ಅಥ ಏಕಷಷ್ಟಿತಮಃ ಸರ್ಗಃ
ತತೋ ಜಾಮ್ಬವತೋ ವಾಕ್ಯಮಗೃಹ್ಣನ್ತ ವನೌಕಸಃ।
ಅಙ್ಗದಪ್ರಮುಖಾ ವೀರಾ ಹನೂಮಾಂಶ್ಚ ಮಹಾಕಪಿಃ॥೧॥
ಪ್ರೀತಿಮನ್ತಸ್ತತಃ ಸರ್ವೇ ವಾಯುಪುತ್ರಪುರಃಸರಾಃ।
ಮಹೇನ್ದ್ರಾಗ್ರಾತ್ ಸಮುತ್ಪತ್ಯ ಪುಪ್ಲುವುಃ ಪ್ಲವಗರ್ಷಭಾಃ॥೨॥
ಮೇರುಮನ್ದರಸಙ್ಕಾಶಾ ಮತ್ತಾ ಇವ ಮಹಾಗಜಾಃ।
ಛಾದಯನ್ತ ಇವಾಕಾಶಂ ಮಹಾಕಾಯಾ ಮಹಾಬಲಾಃ॥೩॥
ಸಭಾಜ್ಯಮಾನಂ ಭೂತೈಸ್ತಮಾತ್ಮವನ್ತಂ ಮಹಾಬಲಮ್ ।
ಹನೂಮನ್ತಂ ಮಹಾವೇಗಂ ವಹನ್ತ ಇವ ದೃಷ್ಟಿಭಿಃ॥೪॥
ರಾಘವೇ ಚಾರ್ಥನಿರ್ವೃತ್ತಿಂ ಕರ್ತುಂ ಚ ಪರಮಂ ಯಶಃ।
ಸಮಾಧಾಯ ಸಮೃದ್ಧಾರ್ಥಾಃ ಕರ್ಮಸಿದ್ಧಿಭಿರುನ್ನತಾಃ॥೫॥
ಪ್ರಿಯಾಖ್ಯಾನೋನ್ಮುಖಾಃ ಸರ್ವೇ ಸರ್ವೇ ಯುದ್ಧಾಭಿನನ್ದಿನಃ।
ಸರ್ವೇ ರಾಮಪ್ರತೀಕಾರೇ ನಿಶ್ಚಿತಾರ್ಥಾ ಮನಸ್ವಿನಃ॥೬॥
ಪ್ಲವಮಾನಾಃ ಖಮಾಪ್ಲುತ್ಯ ತತಸ್ತೇ ಕಾನನೌಕಸಃ।
ನನ್ದನೋಪಮಮಾಸೇದುರ್ವನಂ ದ್ರುಮಶತಾಯುತಮ್ ॥೭॥
ಯತ್ತನ್ಮಧುವನಂ ನಾಮ ಸುಗ್ರೀವಸ್ಯಾಭಿರಕ್ಷಿತಮ್ ।
ಅಧೃಷ್ಯಂ ಸರ್ವಭೂತಾನಾಂ ಸರ್ವಭೂತಮನೋಹರಮ್ ॥೮॥
ಯದ್ರಕ್ಷತಿ ಮಹಾವೀರಃ ಸದಾ ದಧಿಮುಖಃ ಕಪಿಃ।
ಮಾತುಲಃ ಕಪಿಮುಖ್ಯಸ್ಯ ಸುಗ್ರೀವಸ್ಯ ಮಹಾತ್ಮನಃ॥೯॥
ತೇ ತದ್ವನಮುಪಾಗಮ್ಯ ಬಭೂವುಃ ಪರಮೋತ್ಕಟಾಃ।
ವಾನರಾ ವಾನರೇನ್ದ್ರಸ್ಯ ಮನಃಕಾನ್ತಂ ಮಹಾವನಮ್ ॥೧೦॥
ತತಸ್ತೇ ವಾನರಾ ಹೃಷ್ಟಾ ದೃಷ್ಟ್ವಾ ಮಧುವನಂ ಮಹತ್ ।
ಕುಮಾರಮಭ್ಯಯಾಚನ್ತ ಮಧೂನಿ ಮಧುಪಿಙ್ಗಲಾಃ॥೧೧॥
ತತಃ ಕುಮಾರಸ್ತಾನ್ವೃದ್ಧಾಞ್ಜಾಮ್ಬವತ್ಪ್ರಮುಖಾನ್ಕಪೀನ್ ।
ಅನುಮಾನ್ಯ ದದೌ ತೇಷಾಂ ನಿಸರ್ಗಂ ಮಧುಭಕ್ಷಣೇ ॥೧೨॥
ತೇ ನಿಸೃಷ್ಟಾಃ ಕುಮಾರೇಣ ಧೀಮತಾ ವಾಲಿಸೂನುನಾ ।
ಹರಯಃ ಸಮಪದ್ಯನ್ತ ದ್ರುಮಾನ್ ಮಧುಕರಾಕುಲಾನ್ ॥೧೩॥
ಭಕ್ಷಯನ್ತಃ ಸುಗನ್ಧೀನಿ ಮೂಲಾನಿ ಚ ಫಲಾನಿ ಚ ।
ಜಗ್ಮುಃ ಪ್ರಹರ್ಷಂ ತೇ ಸರ್ವೇ ಬಭೂವುಶ್ಚ ಮದೋತ್ಕಟಾಃ॥೧೪॥
ತತಶ್ಚಾನುಮತಾಃ ಸರ್ವೇ ಸುಸಂಹೃಷ್ಟಾ ವನೌಕಸಃ।
ಮುದಿತಾಶ್ಚ ತತಸ್ತೇ ಚ ಪ್ರನೃತ್ಯನ್ತಿ ತತಸ್ತತಃ॥೧೫॥
ಗಾಯನ್ತಿ ಕೇಚಿತ್ ಪ್ರಹಸನ್ತಿ ಕೇಚಿ-
	ನ್ನೃತ್ಯನ್ತಿ ಕೇಚಿತ್ ಪ್ರಣಮನ್ತಿ ಕೇಚಿತ್ ।
ಪತನ್ತಿ ಕೇಚಿತ್ ಪ್ರಚರನ್ತಿ ಕೇಚಿತ್
	ಪ್ಲವನ್ತಿ ಕೇಚಿತ್ ಪ್ರಲಪನ್ತಿ ಕೇಚಿತ್ ॥೧೬॥
ಪರಸ್ಪರಂ ಕೇಚಿದುಪಾಶ್ರಯನ್ತಿ
	ಪರಸ್ಪರಂ ಕೇಚಿದತಿಬ್ರುವನ್ತಿ ।
ದ್ರುಮಾದ್ದ್ರುಮಂ ಕೇಚಿದಭಿದ್ರವನ್ತಿ
	ಕ್ಷಿತೌ ನಗಾಗ್ರಾನ್ನಿಪತನ್ತಿ ಕೇಚಿತ್ ॥೧೭॥
ಮಹೀತಲಾತ್ಕೇಚಿದುದೀರ್ಣವೇಗಾ
	ಮಹಾದ್ರುಮಾಗ್ರಾಣ್ಯಭಿಸಮ್ಪತನ್ತಿ ।
ಗಾಯನ್ತಮನ್ಯಃ ಪ್ರಹಸನ್ನುಪೈತಿ
	ಹಸನ್ತಮನ್ಯಃ ಪ್ರರುದನ್ನುಪೈತಿ ॥೧೮॥
ತುದನ್ತಮನ್ಯಃ ಪ್ರಣದನ್ನುಪೈತಿ
	ಸಮಾಕುಲಂ ತತ್ ಕಪಿಸೈನ್ಯಮಾಸೀತ್ ।
ನ ಚಾತ್ರ ಕಶ್ಚಿನ್ನ ಬಭೂವ ಮತ್ತೋ
	ನ ಚಾತ್ರ ಕಶ್ಚಿನ್ನ ಬಭೂವ ದೃಪ್ತಃ॥೧೯॥
ತತೋ ವನಂ ತತ್ಪರಿಭಕ್ಷ್ಯಮಾಣಂ
	ದ್ರುಮಾಂಶ್ಚ ವಿಧ್ವಂಸಿತಪತ್ರಪುಷ್ಪಾನ್ ।
ಸಮೀಕ್ಷ್ಯ ಕೋಪಾದ್ದಧಿವಕ್ತ್ರನಾಮಾ
	ನಿವಾರಯಾಮಾಸ ಕಪಿಃ ಕಪೀಂಸ್ತಾನ್ ॥೨೦॥
ಸ ತೈಃ ಪ್ರವೃದ್ಧೈಃ ಪರಿಭರ್ತ್ಸ್ಯಮಾನೋ
	ವನಸ್ಯ ಗೋಪ್ತಾ ಹರಿವೃದ್ಧವೀರಃ।
ಚಕಾರ ಭೂಯೋ ಮತಿಮುಗ್ರತೇಜಾ
	ವನಸ್ಯ ರಕ್ಷಾಂ ಪ್ರತಿ ವಾನರೇಭ್ಯಃ॥೨೧॥
ಉವಾಚ ಕಾಂಶ್ಚಿತ್ ಪರುಷಾಣ್ಯಭೀತ-
	ಮಸಕ್ತಮನ್ಯಾಂಶ್ಚ ತಲೈರ್ಜಘಾನ ।
ಸಮೇತ್ಯ ಕೈಶ್ಚಿತ್ ಕಲಹಂ ಚಕಾರ
	ತಥೈವ ಸಾಮ್ನೋಪಜಗಾಮ ಕಾಂಶ್ಚಿತ್ ॥೨೨॥
ಸ ತೈರ್ಮದಾದಪ್ರತಿವಾರ್ಯವೇಗೈ-
	ರ್ಬಲಾಚ್ಚ ತೇನ ಪ್ರತಿವಾರ್ಯಮಾಣೈಃ।
ಪ್ರಧರ್ಷಣೇ ತ್ಯಕ್ತಭಯೈಃ ಸಮೇತ್ಯ
	ಪ್ರಕೃಷ್ಯತೇ ಚಾಪ್ಯನವೇಕ್ಷ್ಯ ದೋಷಮ್ ॥೨೩॥
ನಖೈಸ್ತುದನ್ತೋ ದಶನೈರ್ದಶನ್ತ-
	ಸ್ತಲೈಶ್ಚ ಪಾದೈಶ್ಚ ಸಮಾಪಯನ್ತಃ।
ಮದಾತ್ಕಪಿಂ ತೇ ಕಪಯಃ ಸಮನ್ತಾ-
	ನ್ಮಹಾವನಂ ನಿರ್ವಿಷಯಂ ಚ ಚಕ್ರುಃ॥೨೪॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಏಕಷಷ್ಟಿತಮಃ ಸರ್ಗಃ