അഥ ചതുശ്ചത്വാരിംശഃ സർഗഃ
സന്ദിഷ്ടോ രാക്ഷസേന്ദ്രേണ പ്രഹസ്തസ്യ സുതോ ബലീ ।
ജംബുമാലീ മഹാദംഷ്ട്രോ നിർജഗാമ ധനുർധരഃ॥1॥
രക്തമാല്യാംബരധരഃ സ്രഗ്വീ രുചിരകുണ്ഡലഃ।
മഹാന്വിവൃത്തനയനശ്ചണ്ഡഃ സമരദുർജയഃ॥2॥
ധനുഃ ശക്രധനുഃ പ്രഖ്യം മഹദ് രുചിരസായകം ।
വിസ്ഫാരയാണോ വേഗേന വജ്രാശനിസമസ്വനം ॥3॥
തസ്യ വിസ്ഫാരഘോഷേണ ധനുഷോ മഹതാ ദിശഃ।
പ്രദിശശ്ച നഭശ്ചൈവ സഹസാ സമപൂര്യത ॥4॥
രഥേന ഖരയുക്തേന തമാഗതമുദീക്ഷ്യ സഃ।
ഹനൂമാന്വേഗസമ്പന്നോ ജഹർഷ ച നനാദ ച ॥5॥
തം തോരണവിടങ്കസ്ഥം ഹനൂമന്തം മഹാകപിം ।
ജംബുമാലീ മഹാതേജാ വിവ്യാധ നിശിതൈഃ ശരൈഃ॥6॥
അർധചന്ദ്രേണ വദനേ ശിരസ്യേകേന കർണിനാ ।
ബാഹ്വോർവിവ്യാധ നാരാചൈർദശഭിസ്തു കപീശ്വരം ॥7॥
തസ്യ തച്ഛുശുഭേ താമ്രം ശരേണാഭിഹതം മുഖം ।
ശരദീവാംബുജം ഫുല്ലം വിദ്ധം ഭാസ്കരരശ്മിനാ ॥8॥
തത്തസ്യ രക്തം രക്തേന രഞ്ജിതം ശുശുഭേ മുഖം ।
യഥാഽഽകാശേ മഹാപദ്മം സിക്തം കാഞ്ചനബിന്ദുഭിഃ॥9॥
ചുകോപ ബാണാഭിഹതോ രാക്ഷസസ്യ മഹാകപിഃ।
തതഃ പാർശ്വേഽതിവിപുലാം ദദർശ മഹതീം ശിലാം ॥10॥
തരസാ താം സമുത്പാട്യ ചിക്ഷേപ ജവവദ് ബലീ ।
താം ശരൈർദശഭിഃ ക്രുദ്ധസ്താഡയാമാസ രാക്ഷസഃ॥11॥
വിപന്നം കർമ തദ്ദൃഷ്ട്വാ ഹനൂമാംശ്ചണ്ഡവിക്രമഃ।
സാലം വിപുലമുത്പാട്യ ഭ്രാമയാമാസ വീര്യവാൻ ॥12॥
ഭ്രാമയന്തം കപിം ദൃഷ്ട്വാ സാലവൃക്ഷം മഹാബലം ।
ചിക്ഷേപ സുബഹൂൻബാണാഞ്ജംബുമാലീ മഹാബലഃ॥13॥
സാലം ചതുർഭിശ്ചിച്ഛേദ വാനരം പഞ്ചഭിർഭുജേ ।
ഉരസ്യേകേന ബാണേന ദശഭിസ്തു സ്തനാന്തരേ ॥14॥
സ ശരൈഃ പൂരിതതനുഃ ക്രോധേന മഹതാ വൃതഃ।
തമേവ പരിഘം ഗൃഹ്യ ഭ്രാമയാമാസ വേഗിതഃ॥15॥
അതിവേഗോഽതിവേഗേന ഭ്രാമയിത്വാ ബലോത്കടഃ।
പരിഘം പാതയാമാസ ജംബുമാലേർമഹോരസി ॥16॥
തസ്യ ചൈവ ശിരോ നാസ്തി ന ബാഹൂ ജാനുനീ ന ച ।
ന ധനുർന രഥോ നാശ്വാസ്തത്രാദൃശ്യന്ത നേഷവഃ॥17॥
സ ഹതസ്തരസാ തേന ജംബുമാലീ മഹാരഥഃ।
പപാത നിഹതോ ഭൂമൗ ചൂർണിതാംഗ ഇവ ദ്രുമഃ॥18॥
ജംബുമാലിം സുനിഹതം കിങ്കരാംശ്ച മഹാബലാൻ ।
ചുക്രോധ രാവണഃ ശ്രുത്വാ ക്രോധസംരക്തലോചനഃ॥19॥
സ രോഷസംവർതിതതാമ്രലോചനഃ
	പ്രഹസ്തപുത്രേ നിഹതേ മഹാബലേ ।
അമാത്യപുത്രാനതിവീര്യവിക്രമാൻ
	സമാദിദേശാശു നിശാചരേശ്വരഃ॥20॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ചതുശ്ചത്വാരിംശഃ സർഗഃ