അഥ ഏകോനത്രിംശഃ സർഗഃ
തഥാഗതാം താം വ്യഥിതാമനിന്ദിതാം
	വ്യപേതഹർഷാം പരിദീനമാനസാം ।
ശുഭാം നിമിത്താനി ശുഭാനി ഭേജിരേ
	നരം ശ്രിയാ ജുഷ്ടമിവോപജീവിനഃ॥1॥
തസ്യാഃ ശുഭം വാമമരാലപക്ഷ്മ
	രാജീവൃതം കൃഷ്ണവിശാലശുക്ലം ।
പ്രാസ്പന്ദതൈകം നയനം സുകേശ്യാ
	മീനാഹതം പദ്മമിവാഭിതാമ്രം ॥2॥
ഭുജശ്ച ചാർവഞ്ചിതപീനവൃത്തഃ
	പരാർധ്യകാലാഗുരുചന്ദനാർഹഃ।
അനുത്തമേനാധ്യുഷിതഃ പ്രിയേണ
	ചിരേണ വാമഃ സമവേപതാശു ॥3॥
ഗജേന്ദ്രഹസ്തപ്രതിമശ്ച പീന-
	സ്തയോർദ്വയോഃ സംഹതയോസ്തു ജാതഃ।
പ്രസ്പന്ദമാനഃ പുനരൂരുരസ്യാ
	രാമം പുരസ്താത്സ്ഥിതമാചചക്ഷേ ॥4॥
ശുഭം പുനർഹേമസമാനവർണ-
	മീഷദ്രജോധ്വസ്തമിവാമലാക്ഷ്യാഃ ।
വാസഃ സ്ഥിതായാഃശിഖരാഗ്രദന്ത്യാഃ
	കിഞ്ചിത്പരിസ്രംസത ചാരുഗാത്ര്യാഃ॥5॥
ഏതൈർനിമിത്തൈരപരൈശ്ച സുഭ്രൂഃ
	സഞ്ചോദിതാ പ്രാഗപി സാധുസിദ്ധൈഃ।
വാതാതപക്ലാന്തമിവ പ്രണഷ്ടം
	വർഷേണ ബീജം പ്രതിസഞ്ജഹർഷ ॥6॥
തസ്യാഃ പുനർബിംബഫലാധരോഷ്ഠം
	സ്വക്ഷിഭ്രുകേശാന്തമരാലപക്ഷ്മ ।
വക്ത്രം ബഭാസേ സ്മിതശുക്ലദംഷ്ട്രം
	രാഹോർമുഖാച്ചന്ദ്ര ഇവ പ്രമുക്തഃ॥7॥
സാ വീതശോകാ വ്യപനീതതന്ദ്രീ
	ശാന്തജ്വരാ ഹർഷവിവൃദ്ധസത്ത്വാ ।
അശോഭതാര്യാ വദനേന ശുക്ലേ
	ശീതാംശുനാ രാത്രിരിവോദിതേന ॥8॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഏകോനത്രിംശഃ സർഗഃ