അഥ വിംശഃ സർഗഃ
സ താം പരിവൃതാം ദീനാം നിരാനന്ദാം തപസ്വിനീം ।
സാകാരൈർമധുരൈർവാക്യൈർന്യദർശയത രാവണഃ॥1॥
മാം ദൃഷ്ട്വാ നാഗനാസോരുഗൂഹമാനാ സ്തനോദരം ।
അദർശനമിവാത്മാനം ഭയാന്നേതും ത്വമിച്ഛസി ॥2॥
കാമയേ ത്വാം വിശാലാക്ഷി ബഹുമന്യസ്വ മാം പ്രിയേ ।
സർവാംഗഗുണസമ്പന്നേ സർവലോകമനോഹരേ ॥3॥
നേഹ കേചിന്മനുഷ്യാ വാ രാക്ഷസാഃ കാമരൂപിണഃ।
വ്യപസർപതു തേ സീതേ ഭയം മത്തഃ സമുത്ഥിതം ॥4॥
സ്വധർമോ രക്ഷസാം ഭീരു സർവദൈവ ന സംശയഃ।
ഗമനം വാ പരസ്ത്രീണാം ഹരണം സമ്പ്രമഥ്യ വാ ॥5॥
ഏവം ചൈവമകാമാം ത്വാം ന ച സ്പ്രക്ഷ്യാമി മൈഥിലി ।
കാമം കാമഃ ശരീരേ മേ യഥാകാമം പ്രവർതതാം ॥6॥
ദേവി നേഹ ഭയം കാര്യം മയി വിശ്വസിഹി പ്രിയേ ।
പ്രണയസ്വ ച തത്ത്വേന മൈവം ഭൂഃ ശോകലാലസാ ॥7॥
ഏകവേണീ ധരാശയ്യാ ധ്യാനം മലിനമംബരം ।
അസ്ഥാനേഽപ്യുപവാസശ്ച നൈതാന്യൗപയികാനി തേ ॥8॥
വിചിത്രാണി ച മാല്യാനി ചന്ദനാന്യഗരൂണി ച ।
വിവിധാനി ച വാസാംസി ദിവ്യാന്യാഭരണാനി ച ॥9॥
മഹാർഹാണി ച പാനാനി ശയനാന്യാസനാനി ച ।
ഗീതം നൃത്യം ച വാദ്യം ച ലഭ മാം പ്രാപ്യ മൈഥിലി ॥10॥
സ്ത്രീരത്നമസി മൈവം ഭൂഃ കുരു ഗാത്രേഷു ഭൂഷണം ।
മാം പ്രാപ്യ ഹി കഥം വാ സ്യാസ്ത്വമനർഹാ സുവിഗ്രഹേ ॥11॥
ഇദം തേ ചാരു സഞ്ജാതം യൗവനം ഹ്യതിവർതതേ ।
യദതീതം പുനർനൈതി സ്രോതഃ സ്രോതസ്വിനാമിവ ॥12॥
ത്വാം കൃത്വോപരതോ മന്യേ രൂപകർതാ സ വിശ്വകൃത് ।
നഹി രൂപോപമാ ഹ്യന്യാ തവാസ്തി ശുഭദർശനേ ॥13॥
ത്വാം സമാസാദ്യ വൈദേഹി രൂപയൗവനശാലിനീം ।
കഃ പുനർനാതിവർതേത സാക്ഷാദപി പിതാമഹഃ॥14॥
യദ്യത്പശ്യാമി തേ ഗാത്രം ശീതാംശുസദൃശാനനേ ।
തസ്മിംസ്തസ്മിൻപൃഥുശ്രോണി ചക്ഷുർമമ നിബധ്യതേ ॥15॥
ഭവ മൈഥിലി ഭാര്യാ മേ മോഹമേതം വിസർജയ ।
ബഹ്വീനാമുത്തമസ്ത്രീണാം മമാഗ്രമഹിഷീ ഭവ ॥16॥
ലോകേഭ്യോ യാനി രത്നാനി സമ്പ്രമഥ്യാഹൃതാനി മേ ।
താനി തേ ഭീരു സർവാണി രാജ്യം ചൈവ ദദാമി തേ ॥17॥
വിജിത്യ പൃഥിവീം സർവാം നാനാനഗരമാലിനീം
ജനകായ പ്രദാസ്യാമി തവ ഹേതോർവിലാസിനി ॥18॥
നേഹ പശ്യാമി ലോകേഽന്യം യോ മേ പ്രതിബലോ ഭവേത് ।
പശ്യ മേ സുമഹദ്വീര്യമപ്രതിദ്വന്ദ്വമാഹവേ ॥19॥
അസകൃത്സംയുഗേ ഭഗ്നാ മയാ വിമൃദിതധ്വജാഃ।
അശക്താഃ പ്രത്യനീകേഷു സ്ഥാതും മമ സുരാസുരാഃ॥20॥
ഇച്ഛ മാം ക്രിയതാമദ്യ പ്രതികർമ തവോത്തമം ।
സുപ്രഭാണ്യവസജ്ജന്താം തവാംഗേ ഭൂഷണാനി ഹി ॥21॥
സാധു പശ്യാമി തേ രൂപം സുയുക്തം പ്രതികർമണാ ।
പ്രതികർമാഭിസംയുക്താ ദാക്ഷിണ്യേന വരാനനേ ॥22॥
ഭുങ്ക്ഷ്വ ഭോഗാന്യഥാകാമം പിബ ഭീരു രമസ്വ ച ।
യഥേഷ്ടം ച പ്രയച്ഛ ത്വം പൃഥിവീം വാ ധനാനി ച ॥23॥
ലലസ്വ മയി വിസ്രബ്ധാ ധൃഷ്ടമാജ്ഞാപയസ്വ ച ।
മത്പ്രസാദാല്ലലന്ത്യാശ്ച ലലതാം ബാന്ധവസ്തവ ॥24॥
ഋദ്ധിം മമാനുപശ്യ ത്വം ശ്രിയം ഭദ്രേ യശസ്വിനി ।
കിം കരിഷ്യസി രാമേണ സുഭഗേ ചീരവാസിനാ ॥25॥
നിക്ഷിപ്തവിജയോ രാമോ ഗതശ്രീർവനഗോചരഃ।
വ്രതീ സ്ഥണ്ഡിലശായീ ച ശങ്കേ ജീവതി വാ ന വാ ॥26॥
ന ഹി വൈദേഹി രാമസ്ത്വാം ദ്രഷ്ടും വാപ്യുപലഭ്യതേ ।
പുരോ ബലാകൈരസിതൈർമേഘൈർജ്യോത്സ്നാമിവാവൃതാം ॥27॥
ന ചാപി മമ ഹസ്താത്ത്വാം പ്രാപ്തുമർഹതി രാഘവഃ।
ഹിരണ്യകശിപുഃ കീർതിമിന്ദ്രഹസ്തഗതാമിവ ॥28॥
ചാരുസ്മിതേ ചാരുദതി ചാരുനേത്രേ വിലാസിനി ।
മനോ ഹരസി മേ ഭീരു സുപർണഃ പന്നഗം യഥാ ॥29॥
ക്ലിഷ്ടകൗശേയവസനാം തന്വീമപ്യനലങ്കൃതാം ।
ത്വാം ദൃഷ്ട്വാ സ്വേഷു ദാരേഷു രതിം നോപലഭാമ്യഹം ॥30॥
അന്തഃപുരനിവാസിന്യഃ സ്ത്രിയഃ സർവഗുണാന്വിതാഃ।
യാവത്യോ മമ സർവാസാമൈശ്വര്യം കുരു ജാനകി ॥31॥
മമ ഹ്യസിതകേശാന്തേ ത്രൈലോക്യപ്രവരസ്ത്രിയഃ।
താസ്ത്വാം പരിചരിഷ്യന്തി ശ്രിയമപ്സരസോ യഥാ ॥32॥
യാനി വൈശ്രവണേ സുഭ്രു രത്നാനി ച ധനാനി ച ।
താനി ലോകാംശ്ച സുശ്രോണി മയാ ഭുങ്ക്ഷ്വ യഥാസുഖം ॥33॥
ന രാമസ്തപസാ ദേവി ന ബലേന ച വിക്രമൈഃ।
ന ധനേന മയാ തുല്യസ്തേജസാ യശസാപി വാ ॥34॥
പിബ വിഹര രമസ്വ ഭുങ്ക്ഷ്വ ഭോഗാൻ
	ധനനിചയം പ്രദിശാമി മേദിനീം ച ।
മയി ലല ലലനേ യഥാസുഖം ത്വം
	ത്വയി ച സമേത്യ ലലന്തു ബാന്ധവാസ്തേ ॥35॥
കുസുമിതതരുജാലസന്തതാനി
	ഭ്രമരയുതാനി സമുദ്രതീരജാനി ।
കനകവിമലഹാരഭൂഷിതാംഗീ
	വിഹര മയാ സഹ ഭീരു കാനനാനി ॥36॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ വിംശഃ സർഗഃ