ಅಥ ಸಪ್ತಪಞ್ಚಾಶಃ ಸರ್ಗಃ
ಆಪ್ಲುತ್ಯ ಚ ಮಹಾವೇಗಃ ಪಕ್ಷವಾನಿವ ಪರ್ವತಃ।
ಭುಜಙ್ಗಯಕ್ಷಗನ್ಧರ್ವಪ್ರಬುದ್ಧಕಮಲೋತ್ಪಲಮ್ ॥೧॥
ಸ ಚನ್ದ್ರಕುಮುದಂ ರಮ್ಯಂ ಸಾರ್ಕಕಾರಣ್ಡವಂ ಶುಭಮ್ ।
ತಿಷ್ಯಶ್ರವಣಕಾದಮ್ಬಮಭ್ರಶೈವಲಶಾದ್ವಲಮ್ ॥೨॥
ಪುನರ್ವಸುಮಹಾಮೀನಂ ಲೋಹಿತಾಙ್ಗಮಹಾಗ್ರಹಮ್ ।
ಐರಾವತಮಹಾದ್ವೀಪಂ ಸ್ವಾತೀಹಂಸವಿಲಾಸಿತಮ್ ॥೩॥
ವಾತಸಙ್ಘಾತಜಾಲೋರ್ಮಿಚನ್ದ್ರಾಂಶುಶಿಶಿರಾಮ್ಬುಮತ್ ।
ಹನೂಮಾನಪರಿಶ್ರಾನ್ತಃ ಪುಪ್ಲುವೇ ಗಗನಾರ್ಣವಮ್ ॥೪॥
ಗ್ರಸಮಾನ ಇವಾಕಾಶಂ ತಾರಾಧಿಪಮಿವೋಲ್ಲಿಖನ್ ।
ಹರನ್ನಿವ ಸನಕ್ಷತ್ರಂ ಗಗನಂ ಸಾರ್ಕಮಣ್ಡಲಮ್ ॥೫॥
ಅಪಾರಮಪರಿಶ್ರಾನ್ತಶ್ಚಾಮ್ಬುಧಿಂ ಸಮಗಾಹತ ।
ಹನೂಮಾನ್ಮೇಘಜಾಲಾನಿ ವಿಕರ್ಷನ್ನಿವ ಗಚ್ಛತಿ ॥೬॥
ಪಾಣ್ಡುರಾರುಣವರ್ಣಾನಿ ನೀಲಮಾಞ್ಜಿಷ್ಠಕಾನಿ ಚ ।
ಹರಿತಾರುಣವರ್ಣಾನಿ ಮಹಾಭ್ರಾಣಿ ಚಕಾಶಿರೇ ॥೭॥
ಪ್ರವಿಶನ್ನಭ್ರಜಾಲಾನಿ ನಿಷ್ಕ್ರಮಂಶ್ಚ ಪುನಃ ಪುನಃ।
ಪ್ರಚನ್ನಶ್ಚ ಪ್ರಕಾಶಶ್ಚ ಚನ್ದ್ರಮಾ ಇವ ದೃಶ್ಯತೇ ॥೮॥
ವಿವಿಧಾಭ್ರಘನಾಪನ್ನಗೋಚರೋ ಧವಲಾಮ್ಬರಃ।
ದೃಶ್ಯಾದೃಶ್ಯತನುರ್ವೀರಸ್ತಥಾ ಚನ್ದ್ರಾಯತೇಽಮ್ಬರೇ ॥೯॥
ತಾರ್ಕ್ಷ್ಯಾಯಮಾಣೋ ಗಗನೇ ಸ ಬಭೌ ವಾಯುನನ್ದನಃ।
ದಾರಯನ್ಮೇಘಬೃನ್ದಾನಿ ನಿಷ್ಪತಂಶ್ಚ ಪುನಃ ಪುನಃ॥೧೦॥
ನದನ್ನಾದೇನ ಮಹತಾ ಮೇಘಸ್ವನಮಹಾಸ್ವನಃ।
ಪ್ರವರಾನ್ರಾಕ್ಷಸಾನ್ ಹತ್ವಾ ನಾಮ ವಿಶ್ರಾವ್ಯ ಚಾತ್ಮನಃ॥೧೧॥
ಆಕುಲಾಂ ನಗರೀಂ ಕೃತ್ವಾ ವ್ಯಥಯಿತ್ವಾ ಚ ರಾವಣಮ್ ।
ಅರ್ದಯಿತ್ವಾ ಮಹಾವೀರಾನ್ ವೈದೇಹೀಮಭಿವಾದ್ಯ ಚ ॥೧೨॥
ಆಜಗಾಮ ಮಹಾತೇಜಾಃ ಪುನರ್ಮಧ್ಯೇನ ಸಾಗರಮ್ ।
ಪರ್ವತೇನ್ದ್ರಂ ಸುನಾಭಂ ಚ ಸಮುಪಸ್ಪೃಶ್ಯ ವೀರ್ಯವಾನ್ ॥೧೩॥
ಜ್ಯಾಮುಕ್ತ ಇವ ನಾರಾಚೋ ಮಹಾವೇಗೋಽಭ್ಯುಪಾಗಮತ್ ।
ಸ ಕಿಞ್ಚಿದಾರಾತ್ ಸಮ್ಪ್ರಾಪ್ತಃ ಸಮಾಲೋಕ್ಯ ಮಹಾಗಿರಿಮ್ ॥೧೪॥
ಮಹೇನ್ದ್ರಂ ಮೇಘಸಙ್ಕಾಶಂ ನನಾದ ಸ ಮಹಾಕಪಿಃ।
ಸ ಪೂರಯಾಮಾಸ ಕಪಿರ್ದಿಶೋ ದಶ ಸಮನ್ತತಃ॥೧೫॥
ನದನ್ನಾದೇನ ಮಹತಾ ಮೇಘಸ್ವನಮಹಾಸ್ವನಃ।
ಸ ತಂ ದೇಶಮನುಪ್ರಾಪ್ತಃ ಸುಹೃದ್ಧರ್ಶನಲಾಲಸಃ॥೧೬॥
ನನಾದ ಸುಮಹಾನಾದಂ ಲಾಙ್ಗೂಲಂ ಚಾಪ್ಯಕಮ್ಪಯತ್ ।
ತಸ್ಯ ನಾನದ್ಯಮಾನಸ್ಯ ಸುಪರ್ಣಾಚರಿತೇ ಪಥಿ ॥೧೭॥
ಫಲತೀವಾಸ್ಯ ಘೋಷೇಣ ಗಗನಂ ಸಾರ್ಕಮಣ್ಡಲಮ್ ।
ಯೇ ತು ತತ್ರೋತ್ತರೇ ಕೂಲೇ ಸಮುದ್ರಸ್ಯ ಮಹಾಬಲಾಃ॥೧೮॥
ಪೂರ್ವಂ ಸಂವಿಷ್ಠಿತಾಶ್ಶೂರಾ ವಾಯುಪುತ್ರದಿದೃಕ್ಷವಃ।
ಮಹತೋ ವಾಯುನುನ್ನಸ್ಯ ತೋಯದಸ್ಯೇವ ನಿಃಸ್ವನಮ್ ।
ಶುಶ್ರುವುಸ್ತೇ ತದಾ ಘೋಷಮೂರುವೇಗಂ ಹನೂಮತಃ॥೧೯॥
ತೇ ದೀನಮನಸಃ ಸರ್ವೇ ಶುಶ್ರುವುಃ ಕಾನನೌಕಸಃ।
ವಾನರೇನ್ದ್ರಸ್ಯ ನಿರ್ಘೋಷಂ ಪರ್ಜನ್ಯನಿನದೋಪಮಮ್ ॥೨೦॥
ನಿಶಮ್ಯ ನದತೋ ನಾದಂ ವಾನರಾಸ್ತೇ ಸಮನ್ತತಃ।
ಬಭೂವುರುತ್ಸುಕಾಃ ಸರ್ವೇ ಸುಹೃದ್ದರ್ಶನಕಾಙ್ಕ್ಷಿಣಃ॥೨೧॥
ಜಾಮ್ಬವಾನ್ ಸ ಹರಿಶ್ರೇಷ್ಠಃ ಪ್ರೀತಿಸಂಹೃಷ್ಟಮಾನಸಃ।
ಉಪಾಮನ್ತ್ರ್ಯ ಹರೀನ್ಸರ್ವಾನಿದಂ ವಚನಮಬ್ರವೀತ್ ॥೨೨॥
ಸರ್ವಥಾ ಕೃತಕಾರ್ಯೋಽಸೌ ಹನೂಮಾನ್ನಾತ್ರ ಸಂಶಯಃ।
ನ ಹ್ಯಸ್ಯಾಕೃತಕಾರ್ಯಸ್ಯ ನಾದ ಏವಂವಿಧೋ ಭವೇತ್ ॥೨೩॥
ತಸ್ಯ ಬಾಹೂರುವೇಗಂ ಚ ನಿನಾದಂ ಚ ಮಹಾತ್ಮನಃ।
ನಿಶಮ್ಯ ಹರಯೋ ಹೃಷ್ಟಾಃ ಸಮುತ್ಪೇತುರ್ಯತಸ್ತತಃ॥೨೪॥
ತೇ ನಗಾಗ್ರಾನ್ನಗಾಗ್ರಾಣಿ ಶಿಖರಾಚ್ಛಿಖರಾಣಿ ಚ ।
ಪ್ರಹೃಷ್ಟಾಃ ಸಮಪದ್ಯನ್ತ ಹನೂಮನ್ತಂ ದಿದೃಕ್ಷವಃ॥೨೫॥
ತೇ ಪ್ರೀತಾಃ ಪಾದಪಾಗ್ರೇಷು ಗೃಹ್ಯ ಶಾಖಾಮವಸ್ಥಿತಾಃ।
ವಾಸಾಂಸಿ ಚ ಪ್ರಕಾಶಾನಿ ಸಮಾವಿಧ್ಯನ್ತ ವಾನರಾಃ॥೨೬॥
ಗಿರಿಗಹ್ವರಸಂಲೀನೋ ಯಥಾ ಗರ್ಜತಿ ಮಾರುತಃ।
ಏವಂ ಜಗರ್ಜ ಬಲವಾನ್ ಹನುಮಾನ್ಮಾರುತಾತ್ಮಜಃ॥೨೭॥
ತಮಭ್ರಘನಸಙ್ಕಾಶಮಾಪತನ್ತಂ ಮಹಾಕಪಿಮ್ ।
ದೃಷ್ಟ್ವಾ ತೇ ವಾನರಾಃ ಸರ್ವೇ ತಸ್ಥುಃ ಪ್ರಾಞ್ಜಲಯಸ್ತದಾ ॥೨೮॥
ತತಸ್ತು ವೇಗವಾನ್ ವೀರೋ ಗಿರೇರ್ಗಿರಿನಿಭಃ ಕಪಿಃ।
ನಿಪಪಾತ ಗಿರೇಸ್ತಸ್ಯ ಶಿಖರೇ ಪಾದಪಾಕುಲೇ ॥೨೯॥
ಹರ್ಷೇಣಾಪೂರ್ಯಮಾಣೋಽಸೌ ರಮ್ಯೇ ಪರ್ವತನಿರ್ಝರೇ ।
ಛಿನ್ನಪಕ್ಷ ಇವಾಽಕಾಶಾತ್ಪಪಾತ ಧರಣೀಧರಃ॥೩೦॥
ತತಸ್ತೇ ಪ್ರೀತಮನಸಃ ಸರ್ವೇ ವಾನರಪುಙ್ಗವಾಃ।
ಹನೂಮನ್ತಂ ಮಹಾತ್ಮಾನಂ ಪರಿವಾರ್ಯೋಪತಸ್ಥಿರೇ ॥೩೧॥
ಪರಿವಾರ್ಯ ಚ ತೇ ಸರ್ವೇ ಪರಾಂ ಪ್ರೀತಿಮುಪಾಗತಾಃ।
ಪ್ರಹೃಷ್ಟವದನಾಃ ಸರ್ವೇ ತಮಾಗತಮುಪಾಗಮನ್ ॥೩೨॥
ಉಪಾಯನಾನಿ ಚಾದಾಯ ಮೂಲಾನಿ ಚ ಫಲಾನಿ ಚ ।
ಪ್ರತ್ಯರ್ಚಯನ್ಹರಿಶ್ರೇಷ್ಠಂ ಹರಯೋ ಮಾರುತಾತ್ಮಜಮ್ ॥೩೩॥
ವಿನೇದುರ್ಮುದಿತಾಃ ಕೇಚಿತ್ ಕೇಚಿತ್ ಕಿಲಕಿಲಾಂ ತಥಾ ।
ಹೃಷ್ಟಾಃ ಪಾದಪಶಾಖಾಶ್ಚ ಆನಿನ್ಯುರ್ವಾನರರ್ಷಭಾಃ॥೩೪॥
ಹನೂಮಾಂಸ್ತು ಗುರೂನ್ವೃದ್ಧಾಞ್ಜಾಮ್ಬವತ್ಪ್ರಮುಖಾಂಸ್ತದಾ ।
ಕುಮಾರಮಙ್ಗದಂ ಚೈವ ಸೋಽವನ್ದತ ಮಹಾಕಪಿಃ॥೩೫॥
ಸ ತಾಭ್ಯಾಂ ಪೂಜಿತಃ ಪೂಜ್ಯಃ ಕಪಿಭಿಶ್ಚ ಪ್ರಸಾದಿತಃ।
ದೃಷ್ಟಾ ದೇವೀತಿ ವಿಕ್ರಾನ್ತಃ ಸಙ್ಕ್ಷೇಪೇಣ ನ್ಯವೇದಯತ್ ॥೩೬॥
ನಿಷಸಾದ ಚ ಹಸ್ತೇನ ಗೃಹೀತ್ವಾ ವಾಲಿನಃ ಸುತಮ್ ।
ರಮಣೀಯೇ ವನೋದ್ದೇಶೇ ಮಹೇನ್ದ್ರಸ್ಯ ಗಿರೇಸ್ತದಾ ॥೩೭॥
ಹನೂಮಾನಬ್ರವೀತ್ ಪೃಷ್ಟಸ್ತದಾ ತಾನ್ವಾನರರ್ಷಭಾನ್ ।
ಅಶೋಕವನಿಕಾಸಂಸ್ಥಾ ದೃಷ್ಟಾ ಸಾ ಜನಕಾತ್ಮಜಾ ॥೩೮॥
ರಕ್ಷ್ಯಮಾಣಾ ಸುಘೋರಾಭೀ ರಾಕ್ಷಸೀಭಿರನಿನ್ದಿತಾ ।
ಏಕವೇಣೀಧರಾ ಬಾಲಾ ರಾಮದರ್ಶನಲಾಲಸಾ ॥೩೯॥
ಉಪವಾಸಪರಿಶ್ರಾನ್ತಾ ಮಲಿನಾ ಜಟಿಲಾ ಕೃಶಾ ।
ತತೋ ದೃಷ್ಟೇತಿ ವಚನಂ ಮಹಾರ್ಥಮಮೃತೋಪಮಮ್ ॥೪೦॥
ನಿಶಮ್ಯ ಮಾರುತೇಃ ಸರ್ವೇ ಮುದಿತಾ ವಾನರಾ ಭವನ್ ।
ಕ್ಷ್ವೇಡನ್ತ್ಯನ್ಯೇ ನದನ್ತ್ಯನ್ಯೇ ಗರ್ಜನ್ತ್ಯನ್ಯೇ ಮಹಾಬಲಾಃ॥೪೧॥
ಚಕ್ರುಃ ಕಿಲಕಿಲಾಮನ್ಯೇ ಪ್ರತಿಗರ್ಜನ್ತಿ ಚಾಪರೇ ।
ಕೇಚಿದುಚ್ಛ್ರಿತಲಾಙ್ಗೂಲಾಃ ಪ್ರಹೃಷ್ಟಾಃ ಕಪಿಕುಞ್ಜರಾಃ॥೪೨॥
ಆಯತಾಞ್ಚಿತದೀರ್ಘಾಣಿ ಲಾಙ್ಗೂಲಾನಿ ಪ್ರವಿವ್ಯಧುಃ।
ಅಪರೇ ತು ಹನೂಮನ್ತಂ ಶ್ರೀಮನ್ತಂ ವಾನರೋತ್ತಮಮ್ ॥೪೩॥
ಆಪ್ಲುತ್ಯ ಗಿರಿಶೃಙ್ಗೇಷು ಸಂಸ್ಪೃಶನ್ತಿ ಸ್ಮ ಹರ್ಷಿತಾಃ।
ಉಕ್ತವಾಕ್ಯಂ ಹನೂಮನ್ತಮಙ್ಗದಸ್ತು ತದಾಬ್ರವೀತ್ ॥೪೪॥
ಸರ್ವೇಷಾಂ ಹರಿವೀರಾಣಾಂ ಮಧ್ಯೇ ವಾಚಮನುತ್ತಮಾಮ್ ।
ಸತ್ತ್ವೇ ವೀರ್ಯೇ ನ ತೇ ಕಶ್ಚಿತ್ಸಮೋ ವಾನರ ವಿದ್ಯತೇ ॥೪೫॥
ಯದವಪ್ಲುತ್ಯ ವಿಸ್ತೀರ್ಣಂ ಸಾಗರಂ ಪುನರಾಗತಃ।
ಜೀವಿತಸ್ಯ ಪ್ರದಾತಾ ನಸ್ತ್ವಮೇಕೋ ವಾನರೋತ್ತಮ ॥೪೬॥
ತ್ವತ್ಪ್ರಸಾದಾತ್ ಸಮೇಷ್ಯಾಮಃ ಸಿದ್ಧಾರ್ಥಾ ರಾಘವೇಣ ಹ ।
ಅಹೋ ಸ್ವಾಮಿನಿ ತೇ ಭಕ್ತಿರಹೋ ವೀರ್ಯಮಹೋ ಧೃತಿಃ॥೪೭॥
ದಿಷ್ಟ್ಯಾ ದೃಷ್ಟಾ ತ್ವಯಾ ದೇವೀ ರಾಮಪತ್ನೀ ಯಶಸ್ವಿನೀ ।
ದಿಷ್ಟ್ಯಾ ತ್ಯಕ್ಷ್ಯತಿ ಕಾಕುತ್ಸ್ಥಃ ಶೋಕಂ ಸೀತಾ ವಿಯೋಗಜಮ್ ॥೪೮॥
ತತೋಽಙ್ಗದಂ ಹನೂಮನ್ತಂ ಜಾಮ್ಬವನ್ತಂ ಚ ವಾನರಾಃ।
ಪರಿವಾರ್ಯ ಪ್ರಮುದಿತಾ ಭೇಜಿರೇ ವಿಪುಲಾಃ ಶಿಲಾಃ॥೪೯॥
ಉಪವಿಷ್ಟಾ ಗಿರೇಸ್ತಸ್ಯ ಶಿಲಾಸು ವಿಪುಲಾಸು ತೇ ।
ಶ್ರೋತುಕಾಮಾಃ ಸಮುದ್ರಸ್ಯ ಲಙ್ಘನಂ ವಾನರೋತ್ತಮಾಃ॥೫೦॥
ದರ್ಶನಂ ಚಾಪಿ ಲಙ್ಕಾಯಾಃ ಸೀತಾಯಾ ರಾವಣಸ್ಯ ಚ ।
ತಸ್ಥುಃ ಪ್ರಾಞ್ಜಲಯಃ ಸರ್ವೇ ಹನೂಮದ್ವದನೋನ್ಮುಖಾಃ॥೫೧॥
ತಸ್ಥೌ ತತ್ರಾಙ್ಗದಃ ಶ್ರೀಮಾನ್ವಾನರೈರ್ಬಹುಭಿರ್ವೃತಃ।
ಉಪಾಸ್ಯಮಾನೋ ವಿಬುಧೈರ್ದಿವಿ ದೇವಪತಿರ್ಯಥಾ ॥೫೨॥
ಹನೂಮತಾ ಕೀರ್ತಿಮತಾ ಯಶಸ್ವಿನಾ
	ತಥಾಙ್ಗದೇನಾಙ್ಗದನದ್ಧಬಾಹುನಾ ।
ಮುದಾ ತದಾಧ್ಯಾಸಿತಮುನ್ನತಂ ಮಹನ್
	ಮಹೀಧರಾಗ್ರಂ ಜ್ವಲಿತಂ ಶ್ರಿಯಾಭವತ್ ॥೫೩॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಸಪ್ತಪಞ್ಚಾಶಃ ಸರ್ಗಃ