അഥ ധ്യാനശ്ലോകാഃ
ശുക്ലാംബരധരം വിഷ്ണും ശശിവർണം ചതുർഭുജം ।
പ്രസന്നവദനം ധ്യായേത് സർവവിഘ്നോപശാന്തയേ ॥
വാഗീശാദ്യാഃ സുമനസഃ സർവാർഥാനാമുപക്രമേ ।
യം നത്വാ കൃതകൃത്യാഃ സ്യുസ്തം നമാമി ഗജാനനം ॥
ദോർഭിര്യുക്താ ചതുർഭിഃ സ്ഫടികമണിമയീമക്ഷമാലാം ദധാനാ
ഹസ്തേനൈകേന പദ്മം സിതമപി ച ശുകം പുസ്തകം ചാപരേണ ।
ഭാസാ കുന്ദേന്ദുശംഖസ്ഫടികമണിനിഭാ ഭാസമാനാസമാനാ
സാ മേ വാഗ്ദേവതേയം നിവസതു വദനേ സർവദാ സുപ്രസന്നാ ॥
ഗുരുർബ്രഹ്മാ ഗുരുർവിഷ്ണുഃ ഗുരുർദേവോ മഹേശ്വരഃ ।
ഗുരുഃ സാക്ഷാത് പരം ബ്രഹ്മ തസ്മൈ ശ്രീഗുരവേ നമഃ ॥
കൂജന്തം രാമരാമേതി മധുരം മധുരാക്ഷരം ।
ആരുഹ്യ കവിതാശാഖാം വന്ദേ വാല്മീകികോകിലം ॥
വാല്മീകേർമുനിസിമ്ഹസ്യ കവിതാവനചാരിണഃ ।
ശൃണ്വൻ രാമകഥാനാദം കോ ന യാതി പരാം ഗതിം ॥
യഃ പിബൻ സതതം രാമചരിതാമൃതസാഗരം ।
അതൃപ്തസ്തം മുനിം വന്ദേ പ്രാചേതസമകല്മഷം ॥
ഗോഷ്പദീകൃതവാരാശിം മശകീകൃതരാക്ഷസം ।
രാമായണമഹാമാലാരത്നം വന്ദേഽനിലാത്മജം ॥
അഞ്ജനാനന്ദനം വീരം ജാനകീശോകനാശനം ।
കപീശമക്ഷഹന്താരം വന്ദേ ലങ്കാഭയങ്കരം ॥
ഉല്ലങ്്ഘ്യ സിന്ധോഃ സലിലം സലീലം
	യഃ ശോകവഹ്നിം ജനകാത്മജായാഃ ।
ആദായ തേനൈവ ദദാഹ ലങ്കാം
	നമാമി തം പ്രാഞ്ജലിരാഞ്ജനേയം ॥
ആഞ്ജനേയമതിപാടലാനനം കാഞ്ചനാദ്രികമനീയവിഗ്രഹം ।
പാരിജാതതരുമൂലവാസിനം ഭാവയാമി പവമാനനന്ദനം ॥
യത്ര യത്ര രഘുനാഥകീർതനം തത്ര തത്ര കൃതമസ്തകാഞ്ജലിം ।
ബാഷ്പവാരിപരിപൂർണലോചനം മാരുതിം നമത രാക്ഷസാന്തകം ॥
മനോജവം മാരുതതുല്യവേഗം ജിതേന്ദ്രിയം ബുദ്ധിമതാം വരിഷ്ഠം ।
വാതാത്മജം വാനരയൂഥമുഖ്യം ശ്രീരാമദൂതം ശിരസാ നമാമി ॥
യഃ കർണാഞ്ജലിസമ്പുടൈരഹരഹഃ സമ്യക് പിബത്യാദരാത്
വാല്മീകേർവദനാരവിന്ദഗലിതം രാമായണാഖ്യം മധു ।
ജന്മവ്യാധിജരാവിപത്തിമരണൈരത്യന്തസോപദ്രവം
സംസാരം സ വിഹായ ഗച്ഛതി പുമാൻ വിഷ്ണോഃ പദം ശാശ്വതം ॥
തദുപഗതസമാസസന്ധിയോഗം സമമധുരോപനതാർഥവാക്യബദ്ധം ।
രഘുവരചരിതം മുനിപ്രണീതം ദശശിരസശ്ച വധം നിശാമയധ്വം ॥
വാല്മീകിഗിരിസംഭൂതാ രാമസാഗരഗാമിനീ ।
പുനാതു ഭുവനം പുണ്യാ രാമായണമഹാനദീ ॥
ശ്ലോകസാരസമാകീർണം സർഗകല്ലോലസങ്കുലം ।
കാണ്ഡഗ്രാഹമഹാമീനം വന്ദേ രാമായണാർണവം ॥
വേദവേദ്യേ പരേ പുംസി ജാതേ ദശരഥാത്മജേ ।
വേദഃ പ്രാചേതസാദാസീത് സാക്ഷാദ്രാമായണാത്മനാ ॥
വൈദേഹീസഹിതം സുരദ്രുമതലേ ഹൈമേ മഹാമണ്ടപേ
മധ്യേ പുഷ്പകമാസനേ മണിമയേ വീരാസനേ സുസ്ഥിതം ।
അഗ്രേ വാചയതി പ്രഭഞ്ജനസുതേ തത്ത്വം മുനിഭ്യഃ പരം
വ്യാഖ്യാന്തം ഭരതാദിഭിഃ പരിവൃതം രാമം ഭജേ ശ്യാമലം ॥
വാമേ ഭൂമിസുതാ പുരശ്ച ഹനുമാൻ പശ്ചാത് സുമിത്രാസുതഃ
ശത്രുഘ്നോ ഭരതശ്ച പാർശ്വദലയോർവായ്വാദികോണേഷു ച ।
സുഗ്രീവശ്ച വിഭീഷണശ്ച യുവരാട് താരാസുതോ ജാംബവാൻ
മധ്യേ നീലസരോജകോമലരുചിം രാമം ഭജേ ശ്യാമലം ॥
നമോഽസ്തു രാമായ സലക്ഷ്മണായ
	ദേവ്യൈ ച തസ്യൈ ജനകാത്മജായൈ ।
നമോഽസ്തു രുദ്രേന്ദ്രയമാനിലേഭ്യോ
	നമോഽസ്തു ചന്ദ്രാർകമരുദ്ഗണേഭ്യഃ ॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ധ്യാനശ്ലോകാഃ