അഥ ഷഷ്ഠഃ സർഗഃ
സ നികാമം വിമാനേഷു വിചരൻകാമരൂപധൃക് ।
വിചചാര കപിർലങ്കാം ലാഘവേന സമന്വിതഃ॥1॥
ആസസാദ ച ലക്ഷ്മീവാന്രാക്ഷസേന്ദ്രനിവേശനം ।
പ്രാകാരേണാർകവർണേന ഭാസ്വരേണാഭിസംവൃതം ॥2॥
രക്ഷിതം രാക്ഷസൈർഭീമൈഃ സിംഹൈരിവ മഹദ്വനം ।
സമീക്ഷമാണോ ഭവനം ചകാശേ കപികുഞ്ജരഃ॥3॥
രൂപ്യകോപഹിതൈശ്ചിത്രൈസ്തോരണൈർഹേമഭൂഷണൈഃ।
വിചിത്രാഭിശ്ച കക്ഷ്യാഭിർദ്വാരൈശ്ച രുചിരൈർവൃതം ॥4॥
ഗജാസ്ഥിതൈർമഹാമാത്രൈഃ ശൂരൈശ്ച വിഗതശ്രമൈഃ।
ഉപസ്ഥിതമസംഹാര്യൈർഹയൈഃ സ്യന്ദനയായിഭിഃ॥5॥
സിംഹവ്യാഘ്രതനുത്രാണൈർദാന്തകാഞ്ചനരാജതീഃ।
ഘോഷവദ്ഭിർവിചിത്രൈശ്ച സദാ വിചരിതം രഥൈഃ॥6॥
ബഹുരത്നസമാകീർണം പരാർധ്യാസനഭൂഷിതം ।
മഹാരഥസമാവാപം മഹാരഥമഹാസനം ॥7॥
ദൃശ്യൈശ്ച പരമോദാരൈസ്തൈസ്തൈശ്ച മൃഗപക്ഷിഭിഃ।
വിവിധൈർബഹുസാഹസ്രൈഃ പരിപൂർണം സമന്തതഃ॥8॥
വിനീതൈരന്തപാലൈശ്ച രക്ഷോഭിശ്ച സുരക്ഷിതം ।
മുഖ്യാഭിശ്ച വരസ്ത്രീഭിഃ പരിപൂർണം സമന്തതഃ॥9॥
മുദിതപ്രമദാ രത്നം രാക്ഷസേന്ദ്രനിവേശനം ।
വരാഭരണസംഹ്രാദൈ സമുദ്രസ്വനനിഃസ്വനം ॥10॥
തദ്രാജഗുണസമ്പന്നം മുഖ്യൈശ്ച വരചന്ദനൈഃ।
മഹാജനസമാകീർണം സിംഹൈരിവ മഹദ്വനം ॥11॥
ഭേരീമൃദംഗാഭിരുതം ശംഖഘോഷവിനാദിതം ।
നിത്യാർചിതം പർവസുതം പൂജിതം രാക്ഷസൈഃ സദാ ॥12॥
സമുദ്രമിവ ഗംഭീരം സമുദ്രസമനിഃസ്വനം ।
മഹാത്മനോ മഹദ്വേശ്മ മഹാരത്നപരിച്ഛദം ॥13॥
മഹാരത്നസമാകീർണം ദദർശ സ മഹാകപിഃ।
വിരാജമാനം വപുഷാ ഗജാശ്വരഥസങ്കുലം ॥14॥
ലങ്കാഭരണമിത്യേവ സോഽമന്യത മഹാകപിഃ।
ചചാര ഹനുമാംസ്തത്ര രാവണസ്യ സമീപതഃ॥15॥
ഗൃഹാദ്ഗൃഹം രാക്ഷസാനാമുദ്യാനാനി ച സർവശഃ।
വീക്ഷമാണോഽപ്യസന്ത്രസ്തഃ പ്രാസാദാംശ്ച ചചാര സഃ॥16॥
അവപ്ലുത്യ മഹാവേഗഃ പ്രഹസ്തസ്യ നിവേശനം ।
തതോഽന്യത്പുപ്ലുവേ വേശ്മ മഹാപാർശ്വസ്യ വീര്യവാൻ ॥17॥
അഥ മേഘപ്രതീകാശം കുംഭകർണനിവേശനം ।
വിഭീഷണസ്യ ച തഥാ പുപ്ലുവേ സ മഹാകപിഃ॥18॥
മഹോദരസ്യ ച തഥാ വിരൂപാക്ഷസ്യ ചൈവ ഹി ।
വിദ്യുജ്ജിഹ്വസ്യ ഭവനം വിദ്യുന്മാലേസ്തഥൈവ ച ॥19॥
വജ്രദംഷ്ട്രസ്യ ച തഥാ പുപ്ലുവേ സ മഹാകപിഃ।
ശുകസ്യ ച മഹാവേഗഃ സാരണസ്യ ച ധീമതഃ॥20॥
തഥാ ചേന്ദ്രജിതോ വേശ്മ ജഗാമ ഹരിയൂഥപഃ।
ജംബുമാലേഃ സുമാലേശ്ച ജഗാമ ഹരിസതമഃ॥21॥
രശ്മികേതോശ്ച ഭവനം സൂര്യശത്രോസ്തഥൈവ ച ।
വജ്രകായസ്യ ച തഥാ പുപ്ലുവേ സ മഹാകപിഃ॥22॥
ധൂമ്രാക്ഷസ്യാഥ സമ്പാതേർഭവനം മാരുതാത്മജഃ।
വിദ്യുദ്രൂപസ്യ ഭീമസ്യ ഘനസ്യ വിഘനസ്യ ച ॥23॥
ശുകനാഭസ്യ ചക്രസ്യ ശഠസ്യ കപടസ്യ ച ।
ഹ്രസ്വകർണസ്യ ദംഷ്ട്രസ്യ ലോമശസ്യ ച രക്ഷസഃ॥24॥
യുദ്ധോന്മത്തസ്യ മത്തസ്യ ധ്വജഗ്രീവസ്യ സാദിനഃ।
വിദ്യുജ്ജിഹ്വദ്വിജിഹ്വാനാം തഥാ ഹസ്തിമുഖസ്യ ച ॥25॥
കരാലസ്യ പിശാചസ്യ ശോണിതാക്ഷസ്യ ചൈവ ഹി ।
പ്ലവമാനഃ ക്രമേണൈവ ഹനൂമാന്മാരുതാത്മജഃ॥26॥
തേഷു തേഷു മഹാർഹേഷു ഭവനേഷു മഹായശാഃ।
തേഷാമൃദ്ധിമതാമൃദ്ധിം ദദർശ സ മഹാകപിഃ॥27॥
സർവേഷാം സമതിക്രമ്യ ഭവനാനി സമന്തതഃ।
ആസസാദാഥ ലക്ഷ്മീവാന്രാക്ഷസേന്ദ്രനിവേശനം ॥28॥
രാവണസ്യോപശായിന്യോ ദദർശ ഹരിസത്തമഃ।
വിചരൻഹരിശാർദൂലോ രാക്ഷസീർവികൃതേക്ഷണാഃ॥29॥
ശൂലമുദ്ഗരഹസ്താംശ്ച ശക്തിതോമരധാരിണഃ।
ദദർശ വിവിധാൻഗുല്മാംസ്തസ്യ രക്ഷഃപതേർഗൃഹേ ॥30॥
രാക്ഷസാംശ്ച മഹാകായാന്നാനാപ്രഹരണോദ്യതാൻ ।
രക്താഞ്ശ്വേതാൻസിതാംശ്ചാപി ഹരീംശ്ചാപി മഹാജവാൻ ॥31॥
കുലീനാന്രൂപസമ്പന്നാൻഗജാൻപരഗജാരുജാൻ ।
ശിക്ഷിതാൻ ഗജശിക്ഷായാമൈരാവതസമാന്യുധി ॥32॥
നിഹന്തൄൻപരസൈന്യാനാം ഗൃഹേ തസ്മിന്ദദർശ സഃ।
ക്ഷരതശ്ച യഥാ മേഘാൻസ്രവതശ്ച യഥാ ഗിരീൻ ॥33॥
മേഘസ്തനിതനിർഘോഷാന്ദുർധർഷാൻസമരേ പരൈഃ।
സഹസ്രം വാഹിനീസ്തത്ര ജാംബൂനദപരിഷ്കൃതാഃ॥34॥
ഹേമജാലൈരവിച്ഛിന്നാസ്തരുണാദിത്യസംനിഭാഃ।
ദദർശ രാക്ഷസേന്ദ്രസ്യ രാവണസ്യ നിവേശനേ ॥35॥
ശിബികാ വിവിധാകാരാഃ സ കപിർമാരുതാത്മജഃ।
ലതാഗൃഹാണി ചിത്രാണി ചിത്രശാലാഗൃഹാണി ച ॥36॥
ക്രീഡാഗൃഹാണി ചാന്യാനി ദാരുപർവതകാനി ച ।
കാമസ്യ ഗൃഹകം രമ്യം ദിവാഗൃഹകമേവ ച ॥37॥
ദദർശ രാക്ഷസേന്ദ്രസ്യ രാവണസ്യ നിവേശനേ ।
സ മന്ദരസമപ്രഖ്യം മയൂരസ്ഥാനസങ്കുലം ॥38॥
ധ്വജയഷ്ടിഭിരാകീർണം ദദർശ ഭവനോത്തമം ।
അനന്തരത്നനിചയം നിധിജാലം സമന്തതഃ।
ധീരനിഷ്ഠിതകർമാംഗം ഗൃഹം ഭൂതപതേരിവ ॥39॥
അർചിർഭിശ്ചാപി രത്നാനാം തേജസാ രാവണസ്യ ച ।
വിരരാജ ച തദ്വേശ്മ രശ്മിവാനിവ രശ്മിഭിഃ॥40॥
ജാംബൂനദമയാന്യേവ ശയനാന്യാസനാനി ച ।
ഭാജനാനി ച ശുഭ്രാണി ദദർശ ഹരിയൂഥപഃ॥41॥
മധ്വാസവകൃതക്ലേദം മണിഭാജനസങ്കുലം ।
മനോരമമസംബാധം കുബേരഭവനം യഥാ ॥42॥
നൂപുരാണാം ച ഘോഷേണ കാഞ്ചീനാം നിഃസ്വനേന ച ।
മൃദംഗതലനിർഘോഷൈർഘോഷവദ്ഭിർവിനാദിതം ॥43॥
പ്രാസാദസംഘാതയുതം സ്ത്രീരത്നശതസങ്കുലം ।
സുവ്യൂഢകക്ഷ്യം ഹനുമാൻപ്രവിവേശ മഹാഗൃഹം ॥44॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഷഷ്ഠഃ സർഗഃ