ಅಥ ಅಷ್ಟಾದಶಃ ಸರ್ಗಃ
ತಥಾ ವಿಪ್ರೇಕ್ಷಮಾಣಸ್ಯ ವನಂ ಪುಷ್ಪಿತಪಾದಪಮ್ ।
ವಿಚಿನ್ವತಶ್ಚ ವೈದೇಹೀಂ ಕಿಞ್ಚಿಚ್ಛೇಷಾ ನಿಶಾಭವತ್ ॥೧॥
ಷಡಙ್ಗವೇದವಿದುಷಾಂ ಕ್ರತುಪ್ರವರಯಾಜಿನಾಮ್ ।
ಶುಶ್ರಾವ ಬ್ರಹ್ಮಘೋಷಾನ್ ಸ ವಿರಾತ್ರೇ ಬ್ರಹ್ಮರಕ್ಷಸಾಮ್ ॥೨॥
ಅಥ ಮಙ್ಗಲವಾದಿತ್ರೈಃ ಶಬ್ದೈಃ ಶ್ರೋತ್ರಮನೋಹರೈಃ।
ಪ್ರಾಬೋಧ್ಯತ ಮಹಾಬಾಹುರ್ದಶಗ್ರೀವೋ ಮಹಾಬಲಃ॥೩॥
ವಿಬುಧ್ಯ ತು ಮಹಾಭಾಗೋ ರಾಕ್ಷಸೇನ್ದ್ರಃ ಪ್ರತಾಪವಾನ್ ।
ಸ್ರಸ್ತಮಾಲ್ಯಾಮ್ಬರಧರೋ ವೈದೇಹೀಮನ್ವಚಿನ್ತಯತ್ ॥೪॥
ಭೃಶಂ ನಿಯುಕ್ತಸ್ತಸ್ಯಾಂ ಚ ಮದನೇನ ಮದೋತ್ಕಟಃ।
ನ ತು ತಂ ರಾಕ್ಷಸಃ ಕಾಮಂ ಶಶಾಕಾತ್ಮನಿ ಗೂಹಿತುಮ್ ॥೫॥
ಸ ಸರ್ವಾಭರಣೈರ್ಯುಕ್ತೋ ಬಿಭ್ರಚ್ಛ್ರಿಯಮನುತ್ತಮಾಮ್ ।
ತಾಂ ನಗೈರ್ವಿವಿಧೈರ್ಜುಷ್ಟಾಂ ಸರ್ವಪುಷ್ಪಫಲೋಪಗೈಃ॥೬॥
ವೃತಾಂ ಪುಷ್ಕರಿಣೀಭಿಶ್ಚ ನಾನಾಪುಷ್ಪೋಪಶೋಭಿತಾಮ್ ।
ಸದಾ ಮತ್ತೈಶ್ಚ ವಿಹಗೈರ್ವಿಚಿತ್ರಾಂ ಪರಮಾದ್ಭುತೈಃ॥೭॥
ಈಹಾಮೃಗೈಶ್ಚ ವಿವಿಧೈರ್ವೃತಾಂ ದೃಷ್ಟಿಮನೋಹರೈಃ।
ವೀಥೀಃ ಸಮ್ಪ್ರೇಕ್ಷಮಾಣಶ್ಚ ಮಣಿಕಾಞ್ಚನತೋರಣಾಮ್ ॥೮॥
ನಾನಾಮೃಗಗಣಾಕೀರ್ಣಾಂ ಫಲೈಃ ಪ್ರಪತಿತೈರ್ವೃತಾಮ್ ।
ಅಶೋಕವನಿಕಾಮೇವ ಪ್ರಾವಿಶತ್ಸನ್ತತದ್ರುಮಾಮ್ ॥೯॥
ಅಙ್ಗನಾಶತಮಾತ್ರಂ ತು ತಂ ವ್ರಜನ್ತಮನುವ್ರಜನ್ ।
ಮಹೇನ್ದ್ರಮಿವ ಪೌಲಸ್ತ್ಯಂ ದೇವಗನ್ಧರ್ವಯೋಷಿತಃ॥೧೦॥
ದೀಪಿಕಾಃ ಕಾಞ್ಚನೀಃ ಕಾಶ್ಚಿಜ್ಜಗೃಹುಸ್ತತ್ರ ಯೋಷಿತಃ।
ಬಾಲವ್ಯಜನಹಸ್ತಾಶ್ಚ ತಾಲವೃನ್ತಾನಿ ಚಾಪರಾಃ॥೧೧॥
ಕಾಞ್ಚನೈಶ್ಚೈವ ಭೃಙ್ಗಾರೈರ್ಜಹ್ರುಃ ಸಲಿಲಮಗ್ರತಃ।
ಮಣ್ಡಲಾಗ್ರಾ ಬೃಸೀಶ್ಚೈವ ಗೃಹ್ಯಾನ್ಯಾಃ ಪೃಷ್ಠತೋ ಯಯುಃ॥೧೨॥
ಕಾಚಿದ್ರತ್ನಮಯೀಂ ಪಾತ್ರೀಂ ಪೂರ್ಣಾಂ ಪಾನಸ್ಯ ಭ್ರಾಜತೀಮ್ ।
ದಕ್ಷಿಣಾ ದಕ್ಷಿಣೇನೈವ ತದಾ ಜಗ್ರಾಹ ಪಾಣಿನಾ ॥೧೩॥
ರಾಜಹಂಸಪ್ರತೀಕಾಶಂ ಛತ್ರಂ ಪೂರ್ಣಶಶಿಪ್ರಭಮ್ ।
ಸೌವರ್ಣದಣ್ಡಮಪರಾ ಗೃಹೀತ್ವಾ ಪೃಷ್ಠತೋ ಯಯೌ ॥೧೪॥
ನಿದ್ರಾಮದಪರೀತಾಕ್ಷ್ಯೋ ರಾವಣಸ್ಯೋತ್ತಮಸ್ತ್ರಿಯಃ।
ಅನುಜಗ್ಮುಃ ಪತಿಂ ವೀರಂ ಘನಂ ವಿದ್ಯುಲ್ಲತಾ ಇವ ॥೧೫॥
ವ್ಯಾವಿದ್ಧಹಾರಕೇಯೂರಾಃ ಸಮಾಮೃದಿತವರ್ಣಕಾಃ।
ಸಮಾಗಲಿತಕೇಶಾನ್ತಾಃ ಸಸ್ವೇದವದನಾಸ್ತಥಾಃ॥೧೬॥
ಘೂರ್ಣನ್ತ್ಯೋ ಮದಶೇಷೇಣ ನಿದ್ರಯಾ ಚ ಶುಭಾನನಾಃ।
ಸ್ವೇದಕ್ಲಿಷ್ಟಾಙ್ಗಕುಸುಮಾಃ ಸುಮಾಲ್ಯಾಕುಲಮೂರ್ಧಜಾಃ॥೧೭॥
ಪ್ರಯಾನ್ತಂ ನೈರ್ಋತಪತಿಂ ನಾರ್ಯೋ ಮದಿರಲೋಚನಾಃ।
ಬಹುಮಾನಾಚ್ಚ ಕಾಮಾಚ್ಚ ಪ್ರಿಯಭಾರ್ಯಾಸ್ತಮನ್ವಯುಃ॥೧೮॥
ಸ ಚ ಕಾಮಪರಾಧೀನಃ ಪತಿಸ್ತಾಸಾಂ ಮಹಾಬಲಃ।
ಸೀತಾಸಕ್ತಮನಾ ಮನ್ದೋ ಮನ್ದಾಞ್ಚಿತಗತಿರ್ಬಭೌ ॥೧೯॥
ತತಃ ಕಾಞ್ಚೀನಿನಾದಂ ಚ ನೂಪುರಾಣಾಂ ಚ ನಿಃಸ್ವನಮ್ ।
ಶುಶ್ರಾವ ಪರಮಸ್ತ್ರೀಣಾಂ ಕಪಿರ್ಮಾರುತನನ್ದನಃ॥೨೦॥
ತಂ ಚಾಪ್ರತಿಮಕರ್ಮಾಣಮಚಿನ್ತ್ಯಬಲಪೌರುಷಮ್ ।
ದ್ವಾರದೇಶಮನುಪ್ರಾಪ್ತಂ ದದರ್ಶ ಹನುಮಾನ್ ಕಪಿಃ॥೨೧॥
ದೀಪಿಕಾಭಿರನೇಕಾಭಿಃ ಸಮನ್ತಾದವಭಾಸಿತಮ್ ।
ಗನ್ಧತೈಲಾವಸಿಕ್ತಾಭಿರ್ಧ್ರಿಯಮಾಣಾಭಿರಗ್ರತಃ॥೨೨॥
ಕಾಮದರ್ಪಮದೈರ್ಯುಕ್ತಂ ಜಿಹ್ಮತಾಮ್ರಾಯತೇಕ್ಷಣಮ್ ।
ಸಮಕ್ಷಮಿವ ಕನ್ದರ್ಪಮಪವಿದ್ಧಶರಾಸನಮ್ ॥೨೩॥
ಮಥಿತಾಮೃತಫೇನಾಭಮರಜೋ ವಸ್ತ್ರಮುತ್ತಮಮ್ ।
ಸಪುಷ್ಪಮವಕರ್ಷನ್ತಂ ವಿಮುಕ್ತಂ ಸಕ್ತಮಙ್ಗದೇ ॥೨೪॥
ತಂ ಪತ್ರವಿಟಪೇ ಲೀನಃ ಪತ್ರಪುಷ್ಪಶತಾವೃತಃ।
ಸಮೀಪಮುಪಸಙ್ಕ್ರಾನ್ತಂ ವಿಜ್ಞಾತುಮುಪಚಕ್ರಮೇ ॥೨೫॥
ಅವೇಕ್ಷಮಾಣಸ್ತು ತದಾ ದದರ್ಶ ಕಪಿಕುಞ್ಜರಃ।
ರೂಪಯೌವನಸಮ್ಪನ್ನಾ ರಾವಣಸ್ಯ ವರಸ್ತ್ರಿಯಃ॥೨೬॥
ತಾಭಿಃ ಪರಿವೃತೋ ರಾಜಾ ಸುರೂಪಾಭಿರ್ಮಹಾಯಶಾಃ।
ತನ್ಮೃಗದ್ವಿಜಸಙ್ಘುಷ್ಟಂ ಪ್ರವಿಷ್ಟಃ ಪ್ರಮದಾವನಮ್ ॥೨೭॥
ಕ್ಷೀಬೋ ವಿಚಿತ್ರಾಭರಣಃ ಶಙ್ಕುಕರ್ಣೋ ಮಹಾಬಲಃ।
ತೇನ ವಿಶ್ರವಸಃ ಪುತ್ರಃ ಸ ದೃಷ್ಟೋ ರಾಕ್ಷಸಾಧಿಪಃ॥೨೮॥
ವೃತಃ ಪರಮನಾರೀಭಿಸ್ತಾರಾಭಿರಿವ ಚನ್ದ್ರಮಾಃ।
ತಂ ದದರ್ಶ ಮಹಾತೇಜಾಸ್ತೇಜೋವನ್ತಂ ಮಹಾಕಪಿಃ॥೨೯॥
ರಾವಣೋಽಯಂ ಮಹಾಬಾಹುರಿತಿ ಸಞ್ಚಿನ್ತ್ಯ ವಾನರಃ।
ಸೋಽಯಮೇವ ಪುರಾ ಶೇತೇ ಪುರಮಧ್ಯೇ ಗೃಹೋತ್ತಮೇ ।
ಅವಪ್ಲುತೋ ಮಹಾತೇಜಾ ಹನೂಮಾನ್ಮಾರುತಾತ್ಮಜಃ॥೩೦॥
ಸ ತಥಾಪ್ಯುಗ್ರತೇಜಾಃ ಸ ನಿರ್ಧೂತಸ್ತಸ್ಯ ತೇಜಸಾ ।
ಪತ್ರೇ ಗುಹ್ಯಾನ್ತರೇ ಸಕ್ತೋ ಮತಿಮಾನ್ ಸಂವೃತೋಽಭವತ್ ॥೩೧॥
ಸ ತಾಮಸಿತಕೇಶಾನ್ತಾಂ ಸುಶ್ರೋಣೀಂ ಸಂಹತಸ್ತನೀಮ್ ।
ದಿದೃಕ್ಷುರಸಿತಾಪಾಙ್ಗೀಮುಪಾವರ್ತತ ರಾವಣಃ॥೩೨॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಅಷ್ಟಾದಶಃ ಸರ್ಗಃ