ಅಥ ತ್ರಿಚತ್ವಾರಿಂಶಃ ಸರ್ಗಃ
ತತಃ ಸ ಕಿಙ್ಕರಾನ್ ಹತ್ವಾ ಹನೂಮಾನ್ ಧ್ಯಾನಮಾಸ್ಥಿತಃ।
ವನಂ ಭಗ್ನಂ ಮಯಾ ಚೈತ್ಯಪ್ರಾಸಾದೋ ನ ವಿನಾಶಿತಃ॥೧॥
ತಸ್ಮಾತ್ಪ್ರಾಸಾದಮದ್ಯೈವಮಿಮಂ ವಿಧ್ವಂಸಯಾಮ್ಯಹಮ್ ।
ಇತಿ ಸಞ್ಚಿನ್ತ್ಯ ಹನುಮಾನ್ಮನಸಾದರ್ಶಯನ್ ಬಲಮ್ ॥೨॥
ಚೈತ್ಯಪ್ರಾಸಾದಮುತ್ಪ್ಲುತ್ಯ ಮೇರುಶೃಙ್ಗಮಿವೋನ್ನತಮ್ ।
ಆರುರೋಹ ಹರಿಶ್ರೇಷ್ಠೋ ಹನೂಮಾನ್ಮಾರುತಾತ್ಮಜಃ॥೩॥
ಆರುಹ್ಯ ಗಿರಿಸಙ್ಕಾಶಂ ಪ್ರಾಸಾದಂ ಹರಿಯೂಥಪಃ।
ಬಭೌ ಸ ಸುಮಹಾತೇಜಾಃ ಪ್ರತಿಸೂರ್ಯ ಇವೋದಿತಃ॥೪॥
ಸಮ್ಪ್ರಧೃಷ್ಯ ತು ದುರ್ಧರ್ಷಶ್ಚೈತ್ಯಪ್ರಾಸಾದಮುನ್ನತಮ್ ।
ಹನೂಮಾನ್ಪ್ರಜ್ವಲಁಲ್ಲಕ್ಷ್ಮ್ಯಾ ಪಾರಿಯಾತ್ರೋಪಮೋಽಭವತ್ ॥೫॥
ಸ ಭೂತ್ವಾ ಸುಮಹಾಕಾಯಃ ಪ್ರಭಾವಾನ್ ಮಾರುತಾತ್ಮಜಃ।
ಧೃಷ್ಟಮಾಸ್ಫೋಟಯಾಮಾಸ ಲಙ್ಕಾಂ ಶಬ್ದೇನ ಪೂರಯನ್ ॥೬॥
ತಸ್ಯಾಸ್ಫೋಟಿತಶಬ್ದೇನ ಮಹತಾ ಶ್ರೋತ್ರಘಾತಿನಾ ।
ಪೇತುರ್ವಿಹಙ್ಗಮಾಸ್ತತ್ರ ಚೈತ್ಯಪಾಲಾಶ್ಚ ಮೋಹಿತಾಃ॥೭॥
ಅಸ್ತ್ರವಿಜ್ಜಯತಾಂ ರಾಮೋ ಲಕ್ಷ್ಮಣಶ್ಚ ಮಹಾಬಲಃ।
ರಾಜಾ ಜಯತಿ ಸುಗ್ರೀವೋ ರಾಘವೇಣಾಭಿಪಾಲಿತಃ॥೮॥
ದಾಸೋಽಹಂ ಕೋಸಲೇನ್ದ್ರಸ್ಯ ರಾಮಸ್ಯಾಕ್ಲಿಷ್ಟಕರ್ಮಣಃ।
ಹನುಮಾಞ್ಶತ್ರುಸೈನ್ಯಾನಾಂ ನಿಹನ್ತಾ ಮಾರುತಾತ್ಮಜಃ॥೯॥
ನ ರಾವಣಸಹಸ್ರಂ ಮೇ ಯುದ್ಧೇ ಪ್ರತಿಬಲಂ ಭವೇತ್ ।
ಶಿಲಾಭಿಸ್ತು ಪ್ರಹರತಃ ಪಾದಪೈಶ್ಚ ಸಹಸ್ರಶಃ॥೧೦॥
ಅರ್ದಯಿತ್ವಾ ಪುರೀಂ ಲಙ್ಕಾಮಭಿವಾದ್ಯ ಚ ಮೈಥಿಲೀಮ್ ।
ಸಮೃದ್ಧಾರ್ಥೋ ಗಮಿಷ್ಯಾಮಿ ಮಿಷತಾಂ ಸರ್ವರಕ್ಷಸಾಮ್ ॥೧೧॥
ಏವಮುಕ್ತ್ವಾ ಮಹಾಕಾಯಶ್ಚೈತ್ಯಸ್ಥೋ ಹರಿಯೂಥಪಃ।
ನನಾದ ಭೀಮನಿರ್ಹ್ರಾದೋ ರಕ್ಷಸಾಂ ಜನಯನ್ಭಯಮ್ ॥೧೨॥
ತೇನ ನಾದೇನ ಮಹತಾ ಚೈತ್ಯಪಾಲಾಃ ಶತಂ ಯಯುಃ।
ಗೃಹೀತ್ವಾ ವಿವಿಧಾನಸ್ತ್ರಾನ್ಪ್ರಾಸಾನ್ಖಡ್ಗಾನ್ಪರಶ್ವಧಾನ್ ॥೧೩॥
ವಿಸೃಜನ್ತೋ ಮಹಾಕಾಯಾ ಮಾರುತಿಂ ಪರ್ಯವಾರಯನ್ ।
ತೇ ಗದಾಭಿರ್ವಿಚಿತ್ರಾಭಿಃ ಪರಿಘೈಃ ಕಾಞ್ಚನಾಙ್ಗದೈಃ॥೧೪॥
ಆಜಗ್ಮುರ್ವಾನರಶ್ರೇಷ್ಠಂ ಬಾಣೈಶ್ಚಾದಿತ್ಯಸನ್ನಿಭೈಃ।
ಆವರ್ತ ಇವ ಗಙ್ಗಾಯಾಸ್ತೋಯಸ್ಯ ವಿಪುಲೋ ಮಹಾನ್ ॥೧೫॥
ಪರಿಕ್ಷಿಪ್ಯ ಹರಿಶ್ರೇಷ್ಠಂ ಸ ಬಭೌ ರಕ್ಷಸಾಂ ಗಣಃ।
ತತೋ ವಾತಾತ್ಮಜಃ ಕ್ರುದ್ಧೋ ಭೀಮರೂಪಂ ಸಮಾಸ್ಥಿತಃ॥೧೬॥
ಪ್ರಾಸಾದಸ್ಯ ಮಹಾಂಸ್ತಸ್ಯ ಸ್ತಮ್ಭಂ ಹೇಮಪರಿಷ್ಕೃತಮ್ ।
ಉತ್ಪಾಟಯಿತ್ವಾ ವೇಗೇನ ಹನೂಮಾನ್ಮಾರುತಾತ್ಮಜಃ॥೧೭॥
ತತಸ್ತಂ ಭ್ರಾಮಯಾಮಾಸ ಶತಧಾರಂ ಮಹಾಬಲಃ।
ತತ್ರ ಚಾಗ್ನಿಸ್ಸಮಭವತ್ಪ್ರಾಸಾದಶ್ಚಾಪ್ಯದಹ್ಯತ ॥೧೮॥
ದಹ್ಯಮಾನಂ ತತೋ ದೃಷ್ಟ್ವಾ ಪ್ರಾಸಾದಂ ಹರಿಯೂಥಪಃ।
ಸ ರಾಕ್ಷಸಶತಂ ಹತ್ವಾ ವಜ್ರೇಣೇನ್ದ್ರ ಇವಾಸುರಾನ್ ॥೧೯॥
ಅನ್ತರಿಕ್ಷಸ್ಥಿತಃ ಶ್ರೀಮಾನಿದಂ ವಚನಮಬ್ರವೀತ್ ।
ಮಾದೃಶಾನಾಂ ಸಹಸ್ರಾಣಿ ವಿಸೃಷ್ಟಾನಿ ಮಹಾತ್ಮನಾಮ್ ॥೨೦॥
ಬಲಿನಾಂ ವಾನರೇನ್ದ್ರಾಣಾಂ ಸುಗ್ರೀವವಶವರ್ತಿನಾಮ್ ।
ಅಟನ್ತಿ ವಸುಧಾಂ ಕೃತ್ಸ್ನಾಂ ವಯಮನ್ಯೇ ಚ ವಾನರಾಃ॥೨೧॥
ದಶನಾಗಬಲಾಃ ಕೇಚಿತ್ಕೇಚಿದ್ದಶಗುಣೋತ್ತರಾಃ।
ಕೇಚಿನ್ನಾಗಸಹಸ್ರಸ್ಯ ಬಭೂವುಸ್ತುಲ್ಯವಿಕ್ರಮಾಃ॥೨೨॥
ಸನ್ತಿ ಚೌಘಬಲಾಃ ಕೇಚಿತ್ ಸನ್ತಿ ವಾಯುಬಲೋಪಮಾಃ।
ಅಪ್ರಮೇಯಬಲಾಃ ಕೇಚಿತ್ ತತ್ರಾಸನ್ಹರಿಯೂಥಪಾಃ॥೨೩॥
ಈದೃಗ್ವಿಧೈಸ್ತು ಹರಿಭಿರ್ವೃತೋ ದನ್ತನಖಾಯುಧೈಃ।
ಶತೈಃ ಶತಸಹಸ್ರೈಶ್ಚ ಕೋಟೀಭಿಶ್ಚಾಯುತೈರಪಿ ॥೨೪॥
ಆಗಮಿಷ್ಯತಿ ಸುಗ್ರೀವಃ ಸರ್ವೇಷಾಂ ವೋ ನಿಷೂದನಃ।
ನೇಯಮಸ್ತಿ ಪುರೀ ಲಙ್ಕಾ ನ ಯೂಯಂ ನ ಚ ರಾವಣಃ।
ಯಸ್ಯ ತ್ವಿಕ್ಷ್ವಾಕುವೀರೇಣ ಬದ್ಧಂ ವೈರಂ ಮಹಾತ್ಮನಾ ॥೨೫॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ತ್ರಿಚತ್ವಾರಿಂಶಃ ಸರ್ಗಃ