അഥ അഷ്ടാദശഃ സർഗഃ
തഥാ വിപ്രേക്ഷമാണസ്യ വനം പുഷ്പിതപാദപം ।
വിചിന്വതശ്ച വൈദേഹീം കിഞ്ചിച്ഛേഷാ നിശാഭവത് ॥1॥
ഷഡംഗവേദവിദുഷാം ക്രതുപ്രവരയാജിനാം ।
ശുശ്രാവ ബ്രഹ്മഘോഷാൻ സ വിരാത്രേ ബ്രഹ്മരക്ഷസാം ॥2॥
അഥ മംഗലവാദിത്രൈഃ ശബ്ദൈഃ ശ്രോത്രമനോഹരൈഃ।
പ്രാബോധ്യത മഹാബാഹുർദശഗ്രീവോ മഹാബലഃ॥3॥
വിബുധ്യ തു മഹാഭാഗോ രാക്ഷസേന്ദ്രഃ പ്രതാപവാൻ ।
സ്രസ്തമാല്യാംബരധരോ വൈദേഹീമന്വചിന്തയത് ॥4॥
ഭൃശം നിയുക്തസ്തസ്യാം ച മദനേന മദോത്കടഃ।
ന തു തം രാക്ഷസഃ കാമം ശശാകാത്മനി ഗൂഹിതും ॥5॥
സ സർവാഭരണൈര്യുക്തോ ബിഭ്രച്ഛ്രിയമനുത്തമാം ।
താം നഗൈർവിവിധൈർജുഷ്ടാം സർവപുഷ്പഫലോപഗൈഃ॥6॥
വൃതാം പുഷ്കരിണീഭിശ്ച നാനാപുഷ്പോപശോഭിതാം ।
സദാ മത്തൈശ്ച വിഹഗൈർവിചിത്രാം പരമാദ്ഭുതൈഃ॥7॥
ഈഹാമൃഗൈശ്ച വിവിധൈർവൃതാം ദൃഷ്ടിമനോഹരൈഃ।
വീഥീഃ സമ്പ്രേക്ഷമാണശ്ച മണികാഞ്ചനതോരണാം ॥8॥
നാനാമൃഗഗണാകീർണാം ഫലൈഃ പ്രപതിതൈർവൃതാം ।
അശോകവനികാമേവ പ്രാവിശത്സന്തതദ്രുമാം ॥9॥
അംഗനാശതമാത്രം തു തം വ്രജന്തമനുവ്രജൻ ।
മഹേന്ദ്രമിവ പൗലസ്ത്യം ദേവഗന്ധർവയോഷിതഃ॥10॥
ദീപികാഃ കാഞ്ചനീഃ കാശ്ചിജ്ജഗൃഹുസ്തത്ര യോഷിതഃ।
ബാലവ്യജനഹസ്താശ്ച താലവൃന്താനി ചാപരാഃ॥11॥
കാഞ്ചനൈശ്ചൈവ ഭൃംഗാരൈർജഹ്രുഃ സലിലമഗ്രതഃ।
മണ്ഡലാഗ്രാ ബൃസീശ്ചൈവ ഗൃഹ്യാന്യാഃ പൃഷ്ഠതോ യയുഃ॥12॥
കാചിദ്രത്നമയീം പാത്രീം പൂർണാം പാനസ്യ ഭ്രാജതീം ।
ദക്ഷിണാ ദക്ഷിണേനൈവ തദാ ജഗ്രാഹ പാണിനാ ॥13॥
രാജഹംസപ്രതീകാശം ഛത്രം പൂർണശശിപ്രഭം ।
സൗവർണദണ്ഡമപരാ ഗൃഹീത്വാ പൃഷ്ഠതോ യയൗ ॥14॥
നിദ്രാമദപരീതാക്ഷ്യോ രാവണസ്യോത്തമസ്ത്രിയഃ।
അനുജഗ്മുഃ പതിം വീരം ഘനം വിദ്യുല്ലതാ ഇവ ॥15॥
വ്യാവിദ്ധഹാരകേയൂരാഃ സമാമൃദിതവർണകാഃ।
സമാഗലിതകേശാന്താഃ സസ്വേദവദനാസ്തഥാഃ॥16॥
ഘൂർണന്ത്യോ മദശേഷേണ നിദ്രയാ ച ശുഭാനനാഃ।
സ്വേദക്ലിഷ്ടാംഗകുസുമാഃ സുമാല്യാകുലമൂർധജാഃ॥17॥
പ്രയാന്തം നൈർഋതപതിം നാര്യോ മദിരലോചനാഃ।
ബഹുമാനാച്ച കാമാച്ച പ്രിയഭാര്യാസ്തമന്വയുഃ॥18॥
സ ച കാമപരാധീനഃ പതിസ്താസാം മഹാബലഃ।
സീതാസക്തമനാ മന്ദോ മന്ദാഞ്ചിതഗതിർബഭൗ ॥19॥
തതഃ കാഞ്ചീനിനാദം ച നൂപുരാണാം ച നിഃസ്വനം ।
ശുശ്രാവ പരമസ്ത്രീണാം കപിർമാരുതനന്ദനഃ॥20॥
തം ചാപ്രതിമകർമാണമചിന്ത്യബലപൗരുഷം ।
ദ്വാരദേശമനുപ്രാപ്തം ദദർശ ഹനുമാൻ കപിഃ॥21॥
ദീപികാഭിരനേകാഭിഃ സമന്താദവഭാസിതം ।
ഗന്ധതൈലാവസിക്താഭിർധ്രിയമാണാഭിരഗ്രതഃ॥22॥
കാമദർപമദൈര്യുക്തം ജിഹ്മതാമ്രായതേക്ഷണം ।
സമക്ഷമിവ കന്ദർപമപവിദ്ധശരാസനം ॥23॥
മഥിതാമൃതഫേനാഭമരജോ വസ്ത്രമുത്തമം ।
സപുഷ്പമവകർഷന്തം വിമുക്തം സക്തമംഗദേ ॥24॥
തം പത്രവിടപേ ലീനഃ പത്രപുഷ്പശതാവൃതഃ।
സമീപമുപസങ്ക്രാന്തം വിജ്ഞാതുമുപചക്രമേ ॥25॥
അവേക്ഷമാണസ്തു തദാ ദദർശ കപികുഞ്ജരഃ।
രൂപയൗവനസമ്പന്നാ രാവണസ്യ വരസ്ത്രിയഃ॥26॥
താഭിഃ പരിവൃതോ രാജാ സുരൂപാഭിർമഹായശാഃ।
തന്മൃഗദ്വിജസംഘുഷ്ടം പ്രവിഷ്ടഃ പ്രമദാവനം ॥27॥
ക്ഷീബോ വിചിത്രാഭരണഃ ശങ്കുകർണോ മഹാബലഃ।
തേന വിശ്രവസഃ പുത്രഃ സ ദൃഷ്ടോ രാക്ഷസാധിപഃ॥28॥
വൃതഃ പരമനാരീഭിസ്താരാഭിരിവ ചന്ദ്രമാഃ।
തം ദദർശ മഹാതേജാസ്തേജോവന്തം മഹാകപിഃ॥29॥
രാവണോഽയം മഹാബാഹുരിതി സഞ്ചിന്ത്യ വാനരഃ।
സോഽയമേവ പുരാ ശേതേ പുരമധ്യേ ഗൃഹോത്തമേ ।
അവപ്ലുതോ മഹാതേജാ ഹനൂമാന്മാരുതാത്മജഃ॥30॥
സ തഥാപ്യുഗ്രതേജാഃ സ നിർധൂതസ്തസ്യ തേജസാ ।
പത്രേ ഗുഹ്യാന്തരേ സക്തോ മതിമാൻ സംവൃതോഽഭവത് ॥31॥
സ താമസിതകേശാന്താം സുശ്രോണീം സംഹതസ്തനീം ।
ദിദൃക്ഷുരസിതാപാംഗീമുപാവർതത രാവണഃ॥32॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ അഷ്ടാദശഃ സർഗഃ