അഥ ദ്വാത്രിംശഃ സർഗഃ
തതഃ ശാഖാന്തരേ ലീനം ദൃഷ്ട്വാ ചലിതമാനസാ ।
വേഷ്ടിതാർജുനവസ്ത്രം തം വിദ്യുത്സംഘാതപിംഗലം ॥1॥
സാ ദദർശ കപിം തത്ര പ്രശ്രിതം പ്രിയവാദിനം ।
ഫുല്ലാശോകോത്കരാഭാസം തപ്തചാമീകരേക്ഷണം ॥2॥
സാഥ ദൃഷ്ട്വാ ഹരിശ്രേഷ്ഠം വിനീതവദവസ്ഥിതം ।
മൈഥിലീ ചിന്തയാമാസ വിസ്മയം പരമം ഗതാ ॥3॥
അഹോ ഭീമമിദം സത്ത്വം വാനരസ്യ ദുരാസദം ।
ദുർനിരീക്ഷ്യമിദം മത്വാ പുനരേവ മുമോഹ സാ ॥4॥
വിലലാപ ഭൃശം സീതാ കരുണം ഭയമോഹിതാ ।
രാമ രാമേതി ദുഃഖാർതാ ലക്ഷ്മണേതി ച ഭാമിനീ ॥5॥
രുരോദ സഹസാ സീതാ മന്ദമന്ദസ്വരാ സതീ ।
സാഥ ദൃഷ്ട്വാ ഹരിവരം വിനീതവദുപാഗതം ।
മൈഥിലീ ചിന്തയാമാസ സ്വപ്നോഽയമിതി ഭാമിനീ ॥6॥
സാ വീക്ഷമാണാ പൃഥുഭുഗ്നവക്ത്രം
	ശാഖാമൃഗേന്ദ്രസ്യ യഥോക്തകാരം ।
ദദർശ പിംഗപ്രവരം മഹാർഹം
	വാതാത്മജം ബുദ്ധിമതാം വരിഷ്ഠം ॥7॥
സാ തം സമീക്ഷ്യൈവ ഭൃശം വിപന്നാ
	ഗതാസുകല്പേവ ബഭൂവ സീതാ ।
ചിരേണ സഞ്ജ്ഞാം പ്രതിലഭ്യ ചൈവം
	വിചിന്തയാമാസ വിശാലനേത്രാ ॥8॥
സ്വപ്നോ മയായം വികൃതോഽദ്യ ദൃഷ്ടഃ
	ശാഖാമൃഗഃ ശാസ്ത്രഗണൈർനിഷിദ്ധഃ।
സ്വസ്ത്യസ്തു രാമായ സ ലക്ഷ്മണായ
	തഥാ പിതുർമേ ജനകസ്യ രാജ്ഞഃ॥9॥
സ്വപ്നോ ഹി നായം നഹി മേഽസ്തി നിദ്രാ
	ശോകേന ദുഃഖേന ച പീഡിതായാഃ।
സുഖം ഹി മേ നാസ്തി യതോ വിഹീനാ
	തേനേന്ദുപൂർണപ്രതിമാനനേന ॥10॥
രാമേതി രാമേതി സദൈവ ബുദ്ധ്യാ
	വിചിന്ത്യ വാചാ ബ്രുവതീ തമേവ ।
തസ്യാനുരൂപം ച കഥാം തദർഥ-
	മേവം പ്രപശ്യാമി തഥാ ശൃണോമി ॥11॥
അഹം ഹി തസ്യാദ്യ മനോഭവേന
	സമ്പീഡിതാ തദ്ഗതസർവഭാവാ ।
വിചിന്തയന്തീ സതതം തമേവ
	തഥൈവ പശ്യാമി തഥാ ശൃണോമി ॥12॥
മനോരഥഃ സ്യാദിതി ചിന്തയാമി
	തഥാപി ബുദ്ധ്യാപി വിതർകയാമി ।
കിം കാരണം തസ്യ ഹി നാസ്തി
	രൂപം സുവ്യക്തരൂപശ്ച വദത്യയം മാം ॥13॥
നമോഽസ്തു വാചസ്പതയേ സവജ്രിണേ
	സ്വയംഭുവേ ചൈവ ഹുതാശനായ ।
അനേന ചോക്തം യദിദം മമാഗ്രതോ
	വനൗകസാ തച്ച തഥാസ്തു നാന്യഥാ ॥14॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ദ്വാത്രിംശഃ സർഗഃ