ಅಥ ಅಷ್ಟಚತ್ವಾರಿಂಶಃ ಸರ್ಗಃ ತತಸ್ತು ರಕ್ಷೋಽಧಿಪತಿರ್ಮಹಾತ್ಮಾ ಹನೂಮತಾಕ್ಷೇ ನಿಹತೇ ಕುಮಾರೇ । ಮನಃ ಸಮಾಧಾಯ ಸ ದೇವಕಲ್ಪಂ ಸಮಾದಿದೇಶೇನ್ದ್ರಜಿತಂ ಸರೋಷಃ॥೧॥ ತ್ವಮಸ್ತ್ರವಿಚ್ಛಸ್ತ್ರಭೃತಾಂ ವರಿಷ್ಠಃ ಸುರಾಸುರಾಣಾಮಪಿ ಶೋಕದಾತಾ । ಸುರೇಷು ಸೇನ್ದ್ರೇಷು ಚ ದೃಷ್ಟಕರ್ಮಾ ಪಿತಾಮಹಾರಾಧನಸಞ್ಚಿತಾಸ್ತ್ರಃ॥೨॥ ತ್ವದಸ್ತ್ರಬಲಮಾಸಾದ್ಯ ಸಸುರಾಃ ಸಮರುದ್ಗಣಾಃ। ನ ಶೇಕುಃ ಸಮರೇ ಸ್ಥಾತುಂ ಸುರೇಶ್ವರಸಮಾಶ್ರಿತಾಃ॥೩॥ ನ ಕಶ್ಚಿತ್ತ್ರಿಷು ಲೋಕೇಷು ಸಂಯುಗೇನ ಗತಶ್ರಮಃ। ಭುಜವೀರ್ಯಾಭಿಗುಪ್ತಶ್ಚ ತಪಸಾ ಚಾಭಿರಕ್ಷಿತಃ। ದೇಶಕಾಲಪ್ರಧಾನಶ್ಚ ತ್ವಮೇವ ಮತಿಸತ್ತಮಃ॥೪॥ ನ ತೇಽಸ್ತ್ಯಶಕ್ಯಂ ಸಮರೇಷು ಕರ್ಮಣಾಂ ನ ತೇಽಸ್ತ್ಯಕಾರ್ಯಂ ಮತಿಪೂರ್ವಮನ್ತ್ರಣೇ । ನ ಸೋಽಸ್ತಿ ಕಶ್ಚಿತ್ತ್ರಿಷು ಸಙ್ಗ್ರಹೇಷು ನ ವೇದ ಯಸ್ತೇಽಸ್ತ್ರಬಲಂ ಬಲಂ ಚ ॥೫॥ ಮಮಾನುರೂಪಂ ತಪಸೋ ಬಲಂ ಚ ತೇ ಪರಾಕ್ರಮಶ್ಚಾಸ್ತ್ರಬಲಂ ಚ ಸಂಯುಗೇ । ನ ತ್ವಾಂ ಸಮಾಸಾದ್ಯ ರಣಾವಮರ್ದೇ ಮನಃ ಶ್ರಮಂ ಗಚ್ಛತಿ ನಿಶ್ಚಿತಾರ್ಥಮ್ ॥೬॥ ನಿಹತಾ ಕಿಙ್ಕರಾಃ ಸರ್ವೇ ಜಮ್ಬುಮಾಲೀ ಚ ರಾಕ್ಷಸಃ। ಅಮಾತ್ಯಪುತ್ರಾ ವೀರಾಶ್ಚ ಪಞ್ಚ ಸೇನಾಗ್ರಗಾಮಿನಃ॥೭॥ ಬಲಾನಿ ಸುಸಮೃದ್ಧಾನಿ ಸಾಶ್ವನಾಗರಥಾನಿ ಚ । ಸಹೋದರಸ್ತೇ ದಯಿತಃ ಕುಮಾರೋಽಕ್ಷಶ್ಚ ಸೂದಿತಃ। ನ ತು ತೇಷ್ವೇವ ಮೇ ಸಾರೋ ಯಸ್ತ್ವಯ್ಯರಿನಿಷೂದನ ॥೮॥ ಇದಂ ಚ ದೃಷ್ಟ್ವಾ ನಿಹತಂ ಮಹದ್ ಬಲಂ ಕಪೇಃ ಪ್ರಭಾವಂ ಚ ಪರಾಕ್ರಮಂ ಚ । ತ್ವಮಾತ್ಮನಶ್ಚಾಪಿ ನಿರೀಕ್ಷ್ಯ ಸಾರಂ ಕುರುಷ್ವ ವೇಗಂ ಸ್ವಬಲಾನುರೂಪಮ್ ॥೯॥ ಬಲಾವಮರ್ದಸ್ತ್ವಯಿ ಸಂನಿಕೃಷ್ಟೇ ಯಥಾ ಗತೇ ಶಾಮ್ಯತಿ ಶಾನ್ತಶತ್ರೌ । ತಥಾ ಸಮೀಕ್ಷ್ಯಾತ್ಮಬಲಂ ಪರಂ ಚ ಸಮಾರಭಸ್ವಾಸ್ತ್ರಭೃತಾಂ ವರಿಷ್ಠ ॥೧೦॥ ನ ವೀರ ಸೇನಾ ಗಣಶಶ್ಚ್ಯವನ್ತಿ ನ ವಜ್ರಮಾದಾಯ ವಿಶಾಲಸಾರಮ್ । ನ ಮಾರುತಸ್ಯಾಸ್ತಿ ಗತಿಪ್ರಮಾಣಂ ನ ಚಾಗ್ನಿಕಲ್ಪಃ ಕರಣೇನ ಹನ್ತುಮ್ ॥೧೧॥ ತಮೇವಮರ್ಥಂ ಪ್ರಸಮೀಕ್ಷ್ಯ ಸಮ್ಯಕ್ ಸ್ವಕರ್ಮಸಾಮ್ಯಾದ್ಧಿ ಸಮಾಹಿತಾತ್ಮಾ । ಸ್ಮರಂಶ್ಚ ದಿವ್ಯಂ ಧನುಷೋಽಸ್ಯ ವೀರ್ಯಂ ವ್ರಜಾಕ್ಷತಂ ಕರ್ಮ ಸಮಾರಭಸ್ವ ॥೧೨॥ ನ ಖಲ್ವಿಯಂ ಮತಿಶ್ರೇಷ್ಠ ಯತ್ತ್ವಾಂ ಸಮ್ಪ್ರೇಷಯಾಮ್ಯಹಮ್ । ಇಯಂ ಚ ರಾಜಧರ್ಮಾಣಾಂ ಕ್ಷತ್ರಸ್ಯ ಚ ಮತಿರ್ಮತಾ ॥೧೩॥ ನಾನಾಶಸ್ತ್ರೇಷು ಸಙ್ಗ್ರಾಮೇ ವೈಶಾರದ್ಯಮರಿನ್ದಮ । ಅವಶ್ಯಮೇವ ಬೋದ್ಧವ್ಯಂ ಕಾಮ್ಯಶ್ಚ ವಿಜಯೋ ರಣೇ ॥೧೪॥ ತತಃ ಪಿತುಸ್ತದ್ವಚನಂ ನಿಶಮ್ಯ ಪ್ರದಕ್ಷಿಣಂ ದಕ್ಷಸುತಪ್ರಭಾವಃ। ಚಕಾರ ಭರ್ತಾರಮತಿತ್ವರೇಣ ರಣಾಯ ವೀರಃ ಪ್ರತಿಪನ್ನಬುದ್ಧಿಃ॥೧೫॥ ತತಸ್ತೈಃ ಸ್ವಗಣೈರಿಷ್ಟೈರಿನ್ದ್ರಜಿತ್ ಪ್ರತಿಪೂಜಿತಃ। ಯುದ್ಧೋದ್ಧತಕೃತೋತ್ಸಾಹಃ ಸಙ್ಗ್ರಾಮಂ ಸಮ್ಪ್ರಪದ್ಯತ ॥೧೬॥ ಶ್ರೀಮಾನ್ ಪದ್ಮವಿಶಾಲಾಕ್ಷೋ ರಾಕ್ಷಸಾಧಿಪತೇಃ ಸುತಃ। ನಿರ್ಜಗಾಮ ಮಹಾತೇಜಾಃ ಸಮುದ್ರ ಇವ ಪರ್ವಣಿ ॥೧೭॥ ಸ ಪಕ್ಷಿರಾಜೋಪಮತುಲ್ಯವೇಗೈ- ರ್ವ್ಯಾಘ್ರೈಶ್ಚತುರ್ಭಿಃ ಸ ತು ತೀಕ್ಷ್ಣದಂಷ್ಟ್ರೈಃ। ರಥಂ ಸಮಾಯುಕ್ತಮಸಹ್ಯವೇಗಃ ಸಮಾರುರೋಹೇನ್ದ್ರಜಿದಿನ್ದ್ರಕಲ್ಪಃ॥೧೮॥ ಸ ರಥೀ ಧನ್ವಿನಾಂ ಶ್ರೇಷ್ಠಃ ಶಸ್ತ್ರಜ್ಞೋಽಸ್ತ್ರವಿದಾಂ ವರಃ। ರಥೇನಾಭಿಯಯೌ ಕ್ಷಿಪ್ರಂ ಹನೂಮಾನ್ಯತ್ರ ಸೋಽಭವತ್ ॥೧೯॥ ಸ ತಸ್ಯ ರಥನಿರ್ಘೋಷಂ ಜ್ಯಾಸ್ವನಂ ಕಾರ್ಮುಕಸ್ಯ ಚ । ನಿಶಮ್ಯ ಹರಿವೀರೋಽಸೌ ಸಮ್ಪ್ರಹೃಷ್ಟತರೋಽಭವತ್ ॥೨೦॥ ಇನ್ದ್ರಜಿಚ್ಚಾಪಮಾದಾಯ ಶಿತಶಲ್ಯಾಂಶ್ಚ ಸಾಯಕಾನ್ । ಹನೂಮನ್ತಮಭಿಪ್ರೇತ್ಯ ಜಗಾಮ ರಣಪಣ್ಡಿತಃ॥೨೧॥ ತಸ್ಮಿಂಸ್ತತಃ ಸಂಯತಿ ಜಾತಹರ್ಷೇ ರಣಾಯ ನಿರ್ಗಚ್ಛತಿ ಬಾಣಪಾಣೌ । ದಿಶಶ್ಚ ಸರ್ವಾಃ ಕಲುಷಾ ಬಭೂವು- ರ್ಮೃಗಾಶ್ಚ ರೌದ್ರಾ ಬಹುಧಾ ವಿನೇದುಃ॥೨೨॥ ಸಮಾಗತಾಸ್ತತ್ರ ತು ನಾಗಯಕ್ಷಾ ಮಹರ್ಷಯಶ್ಚಕ್ರಚರಾಶ್ಚ ಸಿದ್ಧಾಃ। ನಭಃ ಸಮಾವೃತ್ಯ ಚ ಪಕ್ಷಿಸಙ್ಘಾ ವಿನೇದುರುಚ್ಚೈಃ ಪರಮಪ್ರಹೃಷ್ಟಾಃ॥೨೩॥ ಆಯಾನ್ತಂ ಸ ರಥಂ ದೃಷ್ಟ್ವಾ ತೂರ್ಣಮಿನ್ದ್ರಧ್ವಜಂ ಕಪಿಃ। ನನಾದ ಚ ಮಹಾನಾದಂ ವ್ಯವರ್ಧತ ಚ ವೇಗವಾನ್ ॥೨೪॥ ಇನ್ದ್ರಜಿತ್ ಸ ರಥಂ ದಿವ್ಯಮಾಶ್ರಿತಶ್ಚಿತ್ರಕಾರ್ಮುಕಃ। ಧನುರ್ವಿಸ್ಫಾರಯಾಮಾಸ ತಡಿದೂರ್ಜಿತನಿಃಸ್ವನಮ್ ॥೨೫॥ ತತಃ ಸಮೇತಾವತಿತೀಕ್ಷ್ಣವೇಗೌ ಮಹಾಬಲೌ ತೌ ರಣನಿರ್ವಿಶಙ್ಕೌ । ಕಪಿಶ್ಚ ರಕ್ಷೋಽಧಿಪತೇಸ್ತನೂಜಃ ಸುರಾಸುರೇನ್ದ್ರಾವಿವ ಬದ್ಧವೈರೌ ॥೨೬॥ ಸ ತಸ್ಯ ವೀರಸ್ಯ ಮಹಾರಥಸ್ಯ ಧನುಷ್ಮತಃ ಸಂಯತಿ ಸಂಮತಸ್ಯ । ಶರಪ್ರವೇಗಂ ವ್ಯಹನತ್ಪ್ರವೃದ್ಧ- ಶ್ಚಚಾರ ಮಾರ್ಗೇ ಪಿತುರಪ್ರಮೇಯಃ॥೨೭॥ ತತಃ ಶರಾನಾಯತತೀಕ್ಷ್ಣಶಲ್ಯಾನ್ ಸುಪತ್ರಿಣಃ ಕಾಞ್ಚನಚಿತ್ರಪುಙ್ಖಾನ್ । ಮುಮೋಚ ವೀರಃ ಪರವೀರಹನ್ತಾ ಸುಸನ್ತತಾನ್ ವಜ್ರಸಮಾನವೇಗಾನ್ ॥೨೮॥ ತತಃ ಸ ತತ್ಸ್ಯನ್ದನನಿಃಸ್ವನಂ ಚ ಮೃದಙ್ಗಭೇರೀಪಟಹಸ್ವನಂ ಚ । ವಿಕೃಷ್ಯಮಾಣಸ್ಯ ಚ ಕಾರ್ಮುಕಸ್ಯ ನಿಶಮ್ಯ ಘೋಷಂ ಪುನರುತ್ಪಪಾತ ॥೨೯॥ ಶರಾಣಾಮನ್ತರೇಷ್ವಾಶು ವ್ಯಾವರ್ತತ ಮಹಾಕಪಿಃ। ಹರಿಸ್ತಸ್ಯಾಭಿಲಕ್ಷ್ಯಸ್ಯ ಮೋಕ್ಷಯಁಲ್ಲಕ್ಷ್ಯಸಙ್ಗ್ರಹಮ್ ॥೩೦॥ ಶರಾಣಾಮಗ್ರತಸ್ತಸ್ಯ ಪುನಃ ಸಮಭಿವರ್ತತ । ಪ್ರಸಾರ್ಯ ಹಸ್ತೌ ಹನುಮಾನುತ್ಪಪಾತಾನಿಲಾತ್ಮಜಃ॥೩೧॥ ತಾವುಭೌ ವೇಗಸಮ್ಪನ್ನೌ ರಣಕರ್ಮವಿಶಾರದೌ । ಸರ್ವಭೂತಮನೋಗ್ರಾಹಿ ಚಕ್ರತುರ್ಯುದ್ಧಮುತ್ತಮಮ್ ॥೩೨॥ ಹನೂಮತೋ ವೇದ ನ ರಾಕ್ಷಸೋಽನ್ತರಂ ನ ಮಾರುತಿಸ್ತಸ್ಯ ಮಹಾತ್ಮನೋಽನ್ತರಮ್ । ಪರಸ್ಪರಂ ನಿರ್ವಿಷಹೌ ಬಭೂವತುಃ ಸಮೇತ್ಯ ತೌ ದೇವಸಮಾನವಿಕ್ರಮೌ ॥೩೩॥ ತತಸ್ತು ಲಕ್ಷ್ಯೇ ಸ ವಿಹನ್ಯಮಾನೇ ಶರೇಷ್ವಮೋಘೇಷು ಚ ಸಮ್ಪತತ್ಸು । ಜಗಾಮ ಚಿನ್ತಾಂ ಮಹತೀಂ ಮಹಾತ್ಮಾ ಸಮಾಧಿಸಂಯೋಗಸಮಾಹಿತಾತ್ಮಾ ॥೩೪॥ ತತೋ ಮತಿಂ ರಾಕ್ಷಸರಾಜಸೂನು- ಶ್ಚಕಾರ ತಸ್ಮಿನ್ಹರಿವೀರಮುಖ್ಯೇ । ಅವಧ್ಯತಾಂ ತಸ್ಯ ಕಪೇಃ ಸಮೀಕ್ಷ್ಯ ಕಥಂ ನಿಗಚ್ಛೇದಿತಿ ನಿಗ್ರಹಾರ್ಥಮ್ ॥೩೫॥ ತತಃ ಪೈತಾಮಹಂ ವೀರಃ ಸೋಽಸ್ತ್ರಮಸ್ತ್ರವಿದಾಂ ವರಃ। ಸನ್ದಧೇ ಸುಮಹಾತೇಜಾಸ್ತಂ ಹರಿಪ್ರವರಂ ಪ್ರತಿ ॥೩೬॥ ಅವಧ್ಯೋಽಯಮಿತಿ ಜ್ಞಾತ್ವಾ ತಮಸ್ತ್ರೇಣಾಸ್ತ್ರತತ್ತ್ವವಿತ್ । ನಿಜಗ್ರಾಹ ಮಹಾಬಾಹುಂ ಮಾರುತಾತ್ಮಜಮಿನ್ದ್ರಜಿತ್ ॥೩೭॥ ತೇನ ಬದ್ಧಸ್ತತೋಽಸ್ತ್ರೇಣ ರಾಕ್ಷಸೇನ ಸ ವಾನರಃ। ಅಭವನ್ನಿರ್ವಿಚೇಷ್ಟಶ್ಚ ಪಪಾತ ಚ ಮಹೀತಲೇ ॥೩೮॥ ತತೋಽಥ ಬುದ್ಧ್ವಾ ಸ ತದಾಸ್ತ್ರಬನ್ಧಂ ಪ್ರಭೋಃ ಪ್ರಭಾವಾದ್ವಿಗತಾಲ್ಪವೇಗಃ। ಪಿತಾಮಹಾನುಗ್ರಹಮಾತ್ಮನಶ್ಚ ವಿಚಿನ್ತಯಾಮಾಸ ಹರಿಪ್ರವೀರಃ॥೩೯॥ ತತಃ ಸ್ವಾಯಮ್ಭುವೈರ್ಮನ್ತ್ರೈರ್ಬ್ರಹ್ಮಾಸ್ತ್ರಂ ಚಾಭಿಮನ್ತ್ರಿತಮ್ । ಹನೂಮಾಂಶ್ಚಿನ್ತಯಾಮಾಸ ವರದಾನಂ ಪಿತಾಮಹಾತ್ ॥೪೦॥ ನ ಮೇಽಸ್ಯ ಬನ್ಧಸ್ಯ ಚ ಶಕ್ತಿರಸ್ತಿ ವಿಮೋಕ್ಷಣೇ ಲೋಕಗುರೋಃ ಪ್ರಭಾವಾತ್ । ಇತ್ಯೇವಮೇವಂವಿಹಿತೋಽಸ್ತ್ರಬನ್ಧೋ ಮಯಾಽಽತ್ಮಯೋನೇರನುವರ್ತಿತವ್ಯಃ॥೪೧॥ ಸ ವೀರ್ಯಮಸ್ತ್ರಸ್ಯ ಕಪಿರ್ವಿಚಾರ್ಯ ಪಿತಾಮಹಾನುಗ್ರಹಮಾತ್ಮನಶ್ಚ । ವಿಮೋಕ್ಷಶಕ್ತಿಂ ಪರಿಚಿನ್ತಯಿತ್ವಾ ಪಿತಾಮಹಾಜ್ಞಾಮನುವರ್ತತೇ ಸ್ಮ ॥೪೨॥ ಅಸ್ತ್ರೇಣಾಪಿ ಹಿ ಬದ್ಧಸ್ಯ ಭಯಂ ಮಮ ನ ಜಾಯತೇ । ಪಿತಾಮಹಮಹೇನ್ದ್ರಾಭ್ಯಾಂ ರಕ್ಷಿತಸ್ಯಾನಿಲೇನ ಚ ॥೪೩॥ ಗ್ರಹಣೇ ಚಾಪಿ ರಕ್ಷೋಭಿರ್ಮಹನ್ಮೇ ಗುಣದರ್ಶನಮ್ । ರಾಕ್ಷಸೇನ್ದ್ರೇಣ ಸಂವಾದಸ್ತಸ್ಮಾದ್ಗೃಹ್ಣನ್ತು ಮಾಂ ಪರೇ ॥೪೪॥ ಸ ನಿಶ್ಚಿತಾರ್ಥಃ ಪರವೀರಹನ್ತಾ ಸಮೀಕ್ಷ್ಯಕಾರೀ ವಿನಿವೃತ್ತಚೇಷ್ಟಃ। ಪರೈಃ ಪ್ರಸಹ್ಯಾಭಿಗತೈರ್ನಿಗೃಹ್ಯ ನನಾದ ತೈಸ್ತೈಃ ಪರಿಭರ್ತ್ಸ್ಯಮಾನಃ॥೪೫॥ ತತಸ್ತೇ ರಾಕ್ಷಸಾ ದೃಷ್ಟ್ವಾ ವಿನಿಶ್ಚೇಷ್ಟಮರಿನ್ದಮಮ್ । ಬಬನ್ಧುಃ ಶಣವಲ್ಕೈಶ್ಚ ದ್ರುಮಚೀರೈಶ್ಚ ಸಂಹತೈಃ॥೪೬॥ ಸ ರೋಚಯಾಮಾಸ ಪರೈಶ್ಚ ಬನ್ಧಂ ಪ್ರಸಹ್ಯ ವೀರೈರಭಿಗರ್ಹಣಂ ಚ । ಕೌತೂಹಲಾನ್ಮಾಂ ಯದಿ ರಾಕ್ಷಸೇನ್ದ್ರೋ ದ್ರಷ್ಟುಂ ವ್ಯವಸ್ಯೇದಿತಿ ನಿಶ್ಚಿತಾರ್ಥಃ॥೪೭॥ ಸ ಬದ್ಧಸ್ತೇನ ವಲ್ಕೇನ ವಿಮುಕ್ತೋಽಸ್ತ್ರೇಣ ವೀರ್ಯವಾನ್ । ಅಸ್ತ್ರಬನ್ಧಃ ಸ ಚಾನ್ಯಂ ಹಿ ನ ಬನ್ಧಮನುವರ್ತತೇ ॥೪೮॥ ಅಥೇನ್ದ್ರಜಿತ್ತಂ ದ್ರುಮಚೀರಬದ್ಧಂ ವಿಚಾರ್ಯ ವೀರಃ ಕಪಿಸತ್ತಮಂ ತಮ್ । ವಿಮುಕ್ತಮಸ್ತ್ರೇಣ ಜಗಾಮ ಚಿನ್ತಾ- ಮನ್ಯೇನ ಬದ್ಧೋಽಪ್ಯನುವರ್ತತೇಽಸ್ತ್ರಮ್ ॥೪೯॥ ಅಹೋ ಮಹತ್ಕರ್ಮ ಕೃತಂ ನಿರರ್ಥಂ ನ ರಾಕ್ಷಸೈರ್ಮನ್ತ್ರಗತಿರ್ವಿಮೃಷ್ಟಾ । ಪುನಶ್ಚ ನಾಸ್ತ್ರೇ ವಿಹತೇಽಸ್ತ್ರಮನ್ಯತ್ ಪ್ರವರ್ತತೇ ಸಂಶಯಿತಾಃ ಸ್ಮ ಸರ್ವೇ ॥೫೦॥ ಅಸ್ತ್ರೇಣ ಹನುಮಾನ್ಮುಕ್ತೋ ನಾತ್ಮಾನಮವಬುಧ್ಯತೇ । ಕೃಷ್ಯಮಾಣಸ್ತು ರಕ್ಷೋಭಿಸ್ತೈಶ್ಚ ಬನ್ಧೈರ್ನಿಪೀಡಿತಃ॥೫೧॥ ಹನ್ಯಮಾನಸ್ತತಃ ಕ್ರೂರೈ ರಾಕ್ಷಸೈಃ ಕಾಲಮುಷ್ಟಿಭಿಃ। ಸಮೀಪಂ ರಾಕ್ಷಸೇನ್ದ್ರಸ್ಯ ಪ್ರಾಕೃಷ್ಯತ ಸ ವಾನರಃ॥೫೨॥ ಅಥೇನ್ದ್ರಜಿತ್ತಂ ಪ್ರಸಮೀಕ್ಷ್ಯ ಮುಕ್ತ- ಮಸ್ತ್ರೇಣ ಬದ್ಧಂ ದ್ರುಮಚೀರಸೂತ್ರೈಃ। ವ್ಯದರ್ಶಯತ್ತತ್ರ ಮಹಾಬಲಂ ತಂ ಹರಿಪ್ರವೀರಂ ಸಗಣಾಯ ರಾಜ್ಞೇ ॥೫೩॥ ತಂ ಮತ್ತಮಿವ ಮಾತಙ್ಗಂ ಬದ್ಧಂ ಕಪಿವರೋತ್ತಮಮ್ । ರಾಕ್ಷಸಾ ರಾಕ್ಷಸೇನ್ದ್ರಾಯ ರಾವಣಾಯ ನ್ಯವೇದಯನ್ ॥೫೪॥ ಕೋಽಯಂ ಕಸ್ಯ ಕುತೋ ವಾಪಿ ಕಿಂ ಕಾರ್ಯಂ ಕೋಽಭ್ಯುಪಾಶ್ರಯಃ। ಇತಿ ರಾಕ್ಷಸವೀರಾಣಾಂ ದೃಷ್ಟ್ವಾ ಸಞ್ಜಜ್ಞಿರೇ ಕಥಾಃ॥೫೫॥ ಹನ್ಯತಾಂ ದಹ್ಯತಾಂ ವಾಪಿ ಭಕ್ಷ್ಯತಾಮಿತಿ ಚಾಪರೇ । ರಾಕ್ಷಸಾಸ್ತತ್ರ ಸಙ್ಕ್ರುದ್ಧಾಃ ಪರಸ್ಪರಮಥಾಬ್ರುವನ್ ॥೫೬॥ ಅತೀತ್ಯ ಮಾರ್ಗಂ ಸಹಸಾ ಮಹಾತ್ಮಾ ಸ ತತ್ರ ರಕ್ಷೋಽಧಿಪಪಾದಮೂಲೇ । ದದರ್ಶ ರಾಜ್ಞಃ ಪರಿಚಾರವೃದ್ಧಾನ್ ಗೃಹಂ ಮಹಾರತ್ನವಿಭೂಷಿತಂ ಚ ॥೫೭॥ ಸ ದದರ್ಶ ಮಹಾತೇಜಾ ರಾವಣಃ ಕಪಿಸತ್ತಮಮ್ । ರಕ್ಷೋಭಿರ್ವಿಕೃತಾಕಾರೈಃ ಕೃಷ್ಯಮಾಣಮಿತಸ್ತತಃ॥೫೮॥ ರಾಕ್ಷಸಾಧಿಪತಿಂ ಚಾಪಿ ದದರ್ಶ ಕಪಿಸತ್ತಮಃ। ತೇಜೋಬಲಸಮಾಯುಕ್ತಂ ತಪನ್ತಮಿವ ಭಾಸ್ಕರಮ್ ॥೫೯॥ ಸ ರೋಷಸಂವರ್ತಿತತಾಮ್ರದೃಷ್ಟಿ- ರ್ದಶಾನನಸ್ತಂ ಕಪಿಮನ್ವವೇಕ್ಷ್ಯ । ಅಥೋಪವಿಷ್ಟಾನ್ಕುಲಶೀಲವೃದ್ಧಾನ್ ಸಮಾದಿಶತ್ತಂ ಪ್ರತಿ ಮುಖ್ಯಮನ್ತ್ರೀನ್ ॥೬೦॥ ಯಥಾಕ್ರಮಂ ತೈಃ ಸ ಕಪಿಶ್ಚ ಪೃಷ್ಟಃ ಕಾರ್ಯಾರ್ಥಮರ್ಥಸ್ಯ ಚ ಮೂಲಮಾದೌ । ನಿವೇದಯಾಮಾಸ ಹರೀಶ್ವರಸ್ಯ ದೂತಃ ಸಕಾಶಾದಹಮಾಗತೋಽಸ್ಮಿ ॥೬೧॥ ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಅಷ್ಟಚತ್ವಾರಿಂಶಃ ಸರ್ಗಃ