അഥ അഷ്ടമഃ സർഗഃ
സ തസ്യ മധ്യേ ഭവനസ്യ സംസ്ഥിതോ
	മഹദ്വിമാനം മണിരത്നചിത്രിതം ।
പ്രതപ്തജാംബൂനദജാലകൃത്രിമം
	ദദർശ ധീമാൻ പവനാത്മജഃ കപിഃ॥1॥
തദപ്രമേയപ്രതികാരകൃത്രിമം
	കൃതം സ്വയം സാധ്വിതി വിശ്വകർമണാ ।
ദിവം ഗതേ വായുപഥേ പ്രതിഷ്ഠിതം
	വ്യരാജതാദിത്യപഥസ്യ ലക്ഷ്മ തത് ॥2॥
ന തത്ര കിഞ്ചിന്ന കൃതം പ്രയത്നതോ
	ന തത്ര കിഞ്ചിന്ന മഹാർഹരത്നവത് ।
ന തേ വിശേഷാ നിയതാഃ സുരേഷ്വപി
	ന തത്ര കിഞ്ചിന്ന മഹാവിശേഷവത് ॥3॥
തപഃ സമാധാനപരാക്രമാർജിതം
	മനഃ സമാധാനവിചാരചാരിണം ।
അനേകസംസ്ഥാനവിശേഷനിർമിതം
	തതസ്തതസ്തുല്യവിശേഷനിർമിതം ॥4॥
മനഃ സമാധായ തു ശീഘ്രഗാമിനം
	ദുരാസദം മാരുതതുല്യഗാമിനം ।
മഹാത്മനാം പുണ്യകൃതാം മഹർദ്ധിനാം
	യശസ്വിനാമഗ്ര്യമുദാമിവാലയം ॥5॥
വിശേഷമാലംബ്യ വിശേഷസംസ്ഥിതം
	വിചിത്രകൂടം ബഹുകൂടമണ്ഡിതം ।
മനോഽഭിരാമം ശരദിന്ദുനിർമലം
	വിചിത്രകൂടം ശിഖരം ഗിരേര്യഥാ ॥6॥
വഹന്തി യത്കുണ്ഡലശോഭിതാനനാ
	മഹാശനാ വ്യോമചരാനിശാചരാഃ।
വിവൃത്തവിധ്വസ്തവിശാലലോചനാ
	മഹാജവാ ഭൂതഗണാഃ സഹസ്രശഃ॥7॥
വസന്തപുഷ്പോത്കരചാരുദർശനം
	വസന്തമാസാദപി ചാരുദർശനം ।
സ പുഷ്പകം തത്ര വിമാനമുത്തമം
	ദദർശ തദ്വാനരവീരസത്തമഃ॥8॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ അഷ്ടമഃ സർഗഃ