ಅಥ ಚತುಃಪಞ್ಚಾಶಃ ಸರ್ಗಃ ವೀಕ್ಷಮಾಣಸ್ತತೋ ಲಙ್ಕಾಂ ಕಪಿಃ ಕೃತಮನೋರಥಃ। ವರ್ಧಮಾನಸಮುತ್ಸಾಹಃ ಕಾರ್ಯಶೇಷಮಚಿನ್ತಯತ್ ॥೧॥ ಕಿಂ ನು ಖಲ್ವವಶಿಷ್ಟಂ ಮೇ ಕರ್ತವ್ಯಮಿಹ ಸಾಮ್ಪ್ರತಮ್ । ಯದೇಷಾಂ ರಕ್ಷಸಾಂ ಭೂಯಃ ಸನ್ತಾಪಜನನಂ ಭವೇತ್ ॥೨॥ ವನಂ ತಾವತ್ಪ್ರಮಥಿತಂ ಪ್ರಕೃಷ್ಟಾ ರಾಕ್ಷಸಾ ಹತಾಃ। ಬಲೈಕದೇಶಃ ಕ್ಷಪಿತಃ ಶೇಷಂ ದುರ್ಗವಿನಾಶನಮ್ ॥೩॥ ದುರ್ಗೇ ವಿನಾಶಿತೇ ಕರ್ಮ ಭವೇತ್ ಸುಖಪರಿಶ್ರಮಮ್ । ಅಲ್ಪಯತ್ನೇನ ಕಾರ್ಯೇಽಸ್ಮಿನ್ಮಮ ಸ್ಯಾತ್ಸಫಲಃ ಶ್ರಮಃ॥೪॥ ಯೋ ಹ್ಯಯಂ ಮಮ ಲಾಙ್ಗೂಲೇ ದೀಪ್ಯತೇ ಹವ್ಯವಾಹನಃ। ಅಸ್ಯ ಸನ್ತರ್ಪಣಂ ನ್ಯಾಯ್ಯಂ ಕರ್ತುಮೇಭಿರ್ಗೃಹೋತ್ತಮೈಃ॥೫॥ ತತಃ ಪ್ರದೀಪ್ತಲಾಙ್ಗೂಲಃ ಸವಿದ್ಯುದಿವ ತೋಯದಃ। ಭವನಾಗ್ರೇಷು ಲಙ್ಕಾಯಾ ವಿಚಚಾರ ಮಹಾಕಪಿಃ॥೬॥ ಗೃಹಾದ್ಗೃಹಂ ರಾಕ್ಷಸಾನಾಮುದ್ಯಾನಾನಿ ಚ ವಾನರಃ। ವೀಕ್ಷಮಾಣೋ ಹ್ಯಸನ್ತ್ರಸ್ತಃ ಪ್ರಾಸಾದಾಂಶ್ಚ ಚಚಾರ ಸಃ॥೭॥ ಅವಪ್ಲುತ್ಯ ಮಹಾವೇಗಃ ಪ್ರಹಸ್ತಸ್ಯ ನಿವೇಶನಮ್ । ಅಗ್ನಿಂ ತತ್ರ ವಿನಿಕ್ಷಿಪ್ಯ ಶ್ವಸನೇನ ಸಮೋ ಬಲೀ ॥೮॥ ತತೋಽನ್ಯತ್ಪುಪ್ಲುವೇ ವೇಶ್ಮ ಮಹಾಪಾರ್ಶ್ವಸ್ಯ ವೀರ್ಯವಾನ್ । ಮುಮೋಚ ಹನುಮಾನಗ್ನಿಂ ಕಾಲಾನಲಶಿಖೋಪಮಮ್ ॥೯॥ ವಜ್ರದಂಷ್ಟ್ರಸ್ಯ ಚ ತಥಾ ಪುಪ್ಲುವೇ ಸ ಮಹಾಕಪಿಃ। ಶುಕಸ್ಯ ಚ ಮಹಾತೇಜಾಸ್ಸಾರಣಸ್ಯ ಚ ಧೀಮತಃ॥೧೦॥ ತಥಾ ಚೇನ್ದ್ರಜಿತೋ ವೇಶ್ಮ ದದಾಹ ಹರಿಯೂಥಪಃ। ಜಮ್ಬುಮಾಲೇಃ ಸುಮಾಲೇಶ್ಚ ದದಾಹ ಭವನಂ ತತಃ॥೧೧॥ ರಶ್ಮಿಕೇತೋಶ್ಚ ಭವನಂ ಸೂರ್ಯಶತ್ರೋಸ್ತಥೈವ ಚ । ಹ್ರಸ್ವಕರ್ಣಸ್ಯ ದಂಷ್ಟ್ರಸ್ಯ ರೋಮಶಸ್ಯ ಚ ರಕ್ಷಸಃ॥೧೨॥ ಯುದ್ಧೋನ್ಮತ್ತಸ್ಯ ಮತ್ತಸ್ಯ ಧ್ವಜಗ್ರೀವಸ್ಯ ರಕ್ಷಸಃ। ವಿದ್ಯುಜ್ಜಿಹ್ವಸ್ಯ ಘೋರಸ್ಯ ತಥಾ ಹಸ್ತಿಮುಖಸ್ಯ ಚ ॥೧೩॥ ಕರಾಲಸ್ಯ ವಿಶಾಲಸ್ಯ ಶೋಣಿತಾಕ್ಷಸ್ಯ ಚೈವ ಹಿ । ಕುಮ್ಭಕರ್ಣಸ್ಯ ಭವನಂ ಮಕರಾಕ್ಷಸ್ಯ ಚೈವ ಹಿ ॥೧೪॥ ನರಾನ್ತಕಸ್ಯ ಕುಮ್ಭಸ್ಯ ನಿಕುಮ್ಭಸ್ಯ ದುರಾತ್ಮನಃ। ಯಜ್ಞಶತ್ರೋಶ್ಚ ಭವನಂ ಬ್ರಹ್ಮಶತ್ರೋಸ್ತಥೈವ ಚ ॥೧೫॥ ವರ್ಜಯಿತ್ವಾ ಮಹಾತೇಜಾ ವಿಭೀಷಣಗೃಹಂ ಪ್ರತಿ । ಕ್ರಮಮಾಣಃ ಕ್ರಮೇಣೈವ ದದಾಹ ಹರಿಪುಙ್ಗವಃ॥೧೬॥ ತೇಷು ತೇಷು ಮಹಾರ್ಹೇಷು ಭವನೇಷು ಮಹಾಯಶಾಃ। ಗೃಹೇಷ್ವೃದ್ಧಿಮತಾಮೃದ್ಧಿಂ ದದಾಹ ಕಪಿಕುಞ್ಜರಃ॥೧೭॥ ಸರ್ವೇಷಾಂ ಸಮತಿಕ್ರಮ್ಯ ರಾಕ್ಷಸೇನ್ದ್ರಸ್ಯ ವೀರ್ಯವಾನ್ । ಆಸಸಾದಾಥ ಲಕ್ಷ್ಮೀವಾನ್ ರಾವಣಸ್ಯ ನಿವೇಶನಮ್ ॥೧೮॥ ತತಸ್ತಸ್ಮಿನ್ಗೃಹೇ ಮುಖ್ಯೇ ನಾನಾರತ್ನವಿಭೂಷಿತೇ । ಮೇರುಮನ್ದರಸಙ್ಕಾಶೇ ನಾನಾಮಙ್ಗಳಶೋಭಿತೇ ॥೧೯॥ ಪ್ರದೀಪ್ತಮಗ್ನಿಮುತ್ಸೃಜ್ಯ ಲಾಙ್ಗೂಲಾಗ್ರೇ ಪ್ರತಿಷ್ಠಿತಮ್ । ನನಾದ ಹನುಮಾನ್ವೀರೋ ಯುಗಾನ್ತಜಲದೋ ಯಥಾ ॥೨೦॥ ಶ್ವಸನೇನ ಚ ಸಂಯೋಗಾದತಿವೇಗೋ ಮಹಾಬಲಃ। ಕಾಲಾಗ್ನಿರಿವ ಜಜ್ವಾಲ ಪ್ರಾವರ್ಧತ ಹುತಾಶನಃ॥೨೧॥ ಪ್ರದೀಪ್ತಮಗ್ನಿಂ ಪವನಸ್ತೇಷು ವೇಶ್ಮಸು ಚಾರಯನ್ । ತಾನಿ ಕಾಞ್ಚನಜಾಲಾನಿ ಮುಕ್ತಾಮಣಿಮಯಾನಿ ಚ ॥೨೨॥ ಭವನಾನಿ ವ್ಯಶೀರ್ಯನ್ತ ರತ್ನವನ್ತಿ ಮಹಾನ್ತಿ ಚ । ತಾನಿ ಭಗ್ನವಿಮಾನಾನಿ ನಿಪೇತುರ್ವಸುಧಾತಲೇ ॥೨೩॥ ಭವನಾನೀವ ಸಿದ್ಧಾನಾಮಮ್ಬರಾತ್ಪುಣ್ಯಸಙ್ಕ್ಷಯೇ । ಸಞ್ಜಜ್ಞೇ ತುಮುಲಃ ಶಬ್ದೋ ರಾಕ್ಷಸಾನಾಂ ಪ್ರಧಾವತಾಮ್ ॥೨೪॥ ಸ್ವೇ ಸ್ವೇ ಗೃಹಪರಿತ್ರಾಣೇ ಭಗ್ನೋತ್ಸಾಹೋಜ್ಝಿತಶ್ರಿಯಾಮ್ । ನೂನಮೇಷೋಽಗ್ನಿರಾಯಾತಃ ಕಪಿರೂಪೇಣ ಹಾ ಇತಿ ॥೨೫॥ ಕ್ರನ್ದನ್ತ್ಯಸ್ಸಹಸಾ ಪೇತುಃ ಸ್ತನನ್ಧಯಧರಾಃ ಸ್ತ್ರಿಯಃ। ಕಾಶ್ಚಿದಗ್ನಿಪರೀತಾಙ್ಗ್ಯೋ ಹರ್ಮ್ಯೇಭ್ಯೋ ಮುಕ್ತಮೂರ್ಧಜಾಃ॥೨೬॥ ಪತನ್ತ್ಯೋ ರೇಜಿರೇಽಭ್ರೇಭ್ಯಸ್ಸೌದಾಮನ್ಯ ಇವಾಮ್ಬರಾತ್ । ವಜ್ರವಿದ್ರುಮವೈದೂರ್ಯಮುಕ್ತಾರಜತಸಂಹತಾನ್ ॥೨೭॥ ವಿಚಿತ್ರಾನ್ಭವನಾದ್ಧಾತೂನ್ಸ್ಯನ್ದಮಾನಾನ್ದದರ್ಶ ಸಃ। ನಾಗ್ನಿಸ್ತೃಪ್ಯತಿ ಕಾಷ್ಠಾನಾಂ ತೃಣಾನಾಂ ಚ ಯಥಾ ತಥಾ ॥೨೮॥ ಹನೂಮಾನ್ರಾಕ್ಷಸೇನ್ದ್ರಾಣಾಂ ವಧೇ ಕಿಞ್ಚಿನ್ನ ತೃಪ್ಯತಿ । ನ ಹನೂಮದ್ವಿಶಸ್ತಾನಾಂ ರಾಕ್ಷಸಾನಾಂ ವಸುನ್ಧರಾ ॥೨೯॥ ಹನೂಮತಾ ವೇಗವತಾ ವಾನರೇಣ ಮಹಾತ್ಮನಾ । ಲಙ್ಕಾಪುರಂ ಪ್ರದಗ್ಧಂ ತದ್ರುದ್ರೇಣ ತ್ರಿಪುರಂ ಯಥಾ ॥೩೦॥ ತತಃ ಸ ಲಙ್ಕಾಪುರಪರ್ವತಾಗ್ರೇ ಸಮುತ್ಥಿತೋ ಭೀಮಪರಾಕ್ರಮೋಽಗ್ನಿಃ। ಪ್ರಸಾರ್ಯ ಚೂಡಾವಲಯಂ ಪ್ರದೀಪ್ತೋ ಹನೂಮತಾ ವೇಗವತೋಪಸೃಷ್ಟಃ॥೩೧॥ ಯುಗಾನ್ತಕಾಲಾನಲತುಲ್ಯರೂಪಃ ಸಮಾರುತೋಽಗ್ನಿರ್ವವೃಧೇ ದಿವಿಸ್ಪೃಕ್ । ವಿಧೂಮರಶ್ಮಿರ್ಭವನೇಷು ಸಕ್ತೋ ರಕ್ಷಃಶರೀರಾಜ್ಯಸಮರ್ಪಿತಾರ್ಚಿಃ॥೩೨॥ ಆದಿತ್ಯಕೋಟೀಸದೃಶಃ ಸುತೇಜಾ ಲಙ್ಕಾಂ ಸಮಸ್ತಾಂ ಪರಿವಾರ್ಯ ತಿಷ್ಠನ್ । ಶಬ್ದೈರನೇಕೈರಶನಿಪ್ರರೂಢೈ- ರ್ಭಿನ್ದನ್ನಿವಾಣ್ಡಂ ಪ್ರಬಭೌ ಮಹಾಗ್ನಿಃ॥೩೩॥ ತತ್ರಾಮ್ಬರಾದಗ್ನಿರತಿಪ್ರವೃದ್ಧೋ ರೂಕ್ಷಪ್ರಭಃ ಕಿಂಶುಕಪುಷ್ಪಚೂಡಃ। ನಿರ್ವಾಣಧೂಮಾಕುಲರಾಜಯಶ್ಚ ನೀಲೋತ್ಪಲಾಭಾಃ ಪ್ರಚಕಾಶಿರೇಽಭ್ರಾಃ॥೩೪॥ ವಜ್ರೀ ಮಹೇನ್ದ್ರಸ್ತ್ರಿದಶೇಶ್ವರೋ ವಾ ಸಾಕ್ಷಾದ್ಯಮೋ ವಾ ವರುಣೋಽನಿಲೋ ವಾ । ರೌದ್ರೋಽಗ್ನಿರರ್ಕೋ ಧನದಶ್ಚ ಸೋಮೋ ನ ವಾನರೋಽಯಂ ಸ್ವಯಮೇವ ಕಾಲಃ॥೩೫॥ ಕಿಂ ಬ್ರಹ್ಮಣಸ್ಸರ್ವಪಿತಾಮಹಸ್ಯ ಲೋಕಸ್ಯ ಧಾತುಶ್ಚತುರಾನನಸ್ಯ । ಇಹಾಽಽಗತೋ ವಾನರರೂಪಧಾರೀ ರಕ್ಷೋಪಸಂಹಾರಕರಃ ಪ್ರಕೋಪಃ॥೩೬॥ ಕಿಂ ವೈಷ್ಣವಂ ವಾ ಕಪಿರೂಪಮೇತ್ಯ ರಕ್ಷೋವಿನಾಶಾಯ ಪರಂ ಸುತೇಜಃ। ಅಚಿನ್ತ್ಯಮವ್ಯಕ್ತಮನನ್ತಮೇಕಂ ಸ್ವಮಾಯಯಾ ಸಾಮ್ಪ್ರತಮಾಗತಂ ವಾ ॥೩೭॥ ಇತ್ಯೇವಮೂಚುರ್ಬಹವೋ ವಿಶಿಷ್ಟಾ ರಕ್ಷೋಗಣಾಸ್ತತ್ರ ಸಮೇತ್ಯ ಸರ್ವೇ । ಸಪ್ರಾಣಿಸಙ್ಘಾಂ ಸಗೃಹಾಂ ಸವೃಕ್ಷಾಂ ದಗ್ಧಾಂ ಪುರೀಂ ತಾಂ ಸಹಸಾ ಸಮೀಕ್ಷ್ಯ ॥೩೮॥ ತತಸ್ತು ಲಙ್ಕಾ ಸಹಸಾ ಪ್ರದಗ್ಧಾ ಸರಾಕ್ಷಸಾ ಸಾಶ್ವರಥಾ ಸನಾಗಾ । ಸಪಕ್ಷಿಸಙ್ಘಾ ಸಮೃಗಾ ಸವೃಕ್ಷಾ ರುರೋದ ದೀನಾ ತುಮುಲಂ ಸಶಬ್ದಮ್ ॥೩೯॥ ಹಾ ತಾತ ಹಾ ಪುತ್ರಕ ಕಾನ್ತ ಮಿತ್ರ ಹಾ ಜೀವಿತೇಶಾಙ್ಗ ಹತಂ ಸುಪುಣ್ಯಮ್ । ರಕ್ಷೋಭಿರೇವಂ ಬಹುಧಾ ಬ್ರುವದ್ಭಿ ಶಬ್ದಃ ಕೃತೋ ಘೋರತರಸ್ಸುಭೀಮಃ॥೪೦॥ ಹುತಾಶನಜ್ವಾಲಸಮಾವೃತಾ ಸಾ ಹತಪ್ರವೀರಾ ಪರಿವೃತ್ತಯೋಧಾ । ಹನೂಮತಃ ಕ್ರೋಧಬಲಾಭಿಭೂತಾ ಬಭೂವ ಶಾಪೋಪಹತೇವ ಲಙ್ಕಾ ॥೪೧॥ ಸಸಮ್ಭ್ರಮಂ ತ್ರಸ್ತವಿಷಣ್ಣರಾಕ್ಷಸಾಂ ಸಮುಜ್ಜ್ವಲಜ್ಜ್ವಾಲಹುತಾಶನಾಙ್ಕಿತಾಮ್ । ದದರ್ಶ ಲಙ್ಕಾಂ ಹನುಮಾನ್ಮಹಾಮನಾಃ ಸ್ವಯಮ್ಭುರೋಷೋಪಹತಾಮಿವಾವನಿಮ್ ॥೪೨॥ ಭಙ್ಕ್ತ್ವಾ ವನಂ ಪಾದಪರತ್ನಸಙ್ಕುಲಂ ಹತ್ವಾ ತು ರಕ್ಷಾಂಸಿ ಮಹಾನ್ತಿ ಸಂಯುಗೇ । ದಗ್ಧ್ವಾ ಪುರೀಂ ತಾಂ ಗೃಹರತ್ನಮಾಲಿನೀಂ ತಸ್ಥೌ ಹನೂಮಾನ್ಪವನಾತ್ಮಜಃ ಕಪಿಃ॥೪೩॥ ಸ ರಾಕ್ಷಸಾಂಸ್ತಾನ್ಸುಬಹೂಂಶ್ಚ ಹತ್ವಾ ವನಂ ಚ ಭಙ್ಕ್ತ್ವಾ ಬಹುಪಾದಪಂ ತತ್ । ವಿಸೃಜ್ಯ ರಕ್ಷೋಭವನೇಷು ಚಾಗ್ನಿಂ ಜಗಾಮ ರಾಮಂ ಮನಸಾ ಮಹಾತ್ಮಾ ॥೪೪॥ ತತಸ್ತು ತಂ ವಾನರವೀರಮುಖ್ಯಂ ಮಹಾಬಲಂ ಮಾರುತತುಲ್ಯವೇಗಮ್ । ಮಹಾಮತಿಂ ವಾಯುಸುತಂ ವರಿಷ್ಠಂ ಪ್ರತುಷ್ಟುವುರ್ದೇವಗಣಾಶ್ಚ ಸರ್ವೇ ॥೪೫॥ ದೇವಾಶ್ಚ ಸರ್ವೇ ಮುನಿಪುಙ್ಗವಾಶ್ಚ ಗನ್ಧರ್ವವಿದ್ಯಾಧರಪನ್ನಗಾಶ್ಚ । ಭೂತಾನಿ ಸರ್ವಾಣಿ ಮಹಾನ್ತಿ ತತ್ರ ಜಗ್ಮುಃ ಪರಾಂ ಪ್ರೀತಿಮತುಲ್ಯರೂಪಾಮ್ ॥೪೬॥ ಭಙ್ಕ್ತ್ವಾ ವನಂ ಮಹಾತೇಜಾ ಹತ್ವಾ ರಕ್ಷಾಂಸಿ ಸಂಯುಗೇ । ದಗ್ಧ್ವಾ ಲಙ್ಕಾಪುರೀಂ ಭೀಮಾಂ ರರಾಜ ಸ ಮಹಾಕಪಿಃ॥೪೭॥ ಗೃಹಾಗ್ರ್ಯಶೃಙ್ಗಾಗ್ರತಲೇ ವಿಚಿತ್ರೇ ಪ್ರತಿಷ್ಠಿತೋ ವಾನರರಾಜಸಿಂಹಃ। ಪ್ರದೀಪ್ತಲಾಙ್ಗೂಲಕೃತಾರ್ಚಿಮಾಲೀ ವ್ಯರಾಜತಾದಿತ್ಯ ಇವಾರ್ಚಿಮಾಲೀ ॥೪೮॥ ಲಙ್ಕಾಂ ಸಮಸ್ತಾಂ ಸಮ್ಪೀಡ್ಯ ಲಾಙ್ಗೂಲಾಗ್ನಿಂ ಮಹಾಕಪಿಃ। ನಿರ್ವಾಪಯಾಮಾಸ ತದಾ ಸಮುದ್ರೇ ಹರಿಪುಙ್ಗವಃ॥೪೯॥ ತತೋ ದೇವಾಸ್ಸಗನ್ಧರ್ವಾಸ್ಸಿದ್ಧಾಶ್ಚ ಪರಮರ್ಷಯಃ। ದೃಷ್ಟ್ವಾ ಲಙ್ಕಾಂ ಪ್ರದಗ್ಧಾಂ ತಾಂ ವಿಸ್ಮಯಂ ಪರಮಂ ಗತಾಃ॥೫೦॥ ತಂ ದೃಷ್ಟ್ವಾ ವಾನರಶ್ರೇಷ್ಠಂ ಹನುಮನ್ತಂ ಮಹಾಕಪಿಮ್ । ಕಾಲಾಗ್ನಿರಿತಿ ಸಞ್ಚಿನ್ತ್ಯ ಸರ್ವಭೂತಾನಿ ತತ್ರಸುಃ॥೫೧॥ ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಚತುಃಪಞ್ಚಾಶಃ ಸರ್ಗಃ