ಅಥ ಏಕೋನತ್ರಿಂಶಃ ಸರ್ಗಃ
ತಥಾಗತಾಂ ತಾಂ ವ್ಯಥಿತಾಮನಿನ್ದಿತಾಂ
	ವ್ಯಪೇತಹರ್ಷಾಂ ಪರಿದೀನಮಾನಸಾಮ್ ।
ಶುಭಾಂ ನಿಮಿತ್ತಾನಿ ಶುಭಾನಿ ಭೇಜಿರೇ
	ನರಂ ಶ್ರಿಯಾ ಜುಷ್ಟಮಿವೋಪಜೀವಿನಃ॥೧॥
ತಸ್ಯಾಃ ಶುಭಂ ವಾಮಮರಾಲಪಕ್ಷ್ಮ
	ರಾಜೀವೃತಂ ಕೃಷ್ಣವಿಶಾಲಶುಕ್ಲಮ್ ।
ಪ್ರಾಸ್ಪನ್ದತೈಕಂ ನಯನಂ ಸುಕೇಶ್ಯಾ
	ಮೀನಾಹತಂ ಪದ್ಮಮಿವಾಭಿತಾಮ್ರಮ್ ॥೨॥
ಭುಜಶ್ಚ ಚಾರ್ವಞ್ಚಿತಪೀನವೃತ್ತಃ
	ಪರಾರ್ಧ್ಯಕಾಲಾಗುರುಚನ್ದನಾರ್ಹಃ।
ಅನುತ್ತಮೇನಾಧ್ಯುಷಿತಃ ಪ್ರಿಯೇಣ
	ಚಿರೇಣ ವಾಮಃ ಸಮವೇಪತಾಶು ॥೩॥
ಗಜೇನ್ದ್ರಹಸ್ತಪ್ರತಿಮಶ್ಚ ಪೀನ-
	ಸ್ತಯೋರ್ದ್ವಯೋಃ ಸಂಹತಯೋಸ್ತು ಜಾತಃ।
ಪ್ರಸ್ಪನ್ದಮಾನಃ ಪುನರೂರುರಸ್ಯಾ
	ರಾಮಂ ಪುರಸ್ತಾತ್ಸ್ಥಿತಮಾಚಚಕ್ಷೇ ॥೪॥
ಶುಭಂ ಪುನರ್ಹೇಮಸಮಾನವರ್ಣ-
	ಮೀಷದ್ರಜೋಧ್ವಸ್ತಮಿವಾಮಲಾಕ್ಷ್ಯಾಃ ।
ವಾಸಃ ಸ್ಥಿತಾಯಾಃಶಿಖರಾಗ್ರದನ್ತ್ಯಾಃ
	ಕಿಞ್ಚಿತ್ಪರಿಸ್ರಂಸತ ಚಾರುಗಾತ್ರ್ಯಾಃ॥೫॥
ಏತೈರ್ನಿಮಿತ್ತೈರಪರೈಶ್ಚ ಸುಭ್ರೂಃ
	ಸಞ್ಚೋದಿತಾ ಪ್ರಾಗಪಿ ಸಾಧುಸಿದ್ಧೈಃ।
ವಾತಾತಪಕ್ಲಾನ್ತಮಿವ ಪ್ರಣಷ್ಟಂ
	ವರ್ಷೇಣ ಬೀಜಂ ಪ್ರತಿಸಞ್ಜಹರ್ಷ ॥೬॥
ತಸ್ಯಾಃ ಪುನರ್ಬಿಮ್ಬಫಲಾಧರೋಷ್ಠಂ
	ಸ್ವಕ್ಷಿಭ್ರುಕೇಶಾನ್ತಮರಾಲಪಕ್ಷ್ಮ ।
ವಕ್ತ್ರಂ ಬಭಾಸೇ ಸ್ಮಿತಶುಕ್ಲದಂಷ್ಟ್ರಂ
	ರಾಹೋರ್ಮುಖಾಚ್ಚನ್ದ್ರ ಇವ ಪ್ರಮುಕ್ತಃ॥೭॥
ಸಾ ವೀತಶೋಕಾ ವ್ಯಪನೀತತನ್ದ್ರೀ
	ಶಾನ್ತಜ್ವರಾ ಹರ್ಷವಿವೃದ್ಧಸತ್ತ್ವಾ ।
ಅಶೋಭತಾರ್ಯಾ ವದನೇನ ಶುಕ್ಲೇ
	ಶೀತಾಂಶುನಾ ರಾತ್ರಿರಿವೋದಿತೇನ ॥೮॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಏಕೋನತ್ರಿಂಶಃ ಸರ್ಗಃ