ಅಥ ಸಪ್ತಷಷ್ಟಿತಮಃ ಸರ್ಗಃ
ಏವಮುಕ್ತಸ್ತು ಹನುಮಾನ್ರಾಘವೇಣ ಮಹಾತ್ಮನಾ ।
ಸೀತಾಯಾ ಭಾಷಿತಂ ಸರ್ವಂ ನ್ಯವೇದಯತ ರಾಘವೇ ॥೧॥
ಇದಮುಕ್ತವತೀ ದೇವೀ ಜಾನಕೀ ಪುರುಷರ್ಷಭ ।
ಪೂರ್ವವೃತ್ತಮಭಿಜ್ಞಾನಂ ಚಿತ್ರಕೂಟೇ ಯಥಾತಥಮ್ ॥೨॥
ಸುಖಸುಪ್ತಾ ತ್ವಯಾ ಸಾರ್ಧಂ ಜಾನಕೀ ಪೂರ್ವಮುತ್ಥಿತಾ ।
ವಾಯಸಃ ಸಹಸೋತ್ಪತ್ಯ ವಿದದಾರ ಸ್ತನಾನ್ತರಮ್ ॥೩॥
ಪರ್ಯಾಯೇಣ ಚ ಸುಪ್ತಸ್ತ್ವಂ ದೇವ್ಯಙ್ಕೇ ಭರತಾಗ್ರಜ ।
ಪುನಶ್ಚ ಕಿಲ ಪಕ್ಷೀ ಸ ದೇವ್ಯಾ ಜನಯತಿ ವ್ಯಥಾ ॥೪॥
ತತಃ ಪುನರುಪಾಗಮ್ಯ ವಿದದಾರ ಭೃಶಂ ಕಿಲ ।
ತತಸ್ತ್ವಂ ಬೋಧಿತಸ್ತಸ್ಯಾಃ ಶೋಣಿತೇನ ಸಮುಕ್ಷಿತಃ॥೫॥
ವಾಯಸೇನ ಚ ತೇನೈವಂ ಸತತಂ ಬಾಧ್ಯಮಾನಯಾ ।
ಬೋಧಿತಃ ಕಿಲ ದೇವ್ಯಾ ತ್ವಂ ಸುಖಸುಪ್ತಃ ಪರನ್ತಪ ॥೬॥
ತಾಂ ಚ ದೃಷ್ಟ್ವಾ ಮಹಾಬಾಹೋ ದಾರಿತಾಂ ಚ ಸ್ತನಾನ್ತರೇ ।
ಆಶೀವಿಷ ಇವ ಕ್ರುದ್ಧಸ್ತತೋ ವಾಕ್ಯಂ ತ್ವಮೂಚಿವಾನ್ ॥೭॥
ನಖಾಗ್ರೈಃ ಕೇನ ತೇ ಭೀರು ದಾರಿತಂ ವೈ ಸ್ತನಾನ್ತರಮ್ ।
ಕಃ ಕ್ರೀಡತಿ ಸರೋಷೇಣ ಪಞ್ಚವಕ್ತ್ರೇಣ ಭೋಗಿನಾ ॥೮॥
ನಿರೀಕ್ಷಮಾಣಃ ಸಹಸಾ ವಾಯಸಂ ಸಮುದೈಕ್ಷಥಾಃ।
ನಖೈಃ ಸರುಧಿರೈಸ್ತೀಕ್ಷ್ಣೈಸ್ತಾಮೇವಾಭಿಮುಖಂ ಸ್ಥಿತಮ್ ॥೯॥
ಸುತಃ ಕಿಲ ಸ ಶಕ್ರಸ್ಯ ವಾಯಸಃ ಪತತಾಂ ವರಃ।
ಧರಾನ್ತರಗತಃ ಶೀಘ್ರಂ ಪವನಸ್ಯ ಗತೌ ಸಮಃ॥೧೦॥
ತತಸ್ತಸ್ಮಿನ್ಮಹಾಬಾಹೋ ಕೋಪಸಂವರ್ತಿತೇಕ್ಷಣಃ।
ವಾಯಸೇ ತ್ವಂ ವ್ಯಧಾಃ ಕ್ರೂರಾಂ ಮತಿಂ ಮತಿಮತಾಂ ವರ ॥೧೧॥
ಸ ದರ್ಭಸಂಸ್ತರಾದ್ಗೃಹ್ಯ ಬ್ರಹ್ಮಾಸ್ತ್ರೇಣನ್ಯಯೋಜಯಃ।
ಸ ದೀಪ್ತ ಇವ ಕಾಲಾಗ್ನಿರ್ಜಜ್ವಾಲಾಭಿಮುಖಂ ಖಗಮ್ ॥೧೨॥
ಸ ತ್ವಂ ಪ್ರದೀಪ್ತಂ ಚಿಕ್ಷೇಪ ದರ್ಭಂ ತಂ ವಾಯಸಂ ಪ್ರತಿ ।
ತತಸ್ತು ವಾಯಸಂ ದೀಪ್ತಃ ಸ ದರ್ಭೋಽನುಜಗಾಮ ಹ ॥೧೩॥
ಭೀತೈಶ್ಚ ಸಮ್ಪರಿತ್ಯಕ್ತಃ ಸುರೈಃ ಸರ್ವೈಶ್ಚ ವಾಯಸಃ।
ತ್ರೀಁಲ್ಲೋಕಾನ್ಸಮ್ಪರಿಕ್ರಮ್ಯ ತ್ರಾತಾರಂ ನಾಧಿಗಚ್ಛತಿ ॥೧೪॥
ಪುನರಪ್ಯಾಗತಸ್ತತ್ರ ತ್ವತ್ಸಕಾಶಮರಿನ್ದಮ ।
ತ್ವಂ ತಂ ನಿಪತಿತಂ ಭೂಮೌ ಶರಣ್ಯಃ ಶರಣಾಗತಮ್ ॥೧೫॥
ವಧಾರ್ಹಮಪಿ ಕಾಕುತ್ಸ್ಥ ಕೃಪಯಾ ಪರಿಪಾಲಯಃ।
ಮೋಘಮಸ್ತ್ರಂ ನ ಶಕ್ಯಂ ತು ಕರ್ತುಮಿತ್ಯೇವ ರಾಘವ ॥೧೬॥
ಭವಾಂಸ್ತಸ್ಯಾಕ್ಷಿ ಕಾಕಸ್ಯ ಹಿನಸ್ತಿ ಸ್ಮ ಸ ದಕ್ಷಿಣಮ್ ।
ರಾಮ ತ್ವಾಂ ಸ ನಮಸ್ಕೃತ್ಯ ರಾಜ್ಞೋ ದಶರಥಸ್ಯ ಚ ॥೧೭॥
ವಿಸೃಷ್ಟಸ್ತು ತದಾ ಕಾಕಃ ಪ್ರತಿಪೇದೇ ಸ್ವಮಾಲಯಮ್ ।
ಏವಮಸ್ತ್ರವಿದಾಂ ಶ್ರೇಷ್ಠಃ ಸತ್ತ್ವವಾಞ್ಛೀಲವಾನಪಿ ॥೧೮॥
ಕಿಮರ್ಥಮಸ್ತ್ರಂ ರಕ್ಷಃಸು ನ ಯೋಜಯಸಿ ರಾಘವ ।
ನ ದಾನವಾ ನ ಗನ್ಧರ್ವಾ ನಾಸುರಾ ನ ಮರುದ್ಗಣಾಃ॥೧೯॥
ತವ ರಾಮ ರಣೇ ಶಕ್ತಾಸ್ತಥಾ  ಪ್ರತಿಸಮಾಸಿತುಮ್ ।
ತವ ವೀರ್ಯವತಃ ಕಚ್ಚಿನ್ಮಯಿ ಯದ್ಯಸ್ತಿ ಸಮ್ಭ್ರಮಃ॥೨೦॥
ಕ್ಷಿಪ್ರಂ ಸುನಿಶಿತೈರ್ಬಾರ್ಣೈಹನ್ಯತಾಂ ಯುಧಿ ರಾವಣಃ।
ಭ್ರಾತುರಾದೇಶಮಾಜ್ಞಾಯ ಲಕ್ಷ್ಮಣೋ ವಾ ಪರನ್ತಪಃ॥೨೧॥
ಸ ಕಿಮರ್ಥಂ ನರವರೋ ನ ಮಾಂ ರಕ್ಷತಿ ರಾಘವಃ।
ಶಕ್ತೌ ತೌ ಪುರುಷವ್ಯಾಘ್ರೌ ವಾಯ್ವಗ್ನಿಸಮತೇಜಸೌ ॥೨೨॥
ಸುರಾಣಾಮಪಿ ದುರ್ಧರ್ಷೌ ಕಿಮರ್ಥಂ ಮಾಮುಪೇಕ್ಷತಃ।
ಮಮೈವ ದುಷ್ಕೃತಂ ಕಿಞ್ಚಿನ್ಮಹದಸ್ತಿ ನ ಸಂಶಯಃ॥೨೩॥
ಸಮರ್ಥೌ ಸಹಿತೌ ಯನ್ಮಾಂ ನ ರಕ್ಷೇತೇ ಪರನ್ತಪೌ ।
ವೈದೇಹ್ಯಾ ವಚನಂ ಶ್ರುತ್ವಾ ಕರುಣಂ ಸಾಧುಭಾಷಿತಮ್ ॥೨೪॥
ಪುನರಪ್ಯಹಮಾರ್ಯಾಂ ತಾಮಿದಂ ವಚನಮಬ್ರುವಮ್ ।
ತ್ವಚ್ಛೋಕವಿಮುಖೋ ರಾಮೋ ದೇವಿ ಸತ್ಯೇನ ತೇ ಶಪೇ ॥೨೫॥
ರಾಮೇ ದುಃಖಾಭಿಭೂತೇ ಚ ಲಕ್ಷ್ಮಣಃ ಪರಿತಪ್ಯತೇ ।
ಕಥಞ್ಚಿದ್ಭವತೀ ದೃಷ್ಟಾ ನ ಕಾಲಃ ಪರಿಶೋಚಿತುಮ್ ॥೨೬॥
ಅಸ್ಮಿನ್ ಮುಹೂರ್ತೇ ದುಃಖಾನಾಮನ್ತಂ ದ್ರಕ್ಷ್ಯಸಿ ಭಾಮಿನಿ ।
ತಾವುಭೌ ನರಶಾರ್ದೂಲೌ ರಾಜಪುತ್ರೌ ಪರನ್ತಪೌ ॥೨೭॥
ತ್ವದ್ದರ್ಶನಕೃತೋತ್ಸಾಹೌ ಲಙ್ಕಾಂ ಭಸ್ಮೀಕರಿಷ್ಯತಃ।
ಹತ್ವಾ ಚ ಸಮರೇ ರೌದ್ರಂ ರಾವಣಂ ಸಹಬಾನ್ಧವಮ್ ॥೨೮॥
ರಾಘವಸ್ತ್ವಾಂ ವರಾರೋಹೇ ಸ್ವಪುರೀಂ ನಯಿತಾ ಧ್ರುವಮ್ ।
ಯತ್ತು ರಾಮೋ ವಿಜಾನೀಯಾದಭಿಜ್ಞಾನಮನಿನ್ದಿತೇ ॥೨೯॥
ಪ್ರೀತಿಸಞ್ಜನನಂ ತಸ್ಯ ಪ್ರದಾತುಂ ತತ್ತ್ವಮರ್ಹಸಿ ।
ಸಾಭಿವೀಕ್ಷ್ಯ ದಿಶಃ ಸರ್ವಾ ವೇಣ್ಯುದ್ಗ್ರಥನಮುತ್ತಮಮ್ ॥೩೦॥
ಮುಕ್ತ್ವಾ ವಸ್ತ್ರಾದ್ದದೌ ಮಹ್ಯಂ ಮಣಿಮೇತಂ ಮಹಾಬಲ ।
ಪ್ರತಿಗೃಹ್ಯ ಮಣಿಂ ದೋರ್ಭ್ಯಾಂ ತವ ಹೇತೋ ರಘುಪ್ರಿಯ ॥೩೧॥
ಶಿರಸಾ ಸಮ್ಪ್ರಣಮ್ಯೈನಾಮಹಮಾಗಮನೇ ತ್ವರೇ ।
ಗಮನೇ ಚ ಕೃತೋತ್ಸಾಹಮವೇಕ್ಷ್ಯ ವರವರ್ಣಿನೀ ॥೩೨॥
ವಿವರ್ಧಮಾನಂ ಚ ಹಿ ಮಾಮುವಾಚ ಜನಕಾತ್ಮಜಾ ।
ಅಶ್ರುಪೂರ್ಣಮುಖೀ ದೀನಾ ಬಾಷ್ಪಗದ್ಗದಭಾಷಿಣೀ ॥೩೩॥
ಮಮೋತ್ಪತನಸಮ್ಭ್ರಾನ್ತಾ ಶೋಕವೇಗಸಮಾಹತಾ ।
ಮಾಮುವಾಚ ತತಃ ಸೀತಾ ಸಭಾಗ್ಯೋಽಸಿ ಮಹಾಕಪೇ ॥೩೪॥
ಯದ್ ದ್ರಕ್ಷ್ಯಸಿ ಮಹಾಬಾಹುಂ ರಾಮಂ ಕಮಲಲೋಚನಮ್ ।
ಲಕ್ಷ್ಮಣಂ ಚ ಮಹಾಬಾಹುಂ ದೇವರಂ ಮೇ ಯಶಸ್ವಿನಮ್ ॥೩೫॥
ಸೀತಯಾಪ್ಯೇವಮುಕ್ತೋಽಹಮಬ್ರುವಂ ಮೈಥಿಲೀಂ ತಥಾ ।
ಪೃಷ್ಟಮಾರೋಹ ಮೇ ದೇವಿ ಕ್ಷಿಪ್ರಂ ಜನಕನನ್ದಿನಿ ॥೩೬॥
ಯಾವತ್ತೇ ದರ್ಶಯಾಮ್ಯದ್ಯ ಸಸುಗ್ರೀವಂ ಸಲಕ್ಷ್ಮಣಮ್ ।
ರಾಘವಂ ಚ ಮಹಾಭಾಗೇ ಭರ್ತಾರಮಸಿತೇಕ್ಷಣೇ ॥೩೭॥
ಸಾಬ್ರವೀನ್ಮಾಂ ತತೋ ದೇವೀ ನೈಷ ಧರ್ಮೋ ಮಹಾಕಪೇ ।
ಯತ್ತೇ ಪೃಷ್ಟಂ ಸಿಷೇವೇಽಹಂ ಸ್ವವಶಾ ಹರಿಪುಙ್ಗವ ॥೩೮॥
ಪುರಾ ಚ ಯದಹಂ ವೀರ ಸ್ಪೃಷ್ಟಾ ಗಾತ್ರೇಷು ರಕ್ಷಸಾ ।
ತತ್ರಾಹಂ ಕಿಂ ಕರಿಷ್ಯಾಮಿ ಕಾಲೇನೋಪನಿಪೀಡಿತಾ ॥೩೯॥
ಗಚ್ಛ ತ್ವಂ ಕಪಿಶಾರ್ದೂಲ ಯತ್ರ ತೌ ನೃಪತೇಃ ಸುತೌ ।
ಇತ್ಯೇವಂ ಸಾ ಸಮಾಭಾಷ್ಯ ಭೂಯಃ ಸನ್ದೇಷ್ಟುಮಾಸ್ಥಿತಾ ॥೪೦॥
ಹನುಮನ್ಸಿಂಹಸಙ್ಕಾಶೌ ತಾವುಭೌ ರಾಮಲಕ್ಷ್ಮಣೌ ।
ಸುಗ್ರೀವಂ ಚ ಸಹಾಮಾತ್ಯಂ ಸರ್ವಾನ್ಬ್ರೂಯಾ ಅನಾಮಯಮ್ ॥೪೧॥
ಯಥಾ ಚ ಸ ಮಹಾಬಾಹುರ್ಮಾಂ ತಾರಯತಿ ರಾಘವಃ।
ಅಸ್ಮಾದ್ದುಃಖಾಮ್ಬುಸಂರೋಧಾತ್ ತತ್ ತ್ವಮಾಖ್ಯಾತುಮರ್ಹಸಿ ॥೪೨॥
ಇಮಂ ಚ ತೀವ್ರಂ ಮಮ ಶೋಕವೇಗಂ
	ರಕ್ಷೋಭಿರೇಭಿಃ ಪರಿಭರ್ತ್ಸನಂ ಚ ।
ಬ್ರೂಯಾಸ್ತು ರಾಮಸ್ಯ ಗತಃ ಸಮೀಪಂ
	ಶಿವಶ್ಚ ತೇಽಧ್ವಾಸ್ತು ಹರಿಪ್ರವೀರ ॥೪೩॥
ಏತತ್ತವಾರ್ಯಾ ನೃಪ ಸಂಯತಾ ಸಾ
	ಸೀತಾ ವಚಃ ಪ್ರಾಹ ವಿಷಾದಪೂರ್ವಮ್ ।
ಏತಚ್ಚ ಬುದ್ಧ್ವಾ ಗದಿತಂ ಯಥಾ ತ್ವಂ
	ಶ್ರದ್ಧತ್ಸ್ವ ಸೀತಾಂ ಕುಶಲಾಂ ಸಮಗ್ರಾಮ್ ॥೪೪॥
ಇತ್ಯಾರ್ಷೇ ಶ್ರೀಮದ್್ರಾಮಾಯಣೇ ವಾಲ್ಮೀಕೀಯೇ ಆದಿಕಾವ್ಯೇ ಸುನ್ದರಕಾಣ್ಡೇ ಸಪ್ತಷಷ್ಟಿತಮಃ ಸರ್ಗಃ