അഥ ഷട്ത്രിംശഃ സർഗഃ
ഭൂയ ഏവ മഹാതേജാ ഹനൂമാൻ പവനാത്മജഃ।
അബ്രവീത് പ്രശ്രിതം വാക്യം സീതാപ്രത്യയകാരണാത് ॥1॥
വാനരോഽഹം മഹാഭാഗേ ദൂതോ രാമസ്യ ധീമതഃ।
രാമനാമാങ്കിതം ചേദം പശ്യ ദേവ്യംഗുലീയകം ॥2॥
പ്രത്യയാർഥം തവാനീതം തേന ദത്തം മഹാത്മനാ ।
സമാശ്വസിഹി ഭദ്രം തേ ക്ഷീണദുഃഖഫലാ ഹ്യസി ॥3॥
ഗൃഹീത്വാ പ്രേക്ഷമാണാ സാ ഭർതുഃ കരവിഭൂഷിതം ।
ഭർതാരമിവ സമ്പ്രാപ്തം ജാനകീ മുദിതാഭവത് ॥4॥
ചാരു തദ്വദനം തസ്യാസ്താമ്രശുക്ലായതേക്ഷണം ।
ബഭൂവ ഹർഷോദഗ്രം ച രാഹുമുക്ത ഇവോഡുരാട് ॥5॥
തതഃ സാ ഹ്രീമതീ ബാലാ ഭർതുഃ സന്ദേശഹർഷിതാ ।
പരിതുഷ്ടാ പ്രിയം കൃത്വാ പ്രശശംസ മഹാകപിം ॥6॥
വിക്രാന്തസ്ത്വം സമർഥസ്ത്വം പ്രാജ്ഞസ്ത്വം വാനരോത്തമ ।
യേനേദം രാക്ഷസപദം ത്വയൈകേന പ്രധർഷിതം ॥7॥
ശതയോജനവിസ്തീർണഃ സാഗരോ മകരാലയഃ।
വിക്രമശ്ലാഘനീയേന ക്രമതാ ഗോഷ്പദീകൃതഃ॥8॥
നഹി ത്വാം പ്രാകൃതം മന്യേ വാനരം വാനരർഷഭ ।
യസ്യ തേ നാസ്തി സന്ത്രാസോ രാവണാദപി സംഭ്രമഃ॥9॥
അർഹസേ ച കപിശ്രേഷ്ഠ മയാ സമഭിഭാഷിതും ।
യദ്യസി പ്രേഷിതസ്തേന രാമേണ വിദിതാത്മനാ ॥10॥
പ്രേഷയിഷ്യതി ദുർധർഷോ രാമോ നഹ്യപരീക്ഷിതം ।
പരാക്രമമവിജ്ഞായ മത്സകാശം വിശേഷതഃ॥11॥
ദിഷ്ട്യാ ച കുശലീ രാമോ ധർമാത്മാ സത്യസഗംരഃ।
ലക്ഷ്മണശ്ച മഹാതേജാഃ സുമിത്രാനന്ദവർധനഃ॥12॥
കുശലീ യദി കാകുത്സ്ഥഃ കിം ന സാഗരമേഖലാം ।
മഹീം ദഹതി കോപേന യുഗാന്താഗ്നിരിവോത്ഥിതഃ॥13॥
അഥവാ ശക്തിമന്തൗ തൗ സുരാണാമപി നിഗ്രഹേ ।
മമൈവ തു ന ദുഃഖാനാമസ്തി മന്യേ വിപര്യയഃ॥14॥
കച്ചിന്ന വ്യഥതേ രാമഃ കച്ചിന്ന പരിതപ്യതേ ।
ഉത്തരാണി ച കാര്യാണി കുരുതേ പുരുഷോത്തമഃ॥15॥
കച്ചിന്ന ദീനഃ സംഭ്രാന്തഃ കാര്യേഷു ച ന മുഹ്യതി ।
കച്ചിത് പുരുഷകാര്യാണി കുരുതേ നൃപതേഃ സുതഃ॥16॥
ദ്വിവിധം ത്രിവിധോപായമുപായമപി സേവതേ ।
വിജിഗീഷുഃ സുഹൃത് കച്ചിന്മിത്രേഷു ച പരന്തപഃ॥17॥
കച്ചിന്മിത്രാണി ലഭതേ മിത്രൈശ്ചാപ്യഭിഗമ്യതേ ।
കച്ചിത്കല്യാണമിത്രശ്ച മിത്രൈശ്ചാപി പുരസ്കൃതഃ॥18॥
കച്ചിദാശാസ്തി ദേവാനാം പ്രസാദം പാർഥിവാത്മജഃ।
കച്ചിത്പുരുഷകാരം ച ദൈവം ച പ്രതിപദ്യതേ ॥19॥
കച്ചിന്ന വിഗതസ്നേഹോ വിവാസാന്മയി രാഘവഃ।
കച്ചിന്മാം വ്യസനാദസ്മാന്മോക്ഷയിഷ്യതി രാഘവഃ॥20॥
സുഖാനാമുചിതോ നിത്യമസുഖാനാമനൂചിതഃ।
ദുഃഖമുത്തരമാസാദ്യ കച്ചിദ്രാമോ ന സീദതി ॥21॥
കൗസല്യായാസ്തഥാ കച്ചിത്സുമിത്രായാസ്തഥൈവ ച ।
അഭീക്ഷ്ണം ശ്രൂയതേ കച്ചിത്കുശലം ഭരതസ്യ ച ॥22॥
മന്നിമിത്തേന മാനാർഹഃ കച്ചിച്ഛോകേന രാഘവഃ।
കച്ചിന്നാന്യമനാ രാമഃ കച്ചിന്മാം താരയിഷ്യതി ॥23॥
കച്ചിദക്ഷൗഹിണീം ഭീമാം ഭരതോ ഭ്രാതൃവത്സലഃ।
ധ്വജിനീം മന്ത്രിഭിർഗുപ്താം പ്രേഷയിഷ്യതി മത്കൃതേ ॥24॥
വാനരാധിപതിഃ ശ്രീമാൻ സുഗ്രീവഃ കച്ചിദേഷ്യതി ।
മത്കൃതേ ഹരിഭിർവീരൈർവൃതോ ദന്തനഖായുധൈഃ॥25॥
കച്ചിച്ച ലക്ഷ്മണഃ ശൂരഃ സുമിത്രാനന്ദവർധനഃ।
അസ്ത്രവിച്ഛരജാലേന രാക്ഷസാന്വിധമിഷ്യതി ॥26॥
രൗദ്രേണ കച്ചിദസ്ത്രേണ രാമേണ നിഹതം രണേ ।
ദ്രക്ഷ്യാമ്യല്പേന കാലേന രാവണം സസുഹൃജ്ജനം ॥27॥
കച്ചിന്ന തദ്ധേമസമാനവർണം
	തസ്യാനനം പദ്മസമാനഗന്ധി ।
മയാ വിനാ ശുഷ്യതി ശോകദീനം
	ജലക്ഷയേ പദ്മമിവാതപേന ॥28॥
ധർമാപദേശാത്ത്യജതഃ സ്വരാജ്യം
	മാം ചാപ്യരണ്യം നയതഃ പദാതേഃ।
നാസീദ്വ്യഥാ യസ്യ ന ഭീർന ശോകഃ
	കച്ചിത്സ ധൈര്യം ഹൃദയേ കരോതി ॥29॥
ന ചാസ്യ മാതാ ന പിതാ ന ചാന്യഃ
	സ്നേഹാദ്വിശിഷ്ടോഽസ്തി മയാ സമോ വാ ।
താവദ്ധ്യഹം ദൂത ജിജീവിഷേയം
	യാവത്പ്രവൃത്തിം ശൃണുയാം പ്രിയസ്യ ॥30॥
ഇതീവ ദേവീ വചനം മഹാർഥം
	തം വാനരേന്ദ്രം മധുരാർഥമുക്ത്വാ ।
ശ്രോതും പുനസ്തസ്യ വചോഽഭിരാമം
	രാമാർഥയുക്തം വിരരാമ രാമാ ॥31॥
സീതായാ വചനം ശ്രുത്വാ മാരുതിർഭീമവിക്രമഃ।
ശിരസ്യഞ്ജലിമാധായ വാക്യമുത്തരമബ്രവീത് ॥32॥
ന ത്വാമിഹസ്ഥാം ജാനീതേ രാമഃ കമലലോചനഃ।
തേന ത്വാം നാനയത്യാശു ശചീമിവ പുരന്ദരഃ॥33॥
ശ്രുത്വൈവ തു വചോ മഹ്യം ക്ഷിപ്രമേഷ്യതി രാഘവഃ।
ചമൂം പ്രകർഷന്മഹതീം ഹര്യൃക്ഷഗണസംയുതാം ॥34॥
വിഷ്ടംഭയിത്വാ ബാണൗഘൈരക്ഷോഭ്യം വരുണാലയം ।
കരിഷ്യതി പുരീം ലങ്കാം കാകുത്സ്ഥഃ ശാന്തരാക്ഷസാം ॥35॥
തത്ര യദ്യന്തരാ മൃത്യുര്യദി ദേവാഃ മഹാസുരാഃ।
സ്ഥാസ്യന്തി പഥി രാമസ്യ സ താനപി വധിഷ്യതി ॥36॥
തവാദർശനജേനാര്യേ ശോകേന പരിപൂരിതഃ।
ന ശർമ ലഭതേ രാമഃ സിംഹാർദിത ഇവ ദ്വിപഃ॥37॥
മന്ദരേണ ച തേ ദേവി ശപേ മൂലഫലേന ച ।
മലയേന ച വിന്ധ്യേന മേരുണാ ദർദുരേണ ച ॥38॥
യഥാ സുനയനം വൽഗു ബിംബോഷ്ഠം ചാരുകുണ്ഡലം ।
മുഖം ദ്രക്ഷ്യസി രാമസ്യ പൂർണചന്ദ്രമിവോദിതം ॥39॥
ക്ഷിപ്രം ദ്രക്ഷ്യസി വൈദേഹി രാമം പ്രസ്രവണേ ഗിരൗ ।
ശതക്രതുമിവാസീനം നാകപൃഷ്ഠസ്യ മൂർധനി ॥40॥
ന മാംസം രാഘവോ ഭുങ്ക്തേ ന ചൈവ മധുസേവതേ ।
വന്യം സുവിഹിതം നിത്യം ഭക്തമശ്നാതി പഞ്ചമം ॥41॥
നൈവ ദംശാന്ന മശകാന്ന കീടാന്ന സരീസൃപാൻ ।
രാഘവോഽപനയേദ്ഗത്രാത്ത്വദ്ഗതേനാന്തരാത്മനാ ॥42॥
നിത്യം ധ്യാനപരോ രാമോ നിത്യം ശോകപരായണഃ।
നാന്യച്ചിന്തയതേ കിഞ്ചിത്സ തു കാമവശം ഗതഃ॥43॥
അനിദ്രഃ സതതം രാമഃ സുപ്തോഽപി ച നരോത്തമഃ।
സീതേതി മധുരാം വാണീം വ്യാഹരൻപ്രതിബുധ്യതേ ॥44॥
ദൃഷ്ട്വാ ഫലം വാ പുഷ്പം വാ യച്ചാന്യത്സ്ത്രീമനോഹരം ।
ബഹുശോ ഹാ പ്രിയേത്യേവം ശ്വസംസ്ത്വാമഭിഭാഷതേ ॥45॥
സ ദേവി നിത്യം പരിതപ്യമാനഃ
	ത്വാമേവ സീതേത്യഭിഭാഷമാണഃ।
ധൃതവ്രതോ രാജസുതോ മഹാത്മാ
	തവൈവ ലാഭായ കൃതപ്രയത്നഃ॥46॥
സാ രാമസങ്കീർതനവീതശോകാ
	രാമസ്യ ശോകേന സമാനശോകാ ।
ശരന്മുഖേനാംബുദശേഷചന്ദ്രാ
	നിശേവ വൈദേഹസുതാ ബഭൂവ ॥45॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഷട്ത്രിംശഃ സർഗഃ