അഥ ദ്വാദശഃ സർഗഃ
സ തസ്യ മധ്യേ ഭവനസ്യ സംസ്ഥിതോ
	ലതാഗൃഹാംശ്ചിത്രഗൃഹാന്നിശാഗൃഹാൻ ।
ജഗാമ സീതാം പ്രതിദർശനോത്സുകോ
	ന ചൈവ താം പശ്യതി ചാരുദർശനാം ॥1॥
സ ചിന്തയാമാസ തതോ മഹാകപിഃ
	പ്രിയാമപശ്യന്രഘുനന്ദനസ്യ താം ।
ധ്രുവം ന സീതാ ധ്രിയതേ യഥാ ന മേ
	വിചിന്വതോ ദർശനമേതി മൈഥിലീ ॥2॥
സാ രാക്ഷസാനാം പ്രവരേണ ജാനകീ
	സ്വശീലസംരക്ഷണതത്പരാ സതീ ।
അനേന നൂനം പ്രതി ദുഷ്ടകർമണാ
	ഹതാ ഭവേദാര്യപഥേ പരേ സ്ഥിതാ ॥3॥
വിരൂപരൂപാ വികൃതാ വിവർചസോ
	മഹാനനാ ദീർഘവിരൂപദർശനാഃ।
സമീക്ഷ്യ താ രാക്ഷസരാജയോഷിതോ
	ഭയാദ്വിനഷ്ടാ ജനകേശ്വരാത്മജാ ॥4॥
സീതാമദൃഷ്ട്വാ ഹ്യനവാപ്യ പൗരുഷം
	വിഹൃത്യ കാലം സഹ വാനരൈശ്ചിരം ।
ന മേഽസ്തി സുഗ്രീവസമീപഗാ ഗതിഃ
	സുതീക്ഷ്ണദണ്ഡോ ബലവാംശ്ച വാനരഃ॥5॥
ദൃഷ്ടമന്തഃപുരം സർവം ദൃഷ്ടാ രാവണയോഷിതഃ।
ന സീതാ ദൃശ്യതേ സാധ്വീ വൃഥാ ജാതോ മമ ശ്രമഃ॥6॥
കിം നു മാം വാനരാഃ സർവേ ഗതം വക്ഷ്യന്തി സംഗതാഃ।
ഗത്വാ തത്ര ത്വയാ വീര കിം കൃതം തദ്വദസ്വ നഃ॥7॥
അദൃഷ്ട്വാ കിം പ്രവക്ഷ്യാമി താമഹം ജനകാത്മജാം ।
ധ്രുവം പ്രായമുപാസിഷ്യേ കാലസ്യ വ്യതിവർതനേ ॥8॥
കിം വാ വക്ഷ്യതി വൃദ്ധശ്ച ജാംബവാനംഗദശ്ച സഃ।
ഗതം പാരം സമുദ്രസ്യ വാനരാശ്ച സമാഗതാഃ॥9॥
അനിർവേദഃ ശ്രിയോ മൂലമനിർവേദഃ പരം സുഖം ।
അനിർവേദോ ഹി സതതം സർവാർഥേഷു പ്രവർതകഃ॥10॥
കരോതി സഫലം ജന്തോഃ കർമ യച്ച കരോതി സഃ।
തസ്മാദനിർവേദകരം യത്നം ചേഷ്ടേഽഹമുത്തമം ॥11॥
ഭൂയസ്തത്ര വിചേഷ്യാമി ന യത്ര വിചയഃ കൃതഃ।
അദൃഷ്ടാംശ്ച വിചേഷ്യാമി ദേശാന്രാവണപാലിതാൻ ॥12॥
ആപാനശാലാ വിചിതാസ്തഥാ പുഷ്പഗൃഹാണി ച ।
ചിത്രശാലാശ്ച വിചിതാ ഭൂയഃ ക്രീഡാഗൃഹാണി ച ॥13॥
നിഷ്കുടാന്തരരഥ്യാശ്ച വിമാനാനി ച സർവശഃ।
ഇതി സഞ്ചിന്ത്യ ഭൂയോഽപി വിചേതുമുപചക്രമേ ॥14॥
ഭൂമീഗൃഹാംശ്ചൈത്യഗൃഹാൻഗൃഹാതിഗൃഹകാനപി ।
ഉത്പതന്നിപതംശ്ചാപി തിഷ്ഠൻഗച്ഛൻപുനഃ ക്വചിത് ॥15॥
അപവൃണ്വംശ്ച ദ്വാരാണി കപാടാന്യവഘട്ടയൻ ।
പ്രവിശന്നിഷ്പതംശ്ചാപി പ്രപതന്നുത്പതന്നിവ ॥16॥
സർവമപ്യവകാശം സ വിചചാര മഹാകപിഃ।
ചതുരംഗുലമാത്രോഽപി നാവകാശഃ സ വിദ്യതേ ।
രാവണാന്തഃപുരേ തസ്മിന്യം കപിർന ജഗാമ സഃ॥17॥
പ്രാകരാന്തരവീഥ്യശ്ച വേദികശ്ചൈത്യസംശ്രയാഃ।
ശ്വഭ്രാശ്ച പുഷ്കരിണ്യശ്ച സർവം തേനാവലോകിതം ॥18॥
രാക്ഷസ്യോ വിവിധാകാരാ വിരൂപാ വികൃതാസ്തഥാ ।
ദൃഷ്ടാ ഹനുമതാ തത്ര ന തു സാ ജനകാത്മജാ ॥19॥
രൂപേണാപ്രതിമാ ലോകേ പരാ വിദ്യാധരസ്ത്രിയഃ।
ദൃഷ്ടാ ഹനുമതാ തത്ര ന തു രാഘവനന്ദിനീ ॥20॥
നാഗകന്യാ വരാരോഹാഃ പൂർണചന്ദ്രനിഭാനനാഃ।
ദൃഷ്ടാ ഹനുമതാ തത്ര ന തു സാ ജനകാത്മജാ ॥21॥
പ്രമഥ്യ രാക്ഷസേന്ദ്രേണ നാഗകന്യാ ബലാദ്ധൃതാഃ।
ദൃഷ്ടാ ഹനുമതാ തത്ര ന സാ ജനകനന്ദിനീ ॥22॥
സോഽപശ്യംസ്താം മഹാബാഹുഃ പശ്യംശ്ചാന്യാ വരസ്ത്രിയഃ।
വിഷസാദ മഹാബാഹുർഹനൂമാന്മാരുതാത്മജഃ॥23॥
ഉദ്യോഗം വാനരേന്ദ്രാണാം പ്ലവനം സാഗരസ്യ ച ।
വ്യർഥം വീക്ഷ്യാനിലസുതശ്ചിന്താം പുനരുപാഗതഃ॥24॥
അവതീര്യ വിമാനാച്ച ഹനൂമാന്മാരുതാത്മജഃ।
ചിന്താമുപജഗാമാഥ ശോകോപഹതചേതനഃ॥25॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ദ്വാദശഃ സർഗഃ