അഥ ത്രിചത്വാരിംശഃ സർഗഃ
തതഃ സ കിങ്കരാൻ ഹത്വാ ഹനൂമാൻ ധ്യാനമാസ്ഥിതഃ।
വനം ഭഗ്നം മയാ ചൈത്യപ്രാസാദോ ന വിനാശിതഃ॥1॥
തസ്മാത്പ്രാസാദമദ്യൈവമിമം വിധ്വംസയാമ്യഹം ।
ഇതി സഞ്ചിന്ത്യ ഹനുമാന്മനസാദർശയൻ ബലം ॥2॥
ചൈത്യപ്രാസാദമുത്പ്ലുത്യ മേരുശൃംഗമിവോന്നതം ।
ആരുരോഹ ഹരിശ്രേഷ്ഠോ ഹനൂമാന്മാരുതാത്മജഃ॥3॥
ആരുഹ്യ ഗിരിസങ്കാശം പ്രാസാദം ഹരിയൂഥപഃ।
ബഭൗ സ സുമഹാതേജാഃ പ്രതിസൂര്യ ഇവോദിതഃ॥4॥
സമ്പ്രധൃഷ്യ തു ദുർധർഷശ്ചൈത്യപ്രാസാദമുന്നതം ।
ഹനൂമാൻപ്രജ്വലഁല്ലക്ഷ്മ്യാ പാരിയാത്രോപമോഽഭവത് ॥5॥
സ ഭൂത്വാ സുമഹാകായഃ പ്രഭാവാൻ മാരുതാത്മജഃ।
ധൃഷ്ടമാസ്ഫോടയാമാസ ലങ്കാം ശബ്ദേന പൂരയൻ ॥6॥
തസ്യാസ്ഫോടിതശബ്ദേന മഹതാ ശ്രോത്രഘാതിനാ ।
പേതുർവിഹംഗമാസ്തത്ര ചൈത്യപാലാശ്ച മോഹിതാഃ॥7॥
അസ്ത്രവിജ്ജയതാം രാമോ ലക്ഷ്മണശ്ച മഹാബലഃ।
രാജാ ജയതി സുഗ്രീവോ രാഘവേണാഭിപാലിതഃ॥8॥
ദാസോഽഹം കോസലേന്ദ്രസ്യ രാമസ്യാക്ലിഷ്ടകർമണഃ।
ഹനുമാഞ്ശത്രുസൈന്യാനാം നിഹന്താ മാരുതാത്മജഃ॥9॥
ന രാവണസഹസ്രം മേ യുദ്ധേ പ്രതിബലം ഭവേത് ।
ശിലാഭിസ്തു പ്രഹരതഃ പാദപൈശ്ച സഹസ്രശഃ॥10॥
അർദയിത്വാ പുരീം ലങ്കാമഭിവാദ്യ ച മൈഥിലീം ।
സമൃദ്ധാർഥോ ഗമിഷ്യാമി മിഷതാം സർവരക്ഷസാം ॥11॥
ഏവമുക്ത്വാ മഹാകായശ്ചൈത്യസ്ഥോ ഹരിയൂഥപഃ।
നനാദ ഭീമനിർഹ്രാദോ രക്ഷസാം ജനയൻഭയം ॥12॥
തേന നാദേന മഹതാ ചൈത്യപാലാഃ ശതം യയുഃ।
ഗൃഹീത്വാ വിവിധാനസ്ത്രാൻപ്രാസാൻഖഡ്ഗാൻപരശ്വധാൻ ॥13॥
വിസൃജന്തോ മഹാകായാ മാരുതിം പര്യവാരയൻ ।
തേ ഗദാഭിർവിചിത്രാഭിഃ പരിഘൈഃ കാഞ്ചനാംഗദൈഃ॥14॥
ആജഗ്മുർവാനരശ്രേഷ്ഠം ബാണൈശ്ചാദിത്യസന്നിഭൈഃ।
ആവർത ഇവ ഗംഗായാസ്തോയസ്യ വിപുലോ മഹാൻ ॥15॥
പരിക്ഷിപ്യ ഹരിശ്രേഷ്ഠം സ ബഭൗ രക്ഷസാം ഗണഃ।
തതോ വാതാത്മജഃ ക്രുദ്ധോ ഭീമരൂപം സമാസ്ഥിതഃ॥16॥
പ്രാസാദസ്യ മഹാംസ്തസ്യ സ്തംഭം ഹേമപരിഷ്കൃതം ।
ഉത്പാടയിത്വാ വേഗേന ഹനൂമാന്മാരുതാത്മജഃ॥17॥
തതസ്തം ഭ്രാമയാമാസ ശതധാരം മഹാബലഃ।
തത്ര ചാഗ്നിസ്സമഭവത്പ്രാസാദശ്ചാപ്യദഹ്യത ॥18॥
ദഹ്യമാനം തതോ ദൃഷ്ട്വാ പ്രാസാദം ഹരിയൂഥപഃ।
സ രാക്ഷസശതം ഹത്വാ വജ്രേണേന്ദ്ര ഇവാസുരാൻ ॥19॥
അന്തരിക്ഷസ്ഥിതഃ ശ്രീമാനിദം വചനമബ്രവീത് ।
മാദൃശാനാം സഹസ്രാണി വിസൃഷ്ടാനി മഹാത്മനാം ॥20॥
ബലിനാം വാനരേന്ദ്രാണാം സുഗ്രീവവശവർതിനാം ।
അടന്തി വസുധാം കൃത്സ്നാം വയമന്യേ ച വാനരാഃ॥21॥
ദശനാഗബലാഃ കേചിത്കേചിദ്ദശഗുണോത്തരാഃ।
കേചിന്നാഗസഹസ്രസ്യ ബഭൂവുസ്തുല്യവിക്രമാഃ॥22॥
സന്തി ചൗഘബലാഃ കേചിത് സന്തി വായുബലോപമാഃ।
അപ്രമേയബലാഃ കേചിത് തത്രാസൻഹരിയൂഥപാഃ॥23॥
ഈദൃഗ്വിധൈസ്തു ഹരിഭിർവൃതോ ദന്തനഖായുധൈഃ।
ശതൈഃ ശതസഹസ്രൈശ്ച കോടീഭിശ്ചായുതൈരപി ॥24॥
ആഗമിഷ്യതി സുഗ്രീവഃ സർവേഷാം വോ നിഷൂദനഃ।
നേയമസ്തി പുരീ ലങ്കാ ന യൂയം ന ച രാവണഃ।
യസ്യ ത്വിക്ഷ്വാകുവീരേണ ബദ്ധം വൈരം മഹാത്മനാ ॥25॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ത്രിചത്വാരിംശഃ സർഗഃ