ಅಥ ದ್ವಾತ್ರಿಂಶಃ ಸರ್ಗಃ
ತತಃ ಶಾಖಾನ್ತರೇ ಲೀನಂ ದೃಷ್ಟ್ವಾ ಚಲಿತಮಾನಸಾ ।
ವೇಷ್ಟಿತಾರ್ಜುನವಸ್ತ್ರಂ ತಂ ವಿದ್ಯುತ್ಸಙ್ಘಾತಪಿಙ್ಗಲಮ್ ॥೧॥
ಸಾ ದದರ್ಶ ಕಪಿಂ ತತ್ರ ಪ್ರಶ್ರಿತಂ ಪ್ರಿಯವಾದಿನಮ್ ।
ಫುಲ್ಲಾಶೋಕೋತ್ಕರಾಭಾಸಂ ತಪ್ತಚಾಮೀಕರೇಕ್ಷಣಮ್ ॥೨॥
ಸಾಥ ದೃಷ್ಟ್ವಾ ಹರಿಶ್ರೇಷ್ಠಂ ವಿನೀತವದವಸ್ಥಿತಮ್ ।
ಮೈಥಿಲೀ ಚಿನ್ತಯಾಮಾಸ ವಿಸ್ಮಯಂ ಪರಮಂ ಗತಾ ॥೩॥
ಅಹೋ ಭೀಮಮಿದಂ ಸತ್ತ್ವಂ ವಾನರಸ್ಯ ದುರಾಸದಮ್ ।
ದುರ್ನಿರೀಕ್ಷ್ಯಮಿದಂ ಮತ್ವಾ ಪುನರೇವ ಮುಮೋಹ ಸಾ ॥೪॥
ವಿಲಲಾಪ ಭೃಶಂ ಸೀತಾ ಕರುಣಂ ಭಯಮೋಹಿತಾ ।
ರಾಮ ರಾಮೇತಿ ದುಃಖಾರ್ತಾ ಲಕ್ಷ್ಮಣೇತಿ ಚ ಭಾಮಿನೀ ॥೫॥
ರುರೋದ ಸಹಸಾ ಸೀತಾ ಮನ್ದಮನ್ದಸ್ವರಾ ಸತೀ ।
ಸಾಥ ದೃಷ್ಟ್ವಾ ಹರಿವರಂ ವಿನೀತವದುಪಾಗತಮ್ ।
ಮೈಥಿಲೀ ಚಿನ್ತಯಾಮಾಸ ಸ್ವಪ್ನೋಽಯಮಿತಿ ಭಾಮಿನೀ ॥೬॥
ಸಾ ವೀಕ್ಷಮಾಣಾ ಪೃಥುಭುಗ್ನವಕ್ತ್ರಂ
	ಶಾಖಾಮೃಗೇನ್ದ್ರಸ್ಯ ಯಥೋಕ್ತಕಾರಮ್ ।
ದದರ್ಶ ಪಿಙ್ಗಪ್ರವರಂ ಮಹಾರ್ಹಂ
	ವಾತಾತ್ಮಜಂ ಬುದ್ಧಿಮತಾಂ ವರಿಷ್ಠಮ್ ॥೭॥
ಸಾ ತಂ ಸಮೀಕ್ಷ್ಯೈವ ಭೃಶಂ ವಿಪನ್ನಾ
	ಗತಾಸುಕಲ್ಪೇವ ಬಭೂವ ಸೀತಾ ।
ಚಿರೇಣ ಸಞ್ಜ್ಞಾಂ ಪ್ರತಿಲಭ್ಯ ಚೈವಂ
	ವಿಚಿನ್ತಯಾಮಾಸ ವಿಶಾಲನೇತ್ರಾ ॥೮॥
ಸ್ವಪ್ನೋ ಮಯಾಯಂ ವಿಕೃತೋಽದ್ಯ ದೃಷ್ಟಃ
	ಶಾಖಾಮೃಗಃ ಶಾಸ್ತ್ರಗಣೈರ್ನಿಷಿದ್ಧಃ।
ಸ್ವಸ್ತ್ಯಸ್ತು ರಾಮಾಯ ಸ ಲಕ್ಷ್ಮಣಾಯ
	ತಥಾ ಪಿತುರ್ಮೇ ಜನಕಸ್ಯ ರಾಜ್ಞಃ॥೯॥
ಸ್ವಪ್ನೋ ಹಿ ನಾಯಂ ನಹಿ ಮೇಽಸ್ತಿ ನಿದ್ರಾ
	ಶೋಕೇನ ದುಃಖೇನ ಚ ಪೀಡಿತಾಯಾಃ।
ಸುಖಂ ಹಿ ಮೇ ನಾಸ್ತಿ ಯತೋ ವಿಹೀನಾ
	ತೇನೇನ್ದುಪೂರ್ಣಪ್ರತಿಮಾನನೇನ ॥೧೦॥
ರಾಮೇತಿ ರಾಮೇತಿ ಸದೈವ ಬುದ್ಧ್ಯಾ
	ವಿಚಿನ್ತ್ಯ ವಾಚಾ ಬ್ರುವತೀ ತಮೇವ ।
ತಸ್ಯಾನುರೂಪಂ ಚ ಕಥಾಂ ತದರ್ಥ-
	ಮೇವಂ ಪ್ರಪಶ್ಯಾಮಿ ತಥಾ ಶೃಣೋಮಿ ॥೧೧॥
ಅಹಂ ಹಿ ತಸ್ಯಾದ್ಯ ಮನೋಭವೇನ
	ಸಮ್ಪೀಡಿತಾ ತದ್ಗತಸರ್ವಭಾವಾ ।
ವಿಚಿನ್ತಯನ್ತೀ ಸತತಂ ತಮೇವ
	ತಥೈವ ಪಶ್ಯಾಮಿ ತಥಾ ಶೃಣೋಮಿ ॥೧೨॥
ಮನೋರಥಃ ಸ್ಯಾದಿತಿ ಚಿನ್ತಯಾಮಿ
	ತಥಾಪಿ ಬುದ್ಧ್ಯಾಪಿ ವಿತರ್ಕಯಾಮಿ ।
ಕಿಂ ಕಾರಣಂ ತಸ್ಯ ಹಿ ನಾಸ್ತಿ
	ರೂಪಂ ಸುವ್ಯಕ್ತರೂಪಶ್ಚ ವದತ್ಯಯಂ ಮಾಮ್ ॥೧೩॥
ನಮೋಽಸ್ತು ವಾಚಸ್ಪತಯೇ ಸವಜ್ರಿಣೇ
	ಸ್ವಯಮ್ಭುವೇ ಚೈವ ಹುತಾಶನಾಯ ।
ಅನೇನ ಚೋಕ್ತಂ ಯದಿದಂ ಮಮಾಗ್ರತೋ
	ವನೌಕಸಾ ತಚ್ಚ ತಥಾಸ್ತು ನಾನ್ಯಥಾ ॥೧೪॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ದ್ವಾತ್ರಿಂಶಃ ಸರ್ಗಃ