അഥ പ്രഥമഃ സർഗഃ
തതോ രാവണനീതായാഃ സീതായാഃ ശത്രുകർഷണഃ।
ഇയേഷ പദമന്വേഷ്ടും ചാരണാചരിതേ പഥി ॥1॥
ദുഷ്കരം നിഷ്പ്രതിദ്വന്ദ്വം ചികീർഷൻ കർമ വാനരഃ।
സമുദഗ്രശിരോഗ്രീവോ ഗവാം പതിരിവാബഭൗ ॥2॥
അഥ വൈദൂര്യവർണേഷു ശാദ്വലേഷു മഹാബലഃ।
ധീരഃ സലിലകല്പേഷു വിചചാര യഥാസുഖം ॥3॥
ദ്വിജാൻ വിത്രാസയൻ ധീമാനുരസാ പാദപാൻ ഹരൻ ।
മൃഗാംശ്ച സുബഹൂൻ നിഘ്നൻ പ്രവൃദ്ധ ഇവ കേസരീ ॥4॥
നീലലോഹിതമാഞ്ജിഷ്ഠപദ്മവർണൈഃ സിതാസിതൈഃ।
സ്വഭാവസിദ്ധൈർവിമലൈർധാതുഭിഃ സമലങ്കൃതം ॥5॥
കാമരൂപിഭിരാവിഷ്ടമഭീക്ഷ്ണം സപരിച്ഛദൈഃ।
യക്ഷകിന്നരഗന്ധർവൈർദേവകല്പൈഃ സപന്നഗൈഃ॥6॥
സ തസ്യ ഗിരിവര്യസ്യ തലേ നാഗവരായുതേ ।
തിഷ്ഠൻ കപിവരസ്തത്ര ഹ്രദേ നാഗ ഇവാബഭൗ ॥7॥
സ സൂര്യായ മഹേന്ദ്രായ പവനായ സ്വയംഭുവേ ।
ഭൂതേഭ്യശ്ചാഞ്ജലിം കൃത്വാ ചകാര ഗമനേ മതിം ॥8॥
അഞ്ജലിം പ്രാങ്്മുഖം കുർവൻ പവനായാത്മയോനയേ ।
തതോ ഹി വവൃധേ ഗന്തും ദക്ഷിണോ ദക്ഷിണാം ദിശം ॥9॥
പ്ലവഗപ്രവരൈർദൃഷ്ടഃ പ്ലവനേ കൃതനിശ്ചയഃ।
വവൃധേ രാമവൃദ്ധ്യർഥം സമുദ്ര ഇവ പർവസു ॥10॥
നിഷ്പ്രമാണശരീരഃ സൻ ലിലംഘയിഷുരർണവം ।
ബാഹുഭ്യാം പീഡയാമാസ ചരണാഭ്യാം ച പർവതം ॥11॥
സ ചചാലാചലശ്ചാശു മുഹൂർതം കപിപീഡിതഃ।
തരൂണാം പുഷ്പിതാഗ്രാണാം സർവം പുഷ്പമശാതയത് ॥12॥
തേന പാദപമുക്തേന പുഷ്പൗഘേണ സുഗന്ധിനാ ।
സർവതഃ സംവൃതഃ ശൈലോ ബഭൗ പുഷ്പമയോ യഥാ ॥13॥
തേന ചോത്തമവീര്യേണ പീഡ്യമാനഃ സ പർവതഃ।
സലിലം സമ്പ്രസുസ്രാവ മദമത്ത ഇവ ദ്വിപഃ॥14॥
പീഡ്യമാനസ്തു ബലിനാ മഹേന്ദ്രസ്തേന പർവതഃ।
രീതീർനിർവർതയാമാസ കാഞ്ചനാഞ്ജനരാജതീഃ॥15॥
മുമോച ച ശിലാഃ ശൈലോ വിശാലാഃ സമനഃശിലാഃ।
മധ്യമേനാർചിഷാ ജുഷ്ടോ ധൂമരാജീരിവാനലഃ॥16॥
ഹരിണാ പീഡ്യമാനേന പീഡ്യമാനാനി സർവതഃ।
ഗുഹാവിഷ്ടാനി സത്ത്വാനി വിനേദുർവികൃതൈഃ സ്വരൈഃ॥17॥
സ മഹാൻ സത്ത്വസന്നാദഃ ശൈലപീഡാനിമിത്തജഃ।
പൃഥിവീം പൂരയാമാസ ദിശശ്ചോപവനാനി ച ॥18॥
ശിരോഭിഃ പൃഥുഭിർനാഗാ വ്യക്തസ്വസ്തികലക്ഷണൈഃ।
വമന്തഃ പാവകം ഘോരം ദദംശുർദശനൈഃ ശിലാഃ॥19॥
താസ്തദാ സവിഷൈർദഷ്ടാഃ കുപിതൈസ്തൈർമഹാശിലാഃ।
ജജ്വലുഃ പാവകോദ്ദീപ്താ ബിഭിദുശ്ച സഹസ്രധാ ॥20॥
യാനി ത്വൗഷധജാലാനി തസ്മിഞ്ജാതാനി പർവതേ ।
വിഷഘ്നാന്യപി നാഗാനാം ന ശേകുഃ ശമിതും വിഷം ॥21॥
ഭിദ്യതേഽയം ഗിരിർഭൂതൈരിതി മത്വാ തപസ്വിനഃ।
ത്രസ്താ വിദ്യാധരാസ്തസ്മാദുത്പേതുഃ സ്ത്രീഗണൈഃ സഹ ॥22॥
പാനഭൂമിഗതം ഹിത്വാ ഹൈമമാസവഭാജനം ।
പാത്രാണി ച മഹാർഹാണി കരകാംശ്ച ഹിരണ്മയാൻ ॥23॥
ലേഹ്യാനുച്ചാവചാൻ ഭക്ഷ്യാൻ മാംസാനി വിവിധാനി ച ।
ആർഷഭാണി ച ചർമാണി ഖഡ്ങ്ഗാംശ്ച കനകത്സരൂൻ ॥24॥
കൃതകണ്ഠഗുണാഃ ക്ഷീബാ രക്തമാല്യാനുലേപനാഃ।
രക്താക്ഷാഃ പുഷ്കരാക്ഷാശ്ച ഗഗനം പ്രതിപേദിരേ ॥25॥
ഹാരനൂപുരകേയൂരപാരിഹാര്യധരാഃ സ്ത്രിയഃ।
വിസ്മിതാഃ സസ്മിതാസ്തസ്ഥുരാകാശേ രമണൈഃ സഹ ॥26॥
ദർശയന്തോ മഹാവിദ്യാം വിദ്യാധരമഹർഷയഃ।
സഹിതാസ്തസ്ഥുരാകാശേ വീക്ഷാഞ്ചക്രുശ്ച പർവതം ॥27॥
ശുശ്രുവുശ്ച തദാ ശബ്ദമൃഷീണാം ഭാവിതാത്മനാം ।
ചാരണാനാം ച സിദ്ധാനാം സ്ഥിതാനാം വിമലേഽമ്ബരേ ॥28॥
ഏഷ പർവതസങ്കാശോ ഹനുമാൻ മാരുതാത്മജഃ।
തിതീർഷതി മഹാവേഗഃ സമുദ്രം വരുണാലയം ॥29॥
രാമാർഥം വാനരാർഥം ച ചികീർഷൻ കർമ ദുഷ്കരം ।
സമുദ്രസ്യ പരം പാരം ദുഷ്പ്രാപം പ്രാപ്തുമിച്ഛതി ॥30॥
ഇതി വിദ്യാധരാ വാചഃ ശ്രുത്വാ തേഷാം തപസ്വിനാം ।
തമപ്രമേയം ദദൃശുഃ പർവതേ വാനരർഷഭം ॥31॥
ദുധുവേ ച സ രോമാണി ചകമ്പേ ചാനലോപമഃ।
നനാദ ച മഹാനാദം സുമഹാനിവ തോയദഃ॥32॥
ആനുപൂർവ്യാ ച വൃത്തം തല്ലാംഗൂലം രോമഭിശ്ചിതം ।
ഉത്പതിഷ്യൻ വിചിക്ഷേപ പക്ഷിരാജ ഇവോരഗം ॥33॥
തസ്യ ലാംഗൂലമാവിദ്ധമതിവേഗസ്യ പൃഷ്ഠതഃ।
ദദൃശേ ഗരുഡേനേവ ഹ്രിയമാണോ മഹോരഗഃ॥34॥
ബാഹൂ സംസ്തംഭയാമാസ മഹാപരിഘസംനിഭൗ ।
ആസസാദ കപിഃ കട്യാം ചരണൗ സഞ്ചുകോച ച ॥35॥
സംഹൃത്യ ച ഭുജൗ ശ്രീമാംസ്തഥൈവ ച ശിരോധരാം ।
തേജഃ സത്ത്വം തഥാ വീര്യമാവിവേശ സ വീര്യവാൻ ॥36॥
മാർഗമാലോകയൻ ദൂരാദൂർധ്വപ്രണിഹിതേക്ഷണഃ।
രുരോധ ഹൃദയേ പ്രാണാനാകാശമവലോകയൻ ॥37॥
പദ്ഭ്യാം ദൃഢമവസ്ഥാനം കൃത്വാ സ കപികുഞ്ജരഃ।
നികുച്യ കർണൗ ഹനുമാനുത്പതിഷ്യൻ മഹാബലഃ॥38॥
വാനരാൻ വാനരശ്രേഷ്ഠ ഇദം വചനമബ്രവീത് ।
യഥാ രാഘവനിർമുക്തഃ ശരഃ ശ്വസനവിക്രമഃ॥39॥
ഗച്ഛേത് തദ്വത് ഗമിഷ്യാമി ലങ്കാം രാവണപാലിതാം ।
നഹി ദ്രക്ഷ്യാമി യദി താം ലങ്കായാം ജനകാത്മജാം ॥40॥
അനേനൈവ ഹി വേഗേന ഗമിഷ്യാമി സുരാലയം ।
യദി വാ ത്രിദിവേ സീതാം ന ദ്രക്ഷ്യാമി കൃതശ്രമഃ॥41॥
ബദ്ധ്വാ രാക്ഷസരാജാനമാനയിഷ്യാമി രാവണം ।
സർവഥാ കൃതകാര്യോഽഹമേഷ്യാമി സഹ സീതയാ ॥42॥
ആനയിഷ്യാമി വാ ലങ്കാം സമുത്പാട്യ സരാവണാം ।
ഏവമുക്ത്വാ തു ഹനുമാൻ വാനരോ വാനരോത്തമഃ॥43॥
ഉത്പപാതാഥ വേഗേന വേഗവാനവിചാരയൻ ।
സുപർണമിവ ചാത്മാനം മേനേ സ കപികുഞ്ജരഃ॥44॥
സമുത്പതതി വേഗാത് തു വേഗാത് തേ നഗരോഹിണഃ।
സംഹൃത്യ വിടപാൻ സർവാൻ സമുത്പേതുഃ സമന്തതഃ॥45॥
സ മത്തകോയഷ്ടിഭകാൻ പാദപാൻ പുഷ്പശാലിനഃ।
ഉദ്വഹന്നുരുവേഗേന ജഗാമ വിമലേഽമ്ബരേ ॥46॥
ഊരുവേഗോത്ഥിതാ വൃക്ഷാ മുഹൂർതം കപിമന്വയുഃ।
പ്രസ്ഥിതം ദീർഘമധ്വാനം സ്വബന്ധുമിവ ബാന്ധവാഃ॥47॥
തമൂരുവേഗോന്മഥിതാഃ സാലാശ്ചാന്യേ നഗോത്തമാഃ।
അനുജഗ്മുർഹനൂമന്തം സൈന്യാ ഇവ മഹീപതിം ॥48॥
സുപുഷ്പിതാഗ്രൈർബഹുഭിഃ പാദപൈരന്വിതഃ കപിഃ।
ഹനൂമാൻ പർവതാകാരോ ബഭൂവാദ്ഭുതദർശനഃ॥49॥
സാരവന്തോഽഥ യേ വൃക്ഷാ ന്യമജ്ജൻ ലവണാംഭസി ।
ഭയാദിവ മഹേന്ദ്രസ്യ പർവതാ വരുണാലയേ ॥50॥
സ നാനാകുസുമൈഃ കീർണഃ കപിഃ സാങ്കുരകോരകൈഃ।
ശുശുഭേ മേഘസങ്കാശഃ ഖദ്യോതൈരിവ പർവതഃ॥51॥
വിമുക്താസ്തസ്യ വേഗേന മുക്ത്വാ പുഷ്പാണി തേ ദ്രുമാഃ।
വ്യവശീര്യന്ത സലിലേ നിവൃത്താഃ സുഹൃദോ യഥാ ॥52॥
ലഘുത്വേനോപപന്നം തദ് വിചിത്രം സാഗരേഽപതത് ।
ദ്രുമാണാം വിവിധം പുഷ്പം കപിവായുസമീരിതം ।
താരാചിതമിവാകാശം പ്രബഭൗ സ മഹാർണവഃ॥53॥
പുഷ്പൗഘേണ സുഗന്ധേന നാനാവർണേന വാനരഃ।
ബഭൗ മേഘ ഇവോദ്യൻ വൈ വിദ്യുദ്ഗണവിഭൂഷിതഃ॥54॥
തസ്യ വേഗസമുദ്ഭൂതൈഃ പുഷ്പൈസ്തോയമദൃശ്യത ।
താരാഭിരിവ രാമാഭിരുദിതാഭിരിവാംബരം ॥55॥
തസ്യാംബരഗതൗ ബാഹൂ ദദൃശാതേ പ്രസാരിതൗ ।
പർവതാഗ്രാദ് വിനിഷ്ക്രാന്തൗ പഞ്ചാസ്യാവിവ പന്നഗൗ ॥56॥
പിബന്നിവ ബഭൗ ചാപി സോർമിജാലം മഹാർണവം ।
പിപാസുരിവ ചാകാശം ദദൃശേ സ മഹാകപിഃ॥57॥
തസ്യ വിദ്യുത്പ്രഭാകാരേ വായുമാർഗാനുസാരിണഃ।
നയനേ വിപ്രകാശേതേ പർവതസ്ഥാവിവാനലൗ ॥58॥
പിംഗേ പിംഗാക്ഷമുഖ്യസ്യ ബൃഹതീ പരിമണ്ഡലേ ।
ചക്ഷുഷീ സമ്പ്രകാശേതേ ചന്ദ്രസൂര്യാവിവ സ്ഥിതൗ ॥59॥
മുഖം നാസികയാ തസ്യ താമ്രയാ താമ്രമാബഭൗ ।
സന്ധ്യയാ സമഭിസ്പൃഷ്ടം യഥാ സ്യാത് സൂര്യമണ്ഡലം ॥60॥
ലാംഗൂലം ച സമാവിദ്ധം പ്ലവമാനസ്യ ശോഭതേ ।
അംബരേ വായുപുത്രസ്യ ശക്രധ്വജ ഇവോച്ഛ്രിതം ॥61॥
ലാംഗൂലചക്രോ ഹനുമാൻ ശുക്ലദംഷ്ട്രോഽനിലാത്മജഃ।
വ്യരോചത മഹാപ്രാജ്ഞഃ പരിവേഷീവ ഭാസ്കരഃ॥62॥
സ്ഫിഗ്ദേശേനാതിതാമ്രേണ രരാജ സ മഹാകപിഃ।
മഹതാ ദാരിതേനേവ ഗിരിർഗൈരികധാതുനാ ॥63॥
തസ്യ വാനരസിംഹസ്യ പ്ലവമാനസ്യ സാഗരം ।
കക്ഷാന്തരഗതോ വായുർജീമൂത ഇവ ഗർജതി ॥64॥
ഖേ യഥാ നിപതത്യുൽകാ ഉത്തരാന്താദ് വിനിഃസൃതാ ।
ദൃശ്യതേ സാനുബന്ധാ ച തഥാ സ കപികുഞ്ജരഃ॥65॥
പതത്പതംഗസങ്കാശോ വ്യായതഃ ശുശുഭേ കപിഃ।
പ്രവൃദ്ധ ഇവ മാതംഗഃ കക്ഷ്യയാ ബധ്യമാനയാ ॥66॥
ഉപരിഷ്ടാച്ഛരീരേണ ച്ഛായയാ ചാവഗാഢയാ ।
സാഗരേ മാരുതാവിഷ്ടാ നൗരിവാസീത് തദാ കപിഃ॥67॥
യം യം ദേശം സമുദ്രസ്യ ജഗാമ സ മഹാകപിഃ।
സ തു തസ്യാംഗവേഗേന സോന്മാദ ഇവ ലക്ഷ്യതേ ॥68॥
സാഗരസ്യോർമിജാലാനാമുരസാ ശൈലവർഷ്മണാം ।
അഭിഘ്നംസ്തു മഹാവേഗഃ പുപ്ലുവേ സ മഹാകപിഃ॥69॥
കപിവാതശ്ച ബലവാൻ മേഘവാതശ്ച നിർഗതഃ।
സാഗരം ഭീമനിർഹ്രാദം കമ്പയാമാസതുർഭൃശം ॥70॥
വികർഷന്നൂർമിജാലാനി ബൃഹന്തി ലവണാംഭസി ।
പുപ്ലുവേ കപിശാർദൂലോ വികിരന്നിവ രോദസീ ॥71॥
മേരുമന്ദരസങ്കാശാനുദ്ഗതാൻ സുമഹാർണവേ ।
അത്യക്രാമന്മഹാവേഗസ്തരംഗാൻ ഗണയന്നിവ ॥72॥
തസ്യ വേഗസമുദ്ഘുഷ്ടം ജലം സജലദം തദാ ।
അംബരസ്ഥം വിബഭ്രാജേ ശരദഭ്രമിവാതതം ॥73॥
തിമിനക്രഝഷാഃ കൂർമാ ദൃശ്യന്തേ വിവൃതാസ്തദാ ।
വസ്ത്രാപകർഷണേനേവ ശരീരാണി ശരീരിണാം ॥74॥
ക്രമമാണം സമീക്ഷ്യാഥ ഭുജഗാഃ സാഗരംഗമാഃ।
വ്യോമ്നി തം കപിശാർദൂലം സുപർണമിവ മേനിരേ ॥75॥
ദശയോജനവിസ്തീർണാ ത്രിംശദ്യോജനമായതാ ।
ഛായാ വാനരസിംഹസ്യ ജവേ ചാരുതരാഭവത് ॥76॥
ശ്വേതാഭ്രഘനരാജീവ വായുപുത്രാനുഗാമിനീ ।
തസ്യ സാ ശുശുഭേ ഛായാ പതിതാ ലവണാംഭസി ॥77॥
ശുശുഭേ സ മഹാതേജാ മഹാകായോ മഹാകപിഃ।
വായുമാർഗേ നിരാലംബേ പക്ഷവാനിവ പർവതഃ॥78॥
യേനാസൗ യാതി ബലവാൻ വേഗേന കപികുഞ്ജരഃ।
തേന മാർഗേണ സഹസാ ദ്രോണീകൃത ഇവാർണവഃ॥79॥
ആപാതേ പക്ഷിസംഘാനാം പക്ഷിരാജ ഇവ വ്രജൻ ।
ഹനുമാൻ മേഘജാലാനി പ്രകർഷൻ മാരുതോ യഥാ ॥80॥
പാണ്ഡുരാരുണവർണാനി നീലമഞ്ജിഷ്ഠകാനി ച ।
കപിനാഽഽകൃഷ്യമാണാനി മഹാഭ്രാണി ചകാശിരേ ॥81॥
പ്രവിശന്നഭ്രജാലാനി നിഷ്പതംശ്ച പുനഃ പുനഃ।
പ്രച്ഛന്നശ്ച പ്രകാശശ്ച ചന്ദ്രമാ ഇവ ദൃശ്യതേ ॥82॥
പ്ലവമാനം തു തം ദൃഷ്ട്വാ പ്ലവഗം ത്വരിതം തദാ ।
വവൃഷുസ്തത്ര പുഷ്പാണി ദേവഗന്ധർവചാരണാഃ॥83॥
തതാപ നഹി തം സൂര്യഃ പ്ലവന്തം വാനരേശ്വരം ।
സിഷേവേ ച തദാ വായൂ രാമകാര്യാർഥസിദ്ധയേ ॥84॥
ഋഷയസ്തുഷ്ടുവുശ്ചൈനം പ്ലവമാനം വിഹായസാ ।
ജഗുശ്ച ദേവഗന്ധർവാഃ പ്രശംസന്തോ വനൗകസം ॥85॥
നാഗാശ്ച തുഷ്ടുവുര്യക്ഷാ രക്ഷാംസി വിവിധാനി ച ।
പ്രേക്ഷ്യ സർവേ കപിവരം സഹസാ വിഗതക്ലമം ॥86॥
തസ്മിൻ പ്ലവഗശാർദൂലേ പ്ലവമാനേ ഹനൂമതി ।
ഇക്ഷ്വാകുകുലമാനാർഥീ ചിന്തയാമാസ സാഗരഃ॥87॥
സാഹായ്യം വാനരേന്ദ്രസ്യ യദി നാഹം ഹനൂമതഃ।
കരിഷ്യാമി ഭവിഷ്യാമി സർവവാച്യോ വിവക്ഷതാം ॥88॥
അഹമിക്ഷ്വാകുനാഥേന സഗരേണ വിവർധിതഃ।
ഇക്ഷ്വാകുസചിവശ്ചായം തന്നാർഹത്യവസാദിതും ॥89॥
തഥാ മയാ വിധാതവ്യം വിശ്രമേത യഥാ കപിഃ।
ശേഷം ച മയി വിശ്രാന്തഃ സുഖീ സോഽതിതരിഷ്യതി ॥90॥
ഇതി കൃത്വാ മതിം സാധ്വീം സമുദ്രശ്ഛന്നമംഭസി ।
ഹിരണ്യനാഭം മൈനാകമുവാച ഗിരിസത്തമം ॥91॥
ത്വമിഹാസുരസംഘാനാം ദേവരാജ്ഞാ മഹാത്മനാ ।
പാതാലനിലയാനാം ഹി പരിഘഃ സംനിവേശിതഃ॥92॥
ത്വമേഷാം ജ്ഞാതവീര്യാണാം പുനരേവോത്പതിഷ്യതാം ।
പാതാലസ്യാപ്രമേയസ്യ ദ്വാരമാവൃത്യ തിഷ്ഠസി ॥93॥
തിര്യഗൂർധ്വമധശ്ചൈവ ശക്തിസ്തേ ശൈല വർധിതും ।
തസ്മാത് സഞ്ചോദയാമി ത്വാമുത്തിഷ്ഠ ഗിരിസത്തമ ॥94॥
സ ഏഷ കപിശാർദൂലസ്ത്വാമുപര്യേതി വീര്യവാൻ ।
ഹനൂമാൻ രാമകാര്യാർഥീ ഭീമകർമാ ഖമാപ്ലുതഃ॥95॥
അസ്യ സാഹ്യം മയാ കാര്യമിക്ഷ്വാകുകുലവർതിനഃ।
മമ ഹീക്ഷ്വാകവഃ പൂജ്യാഃ പരം പൂജ്യതമാസ്തവ ॥96॥
കുരു സാചിവ്യമസ്മാകം ന നഃ കാര്യമതിക്രമേത് ।
കർതവ്യമകൃതം കാര്യം സതാം മന്യുമുദീരയേത് ॥97॥
സലിലാദൂർധ്വമുത്തിഷ്ഠ തിഷ്ഠത്വേഷ കപിസ്ത്വയി ।
അസ്മാകമതിഥിശ്ചൈവ പൂജ്യശ്ച പ്ലവതാം വരഃ॥98॥
ചാമീകരമഹാനാഭ ദേവഗന്ധർവസേവിത ।
ഹനൂമാംസ്ത്വയി വിശ്രാന്തസ്തതഃ ശേഷം ഗമിഷ്യതി ॥99॥
കാകുത്സ്ഥസ്യാനൃശംസ്യം ച മൈഥില്യാശ്ച വിവാസനം ।
ശ്രമം ച പ്ലവഗേന്ദ്രസ്യ സമീക്ഷ്യോത്ഥാതുമർഹസി ॥100॥
ഹിരണ്യഗർഭോ മൈനാകോ നിശമ്യ ലവണാംഭസഃ ।
ഉത്പപാത ജലാത് തൂർണം മഹാദ്രുമലതാവൃതഃ॥101॥
സ സാഗരജലം ഭിത്ത്വാ ബഭൂവാത്യുച്ഛ്രിതസ്തദാ ।
യഥാ ജലധരം ഭിത്ത്വാ ദീപ്തരശ്മിർദിവാകരഃ॥102॥
സ മഹാത്മാ മുഹൂർതേന പർവതഃ സലിലാവൃതഃ।
ദർശയാമാസ ശൃംഗാണി സാഗരേണ നിയോജിതഃ॥103॥
ശാതകുംഭമയൈഃ ശൃംഗൈഃ സകിന്നരമഹോരഗൈഃ।
ആദിത്യോദയസങ്കാശൈരുല്ലിഖദ്ഭിരിവാംബരം ॥104॥
തസ്യ ജാംബൂനദൈഃ ശൃംഗൈഃ പർവതസ്യ സമുത്ഥിതൈഃ ।
ആകാശം ശസ്ത്രസങ്കാശമഭവത് കാഞ്ചനപ്രഭം ॥105॥
ജാതരൂപമയൈഃ ശൃംഗൈർഭ്രാജമാനൈർമഹാപ്രഭൈഃ।
ആദിത്യശതസങ്കാശഃ സോഽഭവത് ഗിരിസത്തമഃ॥106॥
സമുത്ഥിതമസംഗേന ഹനൂമാനഗ്രതഃ സ്ഥിതം ।
മധ്യേ ലവണതോയസ്യ വിഘ്നോഽയമിതി നിശ്ചിതഃ॥107॥
സ തമുച്ഛ്രിതമത്യർഥം മഹാവേഗോ മഹാകപിഃ।
ഉരസാ പാതയാമാസ ജീമൂതമിവ മാരുതഃ॥108॥
സ തദാസാദിതസ്തേന കപിനാ പർവതോത്തമഃ।
ബുദ്ധ്വാ തസ്യ ഹരേർവേഗം ജഹർഷ ച നനാദ ച ॥109॥
തമാകാശഗതം വീരമാകാശേ സമുപസ്ഥിതഃ।
പ്രീതോ ഹൃഷ്ടമനാ വാക്യമബ്രവീത് പർവതഃ കപിം ॥110॥
മാനുഷം ധാരയൻ രൂപമാത്മനഃ ശിഖരേ സ്ഥിതഃ।
ദുഷ്കരം കൃതവാൻ കർമ ത്വമിദം വാനരോത്തമ ॥111॥
നിപത്യ മമ ശൃംഗേഷു സുഖം വിശ്രമ്യ ഗമ്യതാം ।
രാഘവസ്യ കുലേ ജാതൈരുദധിഃ പരിവർധിതഃ॥112॥
സ ത്വാം രാമഹിതേ യുക്തം പ്രത്യർചയതി സാഗരഃ।
കൃതേ ച പ്രതികർതവ്യമേഷ ധർമഃ സനാതനഃ॥113॥
സോഽയം തത്പ്രതികാരാർഥീ ത്വത്തഃ സമ്മാനമർഹതി ।
ത്വന്നിമിത്തമനേനാഹം ബഹുമാനാത് പ്രചോദിതഃ॥114॥
യോജനാനാം ശതം ചാപി കപിരേഷ ഖമാപ്ലുതഃ।
തവ സാനുഷു വിശ്രാന്തഃ ശേഷം പ്രക്രമതാമിതി ॥115॥
തിഷ്ഠ ത്വം ഹരിശാർദൂല മയി വിശ്രമ്യ ഗമ്യതാം ।
തദിദം ഗന്ധവത് സ്വാദു കന്ദമൂലഫലം ബഹു ॥116॥
തദാസ്വാദ്യ ഹരിശ്രേഷ്ഠ വിശ്രാന്തോഽഥ ഗമിഷ്യസി ।
അസ്മാകമപി സംബന്ധഃ കപിമുഖ്യ ത്വയാസ്തി വൈ ।
പ്രഖ്യാതസ്ത്രിഷു ലോകേഷു മഹാഗുണപരിഗ്രഹഃ॥117॥
വേഗവന്തഃ പ്ലവന്തോ യേ പ്ലവഗാ മാരുതാത്മജ ।
തേഷാം മുഖ്യതമം മന്യേ ത്വാമഹം കപികുഞ്ജര ॥118॥
അതിഥിഃ കില പൂജാർഹഃ പ്രാകൃതോഽപി വിജാനതാ ।
ധർമം ജിജ്ഞാസമാനേന കിം പുനര്യാദൃശോ ഭവാൻ ॥119॥
ത്വം ഹി ദേവവരിഷ്ഠസ്യ മാരുതസ്യ മഹാത്മനഃ।
പുത്രസ്തസ്യൈവ വേഗേന സദൃശഃ കപികുഞ്ജര ॥120॥
പൂജിതേ ത്വയി ധർമജ്ഞേ പൂജാം പ്രാപ്നോതി മാരുതഃ।
തസ്മാത് ത്വം പൂജനീയോ മേ ശൃണു ചാപ്യത്ര കാരണം ॥121॥
പൂർവം കൃതയുഗേ താത പർവതാഃ പക്ഷിണോഽഭവൻ ।
തേഽപി ജഗ്മുർദിശഃ സർവാ ഗരുഡാ ഇവ വേഗിനഃ॥122॥
തതസ്തേഷു പ്രയാതേഷു ദേവസംഘാഃ സഹർഷിഭിഃ।
ഭൂതാനി ച ഭയം ജഗ്മുസ്തേഷാം പതനശങ്കയാ ॥123॥
തതഃ ക്രുദ്ധഃ സഹസ്രാക്ഷഃ പർവതാനാം ശതക്രതുഃ।
പക്ഷാംശ്ചിച്ഛേദ വജ്രേണ തതഃ ശതസഹസ്രശഃ॥124॥
സ മാമുപഗതഃ ക്രുദ്ധോ വജ്രമുദ്യമ്യ ദേവരാട് ।
തതോഽഹം സഹസാ ക്ഷിപ്തഃ ശ്വസനേന മഹാത്മനാ ॥125॥
അസ്മിൻ ലവണതോയേ ച പ്രക്ഷിപ്തഃ പ്ലവഗോത്തമ ।
ഗുപ്തപക്ഷഃ സമഗ്രശ്ച തവ പിത്രാഭിരക്ഷിതഃ॥126॥
തതോഽഹം മാനയാമി ത്വാം മാന്യോഽസി മമ മാരുതേ ।
ത്വയാ മമൈഷ സംബന്ധഃ കപിമുഖ്യ മഹാഗുണഃ॥127॥
അസ്മിന്നേവംഗതേ കാര്യേ സാഗരസ്യ മമൈവ ച ।
പ്രീതിം പ്രീതമനാഃ കർതും ത്വമർഹസി മഹാമതേ ॥128॥
ശ്രമം മോക്ഷയ പൂജാം ച ഗൃഹാണ ഹരിസത്തമ ।
പ്രീതിം ച മമ മാന്യസ്യ പ്രീതോഽസ്മി തവ ദർശനാത് ॥129॥
ഏവമുക്തഃ കപിശ്രേഷ്ഠസ്തം നഗോത്തമമബ്രവീത് ।
പ്രീതോഽസ്മി കൃതമാതിഥ്യം മന്യുരേഷോഽപനീയതാം ॥130॥
ത്വരതേ കാര്യകാലോ മേ അഹശ്ചാപ്യതിവർതതേ ।
പ്രതിജ്ഞാ ച മയാ ദത്താ ന സ്ഥാതവ്യമിഹാന്തരാ ॥131॥
ഇത്യുക്ത്വാ പാണിനാ ശൈലമാലഭ്യ ഹരിപുംഗവഃ।
ജഗാമാകാശമാവിശ്യ വീര്യവാൻ പ്രഹസന്നിവ ॥132॥
സ പർവതസമുദ്രാഭ്യാം ബഹുമാനാദവേക്ഷിതഃ।
പൂജിതശ്ചോപപന്നാഭിരാശീർഭിരഭിനന്ദിതഃ॥133॥
അഥോർധ്വം ദൂരമാഗത്യ ഹിത്വാ ശൈലമഹാർണവൗ ।
പിതുഃ പന്ഥാനമാസാദ്യ ജഗാമ വിമലേഽമ്ബരേ ॥134॥
ഭൂയശ്ചോർധ്വം ഗതിം പ്രാപ്യ ഗിരിം തമവലോകയൻ ।
വായുസൂനുർനിരാലംബോ ജഗാമ കപികുഞ്ജരഃ॥135॥
തദ് ദ്വിതീയം ഹനുമതോ ദൃഷ്ട്വാ കർമ സുദുഷ്കരം ।
പ്രശശംസുഃ സുരാഃ സർവേ സിദ്ധാശ്ച പരമർഷയഃ॥136॥
ദേവതാശ്ചാഭവൻ ഹൃഷ്ടാസ്തത്രസ്ഥാസ്തസ്യ കർമണാ ।
കാഞ്ചനസ്യ സുനാഭസ്യ സഹസ്രാക്ഷശ്ച വാസവഃ॥137॥
ഉവാച വചനം ധീമാൻ പരിതോഷാത് സഗദ്ഗദം ।
സുനാഭം പർവതശ്രേഷ്ഠം സ്വയമേവ ശചീപതിഃ॥138॥
ഹിരണ്യനാഭ ശൈലേന്ദ്ര പരിതുഷ്ടോഽസ്മി തേ ഭൃശം ।
അഭയം തേ പ്രയച്ഛാമി ഗച്ഛ സൗമ്യ യഥാസുഖം ॥139॥
സാഹ്യം കൃതം തേ സുമഹദ് വിശ്രാന്തസ്യ ഹനൂമതഃ।
ക്രമതോ യോജനശതം നിർഭയസ്യ ഭയേ സതി ॥140॥
രാമസ്യൈഷ ഹിതായൈവ യാതി ദാശരഥേഃ കപിഃ।
സത്ക്രിയാം കുർവതാ ശക്ത്യാ തോഷിതോഽസ്മി ദൃഢം ത്വയാ ॥141॥
സ തത് പ്രഹർഷമലഭദ് വിപുലം പർവതോത്തമഃ।
ദേവതാനാം പതിം ദൃഷ്ട്വാ പരിതുഷ്ടം ശതക്രതും ॥142॥
സ വൈ ദത്തവരഃ ശൈലോ ബഭൂവാവസ്ഥിതസ്തദാ ।
ഹനൂമാംശ്ച മുഹൂർതേന വ്യതിചക്രാമ സാഗരം ॥143॥
തതോ ദേവാഃ സഗന്ധർവാഃ സിദ്ധാശ്ച പരമർഷയഃ।
അബ്രുവൻ സൂര്യസങ്കാശാം സുരസാം നാഗമാതരം ॥144॥
അയം വാതാത്മജഃ ശ്രീമാൻ പ്ലവതേ സാഗരോപരി ।
ഹനൂമാൻ നാമ തസ്യ ത്വം മുഹൂർതം വിഘ്നമാചര ॥145॥
രാക്ഷസം രൂപമാസ്ഥായ സുഘോരം പർവതോപമം ।
ദംഷ്ട്രാകരാലം പിംഗാക്ഷം വക്ത്രം കൃത്വാ നഭഃസ്പൃശം ॥146॥
ബലമിച്ഛാമഹേ ജ്ഞാതും ഭൂയശ്ചാസ്യ പരാക്രമം ।
ത്വാം വിജേഷ്യത്യുപായേന വിഷാദം വാ ഗമിഷ്യതി ॥147॥
ഏവമുക്താ തു സാ ദേവീ ദൈവതൈരഭിസത്കൃതാ ।
സമുദ്രമധ്യേ സുരസാ ബിഭ്രതീ രാക്ഷസം വപുഃ॥148॥
വികൃതം ച വിരൂപം ച സർവസ്യ ച ഭയാവഹം ।
പ്ലവമാനം ഹനൂമന്തമാവൃത്യേദമുവാച ഹ॥149॥
മമ ഭക്ഷ്യഃ പ്രദിഷ്ടസ്ത്വമീശ്വരൈർവാനരർഷഭ ।
അഹം ത്വാം ഭക്ഷയിഷ്യാമി പ്രവിശേദം മമാനനം ॥150॥
വര ഏഷ പുരാ ദത്തോ മമ ധാത്രേതി സത്വരാ ।
വ്യാദായ വക്ത്രം വിപുലം സ്ഥിതാ സാ മാരുതേഃ പുരഃ॥151॥
ഏവമുക്തഃ സുരസയാ പ്രഹൃഷ്ടവദനോഽബ്രവീത് ।
രാമോ ദാശരഥിർനാമ പ്രവിഷ്ടോ ദണ്ഡകാവനം ।
ലക്ഷ്മണേന സഹ ഭ്രാത്രാ വൈദേഹ്യാ ചാപി ഭാര്യയാ ॥152॥
അന്യകാര്യവിഷക്തസ്യ ബദ്ധവൈരസ്യ രാക്ഷസൈഃ।
തസ്യ സീതാ ഹൃതാ ഭാര്യാ രാവണേന യശസ്വിനീ॥153॥
തസ്യാഃ സകാശം ദൂതോഽഹം ഗമിഷ്യേ രാമശാസനാത് ।
കർതുമർഹസി രാമസ്യ സാഹ്യം വിഷയവാസിനി ॥154॥
അഥവാ മൈഥിലീം ദൃഷ്ട്വാ രാമം ചാക്ലിഷ്ടകാരിണം ।
ആഗമിഷ്യാമി തേ വക്ത്രം സത്യം പ്രതിശൃണോമി തേ ॥155॥
ഏവമുക്താ ഹനുമതാ സുരസാ കാമരൂപിണീ ।
അബ്രവീന്നാതിവർതേന്മാം കശ്ചിദേഷ വരോ മമ ॥156॥
തം പ്രയാന്തം സമുദ്വീക്ഷ്യ സുരസാ വാക്യമബ്രവീത് ।
ബലം ജിജ്ഞാസമാനാ സാ നാഗമാതാ ഹനൂമതഃ॥157॥
നിവിശ്യ വദനം മേഽദ്യ ഗന്തവ്യം വാനരോത്തമ ।
വര ഏഷ പുരാ ദത്തോ മമ ധാത്രേതി സത്വരാ ॥158॥
വ്യാദായ വിപുലം വക്ത്രം സ്ഥിതാ സാ മാരുതേഃ പുരഃ ।
ഏവമുക്തഃ സുരസയാ ക്രുദ്ധോ വാനരപുംഗവഃ॥159॥
അബ്രവീത് കുരു വൈ വക്ത്രം യേന മാം വിഷഹിഷ്യസി ।
ഇത്യുക്ത്വാ സുരസാം ക്രുദ്ധോ ദശയോജനമായതാം ॥160॥
ദശയോജനവിസ്താരോ ഹനൂമാനഭവത് തദാ ।
തം ദൃഷ്ട്വാ മേഘസങ്കാശം ദശയോജനമായതം ।
ചകാര സുരസാപ്യാസ്യം വിംശദ യോജനമായതം ॥161॥
ഹനൂമാംസ്തു തതഃ ക്രുദ്ധസ്ത്രിംശദ് യോജനമായതഃ।
ചകാര സുരസാ വക്ത്രം ചത്വാരിംശത് തഥോച്ഛ്രിതം ॥162॥
ബഭൂവ ഹനുമാൻ വീരഃ പഞ്ചാശദ് യോജനോച്ഛ്രിതഃ।
ചകാര സുരസാ വക്ത്രം ഷഷ്ടിം യോജനമുച്ഛ്രിതം ॥163॥
തദൈവ ഹനുമാൻ വീരഃ സപ്തതിം യോജനോച്ഛ്രിതഃ।
ചകാര സുരസാ വക്ത്രമശീതിം യോജനോച്ഛ്രിതം ॥164॥
ഹനൂമാനനലപ്രഖ്യോ നവതിം യോജനോച്ഛ്രിതഃ ।
ചകാര സുരസാ വക്ത്രം ശതയോജനമായതം ॥165॥
തദ് ദൃഷ്ട്വാ വ്യാദിതം ത്വാസ്യം വായുപുത്രഃ സ ബുദ്ധിമാൻ ।
ദീർഘജിഹ്വം സുരസയാ സുഭീമം നരകോപമം ॥166॥
സ സങ്ക്ഷിപ്യാത്മനഃ കായം ജീമൂത ഇവ മാരുതിഃ।
തസ്മിൻ മുഹൂർതേ ഹനുമാൻ ബഭൂവാംഗുഷ്ഠമാത്രകഃ॥167॥
സോഽഭിപദ്യാഥ തദ്വക്ത്രം നിഷ്പത്യ ച മഹാബലഃ।
അന്തരിക്ഷേ സ്ഥിതഃ ശ്രീമാനിദം വചനമബ്രവീത് ॥168॥
പ്രവിഷ്ടോഽസ്മി ഹി തേ വക്ത്രം ദാക്ഷായണി നമോഽസ്തു തേ ।
ഗമിഷ്യേ യത്ര വൈദേഹീ സത്യശ്ചാസീദ് വരസ്തവ ॥169॥
തം ദൃഷ്ട്വാ വദനാന്മുക്തം ചന്ദ്രം രാഹുമുഖാദിവ ।
അബ്രവീത് സുരസാ ദേവീ സ്വേന രൂപേണ വാനരം ॥170॥
അർഥസിദ്ധ്യൈ ഹരിശ്രേഷ്ഠ ഗച്ഛ സൗമ്യ യഥാസുഖം ।
സമാനയ ച വൈദേഹീം രാഘവേണ മഹാത്മനാ ॥171॥
തത് തൃതീയം ഹനുമതോ ദൃഷ്ട്വാ കർമ സുദുഷ്കരം ।
സാധുസാധ്വിതി ഭൂതാനി പ്രശശംസുസ്തദാ ഹരിം ॥172॥
സ സാഗരമനാധൃഷ്യമഭ്യേത്യ വരുണാലയം ।
ജഗാമാകാശമാവിശ്യ വേഗേന ഗരുഡോപമഃ॥173॥
സേവിതേ വാരിധാരാഭിഃ പതഗൈശ്ച നിഷേവിതേ ।
ചരിതേ കൈശികാചാര്യൈരൈരാവതനിഷേവിതേ ॥174॥
സിംഹകുഞ്ജരശാർദൂലപതഗോരഗവാഹനൈഃ।
വിമാനൈഃ സമ്പതദ്ഭിശ്ച വിമലൈഃ സമലങ്കൃതേ ॥175॥
വജ്രാശനിസമസ്പർശൈഃ പാവകൈരിവ ശോഭിതേ ।
കൃതപുണ്യൈർമഹാഭാഗൈഃ സ്വർഗജിദ്ഭിരധിഷ്ഠിതേ ॥176॥
വഹതാ ഹവ്യമത്യന്തം സേവിതേ ചിത്രഭാനുനാ ।
ഗ്രഹനക്ഷത്രചന്ദ്രാർകതാരാഗണവിഭൂഷിതേ ॥177॥
മഹർഷിഗണഗന്ധർവനാഗയക്ഷസമാകുലേ ।
വിവിക്തേ വിമലേ വിശ്വേ വിശ്വാവസുനിഷേവിതേ ॥178॥
ദേവരാജഗജാക്രാന്തേ ചന്ദ്രസൂര്യപഥേ ശിവേ ।
വിതാനേ ജീവലോകസ്യ വിതതേ ബ്രഹ്മനിർമിതേ ॥179॥
ബഹുശഃ സേവിതേ വീരൈർവിദ്യാധരഗണൈർവൃതേ ।
ജഗാമ വായുമാർഗേ ച ഗരുത്മാനിവ മാരുതിഃ॥180॥
ഹനുമാൻ മേഘജാലാനി പ്രാകർഷൻ മാരുതോ യഥാ ।
കാലാഗുരുസവർണാനി രക്തപീതസിതാനി ച ॥181॥
കപിനാ കൃഷ്യമാണാനി മഹാഭ്രാണി ചകാശിരേ ।
പ്രവിശന്നഭ്രജാലാനി നിഷ്പതംശ്ച പുനഃ പുനഃ॥182॥
പ്രാവൃഷീന്ദുരിവാഭാതി നിഷ്പതൻ പ്രവിശംസ്തദാ ।
പ്രദൃശ്യമാനഃ സർവത്ര ഹനൂമാൻ മാരുതാത്മജഃ॥183॥
ഭേജേഽമ്ബരം നിരാലംബം പക്ഷയുക്ത ഇവാദ്രിരാട് ।
പ്ലവമാനം തു തം ദൃഷ്ട്വാ സിംഹികാ നാമ രാക്ഷസീ ॥184॥
മനസാ ചിന്തയാമാസ പ്രവൃദ്ധാ കാമരൂപിണീ ।
അദ്യ ദീർഘസ്യ കാലസ്യ ഭവിഷ്യാമ്യഹമാശിതാ ॥185॥
ഇദം മമ മഹാസത്ത്വം ചിരസ്യ വശമാഗതം ।
ഇതി സഞ്ചിന്ത്യ മനസാ ച്ഛായാമസ്യ സമാക്ഷിപത് ॥186॥
ഛായായാം ഗൃഹ്യമാണായാം ചിന്തയാമാസ വാനരഃ।
സമാക്ഷിപ്തോഽസ്മി സഹസാ പങ്കൂകൃതപരാക്രമഃ॥187॥
പ്രതിലോമേന വാതേന മഹാനൗരിവ സാഗരേ ।
തിര്യഗൂർധ്വമധശ്ചൈവ വീക്ഷമാണസ്തദാ കപിഃ॥188॥
ദദർശ സ മഹാസത്ത്വമുത്ഥിതം ലവണാംഭസി ।
തദ് ദൃഷ്ട്വാ ചിന്തയാമാസ മാരുതിർവികൃതാനനാം ॥189॥
കപിരാജ്ഞാ യഥാഖ്യാതം സത്ത്വമദ്ഭുതദർശനം ।
ഛായാഗ്രാഹി മഹാവീര്യം തദിദം നാത്ര സംശയഃ॥190॥
സ താം ബുദ്ധ്വാർഥതത്ത്വേന സിംഹികാം മതിമാൻ കപിഃ।
വ്യവർധത മഹാകായഃ പ്രാവൃഷീവ ബലാഹകഃ॥191॥
തസ്യ സാ കായമുദ്വീക്ഷ്യ വർധമാനം മഹാകപേഃ।
വക്ത്രം പ്രസാരയാമാസ പാതാലാംബരസംനിഭം ॥192॥
ഘനരാജീവ ഗർജന്തീ വാനരം സമഭിദ്രവത് ।
സ ദദർശ തതസ്തസ്യാ വികൃതം സുമഹന്മുഖം ॥193॥
കായമാത്രം ച മേധാവീ മർമാണി ച മഹാകപിഃ।
സ തസ്യാ വികൃതേ വക്ത്രേ വജ്രസംഹനനഃ കപിഃ॥194॥
സങ്ക്ഷിപ്യ മുഹുരാത്മാനം നിപപാത മഹാകപിഃ।
ആസ്യേ തസ്യാ നിമജ്ജന്തം ദദൃശുഃ സിദ്ധചാരണാഃ॥195॥
ഗ്രസ്യമാനം യഥാ ചന്ദ്രം പൂർണം പർവണി രാഹുണാ ।
തതസ്തസ്യാ നഖൈസ്തീക്ഷ്ണൈർമർമാണ്യുത്കൃത്യ വാനരഃ॥196॥
ഉത്പപാതാഥ വേഗേന മനഃസമ്പാതവിക്രമഃ।
താം തു ദിഷ്ട്യാ ച ധൃത്യാ ച ദാക്ഷിണ്യേന നിപാത്യ സഃ॥197॥
കപിപ്രവീരോ വേഗേന വവൃധേ പുനരാത്മവാൻ ।
ഹൃതഹൃത്സാ ഹനുമതാ പപാത വിധുരാംഭസി ।
സ്വയംഭുവൈവ ഹനുമാൻ സൃഷ്ടസ്തസ്യാ നിപാതനേ ॥198॥
താം ഹതാം വാനരേണാശു പതിതാം വീക്ഷ്യ സിംഹികാം ।
ഭൂതാന്യാകാശചാരീണി തമൂചുഃ പ്ലവഗോത്തമം ॥199॥
ഭീമമദ്യ കൃതം കർമ മഹത്സത്ത്വം ത്വയാ ഹതം ।
സാധയാർഥമഭിപ്രേതമരിഷ്ടം പ്ലവതാം വര ॥200॥
യസ്യ ത്വേതാനി ചത്വാരി വാനരേന്ദ്ര യഥാ തവ ।
ധൃതിർദൃഷ്ടിർമതിർദാക്ഷ്യം സ കർമസു ന സീദതി ॥201॥
സ തൈഃ സമ്പൂജിതഃ പൂജ്യഃ പ്രതിപന്നപ്രയോജനൈഃ।
ജഗാമാകാശമാവിശ്യ പന്നഗാശനവത് കപിഃ॥202॥
പ്രാപ്തഭൂയിഷ്ഠപാരസ്തു സർവതഃ പരിലോകയൻ ।
യോജനാനാം ശതസ്യാന്തേ വനരാജീം ദദർശ സഃ॥203॥
ദദർശ ച പതന്നേവ വിവിധദ്രുമഭൂഷിതം ।
ദ്വീപം ശാഖാമൃഗ ശ്രേഷ്ഠോ മലയോപവനാനി ച ॥204॥
സാഗരം സാഗരാനൂപാൻ സാഗരാനൂപജാൻ ദ്രുമാൻ ।
സാഗരസ്യ ച പത്നീനാം മുഖാന്യപി വിലോകയത് ॥205॥
സ മഹാമേഘസങ്കാശം സമീക്ഷ്യാത്മാനമാത്മവാൻ ।
നിരുന്ധന്തമിവാകാശം ചകാര മതിമാൻ മതിം ॥206॥
കായവൃദ്ധിം പ്രവേഗം ച മമ ദൃഷ്ട്വൈവ രാക്ഷസാഃ।
മയി കൗതൂഹലം കുര്യുരിതി മേനേ മഹാമതിഃ॥207॥
തതഃ ശരീരം സങ്ക്ഷിപ്യ തന്മഹീധരസംനിഭം ।
പുനഃ പ്രകൃതിമാപേദേ വീതമോഹ ഇവാത്മവാൻ ॥208॥
തദ്രൂപമതിസങ്ക്ഷിപ്യ ഹനൂമാൻ പ്രകൃതൗ സ്ഥിതഃ।
ത്രീൻ ക്രമാനിവ വിക്രമ്യ ബലിവീര്യഹരോ ഹരിഃ॥209॥
സ ചാരുനാനാവിധരൂപധാരീ
	പരം സമാസാദ്യ സമുദ്രതീരം ।
പരൈരശക്യം പ്രതിപന്നരൂപഃ
	സമീക്ഷിതാത്മാ സമവേക്ഷിതാർഥഃ॥210॥
തതഃ സ ലംബസ്യ ഗിരേഃ സമൃദ്ധേ
	വിചിത്രകൂടേ നിപപാത കൂടേ ।
സകേതകോദ്ദാലകനാരികേലേ
	മഹാഭ്രകൂടപ്രതിമോ മഹാത്മാ ॥211॥
തതസ്തു സമ്പ്രാപ്യ സമുദ്രതീരം
	സമീക്ഷ്യ ലങ്കാം ഗിരിവര്യമൂർധ്നി ।
കപിസ്തു തസ്മിൻ നിപപാത പർവതേ
	വിധൂയ രൂപം വ്യഥയന്മൃഗദ്വിജാൻ ॥212॥
സ സാഗരം ദാനവപന്നഗായുതം
	ബലേന വിക്രമ്യ മഹോർമിമാലിനം ।
നിപത്യ തീരേ ച മഹോദധേസ്തദാ
	ദദർശ ലങ്കാമമരാവതീമിവ ॥213॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ പ്രഥമഃ സർഗഃ