അഥ ചത്വാരിംശഃ സർഗഃ
ശ്രുത്വാ തു വചനം തസ്യ വായുസൂനോർമഹാത്മനഃ।
ഉവാചാത്മഹിതം വാക്യം സീതാ സുരസുതോപമാ ॥1॥
ത്വാം ദൃഷ്ട്വാ പ്രിയവക്താരം സമ്പ്രഹൃഷ്യാമി വാനര ।
അർധസഞ്ജാതസസ്യേവ വൃഷ്ടിം പ്രാപ്യ വസുന്ധരാ ॥2॥
യഥാ തം പുരുഷവ്യാഘ്രം ഗാത്രൈഃ ശോകാഭികർശിതൈഃ।
സംസ്പൃശേയം സകാമാഹം തഥാ കുരു ദയാം മയി ॥3॥
അഭിജ്ഞാനം ച രാമസ്യ ദദ്യാ ഹരിഗണോത്തമ ।
ക്ഷിപ്താമിഷികാം കാകസ്യ കോപാദേകാക്ഷിശാതനീം ॥4॥
മനഃശിലായാസ്തിലകോ ഗണ്ഡപാർശ്വേ നിവേശിതഃ।
ത്വയാ പ്രണഷ്ടേ തിലകേ തം കില സ്മർതുമർഹസി ॥5॥
സ വീര്യവാൻ കഥം സീതാം ഹൃതാം സമനുമന്യസേ ।
വസന്തീം രക്ഷസാം മധ്യേ മഹേന്ദ്രവരുണോപമ ॥6॥
ഏഷ ചൂഡാമണിർദിവ്യോ മയാ സുപരിരക്ഷിതഃ।
ഏതം ദൃഷ്ട്വാ പ്രഹൃഷ്യാമി വ്യസനേ ത്വാമിവാനഘ ॥7॥
ഏഷ നിര്യാതിതഃ ശ്രീമാൻ മയാ തേ വാരിസംഭവഃ।
അതഃ പരം ന ശക്ഷ്യാമി ജീവിതും ശോകലാലസാ ॥8॥
അസഹ്യാനി ച ദുഃഖാനി വാചശ്ച ഹൃദയച്ഛിദഃ।
രാക്ഷസൈഃ സഹ സംവാസം ത്വത്കൃതേ മർഷയാമ്യഹം ॥9॥
ധാരയിഷ്യാമി മാസം തു ജീവിതം ശത്രുസൂദന ।
മാസാദൂർധ്വം ന ജീവിഷ്യേ ത്വയാ ഹീനാ നൃപാത്മജ ॥10॥
ഘോരോ രാക്ഷസരാജോഽയം ദൃഷ്ടിശ്ച ന സുഖാ മയി ।
ത്വാം ച ശ്രുത്വാ വിഷജ്ജന്തം ന ജീവേയമപി ക്ഷണം ॥11॥
വൈദേഹ്യാ വചനം ശ്രുത്വാ കരുണം സാശ്രുഭാഷിതം ।
അഥാബ്രവീന്മഹാതേജാ ഹനുമാന്മാരുതാത്മജഃ॥12॥
ത്വച്ഛോകവിമുഖോ രാമോ ദേവി സത്യേന തേ ശപേ ।
രാമേ ശോകാഭിഭൂതേ തു ലക്ഷ്മണഃ പരിതപ്യതേ ॥13॥
ദൃഷ്ടാ കഥഞ്ചിദ്ഭവതീ ന കാലഃ പരിദേവിതും ।
ഇമം മുഹൂർതം ദുഃഖാനാമന്തം ദ്രക്ഷ്യസി ഭാമിനി ॥14॥
താവുഭൗ പുരുഷവ്യാഘ്രൗ രാജപുത്രാവനിന്ദിതൗ ।
ത്വദ്ദർശനകൃതോത്സാഹൗ ലങ്കാം ഭസ്മീകരിഷ്യതഃ॥15॥
ഹത്വാ തു സമരേ രക്ഷോ രാവണം സഹബാന്ധവൈഃ।
രാഘവൗ ത്വാം വിശാലാക്ഷി സ്വാം പുരീം പ്രതി നേഷ്യതഃ॥16॥
യത്തു രാമോ വിജാനീയാദഭിജ്ഞാനമനിന്ദിതേ ।
പ്രീതിസഞ്ജനനം ഭൂയസ്തസ്യ ത്വം ദാതുമർഹസി ॥17॥
സാബ്രവീദ്ദത്തമേവാഹോ മയാഭിജ്ഞാനമുത്തമം ।
ഏതദേവ ഹി രാമസ്യ ദൃഷ്ട്വാ യത്നേന ഭൂഷണം ॥18॥
ശ്രദ്ധേയം ഹനുമന്വാക്യം തവ വീര ഭവിഷ്യതി ।
സ തം മണിവരം ഗൃഹ്യ ശ്രീമാൻപ്ലവഗസത്തമഃ॥19॥
പ്രണമ്യ ശിരസാ ദേവീം ഗമനായോപചക്രമേ ।
തമുത്പാതകൃതോത്സാഹമവേക്ഷ്യ ഹരിയൂഥപം ॥20॥
വർധമാനം മഹാവേഗമുവാച ജനകാത്മജാ ।
അശ്രുപൂർണമുഖീ ദീനാ ബാഷ്പഗദ്ഗദയാ ഗിരാ ॥21॥
ഹനൂമൻസിംഹസങ്കാശൗ ഭ്രാതരൗ രാമലക്ഷ്മണൗ ।
സുഗ്രീവം ച സഹാമാത്യം സർവാൻബ്രൂയാ അനാമയം ॥22॥
യഥാ ച സ മഹാബാഹുർമാം താരയതി രാഘവഃ।
അസ്മാദ്ദുഃഖാംബുസംരോധാത് ത്വം സമാധാതുമർഹസി ॥23॥
ഇദം ച തീവ്രം മമ ശോകവേഗം
	രക്ഷോഭിരേഭിഃ പരിഭർത്സനം ച ।
ബ്രൂയാസ്തു രാമസ്യ ഗതഃ സമീപം
	ശിവശ്ച തേഽധ്വാഽസ്തു ഹരിപ്രവീര ॥24॥
സ രാജപുത്ര്യാ പ്രതിവേദിതാർഥഃ
	കപിഃ കൃതാർഥഃ പരിഹൃഷ്ടചേതാഃ।
തദല്പശേഷം പ്രസമീക്ഷ്യ കാര്യം
	ദിശം ഹ്യുദീചീം മനസാ ജഗാമ ॥25॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ചത്വാരിംശഃ സർഗഃ