അഥ ത്രയോവിംശഃ സർഗഃ
ഇത്യുക്ത്വാ മൈഥിലീം രാജാ രാവണഃ ശത്രുരാവണഃ।
സന്ദിശ്യ ച തതഃ സർവാ രാക്ഷസീർനിർജഗാമ ഹ ॥1॥
നിഷ്ക്രാന്തേ രാക്ഷസേന്ദ്രേ തു പുനരന്തഃപുരം ഗതേ ।
രാക്ഷസ്യോ ഭീമരൂപാസ്താഃ സീതാം സമഭിദുദ്രുവുഃ॥2॥
തതഃ സീതാമുപാഗമ്യ രാക്ഷസ്യഃ ക്രോധമൂർഛിതാഃ।
പരം പരുഷയാ വാചാ വൈദേഹീമിദമബ്രുവൻ ॥3॥
പൗലസ്ത്യസ്യ വരിഷ്ഠസ്യ രാവണസ്യ മഹാത്മനഃ।
ദശഗ്രീവസ്യ ഭാര്യാത്വം സീതേ ന ബഹു മന്യസേ ॥4॥
തതസ്ത്വേകജടാ നാമ രാക്ഷസീ വാക്യമബ്രവീത് ।
ആമന്ത്ര്യ ക്രോധതാമ്രാക്ഷീ സീതാം കരതലോദരീം ॥5॥
പ്രജാപതീനാം ഷണ്ണാം തു ചതുർഥോഽയം പ്രജാപതിഃ।
മാനസോ ബ്രഹ്മണഃ പുത്രഃ പുലസ്ത്യ ഇതി വിശ്രുതഃ॥6॥
പുലസ്ത്യസ്യ തു തേജസ്വീ മഹർഷിർമാനസഃ സുതഃ।
നാമ്നാ സ വിശ്രവാ നാമ പ്രജാപതിസമപ്രഭഃ॥7॥
തസ്യ പുത്രോ വിശാലാക്ഷി രാവണഃ ശത്രുരാവണഃ।
തസ്യ ത്വം രാക്ഷസേന്ദ്രസ്യ ഭാര്യാ ഭവിതുമർഹസി ॥8॥
മയോക്തം ചാരുസർവാംഗി വാക്യം കിം നാനുമന്യസേ ।
തതോ ഹരിജടാ നാമ രാക്ഷസീ വാക്യമബ്രവീത് ॥9॥
വിവൃത്യ നയനേ കോപാന്മാർജാരസദൃശേക്ഷണാ ।
യേന ദേവാസ്ത്രയസ്ത്രിംശദ്ദേവരാജശ്ച നിർജിതഃ॥10॥
തസ്യ ത്വം രാക്ഷസേന്ദ്രസ്യ ഭാര്യാ ഭവിതുമർഹസി ।
വീര്യോത്സിക്തസ്യ ശൂരസ്യ സംഗ്രാമേഷ്വനിവർതിനഃ।
ബലിനോ വീര്യയുക്തസ്യ ഭാര്യാ ത്വം കിം ന ലിപ്സസേ ॥11॥
പ്രിയാം ബഹുമതാം ഭാര്യാം ത്യക്ത്വാ രാജാ മഹാബലഃ।
സർവാസാം ച മഹാഭാഗാം ത്വാമുപൈഷ്യതി രാവണഃ॥12॥
സമൃദ്ധം സ്ത്രീസഹസ്രേണ നാനാരത്നോപശോഭിതം ।
അന്തഃപുരം തദുത്സൃജ്യ ത്വാമുപൈഷ്യതി രാവണഃ॥13॥
അന്യാ തു വികടാ നാമ രാക്ഷസീ വാക്യമബ്രവീത് ।
അസകൃദ് ഭീമവീര്യേണ നാഗാ ഗന്ധർവദാനവാഃ।
നിർജിതാഃ സമരേ യേന സ തേ പാർശ്വമുപാഗതഃ॥14॥
തസ്യ സർവസമൃദ്ധസ്യ രാവണസ്യ മഹാത്മനഃ।
കിമർഥം രാക്ഷസേന്ദ്രസ്യ ഭാര്യാത്വം നേച്ഛസേഽധമേ ॥15॥
തതസ്താം ദുർമുഖീ നാമ രാക്ഷസീ വാക്യമബ്രവീത് ।
യസ്യ സൂര്യോ ന തപതി ഭീതോ യസ്യ സ മാരുതഃ।
ന വാതി സ്മായതാപാംഗി കിം ത്വം തസ്യ ന തിഷ്ഠസേ ॥16॥
പുഷ്പവൃഷ്ടിം ച തരവോ മുമുചുര്യസ്യ വൈ ഭയാത് ।
ശൈലാഃ സുസ്ത്രുവുഃ പാനീയം ജലദാശ്ച യദേച്ഛതി ॥17॥
തസ്യ നൈരൃതരാജസ്യ രാജരാജസ്യ ഭാമിനി ।
കിം ത്വം ന കുരുഷേ ബുദ്ധിം ഭാര്യാർഥേ രാവണസ്യ ഹി ॥18॥
സാധു തേ തത്ത്വതോ ദേവി കഥിതം സാധു ഭാമിനി ।
ഗൃഹാണ സുസ്മിതേ വാക്യമന്യഥാ ന ഭവിഷ്യസി ॥19॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ത്രയോവിംശഃ സർഗഃ