അഥ പഞ്ചചത്വാരിംശഃ സർഗഃ
തതസ്തേ രാക്ഷസേന്ദ്രേണ ചോദിതാ മന്ത്രിണഃ സുതാഃ।
നിര്യയുർഭവനാത്തസ്മാത്സപ്ത സപ്താർചിവർചസഃ॥1॥
മഹദ്ബലപരീവാരാ ധനുഷ്മന്തോ മഹാബലാഃ।
കൃതാസ്ത്രാസ്ത്രവിദാം ശ്രേഷ്ഠാഃ പരസ്പരജയൈഷിണഃ॥2॥
ഹേമജാലപരിക്ഷിപ്തൈർധ്വജവദ്ഭിഃ പതാകിഭിഃ।
തോയദസ്വനനിർഘോഷൈർവാജിയുക്തൈർമഹാരഥൈഃ॥3॥
തപ്തകാഞ്ചനചിത്രാണി ചാപാന്യമിതവിക്രമാഃ।
വിസ്ഫാരയന്തഃ സംഹൃഷ്ടാസ്തഡിദ്വന്ത ഇവാംബുദാഃ॥4॥
ജനന്യസ്താസ്തതസ്തേഷാം വിദിത്വാ കിങ്കരാൻഹതാൻ ।
ബഭൂവുഃ ശോകസംഭ്രാന്താഃ സബാന്ധവസുഹൃജ്ജനാഃ॥5॥
തേ പരസ്പരസംഘർഷാത് തപ്തകാഞ്ചനഭൂഷണാഃ।
അഭിപേതുർഹനൂമന്തം തോരണസ്ഥമവസ്ഥിതം ॥6॥
സൃജന്തോ ബാണവൃഷ്ടിം തേ രഥഗർജിതനിഃസ്വനാഃ।
പ്രാവൃട്കാല ഇവാംഭോദാ വിചേരുർനൈരൃതാംബുദാഃ॥7॥
അവകീർണസ്തതസ്താഭിർഹനൂമാഞ്ശരവൃഷ്ടിഭിഃ।
അഭവത്സംവൃതാകാരഃ ശൈലരാഡിവ വൃഷ്ടിഭിഃ॥8॥
സ ശരാന്വഞ്ചയാമാസ തേഷാമാശുചരഃ കപിഃ।
രഥവേഗാംശ്ച വീരാണാം വിചരന്വിമലേഽമ്ബരേ ॥9॥
സ തൈഃ ക്രീഡന്ധനുഷ്മദ്ഭിർവ്യോമ്നി വീരഃ പ്രകാശതേ ।
ധനുഷ്മദ്ഭിര്യഥാ മേഘൈർമാരുതഃ പ്രഭുരംബരേ ॥10॥
സ കൃത്വാ നിനദം ഘോരം ത്രാസയംസ്താം മഹാചമൂം ।
ചകാര ഹനുമാന്വേഗം തേഷു രക്ഷഃസു വീര്യവാൻ ॥11॥
തലേനാഭിഹനത്കാംശ്ചിത്പാദൈഃ കാംശ്ചിത്പരന്തപഃ।
മുഷ്ടിഭിശ്ചാഹനത്കാംശ്ചിന്നഖൈഃ കാംശ്ചിദ്വ്യദാരയത് ॥12॥
പ്രമമാഥോരസാ കാംശ്ചിദൂരുഭ്യാമപരാനപി।
കേചിത് തസ്യൈവ നാദേന തത്രൈവ പതിതാ ഭുവി ॥13॥
തതസ്തേഷ്വവപന്നേഷു ഭൂമൗ നിപതിതേഷു ച ।
തത്സൈന്യമഗമത്സർവം ദിശോ ദശ ഭയാർദിതം ॥14॥
വിനേദുർവിസ്വരം നാഗാ നിപേതുർഭുവി വാജിനഃ।
ഭഗ്നനീഡധ്വജച്ഛത്രൈർഭൂശ്ച കീർണാഭവദ്രഥൈഃ॥15॥
സ്രവതാ രുധിരേണാഥ സ്രവന്ത്യോ ദർശിതാഃ പഥി ।
വിവിധൈശ്ച സ്വനൈർലങ്കാ നനാദ വികൃതം തദാ ॥16॥
സ താൻപ്രവൃദ്ധാന്വിനിഹത്യ രാക്ഷസാൻ
	മഹാബലശ്ചണ്ഡപരാക്രമഃ കപിഃ।
യുയുത്സുരന്യൈഃ പുനരേവ രാക്ഷസൈ-
	സ്തദേവ വീരോഽഭിജഗാമ തോരണം ॥17॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ പഞ്ചചത്വാരിംശഃ സർഗഃ