ಅಥ ಅಷ್ಟಾವಿಂಶಃ ಸರ್ಗಃ ಸಾ ರಾಕ್ಷಸೇನ್ದ್ರಸ್ಯ ವಚೋ ನಿಶಮ್ಯ ತದ್ ರಾವಣಸ್ಯ ಪ್ರಿಯಮಪ್ರಿಯಾರ್ತಾ । ಸೀತಾ ವಿತತ್ರಾಸ ಯಥಾ ವನಾನ್ತೇ ಸಿಂಹಾಭಿಪನ್ನಾ ಗಜರಾಜಕನ್ಯಾ ॥೧॥ ಸಾ ರಾಕ್ಷಸೀಮಧ್ಯಗತಾ ಚ ಭೀರು- ರ್ವಾಗ್ಭಿರ್ಭೃಶಂ ರಾವಣತರ್ಜಿತಾ ಚ । ಕಾನ್ತಾರಮಧ್ಯೇ ವಿಜನೇ ವಿಸೃಷ್ಟಾ ಬಾಲೇವ ಕನ್ಯಾ ವಿಲಲಾಪ ಸೀತಾ ॥೨॥ ಸತ್ಯಂ ಬತೇದಂ ಪ್ರವದನ್ತಿ ಲೋಕೇ ನಾಕಾಲಮೃತ್ಯುರ್ಭವತೀತಿ ಸನ್ತಃ। ಯತ್ರಾಹಮೇವಂ ಪರಿಭರ್ತ್ಸ್ಯಮಾನಾ ಜೀವಾಮಿ ಯಸ್ಮಾತ್ ಕ್ಷಣಮಪ್ಯಪುಣ್ಯಾ ॥೩॥ ಸುಖಾದ್ವಿಹೀನಂ ಬಹುದುಃಖಪೂರ್ಣ- ಮಿದಂ ತು ನೂನಂ ಹೃದಯಂ ಸ್ಥಿರಂ ಮೇ । ವಿದೀರ್ಯತೇ ಯನ್ನ ಸಹಸ್ರಧಾದ್ಯ ವಜ್ರಾಹತಂ ಶೃಙ್ಗಮಿವಾಚಲಸ್ಯ ॥೪॥ ನೈವಾಸ್ತಿ ನೂನಂ ಮಮ ದೋಷಮತ್ರ ವಧ್ಯಾಹಮಸ್ಯಾಪ್ರಿಯದರ್ಶನಸ್ಯ । ಭಾವಂ ನ ಚಾಸ್ಯಾಹಮನುಪ್ರದಾತು- ಮಲಂ ದ್ವಿಜೋ ಮನ್ತ್ರಮಿವಾದ್ವಿಜಾಯ ॥೫॥ ತಸ್ಮಿನ್ನನಾಗಚ್ಛತಿ ಲೋಕನಾಥೇ ಗರ್ಭಸ್ಥಜನ್ತೋರಿವ ಶಲ್ಯಕೃನ್ತಃ। ನೂನಂ ಮಮಾಙ್ಗಾನ್ಯಚಿರಾದನಾರ್ಯಃ ಶಸ್ತ್ರೈಃ ಶಿತೈಶ್ಛೇತ್ಸ್ಯತಿ ರಾಕ್ಷಸೇನ್ದ್ರಃ॥೬॥ ದುಃಖಂ ಬತೇದಂ ನನು ದುಃಖಿತಾಯಾ ಮಾಸೌ ಚಿರಾಯಾಭಿಗಮಿಷ್ಯತೋ ದ್ವೌ । ಬದ್ಧಸ್ಯ ವಧ್ಯಸ್ಯ ಯಥಾ ನಿಶಾನ್ತೇ ರಾಜೋಪರೋಧಾದಿವ ತಸ್ಕರಸ್ಯ ॥೭॥ ಹಾ ರಾಮ ಹಾ ಲಕ್ಷ್ಮಣ ಹಾ ಸುಮಿತ್ರೇ ಹಾ ರಾಮಮಾತಃ ಸಹ ಮೇ ಜನನ್ಯಃ। ಏಷಾ ವಿಪದ್ಯಾಮ್ಯಹಮಲ್ಪಭಾಗ್ಯಾ ಮಹಾರ್ಣವೇ ನೌರಿವ ಮೂಢವಾತಾ ॥೮॥ ತರಸ್ವಿನೌ ಧಾರಯತಾ ಮೃಗಸ್ಯ ಸತ್ತ್ವೇನ ರೂಪಂ ಮನುಜೇನ್ದ್ರಪುತ್ರೌ । ನೂನಂ ವಿಶಸ್ತೌ ಮಮ ಕಾರಣಾತ್ತೌ ಸಿಂಹರ್ಷಭೌ ದ್ವಾವಿವ ವೈದ್ಯುತೇನ ॥೯॥ ನೂನಂ ಸ ಕಾಲೋ ಮೃಗರೂಪಧಾರೀ ಮಾಮಲ್ಪಭಾಗ್ಯಾಂ ಲುಲುಭೇ ತದಾನೀಮ್ । ಯತ್ರಾರ್ಯಪುತ್ರೌ ವಿಸಸರ್ಜ ಮೂಢಾ ರಾಮಾನುಜಂ ಲಕ್ಷ್ಮಣಪೂರ್ವಜಂ ಚ ॥೧೦॥ ಹಾ ರಾಮ ಸತ್ಯವ್ರತ ದೀರ್ಘಬಾಹೋ ಹಾ ಪೂರ್ಣಚನ್ದ್ರಪ್ರತಿಮಾನವಕ್ತ್ರ । ಹಾ ಜೀವಲೋಕಸ್ಯ ಹಿತಃ ಪ್ರಿಯಶ್ಚ ವಧ್ಯಾಂ ನ ಮಾಂ ವೇತ್ಸಿ ಹಿ ರಾಕ್ಷಸಾನಾಮ್ ॥೧೧॥ ಅನನ್ಯದೇವತ್ವಮಿಯಂ ಕ್ಷಮಾ ಚ ಭೂಮೌ ಚ ಶಯ್ಯಾ ನಿಯಮಶ್ಚ ಧರ್ಮೇ । ಪತಿವ್ರತಾತ್ವಂ ವಿಫಲಂ ಮಮೇದಂ ಕೃತಂ ಕೃತಘ್ನೇಷ್ವಿವ ಮಾನುಷಾಣಾಮ್ ॥೧೨॥ ಮೋಘೋ ಹಿ ಧರ್ಮಶ್ಚರಿತೋ ಮಮಾಯಂ ತಥೈಕಪತ್ನೀತ್ವಮಿದಂ ನಿರರ್ಥಕಮ್ । ಯಾ ತ್ವಾಂ ನ ಪಶ್ಯಾಮಿ ಕೃಶಾ ವಿವರ್ಣಾ ಹೀನಾ ತ್ವಯಾ ಸಙ್ಗಮನೇ ನಿರಾಶಾ ॥೧೩॥ ಪಿತುರ್ನಿದೇಶಂ ನಿಯಮೇನ ಕೃತ್ವಾ ವನಾನ್ನಿವೃತ್ತಶ್ಚರಿತವ್ರತಶ್ಚ । ಸ್ತ್ರೀಭಿಸ್ತು ಮನ್ಯೇ ವಿಪುಲೇಕ್ಷಣಾಭಿಃ ಸಂರಂಸ್ಯಸೇ ವೀತಭಯಃ ಕೃತಾರ್ಥಃ॥೧೪॥ ಅಹಂ ತು ರಾಮ ತ್ವಯಿ ಜಾತಕಾಮಾ ಚಿರಂ ವಿನಾಶಾಯ ನಿಬದ್ಧಭಾವಾ । ಮೋಘಂ ಚರಿತ್ವಾಥ ತಪೋವ್ರತಂ ಚ ತ್ಯಕ್ಷ್ಯಾಮಿ ಧಿಗ್ಜೀವಿತಮಲ್ಪಭಾಗ್ಯಾಮ್ ॥೧೫॥ ಸಞ್ಜೀವಿತಂ ಕ್ಷಿಪ್ರಮಹಂ ತ್ಯಜೇಯಂ ವಿಷೇಣ ಶಸ್ತ್ರೇಣ ಶಿತೇನ ವಾಪಿ । ವಿಷಸ್ಯ ದಾತಾ ನ ತು ಮೇಽಸ್ತಿ ಕಶ್ಚಿ- ಚ್ಛಸ್ತ್ರಸ್ಯ ವಾ ವೇಶ್ಮನಿ ರಾಕ್ಷಸಸ್ಯ ॥೧೬॥ ಶೋಕಾಭಿತಪ್ತಾ ಬಹುಧಾ ವಿಚಿನ್ತ್ಯ ಸೀತಾಥ ವೇಣೀಗ್ರಥನಂ ಗೃಹೀತ್ವಾ । ಉದ್ಬದ್ಧ್ಯ ವೇಣ್ಯುದ್ಗ್ರಥನೇನ ಶೀಘ್ರ- ಮಹಂ ಗಮಿಷ್ಯಾಮಿ ಯಮಸ್ಯ ಮೂಲಮ್ ॥೧೭॥ ಉಪಸ್ಥಿತಾ ಸಾ ಮೃದುಸರ್ವಗಾತ್ರೀ ಶಾಖಾಂ ಗೃಹೀತ್ವಾ ಚ ನಗಸ್ಯ ತಸ್ಯ । ತಸ್ಯಾಸ್ತು ರಾಮಂ ಪರಿಚಿನ್ತಯನ್ತ್ಯಾ ರಾಮಾನುಜಂ ಸ್ವಂ ಚ ಕುಲಂ ಶುಭಾಙ್ಗ್ಯಾಃ॥೧೮॥ ತಸ್ಯಾ ವಿಶೋಕಾನಿ ತದಾ ಬಹೂನಿ ಧೈರ್ಯಾರ್ಜಿತಾನಿ ಪ್ರವರಾಣಿ ಲೋಕೇ । ಪ್ರಾದುರ್ನಿಮಿತ್ತಾನಿ ತದಾ ಬಭೂವುಃ ಪುರಾಪಿ ಸಿದ್ಧಾನ್ಯುಪಲಕ್ಷಿತಾನಿ ॥೧೯॥ ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಅಷ್ಟಾವಿಂಶಃ ಸರ್ಗಃ