അഥ സപ്തമഃ സർഗഃ
സ വേശ്മജാലം ബലവാന്ദദർശ
	വ്യാസക്തവൈദൂര്യസുവർണജാലം ।
യഥാ മഹത്പ്രാവൃഷി മേഘജാലം
	വിദ്യുത്പിനദ്ധം സവിഹംഗജാലം ॥1॥
നിവേശനാനാം വിവിധാശ്ച ശാലാഃ
	പ്രധാനശംഖായുധചാപശാലാഃ।
മനോഹരാശ്ചാപി പുനർവിശാലാ
	ദദർശ വേശ്മാദ്രിഷു ചന്ദ്രശാലാഃ॥2॥
ഗൃഹാണി നാനാവസുരാജിതാനി
	ദേവാസുരൈശ്ചാപി സുപൂജിതാനി ।
സർവൈശ്ച ദോഷൈഃ പരിവർജിതാനി
	കപിർദദർശ സ്വബലാർജിതാനി ॥3॥
താനി പ്രയത്നാഭിസമാഹിതാനി
	മയേന സാക്ഷാദിവ നിർമിതാനി ।
മഹീതലേ സർവഗുണോത്തരാണി
	ദദർശ ലങ്കാധിപതേർഗൃഹാണി ॥4॥
തതോ ദദർശോച്ഛ്രിതമേഘരൂപം
	മനോഹരം കാഞ്ചനചാരുരൂപം ।
രക്ഷോഽധിപസ്യാത്മബലാനുരൂപം
	ഗൃഹോത്തമം ഹ്യപ്രതിരൂപരൂപം ॥5॥
മഹീതലേ സ്വർഗമിവ പ്രകീർണം
	ശ്രിയാ ജ്വലന്തം ബഹുരത്നകീർണം ।
നാനാതരൂണാം കുസുമാവകീർണം
	ഗിരേരിവാഗ്രം രജസാവകീർണം ॥6॥
നാരീപ്രവേകൈരിവ ദീപ്യമാനം
	തഡിദ്ഭിരംഭോധരമർച്യമാനം ।
ഹംസപ്രവേകൈരിവ വാഹ്യമാനം
	ശ്രിയാ യുതം ഖേ സുകൃതം വിമാനം ॥7॥
യഥാ നഗാഗ്രം ബഹുധാതുചിത്രം
	യഥാ നഭശ്ച ഗ്രഹചന്ദ്രചിത്രം ।
ദദർശ യുക്തീകൃതചാരുമേഘ-
	ചിത്രം വിമാനം ബഹുരത്നചിത്രം ॥8॥
മഹീ കൃതാ പർവതരാജിപൂർണാ
	ശൈലാഃ കൃതാ വൃക്ഷവിതാനപൂർണാഃ।
വൃക്ഷാഃ കൃതാഃ പുഷ്പവിതാനപൂർണാഃ
	പുഷ്പം കൃതം കേസരപത്രപൂർണം ॥9॥
കൃതാനി വേശ്മാനി ച പാണ്ഡുരാണി
	തഥാ സുപുഷ്പാണ്യപി പുഷ്കരാണി ।
പുനശ്ച പദ്മാനി സകേസരാണി
	വനാനി ചിത്രാണി സരോവരാണി ॥10॥
പുഷ്പാഹ്വയം നാമ വിരാജമാനം
	രത്നപ്രഭാഭിശ്ച വിഘൂർണമാനം ।
വേശ്മോത്തമാനാമപി ചോച്ചമാനം
	മഹാകപിസ്തത്ര മഹാവിമാനം ॥11॥
കൃതാശ്ച വൈദൂര്യമയാ വിഹംഗാ
	രൂപ്യപ്രവാലൈശ്ച തഥാ വിഹംഗാഃ।
ചിത്രാശ്ച നാനാവസുഭിർഭുജംഗാ
	ജാത്യാനുരൂപാസ്തുരഗാഃ ശുഭാംഗാഃ॥12॥
പ്രവാലജാംബൂനദപുഷ്പപക്ഷാഃ
	സലീലമാവർജിതജിഹ്മപക്ഷാഃ।
കാമസ്യ സാക്ഷാദിവ ഭാന്തി പക്ഷാഃ
	കൃതാ വിഹംഗാഃ സുമുഖാഃ സുപക്ഷാഃ॥13॥
നിയുജ്യമാനാശ്ച ഗജാഃ സുഹസ്താഃ
	സകേസരാശ്ചോത്പലപത്രഹസ്താഃ।
ബഭൂവ ദേവീ ച കൃതാസുഹസ്താ
	ലക്ഷ്മീസ്തഥാ പദ്മിനി പദ്മഹസ്താ ॥14॥
ഇതീവ തദ്ഗൃഹമഭിഗമ്യ ശോഭനം
	സവിസ്മയോ നഗമിവ ചാരുകന്ദരം ।
പുനശ്ച തത്പരമസുഗന്ധി സുന്ദരം
	ഹിമാത്യയേ നഗമിവ ചാരുകന്ദരം ॥15॥
തതഃ സ താം കപിരഭിപത്യ പൂജിതാം
	ചരൻപുരീം ദശമുഖബാഹുപാലിതാം ।
അദൃശ്യ താം ജനകസുതാം സുപൂജിതാം
	സുദുഃഖിതാം പതിഗുണവേഗനിർജിതാം ॥16॥
തതസ്തദാ ബഹുവിധഭാവിതാത്മനഃ
	കൃതാത്മനോ ജനകസുതാം സുവർത്മനഃ।
അപശ്യതോഽഭവദതിദുഃഖിതം മനഃ
	സചക്ഷുഷഃ പ്രവിചരതോ മഹാത്മനഃ॥17॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ സപ്തമഃ സർഗഃ