അഥ ചതുർഥഃ സർഗഃ
സ നിർജിത്യ പുരീം ലങ്കാം ശ്രേഷ്ഠാം താം കാമരൂപിണീം ।
വിക്രമേണ മഹാതേജാ ഹനുമാൻ കപിസത്തമഃ॥1॥
അദ്വാരേണ മഹാവീര്യഃ പ്രാകാരമവപുപ്ലുവേ ।
നിശി ലങ്കാം മഹാസത്ത്വോ വിവേശ കപികുഞ്ജരഃ॥2॥
പ്രവിശ്യ നഗരീം ലങ്കാം കപിരാജഹിതങ്കരഃ।
ചക്രേഽഥ പാദം സവ്യം ച ശത്രൂണാം സ തു മൂർധനി ॥3॥
പ്രവിഷ്ടഃ സത്ത്വസമ്പന്നോ നിശായാം മാരുതാത്മജഃ।
സ മഹാപഥമാസ്ഥായ മുക്തപുഷ്പവിരാജിതം ॥4॥
തതസ്തു താം പുരീം ലങ്കാം രമ്യാമഭിയയൗ കപിഃ।
ഹസിതോത്കൃഷ്ടനിനദൈസ്തൂര്യഘോഷപുരസ്കൃതൈഃ॥5॥
വജ്രാങ്കുശനികാശൈശ്ച വജ്രജാലവിഭൂഷിതൈഃ।
ഗൃഹമേധൈഃ പുരീ രമ്യാ ബഭാസേ ദ്യൗരിവാംബുദൈഃ॥6॥
പ്രജജ്വാല തദാ ലങ്കാ രക്ഷോഗണഗൃഹൈഃ ശുഭൈഃ।
സിതാഭ്രസദൃശൈശ്ചിത്രൈഃ പദ്മസ്വസ്തികസംസ്ഥിതൈഃ॥7॥
വർധമാനഗൃഹൈശ്ചാപി സർവതഃ സുവിഭൂഷിതൈഃ।
താം ചിത്രമാല്യാഭരണാം കപിരാജഹിതങ്കരഃ॥8॥
രാഘവാർഥേ ചരൻ ശ്രീമാൻ ദദർശ ച നനന്ദ ച ।
ഭവനാദ്ഭവനം ഗച്ഛൻ ദദർശ കപികുഞ്ജരഃ॥9॥
വിവിധാകൃതിരൂപാണി ഭവനാനി തതസ്തതഃ।
ശുശ്രാവ രുചിരം ഗീതം ത്രിസ്ഥാനസ്വരഭൂഷിതം ॥10॥
സ്ത്രീണാം മദനവിദ്ധാനാം ദിവി ചാപ്സരസാമിവ ।
ശുശ്രാവ കാഞ്ചീനിനദം നൂപുരാണാം ച നിഃസ്വനം ॥11॥
സോപാനനിനദാംശ്ചാപി ഭവനേഷു മഹാത്മനാം ।
ആസ്ഫോടിതനിനാദാംശ്ച ക്ഷ്വേഡിതാംശ്ച തതസ്തതഃ॥12॥
ശുശ്രാവ ജപതാം തത്ര മന്ത്രാൻ രക്ഷോഗൃഹേഷു വൈ ।
സ്വാധ്യായ നിരതാംശ്ചൈവ യാതുധാനാന്ദദർശ സഃ॥13॥
രാവണസ്തവസംയുക്താൻഗർജതോ രാക്ഷസാനപി ।
രാജമാർഗം സമാവൃത്യ സ്ഥിതം രക്ഷോഗണം മഹത് ॥14॥
ദദർശ മധ്യമേ ഗുല്മേ രാക്ഷസസ്യ ചരാൻ ബഹൂൻ ।
ദീക്ഷിതാൻ ജടിലാൻ മുണ്ഡാൻ ഗോജിനാംബരവാസസഃ॥15॥
ദർഭമുഷ്ടിപ്രഹരണാനഗ്നികുണ്ഡായുധാംസ്തഥാ ।
കൂടമുദ്ഗരപാണീംശ്ച ദണ്ഡായുധധരാനപി ॥16॥
ഏകാക്ഷാനേകവർണാംശ്ച ലംബോദരപയോധരാൻ ।
കരാലാൻഭുഗ്നവക്ത്രാംശ്ച വികടാന്വാമനാംസ്തഥാ ॥17॥
ധന്വിനഃ ഖഡ്ഗിനശ്ചൈവ ശതഘ്നീ മുസലായുധാൻ ।
പരിഘോത്തമഹസ്താംശ്ച വിചിത്രകവചോജ്ജ്വലാൻ ॥18॥
നാതിസ്തൂലാൻ നാതികൃശാൻ നാതിദീർഘാതിഹ്രസ്വകാൻ ।
നാതിഗൗരാൻ നാതികൃഷ്ണാന്നാതികുബ്ജാന്ന വാമനാൻ ॥19॥
വിരൂപാൻബഹുരൂപാംശ്ച സുരൂപാംശ്ച സുവർചസഃ।
പതാകിനശ്ചധ്വജിനോ ദദർശ വിവിധായുധാൻ ॥20॥
ശക്തിവൃക്ഷായുധാംശ്ചൈവ പട്ടിശാശനിധാരിണഃ।
ക്ഷേപണീപാശഹസ്താംശ്ച ദദർശ സ മഹാകപിഃ॥21॥
സ്രഗ്വിണസ്ത്വനുലിപ്താംശ്ച വരാഭരണഭൂഷിതാൻ ।
നാനവേഷസമായുക്താൻ യഥാസ്വൈരചരാൻ ബഹൂൻ ॥22॥
തീക്ഷ്ണശൂലധരാംശ്ചൈവ വജ്രിണശ്ച മഹാബലാൻ ।
ശതസാഹസ്രമവ്യഗ്രമാരക്ഷം മധ്യമം കപിഃ॥23॥
രക്ഷോഽധിപതിനിർദിഷ്ടം ദദർശാന്തഃ പുരാഗ്രതഃ।
സ തദാ തദ് ഗൃഹം ദൃഷ്ട്വാ മഹാഹാടകതോരണം ॥24॥
രാക്ഷസേന്ദ്രസ്യ വിഖ്യാതമദ്രിമൂർധ്നി പ്രതിഷ്ഠിതം ।
പുണ്ഡരീകാവതംസാഭിഃ പരിഖാഭിഃ സമാവൃതം ॥25॥
പ്രാകാരാവൃതമത്യന്തം ദദർശ സ മഹാകപിഃ।
ത്രിവിഷ്ടപനിഭം ദിവ്യം ദിവ്യനാദവിനാദിതം ॥26॥
വാജിഹ്രേഷിതസംഘുഷ്ടം നാദിതം ഭൂഷണൈസ്തഥാ ।
രഥൈര്യാനൈർവിമാനൈശ്ച തഥാ ഹയഗജൈഃ ശുഭൈഃ॥27॥
വാരണൈശ്ച ചതുർദന്തൈഃ ശ്വേതാഭ്രനിചയോപമൈഃ।
ഭൂഷിതൈ രുചിരദ്വാരം മത്തൈശ്ച മൃഗപക്ഷിഭിഃ॥28॥
രക്ഷിതം സുമഹാവീര്യൈര്യാതുധാനൈഃ സഹസ്രശഃ।
രാക്ഷസാധിപതേർഗുപ്തമാവിവേശ ഗൃഹം കപിഃ॥29॥
സ ഹേമജാംബൂനദചക്രവാലം
	മഹാർഹമുക്താമണി ഭൂഷിതാന്തമ്് ।
പരാർധ്യകാലാഗുരുചന്ദനാർഹം
	സ രാവണാന്തഃ പുരമാവിവേശ ॥30॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ചതുർഥഃ സർഗഃ