತವ್ಯಂ ವಿಷಮಂ ಪ್ರತಿಭಾತಿ ಮೇ ॥೧೮॥
ಅಸ್ಮಿನ್ನೇವಙ್ಗತೇ ಕಾರ್ಯೇ ಪ್ರಾಪ್ತಕಾಲಂ ಕ್ಷಮಂ ಚ ಕಿಮ್ ।
ಭವೇದಿತಿ ಮತಿಂ ಭೂಯೋ ಹನುಮಾನ್ಪ್ರವಿಚಾರಯನ್ ॥೧೯॥
ಯದಿ ಸೀತಾಮದೃಷ್ಟ್ವಾಹಂ ವಾನರೇನ್ದ್ರಪುರೀಮಿತಃ।
ಗಮಿಷ್ಯಾಮಿ ತತಃ ಕೋ ಮೇ ಪುರುಷಾರ್ಥೋ ಭವಿಷ್ಯತಿ ॥೨೦॥
ಮಮೇದಂ ಲಙ್ಘನಂ ವ್ಯರ್ಥಂ ಸಾಗರಸ್ಯ ಭವಿಷ್ಯತಿ ।
ಪ್ರವೇಶಶ್ಚೈವ ಲಙ್ಕಾಯಾಂ ರಾಕ್ಷಸಾನಾಂ ಚ ದರ್ಶನಮ್ ॥೨೧॥
ಕಿಂ ವಾ ವಕ್ಷ್ಯತಿ ಸುಗ್ರೀವೋ ಹರಯೋ ವಾಪಿ ಸಙ್ಗತಾಃ।
ಕಿಷ್ಕಿನ್ಧಾಮನುಸಮ್ಪ್ರಾಪ್ತಂ ತೌ ವಾ ದಶರಥಾತ್ಮಜೌ ॥೨೨॥
ಗತ್ವಾ ತು ಯದಿ ಕಾಕುತ್ಸ್ಥಂ ವಕ್ಷ್ಯಾಮಿ ಪರುಷಂ ವಚಃ।
ನ ದೃಷ್ಟೇತಿ ಮಯಾ ಸೀತಾ ತತಸ್ತ್ಯಕ್ಷ್ಯತಿ ಜೀವಿತಮ್ ॥೨೩॥
ಪರುಷಂ ದಾರುಣಂ ತೀಕ್ಷ್ಣಂ ಕ್ರೂರಮಿನ್ದ್ರಿಯತಾಪನಮ್ ।
ಸೀತಾನಿಮಿತ್ತಂ ದುರ್ವಾಕ್ಯಂ ಶ್ರುತ್ವಾ ಸ ನ ಭವಿಷ್ಯತಿ ॥೨೪॥
ತಂ ತು ಕೃಚ್ಛ್ರಗತಂ ದೃಷ್ಟ್ವಾ ಪಞ್ಚತ್ವಗತಮಾನಸಂ ।
ಭೃಶಾನುರಕ್ತಮೇಧಾವೀ ನ ಭವಿಷ್ಯತಿ ಲಕ್ಷ್ಮಣಃ॥೨೫॥
ವಿನಷ್ಟೌ ಭ್ರಾತರೌ ಶ್ರುತ್ವಾ ಭರತೋಽಪಿ ಮರಿಷ್ಯತಿ ।
ಭರತಂ ಚ ಮೃತಂ ದೃಷ್ಟ್ವಾ ಶತ್ರುಘ್ನೋ ನ ಭವಿಷ್ಯತಿ ॥೨೬॥
ಪುತ್ರಾನ್ ಮೃತಾನ್ ಸಮೀಕ್ಷ್ಯಾಥ ನ ಭವಿಷ್ಯನ್ತಿ ಮಾತರಃ।
ಕೌಸಲ್ಯಾ ಚ ಸುಮಿತ್ರಾ ಚ ಕೈಕೇಯೀ ಚ ನ ಸಂಶಯಃ॥೨೭॥
ಕೃತಜ್ಞಃ ಸತ್ಯಸನ್ಧಶ್ಚ ಸುಗ್ರೀವಃ ಪ್ಲವಗಾಧಿಪಃ।
ರಾಮಂ ತಥಾಗತಂ ದೃಷ್ಟ್ವಾ ತತಸ್ತ್ಯಕ್ಷ್ಯತಿ ಜೀವಿತಮ್ ॥೨೮॥
ದುರ್ಮನಾ ವ್ಯಥಿತಾ ದೀನಾ ನಿರಾನನ್ದಾ ತಪಸ್ವಿನೀ ।
ಪೀಡಿತಾ ಭರ್ತೃಶೋಕೇನ ರುಮಾ ತ್ಯಕ್ಷ್ಯತಿ ಜೀವಿತಮ್ ॥೨೯॥
ವಾಲಿಜೇನ ತು ದುಃಖೇನ ಪೀಡಿತಾ ಶೋಕಕರ್ಶಿತಾ ।
ಪಞ್ಚತ್ವಮಾಗತಾ ರಾಜ್ಞೀ ತಾರಾಪಿ ನ ಭವಿಷ್ಯತಿ ॥೩೦॥
ಮಾತಾಪಿತ್ರೋರ್ವಿನಾಶೇನ ಸುಗ್ರೀವ ವ್ಯಸನೇನ ಚ ।
ಕುಮಾರೋಽಪ್ಯಙ್ಗದಃ ತಸ್ಮಾದ್ ವಿಜಹಿಷ್ಯತಿ ಜೀವಿತಮ್ ॥೩೧॥
ಭರ್ತೃಜೇನ ತು ದುಃಖೇನ ಅಭಿಭೂತಾ ವನೌಕಸಃ।
ಶಿರಾಂಸ್ಯಭಿಹನಿಷ್ಯನ್ತಿ ತಲೈರ್ಮುಷ್ಟಿಭಿರೇವ ಚ ॥೩೨॥
ಸಾನ್ತ್ವೇನಾನುಪ್ರದಾನೇನ ಮಾನೇನ ಚ ಯಶಸ್ವಿನಾ ।
ಲಾಲಿತಾಃ ಕಪಿನಾಥೇನ ಪ್ರಾಣಾಂಸ್ತ್ಯಕ್ಷ್ಯನ್ತಿ ವಾನರಾಃ॥೩೩॥
ನ ವನೇಷು ನ ಶೈಲೇಷು ನ ನಿರೋಧೇಷು ವಾ ಪುನಃ।
ಕ್ರೀಡಾಮನುಭವಿಷ್ಯನ್ತಿ ಸಮೇತ್ಯ ಕಪಿಕುಞ್ಜರಾಃ॥೩೪॥
ಸಪುತ್ರದಾರಾಃ ಸಾಮಾತ್ಯಾ ಭರ್ತೃವ್ಯಸನಪೀಡಿತಾಃ।
ಶೈಲಾಗ್ರೇಭ್ಯಃ ಪತಿಷ್ಯನ್ತಿ ಸಮೇಷು ವಿಷಮೇಷು ಚ ॥೩೫॥
ವಿಷಮುದ್ಬನ್ಧನಂ ವಾಪಿ ಪ್ರವೇಶಂ ಜ್ವಲನಸ್ಯ ವಾ ।
ಉಪವಾಸಮಥೋ ಶಸ್ತ್ರಂ ಪ್ರಚರಿಷ್ಯನ್ತಿ ವಾನರಾಃ॥೩೬॥
ಘೋರಮಾರೋದನಂ ಮನ್ಯೇ ಗತೇ ಮಯಿ ಭವಿಷ್ಯತಿ ।
ಇಕ್ಷ್ವಾಕುಕುಲನಾಶಶ್ಚ ನಾಶಶ್ಚೈವ ವನೌಕಸಾಮ್ ॥೩೭॥
ಸೋಽಹಂ ನೈವ ಗಮಿಷ್ಯಾಮಿ ಕಿಷ್ಕಿನ್ಧಾಂ ನಗರೀಮಿತಃ।
ನ ಹಿ ಶಕ್ಷ್ಯಾಮ್ಯಹಂ ದ್ರಷ್ಟುಂ ಸುಗ್ರೀವಂ ಮೈಥಿಲೀಂ ವಿನಾ ॥೩೮॥
ಮಯ್ಯಗಚ್ಛತಿ ಚೇಹಸ್ಥೇ ಧರ್ಮಾತ್ಮಾನೌ ಮಹಾರಥೌ ।
ಆಶಯಾ ತೌ ಧರಿಷ್ಯೇತೇ ವಾನರಾಶ್ಚ ತರಸ್ವಿನಃ॥೩೯॥
ಹಸ್ತಾದಾನೋ ಮುಖಾದಾನೋ ನಿಯತೋ ವೃಕ್ಷಮೂಲಿಕಃ।
ವಾನಪ್ರಸ್ಥೋ ಭವಿಷ್ಯಾಮಿ ಹ್ಯದೃಷ್ಟ್ವಾ ಜನಕಾತ್ಮಜಾಮ್ ॥೪೦॥
ಸಾಗರಾನೂಪಜೇ ದೇಶೇ ಬಹುಮೂಲಫಲೋದಕೇ ।
ಚಿತಿಂ ಕೃತ್ವಾ ಪ್ರವೇಕ್ಷ್ಯಾಮಿ ಸಮಿದ್ಧಮರಣೀಸುತಮ್ ॥೪೧॥
ಉಪವಿಷ್ಟಸ್ಯ ವಾ ಸಮ್ಯಗ್ಲಿಙ್ಗಿನಂ ಸಾಧಯಿಷ್ಯತಃ।
ಶರೀರಂ ಭಕ್ಷಯಿಷ್ಯನ್ತಿ ವಾಯಸಾಃ ಶ್ವಾಪದಾನಿ ಚ ॥೪೨॥
ಇದಮಪ್ಯೃಷಿಭಿರ್ದೃಷ್ಟಂ ನಿರ್ಯಾಣಮಿತಿ ಮೇ ಮತಿಃ।
ಸಮ್ಯಗಾಪಃ ಪ್ರವೇಕ್ಷ್ಯಾಮಿ ನ ಚೇತ್ಪಶ್ಯಾಮಿ ಜಾನಕೀಮ್ ॥೪೩॥
ಸುಜಾತಮೂಲಾ ಸುಭಗಾ ಕೀರ್ತಿಮಾಲಾ ಯಶಸ್ವಿನೀ ।
ಪ್ರಭಗ್ನಾ ಚಿರರಾತ್ರಾಯ ಮಮ ಸೀತಾಮಪಶ್ಯತಃ॥೪೪॥
ತಾಪಸೋ ವಾ ಭವಿಷ್ಯಾಮಿ ನಿಯತೋ ವೃಕ್ಷಮೂಲಿಕಃ।
ನೇತಃ ಪ್ರತಿಗಮಿಷ್ಯಾಮಿ ತಾಮದೃಷ್ಟ್ವಾಸಿತೇಕ್ಷಣಾಮ್ ॥೪೫॥
ಯದಿ ತು ಪ್ರತಿಗಚ್ಛಾಮಿ ಸೀತಾಮನಧಿಗಮ್ಯ ತಾಮ್ ।
ಅಙ್ಗದಃ ಸಹಿತಃ ಸರ್ವೈರ್ವಾನರೈರ್ನ ಭವಿಷ್ಯತಿ ॥೪೬॥
ವಿನಾಶೇ ಬಹವೋ ದೋಷಾ ಜೀವನ್ಪ್ರಾಪ್ನೋತಿ ಭದ್ರಕಮ್ ।
ತಸ್ಮಾತ್ಪ್ರಾಣಾನ್ಧರಿಷ್ಯಾಮಿ ಧ್ರುವೋ ಜೀವತಿ ಸಙ್ಗಮಃ॥೪೭॥
ಏವಂ ಬಹುವಿಧಂ ದುಃಖಂ ಮನಸಾ ಧಾರಯನ್ ಬಹು ।
ನಾಧ್ಯಗಚ್ಛತ್ತದಾ ಪಾರಂ ಶೋಕಸ್ಯ ಕಪಿಕುಞ್ಜರಃ॥೪೮॥
ತತೋ ವಿಕ್ರಮಮಾಸಾದ್ಯ ಧೈರ್ಯವಾನ್ ಕಪಿಕುಞ್ಜರಃ।
ರಾವಣಂ ವಾ ವಧಿಷ್ಯಾಮಿ ದಶಗ್ರೀವಂ ಮಹಾಬಲಮ್ ।
ಕಾಮಮಸ್ತು ಹೃತಾ ಸೀತಾ ಪ್ರತ್ಯಾಚೀರ್ಣಂ ಭವಿಷ್ಯತಿ ॥೪೯॥
ಅಥವೈನಂ ಸಮುತ್ಕ್ಷಿಪ್ಯ ಉಪರ್ಯುಪರಿ ಸಾಗರಮ್ ।
ರಾಮಾಯೋಪಹರಿಷ್ಯಾಮಿ ಪಶುಂ ಪಶುಪತೇರಿವ ॥೫೦॥
ಇತಿ ಚಿನ್ತಾ ಸಮಾಪನ್ನಃ ಸೀತಾಮನಧಿಗಮ್ಯ ತಾಮ್ ।
ಧ್ಯಾನಶೋಕಪರೀತಾತ್ಮಾ ಚಿನ್ತಯಾಮಾಸ ವಾನರಃ॥೫೧॥
ಯಾವತ್ಸೀತಾಂ ನ ಪಶ್ಯಾಮಿ ರಾಮಪತ್ನೀಂ ಯಶಸ್ವಿನೀಮ್ ।
ತಾವದೇತಾಂ ಪುರೀಂ ಲಙ್ಕಾಂ ವಿಚಿನೋಮಿ ಪುನಃ ಪುನಃ॥೫೨॥
ಸಮ್ಪಾತಿ ವಚನಾಚ್ಚಾಪಿ ರಾಮಂ ಯದ್ಯಾನಯಾಮ್ಯಹಮ್ ।
ಅಪಶ್ಯನ್ರಾಘವೋ ಭಾರ್ಯಾಂ ನಿರ್ದಹೇತ್ಸರ್ವವಾನರಾನ್ ॥೫೩॥
ಇಹೈವ ನಿಯತಾಹಾರೋ ವತ್ಸ್ಯಾಮಿ ನಿಯತೇನ್ದ್ರಿಯಃ।
ನ ಮತ್ಕೃತೇ ವಿನಶ್ಯೇಯುಃ ಸರ್ವೇ ತೇ ನರವಾನರಾಃ॥೫೪॥
ಅಶೋಕವನಿಕಾ ಚಾಪಿ ಮಹತೀಯಂ ಮಹಾದ್ರುಮಾ ।
ಇಮಾಮಧಿಗಮಿಷ್ಯಾಮಿ ನಹೀಯಂ ವಿಚಿತಾ ಮಯಾ ॥೫೫॥
ವಸೂನ್ ರುದ್ರಾಂಸ್ತಥಾಽಽದಿತ್ಯಾನಶ್ವಿನೌ ಮರುತೋಽಪಿ ಚ ।
ನಮಸ್ಕೃತ್ವಾ ಗಮಿಷ್ಯಾಮಿ ರಕ್ಷಸಾಂ ಶೋಕವರ್ಧನಃ॥೫೬॥
ಜಿತ್ವಾ ತು ರಾಕ್ಷಸಾನ್ದೇವೀಮಿಕ್ಷ್ವಾಕುಕುಲನನ್ದಿನೀಮ್ ।
ಸಮ್ಪ್ರದಾಸ್ಯಾಮಿ ರಾಮಾಯ ಸಿದ್ಧೀಮಿವ ತಪಸ್ವಿನೇ ॥೫೭॥
ಸ ಮುಹೂರ್ತಮಿವ ಧ್ಯಾತ್ವಾ ಚಿನ್ತಾವಿಗ್ರಥಿತೇನ್ದ್ರಿಯಃ।
ಉದತಿಷ್ಠನ್ಮಹಾಬಾಹುರ್ಹನೂಮಾನ್ಮಾರುತಾತ್ಮಜಃ॥೫೮॥
ನಮೋಽಸ್ತು ರಾಮಾಯ ಸಲಕ್ಷ್ಮಣಾಯ
	ದೇವ್ಯೈ ಚ ತಸ್ಯೈ ಜನಕಾತ್ಮಜಾಯೈ ।
ನಮೋಽಸ್ತು ರುದ್ರೇನ್ದ್ರಯಮಾನಿಲೇಭ್ಯೋ
	ನಮೋಽಸ್ತು ಚನ್ದ್ರಾರ್ಕಮರುದ್ಗಣೇಭ್ಯಃ॥೫೯॥
ಸ ತೇಭ್ಯಸ್ತು ನಮಸ್ಕೃತ್ವಾ ಸುಗ್ರೀವಾಯ ಚ ಮಾರುತಿಃ।
ದಿಶಃ ಸರ್ವಾಃ ಸಮಾಲೋಕ್ಯ ಸೋಽಶೋಕವನಿಕಾಂ ಪ್ರತಿ ॥೬೦॥
ಸ ಗತ್ವಾ ಮನಸಾ ಪೂರ್ವಮಶೋಕವನಿಕಾಂ ಶುಭಾಮ್ ।
ಉತ್ತರಂ ಚಿನ್ತಯಾಮಾಸ ವಾನರೋ ಮಾರುತಾತ್ಮಜಃ॥೬೧॥
ಧ್ರುವಂ ತು ರಕ್ಷೋಬಹುಲಾ ಭವಿಷ್ಯತಿ ವನಾಕುಲಾ ।
ಅಶೋಕವನಿಕಾ ಪುಣ್ಯಾ ಸರ್ವಸಂಸ್ಕಾರಸಂಸ್ಕೃತಾ ॥೬೨॥
ರಕ್ಷಿಣಶ್ಚಾತ್ರ ವಿಹಿತಾ ನೂನಂ ರಕ್ಷನ್ತಿ ಪಾದಪಾನ್ ।
ಭಗವಾನಪಿ ವಿಶ್ವಾತ್ಮಾ ನಾತಿಕ್ಷೋಭಂ ಪ್ರವಾಯತಿ ॥೬೩॥
ಸಙ್ಕ್ಷಿಪ್ತೋಽಯಂ ಮಯಾಽಽತ್ಮಾ ಚ ರಾಮಾರ್ಥೇ ರಾವಣಸ್ಯ ಚ ।
ಸಿದ್ಧಿಂ ದಿಶನ್ತು ಮೇ ಸರ್ವೇ ದೇವಾಃ ಸರ್ಷಿಗಣಾಸ್ತ್ವಿಹ ॥೬೪॥
ಬ್ರಹ್ಮಾ ಸ್ವಯಮ್ಭೂರ್ಭಗವಾನ್ದೇವಾಶ್ಚೈವ ತಪಸ್ವಿನಃ।
ಸಿದ್ಧಿಮಗ್ನಿಶ್ಚ ವಾಯುಶ್ಚ ಪುರುಹೂತಶ್ಚ ವಜ್ರಭೃತ್ ॥೬೫॥
ವರುಣಃ ಪಾಶಹಸ್ತಶ್ಚ ಸೋಮಾದಿತ್ಯೌ ತಥೈವ ಚ ।
ಅಶ್ವಿನೌ ಚ ಮಹಾತ್ಮಾನೌ ಮರುತಃ ಸರ್ವ ಏವ ಚ ॥೬೬॥
ಸಿದ್ಧಿಂ ಸರ್ವಾಣಿ ಭೂತಾನಿ ಭೂತಾನಾಂ ಚೈವ ಯಃ ಪ್ರಭುಃ।
ದಾಸ್ಯನ್ತಿ ಮಮ ಯೇ ಚಾನ್ಯೇಽಪ್ಯದೃಷ್ಟಾಃ ಪಥಿ ಗೋಚರಾಃ॥೬೭॥
ತದುನ್ನಸಂ ಪಾಣ್ಡುರದನ್ತಮವ್ರಣಂ
	ಶುಚಿಸ್ಮಿತಂ ಪದ್ಮಪಲಾಶಲೋಚನಮ್ ।
ದ್ರಕ್ಷ್ಯೇ ತದಾರ್ಯಾವದನಂ ಕದಾನ್ವಹಂ
	ಪ್ರಸನ್ನತಾರಾಧಿಪತುಲ್ಯವರ್ಚಸಮ್ ॥೬೮॥
ಕ್ಷುದ್ರೇಣ ಹೀನೇನ ನೃಶಂಸಮೂರ್ತಿನಾ
	ಸುದಾರುಣಾಲಙ್ಕೃತವೇಷಧಾರಿಣಾ ।
ಬಲಾಭಿಭೂತಾ ಹ್ಯಬಲಾ ತಪಸ್ವಿನೀ
	ಕಥಂ ನು ಮೇ ದೃಷ್ಟಿಪಥೇಽದ್ಯ ಸಾ ಭವೇತ್ ॥೬೯॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ತ್ರಯೋದಶಃ ಸರ್ಗಃ