ಅಥ ಚತುಶ್ಚತ್ವಾರಿಂಶಃ ಸರ್ಗಃ
ಸನ್ದಿಷ್ಟೋ ರಾಕ್ಷಸೇನ್ದ್ರೇಣ ಪ್ರಹಸ್ತಸ್ಯ ಸುತೋ ಬಲೀ ।
ಜಮ್ಬುಮಾಲೀ ಮಹಾದಂಷ್ಟ್ರೋ ನಿರ್ಜಗಾಮ ಧನುರ್ಧರಃ॥೧॥
ರಕ್ತಮಾಲ್ಯಾಮ್ಬರಧರಃ ಸ್ರಗ್ವೀ ರುಚಿರಕುಣ್ಡಲಃ।
ಮಹಾನ್ವಿವೃತ್ತನಯನಶ್ಚಣ್ಡಃ ಸಮರದುರ್ಜಯಃ॥೨॥
ಧನುಃ ಶಕ್ರಧನುಃ ಪ್ರಖ್ಯಂ ಮಹದ್ ರುಚಿರಸಾಯಕಮ್ ।
ವಿಸ್ಫಾರಯಾಣೋ ವೇಗೇನ ವಜ್ರಾಶನಿಸಮಸ್ವನಮ್ ॥೩॥
ತಸ್ಯ ವಿಸ್ಫಾರಘೋಷೇಣ ಧನುಷೋ ಮಹತಾ ದಿಶಃ।
ಪ್ರದಿಶಶ್ಚ ನಭಶ್ಚೈವ ಸಹಸಾ ಸಮಪೂರ್ಯತ ॥೪॥
ರಥೇನ ಖರಯುಕ್ತೇನ ತಮಾಗತಮುದೀಕ್ಷ್ಯ ಸಃ।
ಹನೂಮಾನ್ವೇಗಸಮ್ಪನ್ನೋ ಜಹರ್ಷ ಚ ನನಾದ ಚ ॥೫॥
ತಂ ತೋರಣವಿಟಙ್ಕಸ್ಥಂ ಹನೂಮನ್ತಂ ಮಹಾಕಪಿಮ್ ।
ಜಮ್ಬುಮಾಲೀ ಮಹಾತೇಜಾ ವಿವ್ಯಾಧ ನಿಶಿತೈಃ ಶರೈಃ॥೬॥
ಅರ್ಧಚನ್ದ್ರೇಣ ವದನೇ ಶಿರಸ್ಯೇಕೇನ ಕರ್ಣಿನಾ ।
ಬಾಹ್ವೋರ್ವಿವ್ಯಾಧ ನಾರಾಚೈರ್ದಶಭಿಸ್ತು ಕಪೀಶ್ವರಮ್ ॥೭॥
ತಸ್ಯ ತಚ್ಛುಶುಭೇ ತಾಮ್ರಂ ಶರೇಣಾಭಿಹತಂ ಮುಖಮ್ ।
ಶರದೀವಾಮ್ಬುಜಂ ಫುಲ್ಲಂ ವಿದ್ಧಂ ಭಾಸ್ಕರರಶ್ಮಿನಾ ॥೮॥
ತತ್ತಸ್ಯ ರಕ್ತಂ ರಕ್ತೇನ ರಞ್ಜಿತಂ ಶುಶುಭೇ ಮುಖಮ್ ।
ಯಥಾಽಽಕಾಶೇ ಮಹಾಪದ್ಮಂ ಸಿಕ್ತಂ ಕಾಞ್ಚನಬಿನ್ದುಭಿಃ॥೯॥
ಚುಕೋಪ ಬಾಣಾಭಿಹತೋ ರಾಕ್ಷಸಸ್ಯ ಮಹಾಕಪಿಃ।
ತತಃ ಪಾರ್ಶ್ವೇಽತಿವಿಪುಲಾಂ ದದರ್ಶ ಮಹತೀಂ ಶಿಲಾಮ್ ॥೧೦॥
ತರಸಾ ತಾಂ ಸಮುತ್ಪಾಟ್ಯ ಚಿಕ್ಷೇಪ ಜವವದ್ ಬಲೀ ।
ತಾಂ ಶರೈರ್ದಶಭಿಃ ಕ್ರುದ್ಧಸ್ತಾಡಯಾಮಾಸ ರಾಕ್ಷಸಃ॥೧೧॥
ವಿಪನ್ನಂ ಕರ್ಮ ತದ್ದೃಷ್ಟ್ವಾ ಹನೂಮಾಂಶ್ಚಣ್ಡವಿಕ್ರಮಃ।
ಸಾಲಂ ವಿಪುಲಮುತ್ಪಾಟ್ಯ ಭ್ರಾಮಯಾಮಾಸ ವೀರ್ಯವಾನ್ ॥೧೨॥
ಭ್ರಾಮಯನ್ತಂ ಕಪಿಂ ದೃಷ್ಟ್ವಾ ಸಾಲವೃಕ್ಷಂ ಮಹಾಬಲಮ್ ।
ಚಿಕ್ಷೇಪ ಸುಬಹೂನ್ಬಾಣಾಞ್ಜಮ್ಬುಮಾಲೀ ಮಹಾಬಲಃ॥೧೩॥
ಸಾಲಂ ಚತುರ್ಭಿಶ್ಚಿಚ್ಛೇದ ವಾನರಂ ಪಞ್ಚಭಿರ್ಭುಜೇ ।
ಉರಸ್ಯೇಕೇನ ಬಾಣೇನ ದಶಭಿಸ್ತು ಸ್ತನಾನ್ತರೇ ॥೧೪॥
ಸ ಶರೈಃ ಪೂರಿತತನುಃ ಕ್ರೋಧೇನ ಮಹತಾ ವೃತಃ।
ತಮೇವ ಪರಿಘಂ ಗೃಹ್ಯ ಭ್ರಾಮಯಾಮಾಸ ವೇಗಿತಃ॥೧೫॥
ಅತಿವೇಗೋಽತಿವೇಗೇನ ಭ್ರಾಮಯಿತ್ವಾ ಬಲೋತ್ಕಟಃ।
ಪರಿಘಂ ಪಾತಯಾಮಾಸ ಜಮ್ಬುಮಾಲೇರ್ಮಹೋರಸಿ ॥೧೬॥
ತಸ್ಯ ಚೈವ ಶಿರೋ ನಾಸ್ತಿ ನ ಬಾಹೂ ಜಾನುನೀ ನ ಚ ।
ನ ಧನುರ್ನ ರಥೋ ನಾಶ್ವಾಸ್ತತ್ರಾದೃಶ್ಯನ್ತ ನೇಷವಃ॥೧೭॥
ಸ ಹತಸ್ತರಸಾ ತೇನ ಜಮ್ಬುಮಾಲೀ ಮಹಾರಥಃ।
ಪಪಾತ ನಿಹತೋ ಭೂಮೌ ಚೂರ್ಣಿತಾಙ್ಗ ಇವ ದ್ರುಮಃ॥೧೮॥
ಜಮ್ಬುಮಾಲಿಂ ಸುನಿಹತಂ ಕಿಙ್ಕರಾಂಶ್ಚ ಮಹಾಬಲಾನ್ ।
ಚುಕ್ರೋಧ ರಾವಣಃ ಶ್ರುತ್ವಾ ಕ್ರೋಧಸಂರಕ್ತಲೋಚನಃ॥೧೯॥
ಸ ರೋಷಸಂವರ್ತಿತತಾಮ್ರಲೋಚನಃ
	ಪ್ರಹಸ್ತಪುತ್ರೇ ನಿಹತೇ ಮಹಾಬಲೇ ।
ಅಮಾತ್ಯಪುತ್ರಾನತಿವೀರ್ಯವಿಕ್ರಮಾನ್
	ಸಮಾದಿದೇಶಾಶು ನಿಶಾಚರೇಶ್ವರಃ॥೨೦॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಚತುಶ್ಚತ್ವಾರಿಂಶಃ ಸರ್ಗಃ