അഥ മംഗലശ്ലോകാഃ
സ്വസ്തി പ്രജാഭ്യഃ പരിപാലയന്താം
	ന്യായ്യേന മാർഗേണ മഹീം മഹീശാഃ ।
ഗോബ്രാഹ്മണേഭ്യഃ ശുഭമസ്തു നിത്യം
	ലോകാഃ സമസ്താഃ സുഖിനോ ഭവന്തു ॥
കാലേ വർഷതു പർജന്യഃ പൃഥിവീ സസ്യശാലിനീ ।
ദേശോഽയം ക്ഷോഭരഹിതോ ബ്രാഹ്മണാഃ സന്തു നിർഭയാഃ ॥
അപുത്രാഃ പുത്രിണഃ സന്തു പുത്രിണഃ സന്തു പൗത്രിണഃ ।
അധനാഃ സധനാഃ സന്തു ജീവന്തു ശരദാം ശതം ॥
ചരിതം രഘുനാഥസ്യ ശതകോടിപ്രവിസ്തരം ।
ഏകൈകമക്ഷരം പ്രോക്തം മഹാപാതകനാശനം ॥
ശ്രൃണ്വൻ രാമായണം ഭക്ത്യാ യഃ പാദം പദമേവ വാ ।
സ യാതി ബ്രഹ്മണഃ സ്ഥാനം ബ്രഹ്മണാ പൂജ്യതേ സദാ ॥
രാമായ രാമഭദ്രായ രാമചന്ദ്രായ വേധസേ ।
രഘുനാഥായ നാഥായ സീതായാഃ പതയേ നമഃ ॥
യന്മംഗലം സഹസ്രാക്ഷേ സർവദേവനമസ്കൃതേ ।
വൃത്രനാശേ സമഭവത്തത്തേ ഭവതു മംഗലം ॥
യന്മംഗലം സുപർണസ്യ വിനതാകല്പയത് പുരാ ।
അമൃതം പ്രാർഥയാനസ്യ തത്തേ ഭവതു മംഗലം ॥
മംഗലം കോസലേന്ദ്രായ മഹനീയഗുണാത്മനേ ।
ചക്രവർതിതനൂജായ സാർവഭൗമായ മംഗലം ॥
അമൃതോത്പാദനേ ദൈത്യാൻ ഘ്നതോ വജ്രധരസ്യ യത് ।
അദിതിർമംഗലം പ്രാദാത്തത്തേ ഭവതു മംഗലം ॥
ത്രീൻ വിക്രമാൻ പ്രക്രമതോ വിഷ്ണോരമിതതേജസഃ ।
യദാസീന്മംഗലം രാമ തത്തേ ഭവതു മംഗലം ॥
ഋഷയഃ സാഗരാ ദ്വീപാ വേദാ ലോകാ ദിശശ്ച തേ ।
മംഗലാനി മഹാബാഹോ ദിശന്തു തവ സർവദാ ॥
കായേന വാചാ മനസേന്ദ്രിയൈർവാ
	ബുദ്ധ്യാത്മനാ വാ പ്രകൃതേഃ സ്വഭാവാത് ।
കരോമി യദ് യത് സകലം പരസ്മൈ
	നാരായണായേതി സമർപയാമി ॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ മംഗലശ്ലോകാഃ