ಅಥ ತ್ರಿಷಷ್ಟಿತಮಃ ಸರ್ಗಃ
ತತೋ ಮೂರ್ಧ್ನಾ ನಿಪತಿತಂ ವಾನರಂ ವಾನರರ್ಷಭಃ।
ದೃಷ್ಟ್ವೈವೋದ್ವಿಗ್ನಹೃದಯೋ ವಾಕ್ಯಮೇತದುವಾಚ ಹ ॥೧॥
ಉತ್ತಿಷ್ಠೋತ್ತಿಷ್ಠ ಕಸ್ಮಾತ್ತ್ವಂ ಪಾದಯೋಃ ಪತಿತೋ ಮಮ ।
ಅಭಯಂ ತೇ ಪ್ರದಾಸ್ಯಾಮಿ ಸತ್ಯಮೇವಾಭಿಧೀಯತಾಮ್ ॥೨॥
ಕಿಂ ಸಮ್ಭ್ರಮಾದ್ಧಿತಂ ಕೃತ್ಸ್ರಂ ಬ್ರೂಹಿ ಯದ್ ಬಕ್ತುಮರ್ಹಸಿ ।
ಕಚ್ಚಿನ್ಮಧುವನೇ ಸ್ವಸ್ತಿ ಶ್ರೋತುಮಿಚ್ಛಾಮಿ ವಾನರ ॥೩॥
ಸ ಸಮಾಶ್ವಾಸಿತಸ್ತೇನ ಸುಗ್ರೀವೇಣ ಮಹಾತ್ಮನಾ ।
ಉತ್ಥಾಯ ಸ ಮಹಾಪ್ರಾಜ್ಞೋ ವಾಕ್ಯಂ ದಧಿಮುಖೋಽಬ್ರವೀತ್ ॥೪॥
ನೈವರ್ಕ್ಷರಜಸಾ ರಾಜನ್ನ ತ್ವಯಾ ನ ಚ ವಾಲಿನಾ ।
ವನಂ ನಿಸೃಷ್ಟಪೂರ್ವಂ ತೇ ನಾಶಿತಂ ತತ್ತು ವಾನರೈಃ॥೫॥
ನ್ಯವಾರಯಮಹಂ ಸರ್ವಾನ್ ಸಹೈಭಿರ್ವನಚಾರಿಭಿಃ।
ಅಚಿನ್ತಯಿತ್ವಾ ಮಾಂ ಹೃಷ್ಟಾ ಭಕ್ಷಯನ್ತಿ ಪಿಬನ್ತಿ ಚ ॥೬॥
ಏಭಿಃ ಪ್ರಧರ್ಷಣಾಯಾಂ ಚ ವಾರಿತಂ ವನಪಾಲಕೈಃ।
ಮಾಮಪ್ಯಚಿನ್ತಯನ್ ದೇವ ಭಕ್ಷಯನ್ತಿ ವನೌಕಸಃ॥೭॥
ಶಿಷ್ಟಮತ್ರಾಪವಿಧ್ಯನ್ತಿ ಭಕ್ಷಯನ್ತಿ ತಥಾಪರೇ ।
ನಿವಾರ್ಯಮಾಣಾಸ್ತೇ ಸರ್ವೇ ಭ್ರುಕುಟಿಂ ದರ್ಶಯನ್ತಿ ಹಿ ॥೮॥
ಇಮೇ ಹಿ ಸಂರಬ್ಧತರಾಸ್ತದಾ ತೈಃ ಸಮ್ಪ್ರಧರ್ಷಿತಾಃ।
ನಿವಾರ್ಯನ್ತೇ ವನಾತ್ತಸ್ಮಾತ್ಕ್ರುದ್ಧೈರ್ವಾನರಪುಙ್ಗವೈಃ॥೯॥
ತತಸ್ತೈರ್ಬಹುಭಿರ್ವೀರೈರ್ವಾನರೈರ್ವಾನರರ್ಷಭಾಃ।
ಸಂರಕ್ತನಯನೈಃ ಕ್ರೋಧಾದ್ಧರಯಃ ಸಮ್ಪ್ರಧರ್ಷಿತಾಃ॥೧೦॥
ಪಾಣಿಭಿರ್ನಿಹತಾಃ ಕೇಚಿತ್ಕೇಚಿಜ್ಜಾನುಭಿರಾಹತಾಃ।
ಪ್ರಕೃಷ್ಟಾಶ್ಚ ತದಾ ಕಾಮಂ ದೇವಮಾರ್ಗಂ ಚ ದರ್ಶಿತಾಃ॥೧೧॥
ಏವಮೇತೇ ಹತಾಃ ಶೂರಾಸ್ತ್ವಯಿ ತಿಷ್ಠತಿ ಭರ್ತರಿ ।
ಕೃತ್ಸ್ನಂ ಮಧುವನಂ ಚೈವ ಪ್ರಕಾಮಂ ತೈಶ್ಚ ಭಕ್ಷ್ಯತೇ ॥೧೨॥
ಏವಂ ವಿಜ್ಞಾಪ್ಯಮಾನಂ ತಂ ಸುಗ್ರೀವಂ ವಾನರರ್ಷಭಮ್ ।
ಅಪೃಚ್ಛತ್ತಂ ಮಹಾಪ್ರಾಜ್ಞೋ ಲಕ್ಷ್ಮಣಃ ಪರವೀರಹಾ ॥೧೩॥
ಕಿಮಯಂ ವಾನರೋ ರಾಜನ್ವನಪಃ ಪ್ರತ್ಯುಪಸ್ಥಿತಃ।
ಕಿಂ ಚಾರ್ಥಮಭಿನಿರ್ದಿಶ್ಯ ದುಃಖಿತೋ ವಾಕ್ಯಮಬ್ರವೀತ್ ॥೧೪॥
ಏವಮುಕ್ತಸ್ತು ಸುಗ್ರೀವೋ ಲಕ್ಷ್ಮಣೇನ ಮಹಾತ್ಮನಾ ।
ಲಕ್ಷ್ಮಣಂ ಪ್ರತ್ಯುವಾಚೇದಂ ವಾಕ್ಯಂ ವಾಕ್ಯವಿಶಾರದಃ॥೧೫॥
ಆರ್ಯ ಲಕ್ಷ್ಮಣ ಸಮ್ಪ್ರಾಹ ವೀರೋ ದಧಿಮುಖಃ ಕಪಿಃ।
ಅಙ್ಗದಪ್ರಮುಖೈರ್ವೀರೈರ್ಭಕ್ಷಿತಂ ಮಧು ವಾನರೈಃ॥೧೬॥
ನೈಷಾಮಕೃತಕಾರ್ಯಾಣಾಮೀದೃಶಃ ಸ್ಯಾದ್ ವ್ಯತಿಕ್ರಮಃ।
ವನಂ ಯದಭಿಪನ್ನಾಸ್ತೇ ಸಾಧಿತಂ ಕರ್ಮ ತದ್ ಧ್ರುವಮ್ ॥೧೭॥
ವಾರಯನ್ತೋ ಭೃಶಂ ಪ್ರಾಪ್ತಾಃ ಪಾಲಾ ಜಾನುಭಿರಾಹತಾಃ।
ತಥಾ ನ ಗಣಿತಶ್ಚಾಯಂ ಕಪಿರ್ದಧಿಮುಖೋ ಬಲೀ ॥೧೮॥
ಪತಿರ್ಮಮ ವನಸ್ಯಾಯಮಸ್ಮಾಭಿಃ ಸ್ಥಾಪಿತಃ ಸ್ವಯಮ್ ।
ದೃಷ್ಟಾ ದೇವೀ ನ ಸನ್ದೇಹೋ ನ ಚಾನ್ಯೇನ ಹನೂಮತಾ ॥೧೯॥
ನ ಹ್ಯನ್ಯಃ ಸಾಧನೇ ಹೇತುಃ ಕರ್ಮಣೋಽಸ್ಯ ಹನೂಮತಃ।
ಕಾರ್ಯಸಿದ್ಧಿರ್ಹನುಮತಿ ಮತಿಶ್ಚ ಹರಿಪುಙ್ಗವೇ ॥೨೦॥
ವ್ಯವಸಾಯಶ್ಚ ವೀರ್ಯಂ ಚ ಶ್ರುತಂ ಚಾಪಿ ಪ್ರತಿಷ್ಠಿತಮ್ ।
ಜಾಮ್ಬವಾನ್ಯತ್ರ ನೇತಾ ಸ್ಯಾದಙ್ಗದಶ್ಚ ಮಹಾಬಲಃ॥೨೧॥
ಹನೂಮಾಂಶ್ಚಾಪ್ಯಧಿಷ್ಠಾತಾ ನ ತತ್ರ ಗತಿರನ್ಯಥಾ ।
ಅಙ್ಗದಪ್ರಮುಖೈರ್ವೀರೈರ್ಹತಂ ಮಧುವನಂ ಕಿಲ ॥೨೨॥
ವಿಚಿತ್ಯ ದಕ್ಷಿಣಾಮಾಶಾಮಾಗತೈರ್ಹರಿಪುಙ್ಗವೈಃ।
ಆಗತೈಶ್ಚಾಪ್ರಧೃಷ್ಯಂ ತದ್ಧತಂ ಮಧುವನಂ ಹಿ ತೈಃ॥೨೩॥
ಧರ್ಷಿತಂ ಚ ವನಂ ಕೃತ್ಸ್ನಮುಪಯುಕ್ತಂ ತು ವಾನರೈಃ।
ಪಾತಿತಾ ವನಪಾಲಾಸ್ತೇ ತದಾ ಜಾನುಭಿರಾಹತಾಃ॥೨೪॥
ಏತದರ್ಥಮಯಂ ಪ್ರಾಪ್ತೋ ವಕ್ತುಂ ಮಧುರವಾಗಿಹ ।
ನಾಮ್ನಾ ದಧಿಮುಖೋ ನಾಮ ಹರಿಃ ಪ್ರಖ್ಯಾತವಿಕ್ರಮಃ॥೨೫॥
ದೃಷ್ಟಾ ಸೀತಾ ಮಹಾಬಾಹೋ ಸೌಮಿತ್ರೇ ಪಶ್ಯ ತತ್ತ್ವತಃ।
ಅಭಿಗಮ್ಯ ಯಥಾ ಸರ್ವೇ ಪಿಬನ್ತಿ ಮಧು ವಾನರಾಃ॥೨೬॥
ನ ಚಾಪ್ಯದೃಷ್ಟ್ವಾ ವೈದೇಹೀಂ ವಿಶ್ರುತಾಃ ಪುರುಷರ್ಷಭ ।
ವನಂ ದತ್ತವರಂ ದಿವ್ಯಂ ಧರ್ಷಯೇಯುರ್ವನೌಕಸಃ॥೨೭॥
ತತಃ ಪ್ರಹೃಷ್ಟೋ ಧರ್ಮಾತ್ಮಾ ಲಕ್ಷ್ಮಣಃ ಸಹರಾಘವಃ।
ಶ್ರುತ್ವಾ ಕರ್ಣಸುಖಾಂ ವಾಣೀಂ ಸುಗ್ರೀವವದನಾಚ್ಚ್ಯುತಾಮ್ ॥೨೮॥
ಪ್ರಾಹೃಷ್ಯತ ಭೃಶಂ ರಾಮೋ ಲಕ್ಷ್ಮಣಶ್ಚ ಮಹಾಯಶಾಃ।
ಶ್ರುತ್ವಾ ದಧಿಮುಖಸ್ಯೈವಂ ಸುಗ್ರೀವಸ್ತು ಪ್ರಹೃಷ್ಯ ಚ ॥೨೯॥
ವನಪಾಲಂ ಪುನರ್ವಾಕ್ಯಂ ಸುಗ್ರೀವಃ ಪ್ರತ್ಯಭಾಷತ ।
ಪ್ರೀತೋಽಸ್ಮಿ ಸೋಽಹಂ ಯದ್ಭುಕ್ತಂ ವನಂ ತೈಃ ಕೃತಕರ್ಮಭಿಃ॥೩೦॥
ಧರ್ಷಿತಂ ಮರ್ಷಣೀಯಂ ಚ ಚೇಷ್ಟಿತಂ ಕೃತಕರ್ಮಣಾಮ್ ।
ಗಚ್ಛ ಶೀಘ್ರಂ ಮಧುವನಂ ಸಂರಕ್ಷಸ್ವ ತ್ವಮೇವ ಹಿ ।
ಶೀಘ್ರಂ ಪ್ರೇಷಯ ಸರ್ವಾಂಸ್ತಾನ್ ಹನೂಮತ್ಪ್ರಮುಖಾನ್ ಕಪೀನ್ ॥೩೧॥
ಇಚ್ಛಾಮಿ ಶೀಘ್ರಂ ಹನುಮತ್ಪ್ರಧಾನಾ
	ನ್ಶಾಖಾಮೃಗಾಂಸ್ತಾನ್ಮೃಗರಾಜದರ್ಪಾನ್ ।
ಪ್ರಷ್ಟುಂ ಕೃತಾರ್ಥಾನ್ಸಹ ರಾಘವಾಭ್ಯಾಂ
	ಶ್ರೋತುಂ ಚ ಸೀತಾಧಿಗಮೇ ಪ್ರಯತ್ನಮ್ ॥೩೨॥
ಪ್ರೀತಿಸ್ಫೀತಾಕ್ಷೌ ಸಮ್ಪ್ರಹೃಷ್ಟೌ ಕುಮಾರೌ
	ದೃಷ್ಟ್ವಾ ಸಿದ್ಧಾರ್ಥೌ ವಾನರಾಣಾಂ ಚ ರಾಜಾ ।
ಅಙ್ಗೈಃ ಪ್ರಹೃಷ್ಟೈಃ ಕಾರ್ಯಸಿದ್ಧಿಂ ವಿದಿತ್ವಾ
	ಬಾಹ್ವೋರಾಸನ್ನಾಮತಿಮಾತ್ರಂ ನನನ್ದ ॥೩೩॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ತ್ರಿಷಷ್ಟಿತಮಃ ಸರ್ಗಃ