അഥ ദശമഃ സർഗഃ
തത്ര ദിവ്യോപമം മുഖ്യം സ്ഫാടികം രത്നഭൂഷിതം ।
അവേക്ഷമാണോ ഹനുമാൻ ദദർശ ശയനാസനം ॥1॥
ദാന്തകാഞ്ചനചിത്രാംഗൈർവൈദൂര്യൈശ്ച വരാസനൈഃ।
മഹാർഹാസ്തരണോപേതൈരുപപന്നം മഹാധനൈഃ॥2॥
തസ്യ ചൈകതമേ ദേശേ ദിവ്യമാല്യോപശോഭിതം ।
ദദർശ പാണ്ഡുരം ഛത്രം താരാധിപതിസംനിഭം ॥3॥
ജാതരൂപപരിക്ഷിപ്തം ചിത്രഭാനോഃ സമപ്രഭം ।
അശോകമാലാവിതതം ദദർശ പരമാസനം ॥4॥
വാലവ്യജനഹസ്താഭിർവീജ്യമാനം സമന്തതഃ।
ഗന്ധൈശ്ച വിവിധൈർജുഷ്ടം വരധൂപേന ധൂപിതം ॥5॥
പരമാസ്തരണാസ്തീർണമാവികാജിനസംവൃതം ।
ദാമഭിർവരമാല്യാനാം സമന്താദുപശോഭിതം ॥6॥
തസ്മിഞ്ജീമൂതസങ്കാശം പ്രദീപ്തോജ്ജ്വലകുണ്ഡലം ।
ലോഹിതാക്ഷം മഹാബാഹും മഹാരജതവാസസം ॥7॥
ലോഹിതേനാനുലിപ്താംഗം ചന്ദനേന സുഗന്ധിനാ ।
സന്ധ്യാരക്തമിവാകാശേ തോയദം സതഡിദ്ഗുണം ॥8॥
വൃതമാഭരണൈർദിവ്യൈഃ സുരൂപം കാമരൂപിണം ।
സവൃക്ഷവനഗുല്മാഢ്യം പ്രസുപ്തമിവ മന്ദരം ॥9॥
ക്രീഡിത്വോപരതം രാത്രൗ വരാഭരണഭൂഷിതം ।
പ്രിയം രാക്ഷസകന്യാനാം രാക്ഷസാനാം സുഖാവഹം ॥10॥
പീത്വാപ്യുപരതം ചാപി ദദർശ സ മഹാകപിഃ।
ഭാസ്വരേ ശയനേ വീരം പ്രസുപ്തം രാക്ഷസാധിപം ॥11॥
നിഃശ്വസന്തം യഥാ നാഗം രാവണം വാനരോത്തമഃ।
ആസാദ്യ പരമോദ്വിഗ്നഃ സോപാസർപത്സുഭീതവത് ॥12॥
അഥാരോഹണമാസാദ്യ വേദികാന്തരമാശ്രിതഃ।
ക്ഷീവം രാക്ഷസശാർദൂലം പ്രേക്ഷതേ സ്മ മഹാകപിഃ॥13॥
ശുശുഭേ രാക്ഷസേന്ദ്രസ്യ സ്വപതഃ ശയനം ശുഭം ।
ഗന്ധഹസ്തിനി സംവിഷ്ടേ യഥാ പ്രസ്രവണം മഹത് ॥14॥
കാഞ്ചനാംഗദസംനദ്ധൗ ദദർശ സ മഹാത്മനഃ।
വിക്ഷിപ്തൗ രാക്ഷസേന്ദ്രസ്യ ഭുജാവിന്ദ്രധ്വജോപമൗ ॥15॥
ഐരാവതവിഷാണാഗ്രൈരാപീഡിനകൃതവ്രണൗ ।
വജ്രോല്ലിഖിതപീനാംസൗ വിഷ്ണുചക്രപരിക്ഷതൗ ॥16॥
പീനൗ സമസുജാതാംസൗ സംഗതൗ ബലസംയുതൗ ।
സുലക്ഷണ നഖാംഗുഷ്ഠൗ സ്വംഗുലീയകലക്ഷിതൗ ॥17॥
സംഹതൗ പരിഘാകാരൗ വൃത്തൗ കരികരോപമൗ ।
വിക്ഷിപ്തൗ ശയനേ ശുഭ്രേ പഞ്ചശീർഷാവിവോരഗൗ ॥18॥
ശശക്ഷതജകല്പേന സുശീതേന സുഗന്ധിനാ ।
ചന്ദനേന പരാർധ്യേന സ്വനുലിപ്തൗ സ്വലങ്കൃതൗ ॥19॥
ഉത്തമസ്ത്രീവിമൃദിതൗ ഗന്ധോത്തമനിഷേവിതൗ ।
യക്ഷപന്നഗഗന്ധർവദേവദാനവരാവിണൗ ॥20॥
ദദർശ സ കപിസ്തസ്യ ബാഹൂ ശയനസംസ്ഥിതൗ ।
മന്ദരസ്യാന്തരേ സുപ്തൗ മഹാഹീ രുഷിതാവിവ ॥21॥
താഭ്യാം സ പരിപൂർണാഭ്യാമുഭാഭ്യാം രാക്ഷസേശ്വരഃ।
ശുശുഭേഽചലസങ്കാശഃ ശൃംഗാഭ്യാമിവ മന്ദരഃ॥22॥
ചൂതപുംനാഗസുരഭിർബകുലോത്തമസംയുതഃ।
മൃഷ്ടാന്നരസസംയുക്തഃ പാനഗന്ധപുരഃസരഃ॥23॥
തസ്യ രാക്ഷസരാജസ്യ നിശ്ചക്രാമ മഹാമുഖാത് ।
ശയാനസ്യ വിനിഃശ്വാസഃ പൂരയന്നിവ തദ്ഗൃഹം ॥24॥
മുക്താമണിവിചിത്രേണ കാഞ്ചനേന വിരാജിതാ ।
മുകുടേനാപവൃത്തേന കുണ്ഡലോജ്ജ്വലിതാനനം ॥25॥
രക്തചന്ദനദിഗ്ധേന തഥാ ഹാരേണ ശോഭിനാ ।
പീനായതവിശാലേന വക്ഷസാഭിവിരാജിതാ ॥26॥
പാണ്ഡുരേണാപവിദ്ധേന ക്ഷൗമേണ ക്ഷതജേക്ഷണം ।
മഹാർഹേണ സുസംവീതം പീതേനോത്തരവാസസാ ॥27॥
മാഷരാശിപ്രതീകാശം നിഃശ്വസന്തം ഭുജംഗവത് ।
ഗാംഗേ മഹതി തോയാന്തേ പ്രസുപ്തമിവ കുഞ്ജരം ॥28॥
ചതുർഭിഃ കാഞ്ചനൈർദീപൈർദീപ്യമാനം ചതുർദിശം ।
പ്രകാശീകൃതസർവാംഗം മേഘം വിദ്യുദ്ഗണൈരിവ ॥29॥
പാദമൂലഗതാശ്ചാപി ദദർശ സുമഹാത്മനഃ।
പത്നീഃ സ പ്രിയഭാര്യസ്യ തസ്യ രക്ഷഃപതേർഗൃഹേ ॥30॥
ശശിപ്രകാശവദനാ വരകുണ്ഡലഭൂഷണാഃ।
അമ്ലാനമാല്യാഭരണാ ദദർശ ഹരിയൂഥപഃ॥31॥
നൃത്യവാദിത്രകുശലാ രാക്ഷസേന്ദ്രഭുജാങ്കഗാഃ।
വരാഭരണധാരിണ്യോ നിഷണ്ണാ ദദൃശേ കപിഃ॥32॥
വജ്രവൈദൂര്യഗർഭാണി ശ്രവണാന്തേഷു യോഷിതാം ।
ദദർശ താപനീയാനി കുണ്ഡലാന്യംഗദാനി ച ॥33॥
താസാം ചന്ദ്രോപമൈർവക്ത്രൈഃ ശുഭൈർലലിതകുണ്ഡലൈഃ।
വിരരാജ വിമാനം തന്നഭസ്താരാഗണൈരിവ ॥34॥
മദവ്യായാമഖിന്നാസ്താ രാക്ഷസേന്ദ്രസ്യ യോഷിതഃ।
തേഷു തേഷ്വവകാശേഷു പ്രസുപ്താസ്തനുമധ്യമാഃ॥35॥
അംഗഹാരൈസ്തഥൈവാന്യാ കോമലൈർനൃത്യശാലിനീ ।
വിന്യസ്തശുഭസർവാംഗീ പ്രസുപ്താ വരവരർണിനീ ॥36॥
കാചിദ്വീണാം പരിഷ്വജ്യ പ്രസുപ്താ സമ്പ്രകാശതേ ।
മഹാനദീപ്രകീർണേവ നലിനീ പോതമാശ്രിതാ ॥37॥
അന്യാ കക്ഷഗതേനൈവ മഡ്ഡുകേനാസിതേക്ഷണാ ।
പ്രസുപ്താ ഭാമിനീ ഭാതി ബാലപുത്രേവ വത്സലാ ॥38॥
പടഹം ചാരുസർവാംഗീ ന്യസ്യ ശേതേ ശുഭസ്തനീ ।
ചിരസ്യ രമണം ലബ്ധ്വാ പരിഷ്വജ്യേവ കാമിനീ ॥39॥
കാചിദ് വീണാം പരിഷ്വജ്യ സുപ്താ കമലലോചനാ ।
വരം പ്രിയതമം ഗൃഹ്യ സകാമേവ ഹി കാമിനി ॥40॥
വിപഞ്ചീം പരിഗൃഹ്യാന്യാ നിയതാ നൃത്യശാലിനീ ।
നിദ്രാവശമനുപ്രാപ്താ സഹകാന്തേവ ഭാമിനീ ॥41॥
അന്യാ കനകസങ്കാശൈർമൃദുപീനൈർമനോരമൈഃ।
മൃദംഗം പരിവിദ്ധ്യാംഗൈഃ പ്രസുപ്താ മത്തലോചനാ ॥42॥
ഭുജപാശാന്തരസ്ഥേന കക്ഷഗേന കൃശോദരീ ।
പണവേന സഹാനിന്ദ്യാ സുപ്താ മദകൃതശ്രമാ ॥43॥
ഡിണ്ഡിമം പരിഗൃഹ്യാന്യാ തഥൈവാസക്തഡിണ്ഡിമാ ।
പ്രസുപ്താ തരുണം വത്സമുപഗുഹ്യേവ ഭാമിനീ ॥44॥
കാചിദാഡംബരം നാരീ ഭുജസംഭോഗപീഡിതം ।
കൃത്വാ കമലപത്രാക്ഷീ പ്രസുപ്താ മദമോഹിതാ ॥45॥
കലശീമപവിദ്ധ്യാന്യാ പ്രസുപ്താ ഭാതി ഭാമിനീ ।
വസന്തേ പുഷ്പശബലാ മാലേവ പരിമാർജിതാ ॥46॥
പാണിഭ്യാം ച കുചൗ കാചിത്സുവർണകലശോപമൗ ।
ഉപഗൂഹ്യാബലാ സുപ്താ നിദ്രാബലപരാജിതാ ॥47॥
അന്യാ കമലപത്രാക്ഷീ പൂർണേന്ദുസദൃശാനനാ ।
അന്യാമാലിംഗ്യ സുശ്രോണീം പ്രസുപ്താ മദവിഹ്വലാ ॥48॥
ആതോദ്യാനി വിചിത്രാണി പരിഷ്വജ്യ വരസ്ത്രിയഃ।
നിപീഡ്യ ച കുചൈഃ സുപ്താഃ കാമിന്യഃ കാമുകാനിവ ॥49॥
താസാമേകാന്തവിന്യസ്തേ ശയാനാം ശയനേ ശുഭേ ।
ദദർശ രൂപസമ്പന്നാമഥ താം സ കപിഃ സ്ത്രിയം ॥50॥
മുക്താമണിസമായുക്തൈർഭൂഷണൈഃ സുവിഭൂഷിതാം ।
വിഭൂഷയന്തീമിവ ച സ്വശ്രിയാ ഭവനോത്തമം ॥51॥
ഗൗരീം കനകവർണാഭാമിഷ്ടാമന്തഃപുരേശ്വരീം ।
കപിർമന്ദോദരീം തത്ര ശയാനാം ചാരുരൂപിണീം ॥52॥
സ താം ദൃഷ്ട്വാ മഹാബാഹുർഭൂഷിതാം മാരുതാത്മജഃ।
തർകയാമാസ സീതേതി രൂപയൗവനസമ്പദാ ।
ഹർഷേണ മഹതാ യുക്തോ നനന്ദ ഹരിയൂഥപഃ॥53॥
ആസ്ഫോടയാമാസ ചുചുംബ പുച്ഛം
	നനന്ദ ചിക്രീഡ ജഗൗ ജഗാമ ।
സ്തംഭാനരോഹന്നിപപാത ഭൂമൗ
	നിദർശയൻ സ്വാം പ്രകൃതിം കപീനാം ॥54॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ദശമഃ സർഗഃ